Tibuok-Kalibotang Kasegurohan Ilalom sa “Prinsipe sa Pakigdait”
Kapitulo 14
Tapos sa Bag-ong Pakigtugon—Ang Milenyong Gingharian
ANG milyonmilyong tawo sa tibuok yuta nakadawat nag dagkong mga benepisyo gikan sa paglihok sa bag-ong pakigtugon, bisan pag sila wala mahiapil niana. Sila nahisama sa dili-Israelinhong mga pumuluyo sa Israel sa mga adlaw nga naglihok pa ang pakigtugon sa Moisesnong Kasugoan. (Exodo 20:10) Sa unsang paagi matuod kini sa nag-uswag minilyong benepisyaryo nga nakig-uban sa nahibilin sa espirituwal nga mga Israelinhon karong adlawa?
2 Sa tagna sa Jeremias 31:31-34, ang Usa nga naghatag sa mga kondisyon sa bag-ong pakigtugon miingon: “Akong igabutang ang akong kasugoan sa sulod nila, ug akong igasulat kana sa ilang kasingkasing. Ug ako mahimong ilang Diyos, ug sila mismo mahimong akong katawhan.”
3 Sa kahimtang sa pakigtugon sa Kasugoan, si Jehova nga Diyos, pinaagi sa manalagnang si Moises ingong tigpataliwala, mihatag ngadto sa kinaiyanhong Israel “sa sinulat-sa-kamot nga kasulatan . . ., nga nalangkoban sa kalagdaan.” (Colosas 2:14) Apan, komosta man ang kasugoan sa bag-ong pakigtugon? Ang Tigpataliwala niini dili magsulat niana sa bato, o magsulat niana sa usa ka manuskrito. Ang Tigpataliwala niini wala magbilin ug kaugalingon niyang sinulat. Atong matino kon unsa ang kasugoan sa bag-ong pakigtugon gikan sa dinasig nga Kristohanong Gregong Kasulatan. (2 Timoteo 3:16) Apan bisan sa wala pa masugdi pagsulat kadtong Gregong Kasulatan, gikan sa mga 41 K.P., gisugdan ni Jehova nga Diyos pagsulat ang iyang kasugoan sa bag-ong pakigtugon. Kanus-a? Sa adlaw sa Pentekostes, 33 K.P. Diin man? Sa eksaktong dapit nga dugay na niyang gisaad nga isulat kana: “Igasulat ko ang akong mga kasugoan sa ilang hunahuna, ug igasulat ko sila sa ilang mga kasingkasing.”—Hebreohanon 8:10.
4 Kay gisulat sa kasingkasing, lagmit dili mohunong sa paghigugma sa maong mga kasugoan kadtong nagsugot niana kanila. Kon ang maong mga kasugoan ibutang “sa ilang hunahuna,” lagmit dili nila kana hikalimtan. Busa, ang mga nagabantay nianang mga kasugoana nagaingon, sa mga pulong sa Salmo 119:97: “Gihigugma ko kaayo ang imong kasugoan! Sa tibuok adlaw kini akong gihunahuna.” Gikan sa ilang kinasulorang bahin, ilang ginabutang ang ilang gugma diha sa mga kasugoan ni Jehova ingong gihatag sa iyang Tigpataliwala, si Jesu-Kristo. Sa ingon, uban ang hustong panukmod, sila determinado sa pagbantay nianang bililhong mga kasugoan. Kini mapadapat ngadto sa “gamay nga panon” diha sa bag-ong pakigtugon ug sa “dakong panon” sa “ubang mga karnero” si kinsa, wala diha sa bag-ong pakigtugon, apan ilalom niana.—Itandi ang 1 Juan 5:3; Juan 14:15.
Isyu sa Gingharian Napadayag!
5 Ang mga nagabantay sa mga kasugoan sa bag-ong pakigtugon dili magpadaog sa gitagna sa Tigpataliwala, si Jesu-Kristo, ingong bahin sa “ilhanan . . . sa konklusyon sa sistema sa mga butang”: “Tungod sa pag-usbaw sa pagkamalapason ang gugma sa kadaghanan mabugnaw. Apan ang nagaantos hangtod sa kataposan mao ang mamaluwas. Ug kining maayong balita sa gingharian igawali sa tibuok gipuy-ang yuta ingong usa ka pamatuod sa tanang nasod.”—Mateo 24:3, 12-14.
6 Kining kataposang pamulong mahitungod sa tibuok-yutang pagpamatuod sa Gingharian dili lamang usa ka tagna. Kini usa ka sugo alang sa iyang mga tinun-an nga nagapuyo sa “konklusyon sa sistema sa mga butang.” Kana usa ka giya alang sa ilang hustong panggawi hangtod sa kompletong kataposan sa usa ka sistema sa mga butang nga walay gugma ug natusaktusak sa katibuk-an sa pagkamalapason, dili lamang sa kawalay-pagtagad sa kasugoan sa Diyos. Kinsa karong adlawa ang nagapamatuod nga matuod nga mga Kristohanon, nga nagaisip nianang mga pulong ni Jesu-Kristo ingong usa ka sugo alang kanila? Ang mga kamatuoran sa kasaysayan nga midaghan sukad 1919 matinud-anong nagatubag, “Mga Saksi ni Jehova”! Ang ilang Biblikanhong edukasyonal nga kampanya bahin sa Gingharian mao ang kinalabwan nga narekord, ug sila nagapakitag pagkamalahutayon niana sulod sa miaging 67 ka tuig. Matag tuig karon, kini nagatubo sa gidak-on ug gahom.
7 Si Satanas nga Yawa naningkamot sa pagpugong sa maong katingalahang kampanya sa edukasyon sa Bibliya pinaagi sa pagpukgo sa diyutayng nahibilin sa espirituwal nga mga Israelinhon panahon sa Gubat sa Kalibotan I. Siya napakyas! Sa gilayon, tapos sila mabuhi pag-usab gikan sa samag-kamatayong kahimtang sa ting-init sa 1919, ilang gihimo ang ilang unang tapos-gubat nga kombensiyon sa Cedar Point, Ohio, sa Septiyembre niadtong tuiga. Sa ikaduhang Cedar Point nga kombensiyon sa Septiyembre 1922, ang isyu sa Gingharian kalit napadayag. Sa ikaupat nga adlaw sa maong kombensiyon, nga nag-ulohang “Ang Adlaw,” ang presidente sa Watch Tower Society nagtapos nga talagsaon sa iyang kulbahinam nga diskurso pinaagi sa pagpatugbaw:
8 “Nan, bumalik kamo sa kanataran, Oh kamong mga anak sa Diyos nga Labing Hataas! Isul-ob ninyo ang inyong hinagiban! Magmaugdang, magtukaw, mag-aktibo, magmaisogon. Mahimong matinumanon ug matuod nga mga saksi alang sa Ginoo. Magpadayon sa pakig-away hangtod malaglag ang tanang bahin sa Babilonya. Imantala ang mensahe sa halayo. Ang kalibotan kinahanglang mahibalo nga si Jehova mao ang Diyos ug si Jesu-Kristo mao ang Hari sa mga hari ug Ginoo sa mga ginoo. Kini adlaw sa tanang adlaw. Tan-awa, ang Hari nagamando na! Kamo ang iyang mga tinugyanan sa pagmantala. Busa, imantala, imantala, imantala ang Hari ug ang iyang Gingharian.”
Pagkaila Kang Jehova Uban ang Labawng Pagsabot
9 Kapin na sa 70 ka tuig sukad naentrono si Kristo diha sa Gingharianong gahom sa 1914. Sukad niadto, midaghan kaayo ang ebidensiya mahitungod sa matarong nga kagamhanan sa Diyos. Ang katawhan sa kalibotan kinahanglang mohimo sa ilang pagbarog maylabot sa isyu sa Gingharian, dapig kaha sa Gingharian o batok niana. Ug natuman niadtong nagabarog dapig nianang balaang kagamhanan kining bililhong mga pulong sa bag-ong pakigtugon: “Dili na nila pagatudloan ang matag usa sa iyang kauban ug ang matag usa sa iyang igsoon, nga magaingon, ‘Ilha si Jehova!’ kay silang tanan makaila kanako, gikan sa labing ubos kanila ngadto sa labing dako kanila.”—Jeremias 31:34.
10 Sa 1935 ang nahibilin sa espirituwal nga mga Israelinhon misugod sa pag-abiabi sa “ubang mga karnero” sa Maayong Magbalantay ngadto sa aktibong pakig-uban kanila diha sa “usa ka panon” ilalom kang Jesu-Kristo, nga silang tanan mga Saksi ni Jehova. Unya kadtong “ubang mga karnero,” kinsa misugod sa pagkatigom aron mahimong “usa ka dakong panon” nga walay gitino daang gidaghanon, misugod, duyog sa inanak-sa-espiritung nahibilin, sa “pagbantay sa mga sugo sa Diyos” ug sa pagbuhat “sa buluhaton sa pagpamatuod kang Jesus.” (Pinadayag 7:9-17; 12:17) Busa sukad sa sinugdan sa 1935, kining “ubang mga karnero” nakaila usab kang Jehova “sukad sa labing ubos kanila ngadto sa labing dako kanila.”
11 Bisan pa niana, sa unsang paagi ang Kristohanong kahibalo kang Jehova lahi ug labaw pa kay sa kahibalong nabatonan sa mga Hudiyo ilalom sa daang Moisesnong pakigtugon? Ang langitnong Magbubuhat sa bag-ong pakigtugon nagapadayon sa pagsulti kanato: “Kay akong pasayloon ang ilang kasal-anan, ug ang ilang sala dili ko na pagahinumdoman.” (Jeremias 31:34; Hebreohanon 8:12) Kini maoy tungod sa kamatuorang ang bag-ong pakigtugon gipasukad sa mas maayong halad pinaagi sa mas maayong Tigpataliwala. (Hebreohanon 8:6; 9:11, 12, 22, 23) Ang mas maayong halad sa mas maayong Tigpataliwala dili kinahanglang sublion, sama sa tinuig nga Adlaw sa Pagtabon sa Sala ilalom sa daang pakigtugon sa Moisesnong Kasugoan. (Hebreohanon 10:15-18) Tungod niining tanan, ang kahibalo kang Jehova nga nabatonan niadtong naa ug ilalom sa bag-ong pakigtugon tinuod nga mas maayo, mas makapatugob, mas masinabtanon, mas kompleto kay sa kahibalo sa Diyos nga nabatonan sa mga Hudiyo ilalom sa pakigtugon sa Kasugoan.
12 Labaw sa tanan, si Jehova nga Diyos, ang Tagbuhat-sa-Pakigtugon, mao ang Hari ibabaw niadtong iyang gipasulod sa bag-ong pakigtugon ug ibabaw niadtong iyang gipailalom niana. (Mateo 5:34, 35; Jeremias 10:7) Si apostol Pablo, 1,850 ka tuig una si Jesus maentrono ingong Hari sa mga langit sa 1914, mipunting ngadto sa pagkahari ni Jehova ibabaw niadtong nagasugot sa mga kasugoan sa bag-ong pakigtugon, nga nagaingon: “Karon ngadto sa Hari sa walay kataposan, dili madunoton, dili makita, ang bugtong Diyos, maiya ang kadungganan ug ang himaya hangtod sa kahangtoran. Amen.”—1 Timoteo 1:17.
Ang Milenyong Gingharian Tapos sa “Dakong Kasakitan”
13 Ang “dakong panon” sa “ubang mga karnero,” nga wala masulod sa bag-ong pakigtugon apan ilalom niana, nagapanglantaw nga mogula nga buhi sa “dakong kasakitan.” Tapos malaglag kining presenteng hinukman nga sistema sa mga butang, ilang mapahimuslan, sa usa ka libo ka tuig, ang pagmando ni Jesu-Kristo ug sa iyang kaubang mga manununod ibabaw sa nahinloang yuta. (Pinadayag 7:9-14) Unya ang katuyoan sa bag-ong pakigtugon makab-ot na, nga mao ang pagpatungha sa “usa ka katawhan alang sa linaing pagpanag-iya” aron mahimong mga manununod sa langitnong Gingharian sa Diyos. (1 Pedro 2:9; Buhat 15:14) Pinaagi sa Gingharian sa Diyos, ang mga panalangin moagos sa bug-os ngadto sa “dakong panon” sa makalabang buhi nga “ubang mga karnero.” Si Satanas nga Yawa ug ang iyang dili-makitang demonyong organisasyon ikatambog na unya ug dili na makabalda.—Pinadayag 21:1-4; 20:1-3.
14 Ang makalabang-buhi nga “dakong panon” sa “ubang mga karnero” nakapangandam ug maayo alang sa pagkinabuhi sa bag-ong sistema sa mga butang. Sama sa nahibilin sa espirituwal nga mga Israelinhon, sila nakaila sa Diyos “gikan sa labing ubos kanila ngadto sa labing dako kanila.” (Jeremias 31:34) Sa pag-ampo ngadto sa Diyos, ang nagamandong Hari kas-a miingon: “Kini nagkahulogan sa kinabuhing walay kataposan, ang ilang pagkuha ug kahibalo kanimo, ang bugtong matuod nga Diyos, ug kaniya nga imong gipadala, si Jesu-Kristo.” (Juan 17:3) Busa kining tibuok-yutang pagkaila kang Jehova nga Diyos mosangpot sa walay-kataposang kaluwasan. Kini matuman dili lamang alang sa “unod” nga mamaluwas nga buhi sa “dakong kasakitan” kondili alang usab sa binilyong mga tawong patay nga makadungog sa tingog sa Hari ug mogula gikan sa ilang handumanang mga lubnganan. Ang tanang gikinahanglang kahibalo kang Jehova igahatag ngadto sa maong mga binanhaw.—Mateo 24:21, 22; Juan 5:28, 29; Pinadayag 20:11-15.
15 Makapalipay, ang pagkatuman sa bag-ong pakigtugon sa Diyos hangtod sa dakong kalamposan dili mosangpot sa kapildihan sa “dakong panon” sa mga karnerohon nga makalabang-buhi sa pagkalaglag niining hinukmang sistema sa mga butang. Hinunoa, kini moabli sa dalan alang sa labi pang dagkong mga panalangin dinhi sa hininloang yuta nga ilang mapanunod ug sila makabaton sa unang bahin sa paghimo niini nga tibuok-yutang paraiso. (Mateo 25:34; Lucas 23:43) Sa dili na madugay, kadtong nagalaglag sa yuta mangahanaw na, “apan kadtong nagalaom kang Jehova mao ang magapanunod sa yuta. . . . Ang mga maaghop mismo magapanunod sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:9-11) Bug-os dayegon ang Milenyong Gingharian ni Jehova nga Diyos pinaagi sa “Prinsipe sa Pakigdait” nga nagasubay sa pagkatuman sa bag-ong pakigtugon!
[Mga Pangutana nga Pagatun-an]
1, 2. (a) Kang kinsa ikatandi karong adlawa ang milyonmilyong benepisyaryo sa paglihok sa bag-ong pakigtugon? (b) Unsay giingon sa mga kondisyon sa bag-ong pakigtugon?
3. (a) Sa unsang dagway ang kasugoan sa daang Moisesnong pakigtugon gihatag ngadto sa Israel? (b) Una sugdi pagsulat ang Kristohanon Gregong Kasulatan, diin gipasulat sa Diyos ang mga kasugoan sa bag-ong pakigtugon?
4. Ang pagsulat sa Diyos sa iyang mga kasugoan diha sa kasingkasing ug pagbutang niana diha sa hunahuna sa iyang mga alagad magbaton sa unsang maayong mga epekto?
5. Unsay gitagna sa Tigpataliwala sa bag-ong pakigtugon sa Mateo 24:12-14?
6. (a) Ang Mateo 24:14 ba usa lamang ka tagna? (b) Kinsay nag-isip nga kana dili lamang tagna, ug unsay ikaingon mahitungod sa ilang pagkamainantoson?
7, 8. (a) Panahon sa Gubat sa Kalibotan I, unsay gipaningkamotan ni Satanas nga buhaton niadtong anaa sa bag-ong pakigtugon? (b) Sa tapos-gubat nga yugto, sa unsang paagi ang isyu sa Gingharian kalit napadayag?
9. (a) Tungod sa pag-uswag sa ebidensiya mahitungod sa maong matarong nga kagamhanan, ang mga tawo kinahanglang mokuha sa unsang baroganan? (b) Kadtong mibarog dapig niana gihatagan sa unsang kahibalo?
10. (a) Busa ilalom sa unsang pagtawag nga ang nahibilin sa espirituwal nga mga Israelinhon misugod sa pag-abiabi sa “ubang mga karnero”? (b) Unsang kahibalo ang nabatonan sa “ubang mga karnero”?
11. Sa unsang paagi ang Kristohanong kahibalo bahin kang Jehova lahi ug mas maayo kay sa iya sa mga Hudiyo ilalom sa pakigtugon sa Kasugoan?
12. Labaw sa tanan, unsang katungdanan ang nabatonan ni Jehova ngadto niadtong gipasulod sa bag-ong pakigtugon ug niadtong sa ilalom niana?
13. (a) Kanus-a ug ilalom sa unsang mga kahimtang ang “dakong panon” sa kabug-osan makabaton sa mga panalangin nga moagos gikan sa bag-ong pakigtugon? (b) Unsang dakong katuyoan ang makab-ot sa bag-ong pakigtugon?
14. Unsang maayong pagpangandam ang nabatonan sa molabang-buhing “dakong panon”?
15. Nganong ang pagkatuman sa bag-ong pakigtugon dili mosangpot sa kapildihan sa “dakong panon” sa “ubang mga karnero”?