Si Jesus Gipatay

TAN-AWA ang teribleng butang nga naagoman! Si Jesus gipatay. Ilang gibitay siya sa usa ka estaka. Mga lansang gipalagbas sa iyang mga kamot ug mga tiil. Ngano mang may gustong mobuhat niini?

Kini maoy tungod sa pila ka persona nga nagdumot kang Jesus. Ang usa kanila mao ang daotang manulunda si Satanas nga Yawa. Siya mao ang nagpahinabo sa mga kaaway ni Jesus sa pagbuhat ning makalilisang salaod.

Bisan una pa sa paglansang kang Jesus dinhi sa estaka, ang iyang mga kaaway nagbuhat na ug daotan kaniya. Nahinumdom ka ba sa unsang paagi ang relihiyosong mga pangulo miadto sa tanaman sa Getsemani ug nagdakop kaniya? Buweno, tan-awon ta unsay sunod nahitabo.

Sa gidala si Jesus, ang iyang mga apostol nangalagiw tungod kay nangahadlok sila. Apan si Pedro ug si Juan wala mopalayo. Misunod sila sa pagtan-aw kon unsay mahitabo kang Jesus.

Ang mga saserdote nagdala kang Jesus ngadto sa tigulang tawo si Anas, kinsa mao ang kanhi hataas nga saserdote. Ang panon wala moestar dinhi ug dugay. Unya ilang gidala si Jesus ngadto sa balay ni Caipas, kinsa mao karon ang hataas nga saserdote. Daghang relihiyosong pangulo nagkapundok sa iyang balay.

Dinhi ilang gihimo ang usa ka husay. Ang katawhan nagsugilog mga bakak mahitungod kang Jesus. Ang relihiyosong mga pangulo tanan nanulti: ‘Si Jesus kinahanglan mamatay.’ Unya ilang gilud-an ang iyang nawong, nagsumbag kaniya pinaagi sa ilang mga kumo.

Samtang kini nagpadayon, si Pedro anaa sa gawas sa nataran. Usa ka ulipong babaye mitan-aw kang Pedro, ug miingon: ‘Kining tawhana uban usab kang Jesus.’

‘Dili, dili ako kauban,’ mitubag si Pedro.

Tulo ka higayon ang katawhan nagsulti kang Pedro nga siya kauban ni Jesus, ug matag higayon si Pedro namalibad nga dili tinuod. Sa ikatulong higayon nga si Pedro misulti niini, si Jesus milingi ug mitan-aw kaniya. Si Pedro mibatig labihang kasubo nga nakasulti niining mga bakaka, ug mipahilayo siya ug mibakho.

Sa pagsidlak sa adlaw sa Biyernes sa buntag, ang mga saserdote nagdala kang Jesus sa ilang dakong tigomanang dapit, ang hawanan sa Sanhedrin. Dinhi sila nagsultihanay unsay ilang buhaton kaniya. Ilang gidala siya ngadto kang Pilato, ang magmamando sa distrito sa Judea.

Gisultihan nila si Pilato nga si Jesus kinahanglang patyon. Apan si Pilato misulti kanila: ‘Wala akoy nakita nga may nabuhat siyang bisan unsang sala. Unya si Pilato nagpadala kang Jesus ngadto kang Herodes Antipas. Si Herodes mao ang magmamando sa Galilea, apan nag-estar siya sa Jerusalem. Si Herodes wala usay nakitang sala nga nahimo ni Jesus, busa iyang gipadala siya balik kang Pilato.

Buot ni Pilato nga buhian si Jesus. Apan gusto sa mga kaaway ni Jesus ang usa ka kawatan ginganlan Barrabas ang buhian hinuon. Karon duol nang kaudtohon. Si Pilato nagdala kang Jesus sa gawas ug miingon: ‘Tan-awa! Ang inyong hari!’ Apan ang pangulong mga saserdote misinggit: ‘Ipahilayo siya! Patya siya!’ Busa ilang gidala si Jesus aron patyon.

Sayo sa palis sa Biyernes si Jesus gilansang sa usa ka estaka. Sa matag kilid ni Jesus may kriminal usab pagapatyon sa estaka. Dili ka makakita kanila sa hulagway. Sa hapit na gayod si Jesus patyon, usa sa mga kriminal miingon ngadto kaniya: ‘Hinumdomi ako kon ikaw atua na sa imong gingharian.’ Si Jesus mitubag: ‘Ako mosaad kanimo nga ikaw makauban kanako sa paraiso.’

Dili ba kana usa ka kahibulongang saad? Sa dihang si Jesus magmando ingon nga hari sa langit, iyang buhion pag-usab kining tawhana aron makapahimulos sa bag-ong paraiso sa yuta. Dili ba kita malipay bahin niana?