Usa ka Bag-ong Paraiso sa Yuta

TAN-AWA kanang tag-as nga mga kahoy, maanindot nga mga bulak ug tag-as nga mga bukid. Tan-awa ang binaw nga nagkaon diha sa kamot sa usa ka gamayng batang lalaki. Ug tan-awa ang mga leyon ug ang mga kabayo nga nahimutang didto sa kabalilihan. Dili ba ikaw gusto magpuyo sa usa ka dapit nga sama niini?

Gusto sa Diyos nga magpuyo ka sa walay kataposan sa yuta nga usa ka paraiso. Kini mao ang saad sa Bibliya niadtong kinsa mopuyo sa usa ka bag-ong paraiso: ‘Ang Diyos uban kanila. Wala nay kamatayon o paghilak o kasakit. Ang kanhing mga butang nangagi na.’

Si Jesus maneguro nga kining kahibulongang kausaban mahitabo. Nahibalo ka ba kon kanus-a? Oo, human siya makahinlo sa yuta sa tanang kadaotan ug sa daotang katawhan. Nahinumdom ka ba kon giunsa ni Jesus pag-ayo ang katawhan ug bisan gani sa pagbuhi sa mga patay sa dinhi pa siya sa yuta? Iyang gihimo kini sa pagpakita sa iyang buhaton sa tibuok yuta sa ma-Hari siya sa gingharian sa Diyos.

Dili ba pagkamaanindot ang pagpuyo ning bag-ong paraiso sa yuta? Si Jesus, kauban sa pipila nga iyang gipili, magamando sa langit. Kini sila magapaigo nga ang tanan sa yuta magmalipayon. Tan-awon ta kon unsa ang atong kinahanglang buhaton aron ang Diyos magtugot nga magpuyo ta sa bag-ong paraiso.