Gilutos Tungod sa Pagkamatarong
Tingali nakadungog ka gikan sa mga higala ug mga paryente nga ang mga Saksi ni Jehova magkaproblema sa balaod, nga sila gidili sa pila ka mga kagamhanan, o nga sila mga daotang tawo. Nganong may pagdaot man kanila?
Dili tungod kay walay pagtahod ang mga Saksi sa balaod kondili ilang gisunod ang lakang ni Jesus. Si Jesus miingon sa iyang mga tinun-an nga sila biaybiayon sa mga tawo, lutuson, ug pahamtangan sa tanang matang sa pagkadaotan. Tungod kini kay ang pangunang kaaway sa Diyos, si Satanas, mao ang diyos niining kalibotana, ug nagtinguha siya sa pagpalayo sa mga tawo sa pagsimba sa Diyos.—Mateo 5:10-12; 10:16-22, 34-39; 24:9, 10; Juan 15:17–16:3; 2 Timoteo 3:12; 1 Pedro 5:8; Pinadayag 12:17.
Sa gidakop ang mga apostoles ug gidala sa hukmanan, dili kadto tungod kay sila mga kriminal, mga tawo sa kabangisan, o mga sedisyonista. Tungod kadto kay sila nagsangyaw sa maayong balita. Sa miapelar si Pablo sa iyang kaso sa hataas nga mga hukmanan, kadto maoy sa pagdepensa ug sa pagpamatuod sa legal nga paagi sa katungod sa mga Kristohanon sa pagsangyaw sa maayong balita.—Buhat 4:18-20; 5:28-32; Filipos 1:7.
Karon, ang mga Saksi ni Jehova maoy mga masinundanon sa balaod nga mga Kristohanon nga nagabayad sa ilang mga buhis ug nagpakitag pagtahod niadtong anaa sa awtoridad. Nagabayad sila sa mga butang nga iya ni Cesar ug ang Diyos sa mga butang nga iya sa Diyos. Kon magkasumpaki sila sa awtoridad sa kagamhanan, tungod kana kay ang kagamhanan dili modawat sa ilang buluhatong pagsangyaw, o tungod sa ilang neyutral nga baroganan sa mga kahikayan taliwala sa mga nasod. Apan niining bahina ang mga Saksi may samang baroganan sa mga apostoles, kinsa miingon: “Among unahon pagsugot ang Diyos ingong magmamando inay ang mga tawo.”—Buhat 5:29; Marcos 12:17; Juan 18:36; Tito 3:1, 2.
Ang mga Saksi ni Jehova wala magpangitag paglutos kondili buot sila ug mahapsay ug malinawng kinabuhi. Apan, kon ugaling tungod sa ilang pagsunod sa kasugoan sa Diyos ug sa panig-ingnan ni Jesu-Kristo sila lutoson, sila malipay sa pag-antos niana.—Mateo 5:10-12; Buhat 5:40, 41; 1 Corinto 4:12; 1 Timoteo 2:2; 1 Pedro 3:14, 15; 4:12-16.
● Nganong ang mga alagad ni Jehova gibiaybiay ug gilutos?
● Nganong magkaproblema usahay ang mga Saksi ni Jehova sa mga awtoridad sa kagamhanan, sama sa Kristohanong mga apostoles?
● Unsay paglantaw sa mga alagad ni Jehova sa paglutos?
[Mga hulagway sa panid 29]
Gitaral si Jesus sa atubangan kang Pilato ug si apostol Pablo gibilanggo tungod sa pagsangyaw sa Gingharian sa Diyos