Kon Nganong si David Mikalagiw

TAPOS mapatay ni David si Goliat, nahimuot kaayo si Saul kaniya. Iyang gihimo si David nga pangulo sa iyang kasundalohan ug gikuha siya aron sa balay na sa Hari magpuyo.

Sa ulahi, sa nahiuli ang mga sundalo gikang nakig-away sa mga Pelistihanon, ang mga babaye mihatag labawng pasidungog kang David kay kang Saul. Kini nakapasina kang Saul. Apan ang anak lalaki ni Saul nga si Jonathan wala masina. Nahigugma siya kang David sa labihan gayod, ug si David nahigugma usab kang Jonathan. Ang duha nagsinaaray ang usag usa nga managhigala sila kanunay.

Si David maayo kaayong motugtog sa alpa, ug si Saul nakagusto sa pagpamati kaniyang magtugtog. Apan usa ka adlaw ang kasina ni Saul miawhag kaniya sa pagbuhat sa usa ka makalilisang butang. Samtang si David nagtugtog sa alpa, si Saul milabay sa iyang bangkaw kang David. Apan si David nakalihay ug ang bangkaw misipyat. Sa ulahi si Saul misipyat gihapon sa pagbangkaw kang David. Busa si David karon nahibalo nga kinahanglan siyang magmatngon pag-ayo.

Nahinumdom ba ikaw nga ang usang makapatay kang Goliat ginaingon nga makakuha sa anak babaye ni Saul ingon nga iyang asawa? Buweno, sa kataposan si Saul misulti kang David nga iyang maangkon ang iyang anak babaye si Michal, apan una kinahanglan siyang magpatay 100 ka kaaway nga Pelistihanon. Palandonga kana! Si Saul sa pagkatinuod naglaom nga ang mga Pelistihanon magpatay kang David. Apan sila wala makapatay, busa si Saul mihatag sa iyang anak babaye kang David aron maasawa ni David.

Usa ka adlaw si Saul misulti kang Jonathan ug sa tanan niyang mga ulipon sa iyang tinguha sa pagpatay kang David. Apan si Jonathan misanta: ‘Ayaw pagbuhata kana. Si David walay nabuhat bisan unsang sayop kanimo.’

Busa si Saul misaad nga dili magdaot kang David. Si David gipabalik, ug mialagad na usab kang Saul diha sa iyang balay. Bisan pa, usa ka adlaw niana, si Saul milabay na pod sa iyang bangkaw kang David. Si David milihay ug ang bangkaw misipyat. Kini maoy ikatulong higayon! Si David mipauli sa iya mismong balay. Apan si Saul mipadalag mga tawo aron sa pagpatay kaniya. Si Michal nahibalo sa giplano sa iyang amahan nga buhaton, ug siya mitabang kang David sa pag-ikyas. Dul-an sa pito ka tuig, si David angay magtago sa usa ka dapit ngadto sa lain, aron si Saul dili makakaplag kaniya.