Ang Paril sa Jerico

UNSA may nakapahinabo ning mga parila sa Jerico nga nalumpag? Maorag ang usa ka dakong bomba ang miigo kanila. Apan niadtong mga adlawa wala sila makabaton sa mga bomba. Kini maoy laing milagro ni Jehova. Tun-an ta sa unsang paagi kini nahitabo.

Si Jehova misulti kang Josue: ‘Ikaw ug ang imong manggugubat nga mga tawo momartsa palibot sa siyudad kausa sa matag adlaw sulod sa unom ka adlaw. Dad-a ang arka sa tugon uban kaninyo. Ang pito ka saserdote kinahanglang maglakaw nga una niini ug magpatingog sa ilang mga trompeta.

‘Sa ikapitong adlaw, pagmartsa libot sa siyudad sa pito ka higayon. Unya ipatuy-aw ang usa ka hataas tunog sa mga trompeta. Ang tanan pasinggita sa makusog. Ug ang paril magun-ob nga hapla.’

Si Josue ug ang katawhan mibuhat sumala sa gisulti ni Jehova. Ang mga kaaway sa katawhan sa Diyos sa Jerico lagmit nangahadlok na sa pagtan-aw kanilang nagmartsa. Nakita mo ba ang pulang pisi nga nagbitay sa bentana? Kang kinsang bentana kana? Oo, si Rahab nagbuhat sumala sa gisulti sa duha ka espiya nga iyang buhaton.

Sa kataposan, sa ikapitong adlaw, ang mga paril nagun-ob nga hapla sumala sa gisulti ni Jehova. Si Josue miingon: ‘Patya ang tanan sulod sa siyudad ug sunoga ang tanang butang. Ibilin lamang ang salapi, bulawan, tumbaga ug puthaw, ug ihatag sila sa tipiganan sa bahandi sa tolda ni Jehova.’

Si Josue nagsugo sa duha ka espiya sa pag-adto ug pagpagawas kang Rahab ug sa iyang pamilya sa iyang balay. Siya ug ang iyang pamilya naluwas, sumala gayod sa gisaad sa mga espiya kaniya.