Naghulat sa Jerusalem

Kining mga tawo dinhi mga sumusunod ni Jesus. Sila miestar sa Jerusalem, sumala sa gisulti ni Jesus. Karon, samtang silang tanan naghulat, usa ka kusog nga dahunog mipuno sa balay. Kini sama sa huros sa kusog nga hangin. Unya, mga dila sa kalayo mipakita ibabaw sa mga ulo sa mga tinun-an. Nakakita ka ba kanila? Unsa may ipasabot ning tanan?

Kini usa ka milagro! Si Jesus mibalik sa langit, ug nagbubo sa balaang espiritu sa Diyos sa iyang mga sumusunod. Nahibalo ka ba unsay ipahinabo sa espiritu nga mabuhat nila? Silang tanan nagsugod sa pagsulti sa nagkalainlaing mga pinulongan!

Daghang katawhan sa Jerusalem nakabati sa kagahob, ug mitan-aw unsay nahitabo. Ang pipila kanila gikan sa ubang mga nasod. Pagkadakong katingala nila! Ilang nabati ang mga tinun-an nagsulti sa ilang kaugalingong pinulongan, ug nagsulti sa kahibulongang mga butang gihimo sa Diyos.

Ang mga bisita nahibulong sa unsang paagi ang mga tawong gikan sa Galilea makahimo sa pagsulti sa daghan kaayong nagkalainlaing mga pinulongan. Busa si Pedro mibarog sa pagsaysay kanila. Siya nagsulti sa katawhan giunsa si Jesus sa pagpatay, ug nga si Jehova nagbanhaw kaniya gikan sa mga patay. ‘Karon si Jesus atua sa langit sa tuong kamot sa Diyos,’ nag-ingon si Pedro. ‘Ug siya nagbubo sa gisaad balaang espiritu. Kanay hinungdan nganong nakakita ug nakadungog kamo niining mga milagroha.’

Buweno, sa dihang si Pedro nagsulti niining butanga, daghang katawhan mibati sa kaguol mahitungod sa nabuhat ngadto kang Jesus. ‘Unsay angay namong buhaton?’ sila nangutana. Si Pedro mitug-an kanila: ‘Kinahanglan mag-usab kamo sa inyong kinabuhi ug magpabawtismo.’ Nianang adlawa, dul-an sa 3,000 ka tawo ang nabawtismohan ug nahimong mga sumusunod ni Jesus.