Kapitulo 21

Mainitong Pag-abiabi Alang sa mga Mobalik

ADUNAY daghang tawo nga sa usa ka panahon may igong nasayran sa kamatuoran sa Bibliya mao nga nahibalo nga si Jehova mao ang matuod nga Diyos ug may nasabtan mahitungod sa iyang mga katuyoan. Bisan tuod sila dili mga Saksi ni Jehova, sila tingali nakatuon sa Bibliya uban sa mga Saksi. O tingali ang ilang mga ginikanan mga Saksi. Daghan kanila nakatambong sa pila ka tigom sa Kingdom Hall. Tingali sila nakaapil pa sa pagpahayag sa mensahe sa Gingharian ngadto sa uban. Apan wala nila ideboto ang ilang kinabuhi sa pagbuhat sa kabubut-on sa Diyos. Nganong wala man?

² Ang kalibotan nagatanyag sa mga pandani nga sa ilang hunahuna ilang gikinahanglan, mga butang nga ilang gibati makadugang sa kalipay sa ilang kinabuhi, ug sila nahilayo sa organisasyon ni Jehova sa ilang pagpangagpas nianang mga butanga. Bisan pa niana, sa igong panahon ang pipila kanila nakaamgo nga wala nila hikaplagi ang matang sa kinabuhi nga ilang gidahom. Sila nahigmata sa kamatuoran nga kon sila mopadayon sa ilang kahimtang, sila malaglag duyog sa kalibotan. Wala nila hikalimti ang kasegurohan ug espirituwal nga kadagaya sa “balay” ni Jehova, ug buot nilang mahibalik dinha. Apan dawaton ba sila ni Jehova?

MIBALIK ANG ANAK NGA MAUSIKON

³ Ang tubag gipaila diha sa ilado kaayong sambingay ni Jesus sa anak nga mausikon. Ingong ilustrasyon, si Jesus misugid mahitungod sa usa ka tawo nga may duha ka anak lalaki. Ang manghod nga anak nangayo sa iyang amahan sa iyang bahin sa katigayonan. Kay nakuha na kini, siya miadto sa halayong dapit, diin didto iyang giusik-usikan ang tanan diha sa kinabuhi sa pagpatuyang. Sa ingon siya milihok nga mausikon. Sa giabot ug gutom ang maong dapit, ang batan-ong lalaki, tungod sa hilabihang kawalad-on, napugos sa pag-atiman sa mga baboy, apan siya wala gani tugoti sa pagkaon sa ilang pagkaon. Kay nahinuklog tungod sa nahiagoman niyang mga suliran, siya nabalikan sa maayong salabotan. Iyang nahinumdoman ang maayong kinabuhi bisan sa mga tawong sinuholan sa balay sa iyang amahan, ug siya mihukom sa pagbalik. Iyang angkonon ang iyang makasasalang dalan ug mohangyo nga siya dawaton pag-usab, dili ingong usa ka anak, kondili ingong usa ka sulugoong sinuholan. (Lucas 15:11-19) Apan tapos sa tanang butang iyang nabuhat, pabalikon kaha siya sa iyang amahan? Sa unsang paagi si Jehova, nga gihawasan sa amahan niining sambingaya, magaisip sa pagbalik sa ingon nga tawo?

⁴ Sa paghulagway sa tin-aw sa mga pagbati ni Jehova bahin niana, si Jesus nagpadayon: “Samtang [ang manghod nga anak lalaki] didto pa sa halayo, nakita siya sa iyang amahan ug siya giabot ug kaluoy, ug siya midalagan ug mihalog sa iyang liog, ug mabinationg mihalok kaniya. Unya ang anak miingon kaniya, ‘Amahan, nakasala ako batok sa langit ug batok kanimo. Ako dili na takos pagatawgon nga imong anak. Himoa na lang ako nga usa sa imong mga sinuholan.’ Apan ang amahan miingon sa iyang mga ulipon, ‘Pagdali! Dad-a ninyo ang usa ka kupo, ang labing maayo, ug isul-ob kini kaniya, ug butangig singsing ang iyang kamot ug sapin ang iyang mga tiil. Ug dad-a dinhi ang gipatambok nga nating baka, ihawa kini ug mangaon kita ug managsadya, kay kining akong anak namatay ug nabuhi pag-usab; siya nawala ug nahikaplagan.’ Ug sila misugod sa pagsadya.”—Lucas 15:20-24.

SA UNSANG PAAGI ANG SAMBINGAY MAPADAPAT KARONG ADLAWA?

⁵ Sa maong ilustrasyon ang magulang nga anak, ang panganay, tukmang motumbas ngadto sa “kongregasyon sa mga panganay nga nahitala sa mga langit.” (Hebreohanon 12:23) Komosta ang manghod nga anak? Siya nagahawas sa usa ka pundok nga lahi sa “gamay nga panon” nga may langitnong paglaom. Dili tanan sa “ubang mga karnero” sa Ginoo ang mohaom sa kahubitan sa manghod nga anak, apan ang pipila mohaom niana. Bisan una pa madayag sa linain ang pagtigom sa “ubang mga karnero, sugod sa 1935, may mga tawo nga nakaila nga si Jehova mao ang bugtong matuod nga Diyos. Sila nasayod sa paglaom sa yutan-ong kinabuhi ilalom sa iyang Gingharian, ug sila wala maghambin sa hunahuna nga mahisakop sa “kongregasyon sa mga panganay” nga may langitnong mga paglaom. Apan inay sa pagdeboto sa ilang kaugalingon ngadto sa pag-alagad kang Jehova, sila napuliki sa kalibotanong mga pangagpas. Ilang gidawat ang “pangabuhian” nga gitugot kanila sa Diyos, ang panahon ug kinabuhi nga iyang gitugot nga ilang mabatonan, ug gigamit kana alang sa hakog nga katagbawan sa kaugalingon. Apan niadtong 1935 sa dihang ang mga alagad ni Jehova unang nakasabot sa tin-aw sa ilhanan sa “dakong panon,” daghan nga mitumbas sa manghod nga anak sa bug-os kasingkasing mitanyag sa ilang kaugalingon alang sa pag-alagad diha sa balay sa Amahan. Kadtong usa ka panahon sa pagsadya sumala sa gihubit ni Jesus diha sa iyang sambingay.

⁶ Matuod nga, sa maong panahon, dili tanan ang miambit sa maong pagsadya tungod sa pag-abot sa matang nga gihawasan sa manghod nga anak. Sa iyang sambingay gipaila ni Jehova nga kini mao ang kahimtang. Apan dili tanan sa nahibilin sa “gamay nga panon” nagpadayag sa maong espriitu, ug sa iyang ilustrasyon gitugot ni Jesus nga ang dalan bukas bisan alang niadtong sa sinugdan wala mahimuot, sa pagpakig-ambit sa kalipay nga nabatonan ni Jehova dihang ang maong mga makasasala tinuod maghinulsol.—Lucas 15:7, 10, 25-32.

⁷ Hinuon, sukad niadtong mga hitabo sa tunga sa katuigang 1930 naamgohan sa uban nga sila, usab, sa pila ka bahin sama niadtong anak nga mausikon. Sila nasinati pag-ayo sa espirituwal nga panimalay ni Jehova, sa iyang makita nga organisasyon, apan ang ilang paagi sa kinabuhi nagdala kanila nga halayo niana, nga daw ngadto sa “halayong dapit.” Sila wala mosupak sa mga alagad ni Jehova, apan ang ilang paagi sa kinabuhi wala mahiuyon sa mga sukdanan sa Pulong sa Diyos. Tingali ilang gitukod ang ilang tibuok kinabuhi palibot sa ilang sekular nga trabaho ug sa ilang kaugalingon apan napakyas sa paghatag ug tukmang gibug-aton ngadto sa ilang mga obligasyon atubangan sa Diyos ug sa kaugdang sa mga panahong atong ginapuy-an. Ang pipila nangasilo sa mga pagkadili-hingpit sa uban nga niadto nakig-uban sa kongregasyon ug sila wala magpaabot nga mapailobon nga si Jehova magtul-id sa mga butang. Apan sa unsang kahimtang nahidangat kini silang tanan dihang sila nagpalayo sa panimalay sa mga magtutuo?

⁸ Sa nahaigong panahon, naamgohan sa pipila nga sila nahimong kabos sa espirituwal. Ilang nasabot nga bisan unsang daklit nga mga yugto sa kalipay nga naangkon nila wala maghatag kanilag malungtarong kalipay. Tingali ila usab nasayrang ang ilang paagi sa kinabuhi nagadaot sa lawasnon, emosyonal ug espirituwal nga paagi. Sa kahiladman ilang gibati ang kawalay-pulos, sama sa gibati sa tanan nga walay Diyos ug walay paglaom. (Efeso 2:12) Ilang naamgohan nga ang panahon lamang nga sila tinuod malipayon maoy sa sulod sa “balay” ni Jehova. Buot nilang mobalik. Angay ba silang mobalik? Unsang posibleng kaayohan ang maangkon sa pagpadayon sa ilang kahimtang sa kakabos? Ang paglangan makapalaglag. Kon mopadayon sila sa paghawid sa kalibotan, sa dihang kini laglagon sila mawad-an sa ilang kinabuhi.

⁹ Apan makabalik ba ang maong mga tawo? Sa mainiton si Jehova nagadapit kanila sa pagbalik, ug ang iyang makita nga organisasyon nagahatag ug mahigugmaong tabang niadtong mobalik. (Zacarias 1:3, 4) Unsay gikinahanglan? Sumala sa gipakita sa sambingay ni Jesus, kinahanglang sila mahibalik sa maayong salabotan, mohimo sa lakang sa pagbalik ug moangkon nga sila nakasala batok sa Diyos. Kon sila nakabuhat sa dili-Kristohanong panggawi, kinahanglang ilang ihatag ang makapatuo nga ebidensiya ngadto sa mga ansiano nga sa maong panahon sila mibiya na sa maong dalan sa kinabuhi ug tinuod mahinulsolon. Ang ilang mainitong tinguha karon kinahanglan mao ang pag-alagad kang Jehova ingong bahin sa iyang makitang organisasyon. (Lucas 15:18-21; Proverbio 28:13) Kon kana sa pagkamatuod mao ang anaa sa ilang kasingkasing, sila makatino nga ang ilang pagbiya sa ilang daotang mga paagi ug mga hunahuna ug pagbalik kang Jehova mohatag ug dakong kalipay. (Isaias 55:7) Ugaling, aron ang ilang kaugalingong kalipay molabaw sa kalipay sa mainitong pagdawat pag-usab diha sa Kingdom Hall, gikinahanglan ang pagpalig-on na usab sa espirituwal.

PAGTUKOD IBABAW SA MAAYONG PATUKORANAN

¹⁰ Ilabinang hinungdanon ni bisan kinsang mobalik sa panimalay ni Jehova ang pagsinati pag-ayo sa nagkalainlaing bahin sa personalidad ni Jehova ug sa pag-ugmad sa suod personal nga relasyon uban kaniya. Kinahanglang ilang amgohon nga ang tanang gikinahanglan ni Jehova gikan kanato maoy alang gayod sa atong kaayohan. Ang iyang mga sugo dili maghikaw sa kalipay sa kinabuhi kondili, hinunoa, magapanalipod kanato batok sa pagbuhat sa mga butang nga tingali mohatag ug umalaging kalipay apan motultol sa mapait nga ani. (Isaias 48:17; Galacia 6:7, 8) Dihang kita iyang disiplinahon, kini tungod sa iyang gugma kanato. (Proverbio 3:11, 12) Ang personal nga pagtuon nga sundan sa pagpalandong sa butang nakat-onan, matim-os nga pag-ampo ug regular nga pagtambong sa tigom motabang nato sa pagkakat-on sa pagbutang sa atong bug-os nga pagsalig kang Jehova, sa pagsalig kaniya alang sa direksiyon diha sa tanang butang atong ginabuhat.—Proverbio 3:5, 6.

¹¹ Kadtong nangahisalaag tingali nahibalo kon unsay matarong ug kon unsay daotan. Apan karon kinahanglan usab nga sila makaugmad ug pagdumot sa pagkadaotan ug kinahanglang sila mopadayon sa paghimo niana samtang kini nagaalirong kanila. (Salmo 97:10) Sila mabuligan niini kon ilang pangitaon dili lamang ang kahibalo kondili ang pagsabot usab. Una sa tanan, kini nagalangkit sa pagsabot sa mga butang maylabot sa Diyos. Kinahanglang atong ilhon ang nagkalainlaing paagi sa iyang pagtudlo kanato ug sa unsang paagi ang atong pagsanong ngadto sa iyang tambag magaapektar sa atong relasyon uban kaniya. (Proverbio 4:7; 9:10) Kinahanglang atong pabilhan ang kahinungdanon sa pagkawalay-pagkasumpaki, pinaagi sa pagpadapat sa mga sukdanan ni Jehova sa tanang panahon, sa tanang butang atong ginabuhat. (Tito 2:11, 12; 1 Tesalonica 4:7) Ang pag-amping angay usab ipakita sa pagpalandong dili lamang sa umalagi nga kalipay kondili kon unsa ang sangpotan sa atong mga desisyon. (Itandi ang Proverbio 20:21; 23:17, 18; Hebreohanon 11:24-26.) Angay usab nga kita mahigugmaong mabalaka sa epekto diha sa uban sa mga butang atong ginasulti ug ginabuhat.—Roma 15:1, 2.

¹² Ingong mga Kristohanon kita malig-on pag-ayo sa pagkaamgo nga kita ania sa taliwala sa espirituwal nga pakiggubat. Ang atong pangunang kaaway mao si Satanas nga Yawa, uban ang iyang mga demonyo. Sa tanang paaging posible siya nagapangita sa pagpahilayo kanato gikan sa hinungdanong buluhaton sa Gingharian nga gihatag ni Jehova kanato aron buhaton. Ang iyang tumong mao ang paghaylo kanato nga magpahilayo sa mga sukdanan ni Jehova, nga mahimong bahin sa kalibotan nga niana siya mao ang magmamando. Ang iyang mga lit-ag subsob makapadani sa kasagarang mga tinguha (alang sa kalipay, lawasnong kaharuhay, gugma ug pagbati), apan siya nagaawhag nga atong pakalabwon ang maong mga tinguha nga magdaot sa katuyoan niana o tagbawon kana sa daotang mga paagi. Pinaagi lamang sa bug-os nga paggamit sa espirituwal nga hinagiban nga gitagana sa Diyos nga kita mogula nga mga mananaog niining pakig-away alang sa atong espirituwal nga mga kinabuhi.—Efeso 6:11-18.

¹³ Si Jesus miingon nga kon kita moduol kaniya ug isangon ang iyang “yugo,” kita makakaplag ug pahulay sa atong mga kalag. (Mateo 11:29, 30) Ang pagpasangon sa “yugo” sa kaugalingon nagkahulogan sa pag-alagad. Apan ang pag-alagad kang Jehova sa pagsundog sa iyang Anak nagadalag tinuod nga pahulay. Sa unsang paagi? Tungod kay kini nagadalag tinuod nga kagawasan. Kita dili na mga ulipon sa sala, nga naulipon niana, nga nagabuhat sa mga butang atong nasayran nga dili angay natong buhaton ug tingali atong gipanghinaot nga wala nato buhata. (Juan 8:32, 34-36) Kon ang atong Kristohanong personalidad gitukod ibabaw kang Jesu-Kristo ingong patukoranan, atong mapabilhan ang iyang papel diha sa katuyoan ni Jehova, kita magpatalinghog kaniya ug makakat-on gikan kaniya. Siya nagkalipay sa pagbuhat sa kabubut-on sa iyang Amahan. Kita makatuon sa pagbuhat usab niana. (Juan 4:34; Salmo 40:8) Tungod sa pagsunod sa moral nga mga sukdanan sa Diyos kita makabaton ug hinlong konsensiya. Inay sa pagkinabuhi alang lamang sa kaugalingon, atong maagoman ang kalipay nga nagagikan sa paghatag. (Buhat 20:35) Ang kinabuhi makabaton unyag tinuod nga katuyoan alang kanato. Labaw sa tanan, maangkon nato ang kalipay sa pagkasayod nga atong nabatonan ang pag-uyon ni Jehova mismo, ang Amahan sa tanan nga mahimong iyang mga anak.—Proverbio 10:22.

[Mga Pangutana nga Pagatun-an]

1. Unsang matang sa mga tawo ang gihisgotan niining kapituloha?

2. (a) Nganong sila nahilayo sa organisasyon ni Jehova? (b) Nganong sila mosugod sa pagtinguha nga mahibalik sila?

3. (a) Sa sambingay sa anak nga mausikon, unsang kahubitan ang gihatag ni Jesus sa susamang kahimtang? (b) Kinsay gihulagwayan sa amahan?

4. Giunsa pagdawat sa amahan ang iyang anak sa dihang siya mibalik?

5. (a) Kinsay gihulagwayan sa magulang nga anak lalaki sa sambingay ni Jesus? (b) Nan, kinsay gihawasan sa manghod nga anak lalaki, ang mausikon?

6. Sa katumanan, giunsa sa pila ka tawo pagpadayag ang tinamdan sa magulang nga anak, apan matuod ba kana sa tanang nahibilin?

7, 8. (a) Sa katuigang bag-o pa, unsay nakapahilayo sa uban gikan sa panimalay ni Jehova? (b) Sa unsang mga paagi gibati sa pipila nga sama sa anak nga mausikon? (c) Nganong sila angay mobalik?

9. (a) Nganong buot ni Jehova nga mobalik ang maong mga tawo? (Ezekiel 18:23) (b) Unsay gikinahanglan sa ilang bahin?

10. (a) Unsang tinamdan bahin sa mga kinahanglanon ni Jehova ang kinahanglang ugmaron sa mga mahinulsolon? (b) Sa unsang paagi ilang maugmad ang suod personal nga relasyon uban kang Jehova?

11. Sa unsang paagi kadtong nangahisalaag mabuligan sa (a) pag-ugmad ug pagdumot sa pagkadaotan? (b) pagtinguha sa pagsabot? (c) pagkawalay-pagsumpaki sa pagpadapat sa diyosnong mga sukdanan? (d) pagkat-on sa pagpalandong sa sangpotanan sa bisan unsang ilang giplanong buhaton? (e) pagpakitag mahigugmaong kabalaka sa uban?

12. (a) Ang pagkasayod sa unsa bahin kang Satanas ug sa iyang mga paagi ang motabang sa pagpanalipod kanato? (b) Unsay gikinahanglan aron modaog sa maong pakig-away?

13. (a) Sa unsang paagi kita makakaplag ug pahulay alang sa atong mga kalag? (b) Nganong ang pag-alagad kang Jehova sa pagsundog kang Kristo mohatag gayod kanatog kalipay?