Ang Adlaw Miurong

TAN-AWA si Josue. Nag-ingon siya: ‘Adlaw, urong!’ Ug ang adlaw miurong sa tibuok adlaw. Si Jehova ang nagpahinabo niini! Apan tan-awon ta ngano si Josue gustong ang adlaw magpadayon sa paghayag.

Sa dihang ang lima ka daotang hari misugod sa pakiggubat kanila, ang mga Gabaonhon nagsugo ug usa ka tawo kang Josue sa pagpangayo sa panabang. Diha dayon, si Josue ug ang tanan niyang manggugubat nga mga tawo nangadto. Sa tibuok gabii sila nagmartsa. Sa dihang sila nahiabot sa Gabaon ang mga sundalo sa lima ka hari misugod sa pagpangalagiw. Unya si Jehova nagpahinabo nga mangahulog gikan sa langit ang dagkong batong-yelo, ug dugang mga sundalo ang namatay gumikan sa pagkaigo sa batong-yelo kay sa napatay sa manggugubat nga mga tawo ni Josue.

Nakita ni Josue nga hapit nang mosalop ang adlaw. Inig ngitngit, daghan sa kaaway nga mga sundalo makakalagiw. Mao kanay hinungdan nga mihangyo siya kang Jehova sa pagpaurong sa adlaw. Unya ang mga Israelita magmadaogon sa gubat nga hayag pa.

Sa kinatibuk-an may 31 ka daotang hari sa Canaan ang nagdumot sa katawhan sa Diyos. Migugol si Josue ug ang iyang kasundalohan dul-an sa unom ka tuig sa pagbuntog kanila. Unya, si Josue naghikay nga ang yuta mapahatpahat niadtong mga tribo nga sa gihapon nagkinahanglan ug teritoryo.

Human sa daghang tuig, si Josue namatay nga 110 anyos ang panuigon. Samtang siya ug ang iyang mga higala buhi pa, ang katawhan nagsugot sa Diyos. Apan sa dihang kining maayong mga tawo nangamatay, ang katawhan misugod sa pagbuhat sa daotang mga butang ug nahisugamak sa kasamok. Unya sila nagkinahanglan gayod sa tabang sa Diyos.