Ang Diyos Mipili Kang David

NAKITA mo ba unsay nahitabo? Ang batang lalaki nagluwas niining gamayng kordero gikan sa oso. Ang oso buot motukob sa kordero, apan ang batang lalaki miluwas niini. Ug unya ang batang lalaki mibunal sa oso hangtod namatay! Sa laing panahon siya nagluwas sa usa ka karnero gikan sa usa ka leyon. Dili ba siya usa ka maisog batang lalaki? Nahibalo ba ikaw kinsa siya?

Kini mao ang batan-ong si David. Nagpuyo siya sa Betlehem. Ang iyang apohang lalaki mao si Obed, ang anak ni Ruth ug Booz. Nahinumdom ba ikaw kanila? Ug ang amahan ni David mao si Isai. Si David nag-atiman sa mga karnero sa iyang amahan. Siya natawo 10 ka tuig human si Jehova nagpili kang Saul sa pagkahari.

Ang panahon miabot nga si Jehova misulti kang Samuel: ‘Pagkuhag pipila ka espesyal nga lana ug umadto sa balay ni Isai sa Betlehem. Akong napili ang usa sa iyang mga anak lalaki nga himoong hari.’ Sa dihang nakita ni Samuel ang kinamagulangang anak ni Isai nga si Eliab, nakaingon siya sa iyang kaugalingon: ‘Kini seguradong mao ang usa nga gipili ni Jehova.’ Apan si Jehova misulti kaniya: ‘Ayaw pagtan-aw sa gitas-on ug sa iyang kaambongan. Wala ako magpili kaniya sa pagkahari.’

Busa si Isai nagtawag sa iyang anak lalaki si Abinadab, apan si Jehova wala magpili kaniya. Sunod gidala ni Isai ang iyang anak lalaki si Samma, apan si Jehova wala magpili gihapon kaniya. Si Isai nagdala sa pito niya ka anak lalaki kang Samuel, apan si Jehova walay gipili bisan usa kanila.

Sa kataposan ilang gipaanha si David, kinsa mao ang kinamanghoran. Nakita ni Samuel nga siya guwapong pagkabata. ‘Kini mao na,’ matod ni Jehova. ‘Ibubo ang lana diha kaniya.’ Ug kini gibuhat ni Samuel. Busa moabot ang panahon nga si David mahimong hari sa Israel.