Kapitulo 23

Isilsil sa Hunahuna ang Adlaw ni Jehova

1. (a) Sa dihang unang nakat-onan mo nga ang kaluwasan gikan sa mga kasakit niining daang sistema haduol na, unsa ang imong pagsanong? (b) Unsang mga pangutana maylabot niini nga sa tininuod atong pagatagdon?

SA WALAY DUHADUHA ang usa sa unang mga butang nga imong nakat-onan gikan sa pagtuon sa Bibliya mao nga ang kaluwasan gikan sa mga kasakit sa kinabuhi sa presenteng sistema sa mga butang maoy haduol na. (Luc. 21:28) Ikaw nakadangat sa pagkaamgo nga ang katuyoan sa Diyos mao ang paghimo sa tibuok nga yuta nga Paraiso. Ang salaod, gubat, sakit ug kamatayon mawala na, ug bisan ang minahal nga mga hinigugma mabuhi pag-usab. Pagkamakapasibot sa kasingkasing nga kalaoman! Ang pagkaduol na nianang tanan gipasiugda sa ebidensiya nga ang dili makitang presensiya ni Kristo ingong nagamandong Hari nagsugod sa 1914 K.P. ug sukad niadto kita nagapuyo na sa kataposang mga adlaw ning daotang kalibotan. Ang mao bang kahibalo nagpatunghag kausaban diha sa imong kinabuhi? Ang imo bang paagi sa kinabuhi nagapasundayag gayod sa hugot nga pagtuo nga ang “adlaw ni Jehova” haduol na?

2. (a) Kanus-a man moabot ang “adlaw ni Jehova”? (b) Sa unsang paagi napamatud-ang makaayo ang punto nga wala ibutyag ni Jehova ang “adlaw o ang takna”?

² Tin-aw nga nagpakita ang Kasulatan nga ang “kaliwatan” nga nakakita sa pagsugod sa presensiya ni Kristo makakita usab sa “dakong adlaw ni Jehova” nga niana iyang ipahamtang ang paghukom batok sa tanan nga nagabuhat sa pagkadaotan. (Mat. 24:34; Sof. 1:14–2:3) Kanang “kaliwatana” sa pagkakaron tigulang na sa edad. Apan ang Bibliya wala magpunting sa tinong petsa sa dihang si Jesu-Kristo moabot ingong berdugo ni Jehova batok sa yutan-ong sistema sa mga butang ni Satanas. “Mahitungod sa maong adlaw o takna walay nasayod, bisan pa ang mga manulonda sa langit ni ang Anak, kondili ang Amahan,” si Jesus miingon. (Mar. 13:32) Kini napamatud-an nga makaayo kaayo. Diha sa unsang paagi? Nakatabang kini sa pagpalugwa kon unsa ang anaa sa mga kasingkasing sa mga tawo. Kon may si bisan kinsa nga dili tinuod nahigugma kang Jehova, sila mahilig sa pag-oktaba sa iyang “adlaw” diha sa ilang mga hunahuna ug moliso ngadto sa kalibotanong mga pangagpas nga ang ilang kasingkasing nakiling. Uyonan ni Jehova ingong iyang mga alagad sila lamang kinsa tinuod nga nahigugma kaniya ug nagapakita niana pinaagig pag-alagad kaniyang tibuok-kalag, sa walay pag-isip kon kanus-a moabot ang kataposan sa daotang sistema. Ang pag-uyon sa Diyos ug sa iyang Anak dili alang kanilang mainit-init o maduhaduhaon.​—Pin. 3:16; Sal. 37:4; 1 Juan 5:3.

3. Unsa ang giingon ni Jesus ingong pahimangno alang kanato bahin niining butanga?

³ Ingong pahimangno sa mga mahigugmaon kang Jehova, si Jesus miingon: “Padayon sa pagbantay, pagtukaw kamo, kay wala kamo masayod sa panahon nga magakahitabo kini.” (Mar. 13:33-37) Siya nag-agda kanato nga dili tugotan ang pagkaon ug pag-inom o “mga kabalaka sa kinabuhi” sa paglinga sa atong dakong pagtagad nga ato nang masayloan ang pagkakuyaw sa atong panahon.​—Luc. 21:34-36; Mat. 24:37-42.

4. Ingon sa gipatin-aw ni Pedro, unsa ang ipadangat sa “adlaw ni Jehova”?

⁴ Sa ulahi, ang apostol nga si Pedro mitambag sa tanan nga adunay tinuod nga pagtuo sa ‘pagpaabot ug pagsilsil sa hunahuna sa presensiya sa adlaw ni Jehova, nga pinaagi niana ang mga langit mangasunog sa kalayo ug ang mga butang tungod sa hilabihang kainit mangatunaw.’ Ang pagkaduol na sa “adlaw ni Jehova” usa ka kamatuoran nga dili gayod pakamenoson ni bisan kinsa man kanato. Ang makitang mamandoong mga langit ug daotan tawhanong katilingban sa dili madugay pulihan na sa “bag-ong mga langit ug bag-ong yuta” nga hinimo sa Diyos, ug ang tanang “butang” nga giganoy sa presenteng kalibotanong sistema​—ang kinaugalingong tinamdan niana, ang daotan ug materyalistikanhong paagi sa kinabuhi niana​—taposon kining tanan diha sa malaglagong kainit sa “adlaw ni Jehova.” (2 Ped. 3:10-13) Gikinahanglan tang magmaigmat, nga nasayran nga kining makapalumpag-kalibotan nga mga hitabo mahimong mosugod sa bisan unsang panahon.​—Mat. 24:44.

Padayong Magmaalisto sa mga Hitabo nga Nagtuman sa Ilhanan

5. (a) Ngadto sa unsang gidak-on nga ang tubag ni Jesus ngadto sa pangutana nga natala sa Mateo 24:3 gipadapat ngadto sa kataposan sa Hudiyong sistema? (b) Unsang mga bahin sa iyang tubag nga nagpunting sa mga hitabo gikan sa 1914 K.P. padayon?

⁵ Ilabina tungod sa panahon nga kita nagapuyo, kinahanglan kitang sinati kaayo sa mga detalye sa linangkob nga ilhanan nga nagpaila sa “kataposang mga adlaw,” o ang “konklusiyon sa sistema sa mga butang.” Sa pagsabot nga husto sa maong ilhanan, kinahanglang hinumdoman ta nga sa dihang si Jesus mitubag sa pangutana sa iyang mga tinun-an ingon sa natala sa Mateo 24:3, ang pipila sa iyang gibungat napadapat sa kataposan sa Hudiyong sistema sa unang siglo, pero ang lintunganayng kapadapatan miabot nga saylo pa gayod niana. Ang iyang gihubit diha sa mga bersikulo 4 hangtod sa 22 sa gamayng-paagi natuman tali sa 33 ug 70 K.P. Pero ang tagna adunay dakong katumanan sa atong adlaw ug nagbutyag sa maong yugto sukad sa 1914 K.P. ingong ang panahon sa kang Kristo nga “presensiya ug ang konklusiyon sa sistema sa mga butang.” (Usab ang Marcos 13:5-20 ug Lucas 21:8-24) Ang Mateo 24:23-28 nagtug-an kanato sa nahitabo gikan sa 70 K.P. padayon ngadto sa panahon sa presensiya ni Kristo. (Usab ang Marcos 13:21-23) Mahitungod sa mga hitabo nga gibatbat gikan sa Mateo 24:29 hangtod sa kataposan sa kapitulo 25, kini nagpunting sa yugto sa panahon sukad sa 1914 K.P.​—Usab ang Marcos 13:24-37 ug Lucas 21:25-36.

6. (a) Ngano nga kita gayod sa personal magmaigmat kon sa unsang paagi ang mga hitabo karon nagtuman sa “ilhanan”? (b) Tubaga ang mga pangutana sa kataposan niining parapoha aron ipakita kon sa unsang paagi ang “ilhanan” natuman sukad sa 1914.

⁶ Kita kinahanglang sa personal mapaniiron sa karong mga hitabo nga nagatuman sa “ilhanan.” Ang atong paglangkit niining mga hitaboa ngadto sa tagna sa Bibliya motabang kanato sa padayong “pagsilsil sa hunahuna” sa adlaw ni Jehova. Kana usab magpaarang kanato nga mahimong makabigon sa dihang nagapasidaan sa uban sa pagkaduol na sa “adlaw sa panimalos sa bahin sa atong Diyos.” (Isa. 61:1, 2) Uban niining mga tumonga sa hunahuna, sublia ang mosunod nga mga bahin sa “ilhanan.”

Diha sa unsang talagsaong paagi nga natuman sukad sa 1914 K.P. ang gitagnang pagtindog sa ‘nasod batok nasod ug gingharian batok gingharian’? Unsay nahitabo sa dili pa dugayng mga bulan nga nagdugang sa katumanan?

Ngadto sa unsang gidak-on nga ang pagkakulang sa pagkaon nag-apektar sa yuta bisan pa sa siyentipikanhong kahibalo sa ika-20 nga siglo?

Aduna ba gayoy kalainan diha sa pagkasubsob sa mga linog nga nahitabo sa lainlaing dapit sukad sa 1914 K.P.?

Sa 1918 unsang kamatay ang miangkon sa dugang mga kinabuhi kay sa gubat sa kalibotan? Bisan pa sa medikal nga kahibalo, unsang mga sakit nga dagsang na kaayo?

Unsang ebidensiya ang imong nakita nga ang mga tawo gipanguyapan gayod tungod sa kahadlok, ingon sa gitagna sa Lucas 21:26?

Unsay magpakombensir kanimo nga ang mga kahimtang nga gihubit sa 2 Timoteo 3:1-5 dili kay ang naandan na nga paagi sa kinabuhi kondili kini nagakagrabe ngadto sa makapalisang nga kahimtang samtang kita nagapadulong sa kahumanan sa kataposang mga adlaw?

Katawhan Pagabulagbulagon

7. (a) Unsa ang laing hitabo, nga gihubit sa Mateo 13:36-43, nga gilambigit ni Jesus sa konklusiyon sa sistema sa mga butang? (b) Unsa ang kahulogan sa maong ilustrasyon?

⁷ Aduna usab ing laing hinungdanong mga hitabo nga gilangkit gayod ni Jesus sa konklusiyon sa sistema sa mga butang. Ang usa niini mao ang pagbulag sa “mga anak sa gingharian” gikan sa “mga anak sa usa nga daotan.” Naghisgot si Jesus niini diha sa iyang sambingay bahin sa trigong umahan nga gisapawan-pagsabod sa kaaway ug mga bunglayon. Ang “trigo” diha sa iyang ilustrasyon nagrepresentar sa matuod dinihogang mga Kristohanon. Ang “mga bunglayon” mao ang mini nga mga Kristohanon. Diha sa konklusiyon sa sistema sa mga butang ang “mga bunglayon”​—silang nagaangkong mga Kristohanon pero nagpamatuod sa ilang kaugalingon nga “mga anak sa usa nga daotan” kay sila nagatapot man sa kalibotan nga si Satanas mao ang magmamando​—ginabulag gikan sa “mga anak sa gingharian [sa Diyos]” ug gitiman-an alang sa kalaglagan. (Mat. 13:36-43) Kini ba nahitabo gayod?

8. (a) Human sa Gubat sa Kalibotan I, unsang dakong pagbulagbulag sa tanang nag-angkong mga Kristohanon ang nahitabo? (b) Giunsa sa pagpamatuod sa matuod dinihogang mga Kristohanon nga sila, sa tinuoray, ang “mga anak sa gingharian”?

⁸ Human sa Gubat sa Kalibotan I dihay, sa pagkamatuod, dakong pagbahinbahin sa tanang mga tawo kinsa nag-angkong mga Kristohanon ngadto sa duha ka matang: (1) Ang kaklerohan sa Kakristiyanohan ug ang ilang mga sumusunod, kinsa kusganong mipaluyo sa Liga sa mga Nasod (karon ang Nahiusang Kanasoran), samtang sa gihapon nagatapot sa ilang nasyonalismo. (2) Ang diyutay lang nga matuod dinihogang mga Kristohanon sa human-gubat nga panahon, kinsa sa bug-os midapig sa Mesiyanikong Gingharian sa Diyos. Pinaagig dayag nga pagsuportar sa mga gobyerno sa kalibotan ingong paagi sa pagkab-ot sa kalinaw ug kasegurohan, ang unang matang nagklaro nga sila dili ang matuod nga mga Kristohanon. (Juan 17:16) Sa kasukwahi, ang mga alagad ni Jehova hustong nagyagyag sa Liga sa mga Nasod ingon nga mao ang moderno-adlawng “dulumtanang butang nga nagapahinabog kalaglagan,” nga gipunting sa Mateo 24:15. Kay nagpakita sa ilang kaugalingon nga matuod nga “mga anak sa gingharian [sa Diyos],” sila miabaga sa pagsangyaw “niining maayong balita sa gingharian . . . sa tibuok pinuy-anang yuta.” (Mat. 24:14) Uban sa unsang mga resulta?

9. Unsa ang unang resulta ning maong buluhatong pagsangyaw sa Gingharian?

⁹ Una, dihay pagpanigom sa nanghibilin sa “mga pinili,” ang dinihogan-espiritu nga mga Kristohanon. Bisan tuod nakatag pag-ayo taliwala sa mga nasod, nga maorag ngadto sa “upat ka hangin,” ubos sa pagtultol sa mga anghel sila natigom ngadto sa organisasyonal nga panaghiusa.​—Mat. 24:31.

10. (a) Giunsa sa pagbuhat ang dugang buluhatong pagbulagbulag, ug uyon sa unsang tagna? (b) Ang katumanan niining mga tagnaa nagkahulogan ug unsa?

¹⁰ Unya, ingon sa gitagna ni Jesus, iyang gisugdan ang pagbulagbulag sa katawhan sa tanang kanasoran, “maingon sa usa ka magbalantay nga nagalain sa mga karnero gikan sa mga kanding.” Kining buluhatona, nga gidumala ni Kristo gikan sa iyang langitnong trono, nagapadayon hangtod gayod sa pagkakaron, ug ikaw sa personal naapektahan niana. Ang kadaghanan sa katawhan nagayubit sa Gingharian sa Diyos ug sa dinihogan-espiritu nga “mga anak” ug busa igatugyan ngadto sa “walay kataposang pagkaputol” diha sa kamatayon. Apan, ngadto sa uban ang Ginoo nagapaabot sa iyang pagdapit aron panundon ang yutan-ong hawanan sa iyang Gingharian, uban sa panglantaw sa kinabuhing walay kataposan. Ang maong samag karnero nga mga tawo nakig-anib sa ilang kaugalingon uban sa dinihogang “mga anak sa gingharian,” bisan tuod kini sila maoy mga tumong sa mabangis nga paglutos. (Mat. 25:31-46) Sa pagkamaunongon sila nagaabag kanila sa pagmantala sa hinungdanong mensahe sa Gingharian. Ang usa ka dakong panon sa katawhan nga mikabat ngadto sa mga menilyon nagapakig-ambit niining buluhatona. Ang balita sa Gingharian nagalanog na ngadto sa kinatumyan sa yuta. Unsa man ang kahulogan niining mga hitaboa? Nga kita haduol na kaayo sa pagtiklop sa “kataposang mga adlaw” ug nga ang “adlaw ni Jehova” haduol na.

Unsay Anaa sa Ugma-Damlag?

11. Aduna pa bay dugang buluhatong pagsangyaw nga pagahimoon sa dili pa moabot ang “adlaw ni Jehova”?

¹¹ Aduna pa ba gihapoy mga tagna nga pagatumanon sa dili pa mosugod ang dako ug makalilisang nga adlaw ni Jehova? Aduna! Ang pagbulagbulag sa mga tawo tungod sa isyu sa Gingharian nga wala pa mahuman. Sa pipila ka dapit diin ang hilabihang pagsupak naagoman sa katuigan, karon aduna na ing maayong ani sa bag-ong mga tinun-an. Ug bisan sa dapit nga ang mga tawo nagsalikway sa maayong balita, ang hustisya ug kaluoy ni Jehova nabayaw pinaagi sa atong paghatag ug pamatuod. Busa, padayon sa buluhaton! Si Jesus nagpasalig kanato nga, sa dihang mahuman na, “ang kataposan moabot.”​—Mat. 24:14.

12. (a) Ingon sa gipakita sa 1 Tesalonica 5:2, 3, unsang bililhon nga hitabo nga mahitabo pa? (b) Unsa man ang kahulogan niana alang kanato?

¹² Ang laing hinungdanon kaayong tagna sa Bibliya nagtagna: “Sa dihang sila magakanayon: ‘Kalinaw ug kasegurohan!’ unya ang kalit nga kalaglagan modangat dayon sa ibabaw kanila maingon gayod sa pagbati sa kasakit diha sa talianak nga babaye; ug sila dili gayod makaikyas.” (1 Tes. 5:2, 3) Kon unsang matanga kana sa pagsinggit ug “kalinaw ug kasegurohan” kana tan-awonon pa. Pero tino nga dili kana magkahulogan nga ang mga lider sa kalibotan sa tininuod makasulbad sa mga suliran sa katawhan. Silang “nagasilsil sa hunahuna” sa adlaw ni Jehova dili mapasalaag pinaagi nianang maong proklamasyon. Sila nasayod nga, nga dihadiha pagkahuman niana, ang “kalit nga kalaglagan” mahitabo.

13. Unsang mga hitabo nga mosunod gilayon sa proklamasyong “kalinaw ug kasegurohan,” ug diha sa unsang han-ay?

¹³ Una, ingon sa gipakita sa Kasulatan, ang politikanhong mga magmamando, sa tibuok kalibotang paagi, mosumbalik batok sa Babilonyang Bantogan, ang imperyo sa bakak nga relihiyon, ug laglagon siya. (Pin. 17:15, 16) Sa pagkamatuod pagatagdon nga ang mabatokon nga mga tinamdan ilabina ngadto sa mga relihiyon sa Kakristiyanohan bisan sa pagkakaron nahimong dayag na. Ang mga gobyerno nga adunay maisogong batok-relihiyon nga mga polisa naghimo na ug kusganong impluwensiya diha sa Nahiusang Kanasoran, ug ang publiko mismo diha sa gikaingong relihiyosong mga kayutaan sa tinagdaghan nagsalikway sa mga relihiyon sa ilang katigulangan. Unsa man ang kahulogan niining tanan? Nga ang paglaglag sa tanang bakak nga relihiyon haduol na. Human niana, sa dihang ang mga nasod sa katig-a mosumbalik, sa bug-os nga puwersa, batok niadtong nagabayaw sa pagkasoberano ni Jehova, ang balaang kasuko ibundak batok sa politikanhong mga gobyerno ug sa ilang mga tigpaluyo, nga mosangpot diha sa bug-os nga kalaglagan sa tanan kanila. Sa kataposan, si Satanas mismo uban sa iyang mga demonyo igatambog ngadto sa bung-aw, nga sa bug-os pinugngan gikan sa pag-impluwensiya sa katawhan. Kini gayod mao ang “adlaw ni Jehova,” ang adlaw sa dihang ang iyang ngalan ibayaw sa kahitas-an.​—Ezek. 38:18, 22, 23; Pin. 19:11–20:3.

14. Nganong dili maalamon sa pagpangatarongan nga ang adlaw ni Jehova dugay pa man?

¹⁴ Kana moabot nga eksakto sa panahon, sumala sa eskedyol sa Diyos. Dili kana maulahi. (Hab. 2:3) Hinumdomi, ang kalaglagan sa Jerusalem sa 70 K.P. kalit nga miabot, sa panahong wala dahoma kadto sa mga Hudiyo, sa naghunahuna silang miagi na ang kapeligrohan. Ug komosta na man ang nahitabo sa karaang Babilonya? Kadto gamhanan, masaligon, gipanalipdan pinaagi mabagang mga paril. Pero kadto naparot sa usa ka gabii. Busa, usab, ang “kalit nga kalaglagan” modangat sa presenteng daotang sistema. Sa dihang mahitabo na kana, hinaot nga kita makaplagan nga nahiusa diha sa matuod nga pagsimba, tungod kay padayong “nagsilsil sa hunahuna” sa adlaw ni Jehova.

Repasong Panaghisgot

● Nganong hinungdanon nga padayong “isilsil sa hunahuna” ang adlaw ni Jehova? Unsaon nato kana sa pagbuhat?

● Sa unsang paagi kita sa personal naapektahan sa pagbulagbulag sa katawhan nga nagakahitabo?

● Unsa pa ang anaa sa umaabot sa dili pa mosugod ang adlaw ni Jehova? Busa unsa man gayod ang pagabuhaton ta sa personal?