Pagkaluwas Ngadto sa Usa ka Bag-ong Yuta
Kapitulo 23
“Kamo Nagakinahanglan ug Pailob”
Sila nga misalig kang Jehova mao ang tinuod labing malipayong katawhan sa yuta karon. Sila nasayod kon asa makita ang labing maayong tambag kon unsaon sa pagsagubang sa mga suliran sa kinabuhi—sa kaugalingong Pulong sa Diyos. Dili sila mahadlok dihang magtan-aw sa umaabot, tungod kay sila nasayod sa katuyoan sa Diyos sa yuta. (Jeremias 17:7, 8; Salmo 46:1, 2) Bisan pa, si apostol Pablo misulat sa kaubang mga Kristohanon: “Kamo nagakinahanglan ug pailob, aron nga, tapos ninyo matuman ang kabubut-on sa Diyos, inyong madawat ang katumanan sa gisaad.” (Hebreohanon 10:36) Unsa kanang butanga nga nagakinahanglan ug pailob?
2 Sa wala pa siya mamatay, gipasidan-an ni Jesus ang iyang mga apostoles kon unsay naghulat sa unahan, nga nagaingon: “Kon kamo bahin pa sa kalibotan, higugmaon sa kalibotan ang mga iya. Apan kay kamo dili man bahin sa kalibotan, kondili gipili ko kamo gikan sa kalibotan, ang kalibotan nagadumot kaninyo. Hinumdomi ang pulong nga akong giingon kaninyo, Ang ulipon dili labaw sa iyang agalon. Kon ako ilang gilutos, kamo usab ilang pagalutoson; kon ang akong pulong ilang gibantayan, ang inyo ila usab nga pagabantayan. Apan kining tanan ilang buhaton kaninyo tungod sa akong ngalan, kay sila wala man makaila kaniya nga mao ang nagapadala kanako.” (Juan 15:19-21) Pagkatinuod gayod niini!
3 Ang mga sumusunod ni Jesus nahimong mga tumong sa pagdumot tungod kay nagpuyo sila sa taliwala sa kalibotan nga nagasalikway sa tinuod nga gihawasan sa Kristiyanidad. Ang Kristo nagkahulogang “Usa nga Dinihogan.” Si Jesu-Kristo mao ang usa nga dinihogan ni Jehova nga mahimong Hari, magamando sa tibuok yuta. Busa dihang miingon si Jesus nga pagalutoson ang iyang mga disipulo ‘tungod sa iyang ngalan,’ ang iyang gipasabot mao nga sila lutoson tungod sa ilang pagpasakop kaniya ingong Mesiyanikong Hari ni Jehova, tungod sa ilang pagsunod kang Kristo nga una kay sa kang bisan kinsang tawhanong mga magmamando, tungod sa ilang maunongong pagpasakop sa iyang Gingharian ug sa dili pagpangilabot sa mga kalihokan sa tawhanong mga kagamhanan. Si Jesus midugang nga may paglutos tungod kay ang mga maglulutos “wala makaila kaniya nga nagpadala kanako”—sa ato pa, sila midumili sa pag-ila kang Jehova nga Diyos ingong ilang Unibersal nga Soberano. (Itandi sa Exodo 5:2) Kinsa ang pangunang mag-uugda niini nga paglutos? Si Satanas nga Yawa.—Pinadayag 2:10.
4 Ilabina sukad nga gitambog si Satanas gikan sa langit tapos sa pagkatawo sa Mesiyanikong Gingharian ni Jehova sa 1914, ang kapig-otan sa tinuod nga mga Kristohanon misamot. Ayaw pakamenosa kini. Adunay bug-os nga pakiggubat sa bahin sa Yawa ug sa iyang mga demonyo batok sa tanang nagabarog sa kiliran sa Gingharian sa Diyos diha sa mga kamot ni Jesu-Kristo. Mahitungod niini, ang Pinadayag 12:17 nag-ingon: “Ug ang dragon [Satanas nga Yawa] nasuko sa babaye [langitnon samag-asawang organisasyon sa Diyos], ug nakiggubat batok sa mga nanghibilin sa iyang binhi [ang dinihogan-langitnong mga sumusunod ni Kristo sa yuta], nga nagasunod sa mga sugo sa Diyos ug nagapanghimatuod mahitungod kang Jesus.” Nakita usab sa “ubang mga karnero,” ang ilang kaugalingon sa mainit nga pakig-away. Sa malipotong paagi, naningkamot si Satanas sa pagdani o sa pagpugos kanila sa paghunong sa pagsunod sa mga sugo sa Diyos. Maoy iyang tinguha nga mapaluya sila ug dayon bug-os nga pukanon ang ilang espirituwalidad. Ang iyang tumong mao ang pagpahilom sa proklamasyon mahitungod kang Jesus ingong Mesiyanikong Hari ni Jehova. Apan niining espirituwal nga gubat ang maunongong mga alagad sa Diyos ang mogula nga madaogon.
Unsay Angayng Buhaton sa mga Kristohanon?
5 Giila sa daghang mga opisyal sa kagamhanan nga ang mga Saksi ni Jehova maoy mga tawong masinundanon sa balaod ug maayong impluwensiya sila sa komunidad. Bisan pa, ang tanang tawhanong mga kagamhanan maoy bahin sa kalibotanong sistema sa mga butang ni Satanas. (1 Juan 5:19; Pinadayag 13:2) Busa dili ikatingala kon idili sa ubang mga kagamhanan ang mga tigom sa niadtong nagasimba sa tinuod nga Diyos, ibando ang ilang literatura sa Bibliya, idili ang ilang pagsangyaw mahitungod sa Gingharian sa Diyos, oo, bisan sa pagbilanggo ug sa pag-abuso kanila sa pisikal nga paagi. Kon ikaw mismo ang mailalom sa maong kapig-otan, unsay imong buhaton?
6 Ang mga apostoles ni Jesu-Kristo matinahuron sa mga opisyal sa kagamhanan. Dihang gilutos, wala sila mibalos. Apan dihang gisugo sa paghunong sa pagbuhat sa sugo sa Diyos, sila malig-ong mitubag: “Kinahanglan maoy unahon namo pagsugot ang Diyos ingong magmamando inay ang mga tawo.” (Buhat 5:29; Roma 12:19; 1 Pedro 3:15) Bisag nameligro pa ang ilang mga kinabuhi, wala sila mikompromiso bisan pa sa hulga sa kamatayon. Sila nasayod nga sila nag-alagad sa “Diyos nga magabanhaw sa mga patay.” (2 Corinto 1:9; Hebreohanon 2:14, 15) Bisag gilutos, sila malipayon—malipayon tungod kay sila nasayod nga sila nakapahimuot sa Diyos, malipayon nga sila nakahigayon sa pakigbahin sa pagbayaw sa iyang ngalan ug sa pagpamatuod sa ilang pagkamaunongon ngadto sa iyang dinihogang Hari. (Buhat 5:41, 42; Mateo 5:11, 12) Ingon ka ba nianang matanga sa pagkatawo? Bukas ka bang nagpaila sa imong kaugalingon uban niadtong nagaantos sa samang mga kasinatian? Si Eʹbed-melʹech mao ang usa nga maisogong nagpaila sa iyang kaugalingon. Kinsa siya?
7 Si Eʹbed-melʹech maoy usa ka mahadlokon sa Diyos nga Etiopianhon nga nagpuyo sa Jerusalem sa yugto sa panahon nga mitultol sa kalaglagan niini pinaagi sa mga Babilonyanhon. Nagtrabaho siya sa panimalay ni Haring Zedekias. Niadtong panahona nag-alagad si Jeremias ingong propeta ni Jehova sa Gingharian sa Juda ug sa kasikbit nga mga nasod. Tungod sa iyang walay pagkompromisong paghatod sa balita sa pasidaan sa Diyos, nahimo siyang tumong sa grabeng paglutos. Sumala sa paghulhog sa pipila ka prinsipe sa Jerusalem, gilabog pa gani siya sa lapokon nga atabay aron malunod ug didto mamatay. Bisag dili Israelitas si Eʹbed-melʹech, iyang giila si Jeremias ingong propeta ni Jehova. Dihang nakadungog sa nahitabo, gipangita dayon ni Eʹbed-melʹech ang hari sa ganghaan sa siyudad sa pagangaliya alang kang Jeremias. Milihok sumala sa mando sa hari, mikuha dayon siyag 30 ka tawo, mga pisi ug mga nuug. Iyang gisugo si Jeremias sa pagbutang sa mga nuug sa iyang ilok aron dili masamad sa mga pisi, ug dayon ilang gibitad ang propeta gawas sa atabay.—Jeremias 38:4-13.
8 Masabot nga nabalaka si Eʹbed-melʹech sa buhaton unya kaniya sa mga prinsipe tungod sa pagpakyas sa ilang laraw, apan milabaw ang iyang kabalaka tungod sa iyang pagtahod sa propeta ni Jehova ug sa iyang kaugalingong pagsalig sa Diyos. Ingong resulta, gipasaligan ni Jehova si Eʹbed-melʹech pinaagi kang Jeremias: “‘Ania karon dad-on ko ang akong tinuod nga mga pulong batok niining siyudara tungod sa kadaotan ug dili sa kaayohan, ug sila matuman nianang adlawa sa imong atubangan. Apan ako magaluwas kanimo nianang adlawa,’ nagaingon si Jehova, ‘ug dili ka itugyan ngadto sa kamot sa mga tawo nga imong gikahadlokan. Kay sa pagkamatuod ako magaluwas kanimo, ug dili ka mahulog pinaagi sa espada; kondili ang imong kalag hinoon mahimong ingon sa tukbonon nganha kanimo, tungod kay misalig ka kanako,’ nagaingon si Jehova.”—Jeremias 39:16-18.
9 Pagkabililhon niadtong saara alang sa mga alagad ni Jehova karon! Sama kang Eʹbed-melʹech, ang “ubang mga karnero” nakakita sa mga inhustisyang nahimo ngadto sa modernong-adlawng Jeremias nga matang, ang dinihogang nanghibilin, ug sa mga paningkamot sa pagpahunong sa ilang pagwali sa balita ni Jehova. Wala sila magpanuko sa paghimog bisan unsang aksiyon nga ilang mahimo aron mapanalipdan ug paluyohan ang dinihogang matang. Busa, sa tukma, ang saad ni Jehova kang Eʹbed-melʹech nakapabaskog kanila, nakapalig-on sa ilang pagsalig nga dili gayod itugot sa Diyos nga malalag sila sa mga magsusupak apan Siya magatigpig kanilang buhi ingong matang latas sa umaabot nga kalaglagan sa kalibotan ngadto sa Iyang matarong “bag-ong yuta.”
10 Dili tanan sa nagasunod sa mga tunob ni Jesu-Kristo gihulga sa pagkabilanggo, apan ang tanan nakaagi ug paglutos sa usa ka matang. (2 Timoteo 3:12) Libolibo sa Kristohanong mga asawa, ug mga bana sa daghang mga tuig matinumanong nag-antos sa grabeng pagsupak diha mismo sa ilang kaugalingong mga panimalay. Ang mga kabataan usab, tungod sa ilang tinguha sa pag-alagad kang Jehova, gisalikway sa ilang mga ginikanan. (Mateo 10:36-38) Ang Kristohanong mga kabataan tingali makaatubang usab ug mga paglutos diha sa tunghaan; ang mga edran, diha sa ilang trabahoan. Ang tanang mga Saksi ni Jehova nakatilaw niini dihang nakigbahin sila sa pagpamatuod sa katilingban mahitungod sa Gingharian sa Diyos. Ngadto kanilang tanan, aplikado ang mga pulong ni Jesus: “Pinaagi sa inyong pailob mabatonan ninyo ang inyong mga kalag.”—Lucas 21:19.
11 Alang sa kadaghanan, adunay ubang mga kahimtang nga nagabutang kanila sa pagsulay. Tingali may seryoso sila nga sakit, nga makakuha sa kalipay sa kinabuhi. O, tingali, atubangon nila ang malisod kaayong kahimtang sa panalapi. Tingali, may mga panahon pa nga ang mga komento sa suod nga higala dili makataronganon ug masakit. Mahitungod sa kaso sa patriarkang si Job, gigamit ni Satanas kining tanang paagiha sa paningkamot sa pagbungkag sa iyang integridad. Unsay atong reaksiyon kon kita pa ang nahimutang sa samang mga kahimtang?—Santiago 5:11.
12 Sa laing bahin, komusta kon atong makita nga wala kaayoy modawat sa atong mga paningkamot sa pagpamatuod mahitungod sa mga katuyoan ni Jehova? Kana usab, nagkinahaglag pailob. Hinumdomi, ang tanang katuigan nga nagwali si Noe sa wala pa ang Lunop, ang iyang asawa ug mga anak ug ang ilang mga asawa lamang ang miduyog kaniya sa pag-alagad kang Jehova. Ang nahibilin sa tanang katawhan “wala magpakabana.” (Mateo 24:39) Sa susama, ang kinabag-an karon ‘wala magpakabana.’ Apan, diha sa ubang mga dapit, diin niadto diyutay lamang ang midawat sa balita sa Gingharian, karon aduna nay abundang ani sa mga magsisimba sa tinuod nga Diyos. Malipayon kadtong mapailobon sa mga katuigan sa pagkawalay pagtagad o direktang pagsupak ug karon nakigbahin na niining tagsaong pagpanigom!
‘MALIPAYON KADTONG NAGAPADAYON SA PAGPAILOB’
13 Aron malikayan ang pagkawala sa katingalahang palaabuton sa kinabuhi diha sa “bag-ong yuta,” hinungdanong ipunting nato ang atong panan-aw sa dakong isyu nga ginaatubang sa tanang kalalangan—ang isyu sa unibersal nga pagkasoberano. Kita ba sa walay pagkompromiso anaa sa kiliran ni Jehova? Bug-os ba natong nasabtan nga adunay duha ka kiliran, nga walay katungang dapit? Aron dili kita mapagan niining gubata, kinahanglang atong ilhon nga ang pagdumot ug pagdani maoy mga paagi nga gamiton ni Satanas sa pagbungkag sa atong integridad, aron mohunong kita sa pagsunod sa Diyos, aron mapalayo kita gikan sa importanteng buluhaton sa pagpamatuod sa Mesiyanikong Gingharian.—1 Pedro 5:8, 9; Marcos 4:17-19.
14 Kinahanglang atong ugmaron usab ang bug-os nga pagsalig kang Jehova. Pagkabinuang kon mosulay kita sa atong kaugalingong kusog sa paglikay sa malalangong mga lit-ag sa labaw-tawhanong kaaway! Apan kon mosalig kita kang Jehova sa bug-os natong kasingkasing, nan kon mahiagom kita sa kalisod ug atubangon ang pagsulay kita mosuod kaniya. (Efeso 6:10, 11; Proverbio 3:5, 6) Wala kita pugsa ni Jehova sa paglakaw sa usa ka dalan. Dili siya moagak kanato nga supak sa atong buot. Apan kon modangop kita sa iyang Pulong alang sa pagtultol, mangayo kaniyag kusog pinaagi sa pag-ampo ug magpabiling suod sa iyang organisasyon, kita iyang tultolan sa atong mga lakang. Ug lig-onon kita niya pinaagi sa napabag-ong pamatuod sa iyang dili mapakyas nga gugma.—Roma 8:38, 39.
15 Masulayan ka sa mga kalisdanan ug mga tintasyon nga imong maagoman. Kinsay imong unahon sa imong kinabuhi? Ang pangangkon ni Satanas nga kitang tanan nagatagad lamang sa atong kaugalingon. Ingon niana ang kadaghanang mga tawo. Lahi si Jesu-Kristo. Ikaw ba? Nakakat-on ka ba sa pagpadako pag-una sa ngalan ni Jehova? Nan, kon mao, inay likayan ang mga kahimtang nga magsulay sa imong pagtuo, makahimo ka sa pag-atubang kanila, mag-ampo kang Jehova nga hatagan kag kaalam aron magamit kini sa pagpasidungog kaniya. Ang kasakitan nga imong maagoman mobungag pailob; pailob tungod sa imong gugma kang Jehova nga magkahulogan sa iyang pag-uyon. “Malipayon ang tawo nga padayong mopailob sa pagsulay, tungod kay sa pagkahimong inuyonan iyang madawat ang purongpurong sa kinabuhi nga gisaad sa Diyos kanila nga nagahigugma kaniya.”—Santiago 1:2-4, 12; Roma 5:3, 4.
16 Dili igo ang pagsugod sa pag-alagad lamang kang Jehova o sa pagpailob sa mubong panahon. Kita anaa sa lumba, ug maangkon ang ganti ngadto lamang sa makaabot sa sangkoanan. Malipayon kadtong tanan nga nagapaningkamot uban sa ilang mga mata nga malig-ong nagapunting sa ganti dihang kining daang sistema mahugno diha sa kalumpagan! Unsa ka dakong palaabuton ang nagahulat kanila!—Hebreohanon 12:1-3; Mateo 24:13.
[Mga Pangutana nga Pagatun-an]
1. (a) Nganong tinuod nga malipayong katawhan ang mga Saksi ni Jehova? (b) Apan unsay tambag sa Hebreohanon 10:36 nga aplikado kanatong tanan?
2. Nganong nagkinahanglag pailob ang mga disipulo ni Jesus?
3. (a) Sa unsang paagi nga ang mga disipulo ni Jesus gilutos ‘tungod sa ngalan ni Jesus’? (b) Sa unsa nga diwa nga “wala makaila” ang mga maglulutos sa Usa nga nagpadala kang Jesus? (c) Kinsa ang pangunang responsable sa paglutos?
4. (a) Sa unsang paagi apektado ang atong kinabuhi sa katumanan sa Pinadayag 12:17? (b) Unsa ang tumong ni Satanas?
5. Unsang mga aksiyon ang gihimo sa mga kagamhanan batok sa mga Saksi ni Jehova?
6. (a) Unsang kaisipan ang atong huptan maylabot sa mga opisyal sa kagamhanan? (b) Apan determinado kita sa pagbuhat ug unsa? (c) Bisag lutoson, sa unsang paagi makapadayon kitang malipayon?
7. (a) Kinsa si Eʹbed-melʹech, ug nganong may kaikag kita kaniya karon? (b) Dihang nakadungog nga gihulog si Jeremias sa lapokong atabay, unsay gihimo ni Eʹbed-melʹech, ug ngano?
8. Unsang makapalig-ong saad ang gihatod kang Eʹbed-melʹech, ug ngano?
9. (a) Sa unsang paagi ang “ubang mga karnero” kaamgid kang Eʹbed-melʹech? (b) Busa, unsay kahulogan sa saad ni Jehova kang Eʹbed-melʹech alang sa “ubang mga karnero” karon?
10. Unsang bahina sa kinabuhi nga makaagi ang mga Kristohanon ug paglutos?
11. (a) Unsa pang ubang mga situwasyon nga nahimong grabeng pagsulay sa kadaghanan? (b) Kinsa pa ang nakaeksperyensiya niining mga butanga, ug ngano?
12. (a) Nganong ilabinang kinahanglan si Noe ug pailob sa iyang ministeryo? (b) Sa unsang paagi kaamgid ang kahimtang karon sa atong adlaw?
13. (a) Aron makalahutay, unsay ipunting nato sa atong panan-aw? (b) Unsay atong gikinahanglan aron maila ang mga paagi ni Satanas?
14. (a) Unsang relasyona ang kinahanglan natong palamboon, ug uban kang kinsa? (b) Sa unsang paagi kita iyang tabangan?
15. (a) Kinsa ang kinahanglang una sa atong kinabuhi? (b) Sa unsang paagi lantawon nato ang mga situwasyon nga nagasulay sa atong pagtuo?
16. Unsang tumong ang atong paningkamotang kab-oton?