Mga Tigom sa Pagpukaw sa Gugma ug Maayong mga Buhat
Ang unang mga Kristohanon nagtigom, sa kasagaran sa pribadong mga balay, sa pagdawat ug instruksiyon ug sa pagtagamtam sa makapalig-ong pag-ubanay. Karon, ang mga kongregasyon sa mga Saksi ni Jehova magtigom tulo ka beses sa usa ka semana. Ikaw gidapit sa pagtambong bisan hain niining mga tigoma. Ang ilang mga tigom dili samag rituwal, apan ilang gihatagag pagtagad ang balaang edukasyon. Buksan ug taposon ang mga tigom sa kongregasyon pinaagi sa pag-awit ug pag-ampo. Walay bayad ang pagtambong, ug walay koleksiyong himoon.—Buhat 4:23-31; 14:22; 15:32, 35; Roma 16:5; Colosas 4:15.
Tingali ang unang tigom nga imong matambongan mao ang 45-minutos nga pakigpulong sa publiko, nga maghisgot bahin sa mga pagtulon-an sa Bibliya, tagna, o tambag sa Kristohanong pagkinabuhi. Sunod niining pakigpulonga, mao ang pagtuon sa Bibliya, ginamit ang artikulo sa Ang Bantayanang Torre nga gidesinyo alang sa pagtuon sa kongregasyon. Mao kini ang paagi sa pagtuon: Basahon ang parapo gikan sa Ang Bantayanang Torre, ug ibangon sa konduktor ang pangutana sa materyal aron kadtong mga tumatambong makabolunter sa pagtubag pinaagi sa pagpataas sa ilang kamot. Kasagaran daghang komento ang ihatag sa matag parapo. Usa ka oras ang tigom.
Sa ulahi nga semana, duha ka 45-minutos nga tigom ang himoon. Ang usa mao ang Teokratikanhong Ministeryong Tunghaan. Kini naghatag pagbansay kon unsaon sa pagtigom ug materyal bahin sa mga ulohan sa Bibliya ug sa pagtudlo niini sa epektibong paagi. Human sa 21 minutos sa linaing pagtudlo, ang mga estudyante nga giasayn sa abanse mohatag ug mugbong mga presentasyon. Matag tapos sa presentasyon, ang instruktor sa tunghaan mohatag tambag sa pagpakita kon sa unsang paagi mouswag ang estudyante. Daghang mga tun-anang libro ang giandam alang ning tunghaana. Kadtong regular nga tigtambongan sa mga tigom makapalista, basta nagakinabuhi sila sumala sa Kristohanong mga prinsipyo.
Ang sunod nga tigom gitawag Tigom sa Pag-alagad. Kini adunay tulo o upat ka bahin nga nagahisgot sa pagtanyag sa maayong balita sa balay ug balay maingon man sa ubang bahin sa ministeryo. Kining mga bahina ginapresentar ingong mga pakigpulong, mga panaghisgot, o mga pasundayag, nga may pagpakigbahin sa tumatambong. Ang kadaghanan sa programa gibase sa materyal nga makita sa Atong Pag-alagad sa Gingharian, upat ka panid nga instruksiyon nga gipatik kada bulan sa Watch Tower Society.
Ang laing tigom mao ang senemanang pagtuon nga himoon sa gagmayng mga grupo, sa kasagaran diha sa pribadong mga balay sa bug-os nga teritoryo sa kongregasyon. Ang pagtuon gibase sa Bibliya ug sa bag-ong libro nga gipatik sa Sosyedad. Sanglit mas gamay man ang grupo, mas dako ang higayon alang sa tanan nga makabahin sa panaghisgot, ug adunay maayong higayon alang sa nagatambong sa pagsinati pag dugang sa usag usa.
Himoon sa kadaghanang mga kongregasyon ang ilang mga tigom diha sa Kingdom Hall nga gitukod sa mga Saksi ni Jehova. Ang gasto gikobrehan sa boluntaryong mga amot sa mga Saksi ni Jehova, ug sa kasagaran ang trabaho gihimo nga walay bayad sa boluntaryong mga trabahante. Adunay mga kahon sa kontribusyon sa tanang mga tigom alang niadtong gustong moamot.
Ang mga tigom sa kongregasyon nakatabang sa mga Saksi ni Jehova sa pagsunod sa tambag diha sa Hebreohanon 10:24, 25: “Magmatinagdanon kita sa usag usa sa pagpukaw sa gugma ug sa maayong mga buhat, sa dili pagbiya sa atong panagtigom, sama sa ginabuhat sa pipila, kondili magdinasigay sa usag usa, ug ilabina gayod sa makita [nato] nga ang adlaw sa paghukom nagkahiduol na.”
● Unsang mga bahin sa mga tigom sa unang Kristohanon ang makita sa mga tigom sa mga Saksi ni Jehova?
● Igambalay kon unsay ginapresentar sa lima ka tigom nga regular nga gihimo sa mga Saksi?
● Sa unsang paagi ang mga tigomanan nabatonan?
[Mga hulagway sa panid 14]
Ansiano nga nagdumala sa Pagtuon sa Bantayanang Torre, Tinipong Bansa
Talan-awon sa Teokratikanhong Ministeryong Tunghaan, Faeroe Islands
Pagtuon sa grupo sa pribadong balay, Yap
Kingdom Hall, New Braunfels, Texas, U.S.A., gitukod sa duha ka adlaw sa mga Saksi ni Jehova
[Mga hulagway sa panid 15]
Mga Kingdom Hall sa nagkalainlaing nasod
Japan
Australia
Austria
Espanya