Ang Diyos Mitabang Kang Haring Ezechias

NGANO man kining tawhana nag-ampo kang Jehova? Unsa man kanang mga sulata nga iyang gihikyad sa atubangan sa altar ni Jehova? Ang tawo mao si Ezechias. Siya mao ang hari sa habagatan duha ka tribo sa Israel. Ug siya anaa sa usa ka dakong kasamok.

Ang Asirianhong mga kasundalohan nakalaglag na sa amihanang 10 ka tribo. Gitugotan kini ni Jehova nga mahitabotungod kay kadtong mga tawhana maoy daotan kaayo. Karon ang Asirianhong mga kasundalohan misulong sa pakig-away batok sa duha-tribong gingharian.

Ang hari sa Asiria dili pa lang dugay nga nagpadala ug mga sulat kang Hari Ezechias. Ang mga sulat nagbiaybiay kang Jehova, ug nagmando kang Ezechias sa pagsurender. Mao kining mga sulata nga gibutang ni Ezechias sa atubangan sa altar ni Jehova. Si Ezechias nag-ampo: ‘O Jehova, luwasa kami gikan sa hari sa Asiria. Unya ang tanang mga nasod mahibalo nga ikaw lamang ang Diyos.’ Mamati ba si Jehova kang Ezechias?

Si Ezechias usa ka maayong hari. Siya mabinantayong nagsugot sa tanang mga balaod ni Jehova. Busa, tapos si Ezechias makahuman sa pag-ampo, ang manalagnang si Isaias nagpadala kaniya ning mensahe gikan kang Jehova: ‘Ang hari sa Asiria dili mosulong sa Jerusalem. Ang iyang mga sundalo dili gani makahimo sa pagtiro sa usa ka gapasan sa siyudad.’

Tan-awa ang hulagway ning panira. Ang patayng mga sundalo mao ang mga Asirianhon. Si Jehova nagpadala sa iyang manulunda, ug usa ka gabii, ang manulunda mipatay 185,000 ka Asirianhong mga sundalo. Busa ang hari sa Asiria milunga ug mipauli.

Ang duha-tribong gingharian naluwas, ug may kadiyut nga kalinaw. Apan human si Ezechias mamatay, ang sunod duha ka hari daotan kaayo ug ang yuta napuno sa kadaotan. Unya si Josias ang apo-sa-tuhod ni Ezechias, nahimong hari.