Tibuok-Kalibotang Kasegurohan Ilalom sa “Prinsipe sa Pakigdait”
Kapitulo 16
Nanglakaw na Karon ang “Dakong Panon” sa “Dalan” Paingon sa Organisasyon sa Diyos
SA panahon sa Milenyal nga Pagmando sa “Prinsipe sa Pakigdait,” daghan sa mga bahin sa kapitulo 35 sa Isaias, nga karon nagakatuman na sa dili pa malaglag ang Babilonyang Bantogan, mapabanaag sa literal nga paagi diha sa katawhan. Kon unsay natuman sa espirituwal nga paagi tino nga matuman sa pisikal nga paagi. Ang dakong espirituwal nga katumanan niining tagnaa nagakahitabo na karon, uban sa napasig-uling mga alagad gikan sa pagkabihag sa Babilonyang Bantogan. Gibatbat ni propetang Isaias kini niining matahom nga pagkapahayag nga mga pulong:
2 “Ang kamingawan ug ang mala nga yuta magmasadya, ug ang kamingawan magakalipay ug mamulak sama sa rosas. Kini mamulak sa kadagaya, ug magakalipay uban sa kasadya ug pag-awit. Ang himaya sa Lebanon igahatag kaniya, ang katahom sa Carmelo ug Saron. Sila makakita sa himaya ni Jehova.”—Isaias 35:1, 2.
3 Haing lokasyon nahimutang ang kamingawan ug mala nga yuta? Sa ikaunom nga siglo W.K.P., sila nahimutang sa teritoryo sa gingharian sa Juda. Sa pagka 537 W.K.P., nahimong awaaw ang yuta ug walay pomuluyo sulod sa 70 ka tuig. Apan sa unsang paagi mahimong masadya ang kamingawan? Kinahanglang ibalik ang pomuluyo niini kanhi. Kadto kinahanglang ituboy gikan sa iyang ubos nga kahimtang ug hatagag himaya sa taliwala sa hataas nga kabukiran sa matahom tan-awong Lebanon.
Nagapatunghag Mahulagwayong Tanaman sa Eden
4 Ang modernong-adlawng katugbang, sa espirituwal nga diwa, sa kausaban sa yuta gikan sa pagkabinayaan sa Diyos nga panagway ngadto sa usa ka kahimtang nga nagapamatuod sa pagbalik sa pabor sa Diyos nahitabo sa 1919. Ang napasig-uling katawhan ni Jehova determinado sa pagpahimulos sa bug-os sa yugto sa kalinaw nga gibuksan niadto. Ang Dakong Siro, si Jesu-Kristo, ug ang iyang Amahan, si Jehova nga Diyos, nagsugo sa nakagawas nga nanghibilin sa espirituwal nga mga Israelitas sa pagbuhat ug dakong buluhaton nga katumbas sa pagtukod pag-usab sa templo ni Jehova pinaagi sa namauling mga nanghibilin sa karaang Israel tapos sa 537 W.K.P. Ang mga kalihokan sa pagpasig-uli tapos sa 1919 nakapatunghag malarawanong tanaman sa Eden.
5 Gitagna kini niining mga pulonga sa Isaias 35: “Nianang panahona ang mga mata sa buta mangabuka, ug ang mga igdulongog sa mga bungol makadungog. Unya ang tawo nga piang molakaw sama sa lagsaw, ug ang dila sa amang magasinggit sa kalipay. Kay sa kamingawan magabugwak ang mga tubig, ug ang mga sapa sa kamingawan. Ug ang napagbang balas mahimo nga usa ka linaw, ug ang giuhaw nga yuta magatubod sa tubig. Didto sa puloy-anan sa mga iro nga ihalas, sila managhigda, motubo ang mga balili ug mga banban ug mga tangbo.”—Isaias 35:5-7.
6 Ang paglungtad sa antitipiko, modernong-adlawng Edom wala makapugong sa kausaban sa espirituwal nga Israel ngadto sa usa ka paraiso nga kahimtang sa katumanan sa Isaias kapitulo 35. Busa ang modernong-adlawng mga Edomanhon walay katarongan sa paglipay sama sa kalipay nga gibati sa nakabalik nga nanghibilin sa espirituwal nga Israel, duyog sa nagkauswag nga “dakong panon.” Ang “dakong panon” adunay dakong bahin sa pagpatunhay sa espirituwal nga paraiso sa modernong-adlawng mga Saksi ni Jehova.
7 Wala pa sukad sa kataposan sa Hentil nga mga Panahon nga nabuksan ang mga mata sa pagsabot sa espirituwal nga Israelitas sa pagkakita nga ang kasamok sa kalibotan nga nahitabo sa 1914 matapos nga may nanghibilin pa kanila dinhi sa yuta. Wala usab sila makakita nga sila ug ang “dakong panon” sa “ubang mga karnero” hatagan ug pribilehiyo sa paghatag ug tibuok-kalibotang pagpamatuod sa pagkatukod sa Mesiyanikong Gingharian sa Diyos. Busa nahitabo nga sa 1919 ang buta sa espirituwal nga mga mata sa nanghibilin nabuksan, ug pagkakatingalahang panan-aw sa haduol nga umaabot ang nasabtan niadtong nabuksang mga mata!
8 Diha sa ilang mga kombensiyon sa Cedar Point, Ohio, sa 1919 ug sa 1922, sila nakadawat ug pila ka katin-awan sa buluhaton nga anaa sa unahan. Sila matinguhaon sa buluhaton sa ilang atubangan. Ang ilang espirituwal nga mga dalunggan nakadungog sa maukyabong balita sa Gingharian sa Diyos ug sa panginahanglan sa pagmantala niana. Sama sa lagsaw, sila milukso sa pag-alagad ingong mga saksi alang nianang dugay nang giampong Gingharian. Ang ilang mga dila, nga amang niadto, misinggit sa kalipay mahitungod sa gahom sa Mesiyanikong Gingharian sa kalangitan.—Pinadayag 14:1-6.
9 Oo, ingon nga daw mibuhagay ang mga tubig sa espirituwal nga kahimtang nga gipasagdang mala ug awaaw niadto, busa karon lunhawng tan-awon ang tanan ug dagaya sa tanaman—andam nga labing mabungahon. Dili ikahibulong nga ang napasig-uling katawhan ni Jehova mibatig dakong kalipay ug nalig-on sama sa lagsaw nga malagsikong nagalukso sa kahitas-an! Tinuod, ang mga tubig sa kamatuoran mahitungod sa Gingharian sa Diyos, nga natukod sa mga kamot ni Jesu-Kristo sa 1914, mibusagak sa nagkakusog nga puwersa, nga miresultag katingalahang kahupayan.—Isaias 44:1-4.
Ang “Dalan” sa Pagkabalaan
10 Unsay kahulogan sa gipahayag sa ibabaw? Kini: Una ang nanghibilin ug sa ulahi ang “dakong panon” sa “ubang mga karnero” migula sa Babilonyang Bantogan ug nahimong mga saksi sa Gingharian sa Diyos. Apan pinaagi sa unsang dalana ang ilang agian aron mabatonan pagbalik ang kahimuot sa Diyos ug maagak ngadto niining espirituwal nga paraiso? Ingon nga daw ang halapad, haluag nga alagianan gibuksan alang kanila aron hiusang makalakaw ang mga panon nga may espiritu sa paglalin nga mga Israelitas paingon ngadto sa ilang hinatag sa Diyos nga yuta. Gipadayag kini sa mahimayaong tagna ni Isaias:
11 “Ug didto may usa ka dalan, ug usa ka alagianan, ug kini pagatawgon; ang Alagianan sa Pagkabalaan. Ang hugaw dili moagi ibabaw niini. Apan kini maila sa mga linuwas, walay mga buangbuang ang mahisalaag niini. Walay leon nga hipalgan didto, ni bisan unsa nga manunukob nga mananap moadto didto.”—Isaias 35:8, 9.
12 Dihang natapos ang Gubat sa Kalibotan I wala mabuksi sa awtomatikong paagi ang modernong-adlawng “dalan.” Walo sa mga sakop sa Watch Tower Society gibilanggo gihapon ug seryosong mihinay ang buluhatong pagpamatuod. Sa Enero 4, 1919, sa tuigtuig nga tigom sa Watch Tower Society sa Pittsburgh, Pennsylvania, si J. F. Rutherford, ang presidente sa Sosyedad, gipili pag-usab sa katungdanan, bisan pa nga siya binilanggo, sumala sa kamatuoran nga siya maoy usa ka inosenteng alagad sa Labing Hataas nga Diyos.
13 Sa Marso 25, 1919, siya ug ang iyang kaubang mga binilanggo gipagawas ug sa ulahi bug-os nga gihukmang walay sala batok sa mga sumbong. Ang The Watch Tower sa Septiyembre 15, 1919, sa panid 283, nasudlan ug makadasig nga balita nga ang mga opisina sa Sosyedad, sa Oktubre 1, 1919, ibalhin gikan sa Pittsburgh ngadto sa Brooklyn Bethel diha sa 124 Columbia Heights. Dayon, sa Disyembre 15, 1919, ang gula sa The Watch Tower, kining duha ka besis mogula sa usa ka bulan nga publikasyon gianunsiyo nga patikon pag-usab sa Brooklyn, New York.
14 Busa nabuksan sa 1919 ang mahulagwayong dalan alang sa malipayong mga alagad sa Diyos. Kadtong nagtinguha nga mahimong balaan sa panan-aw ni Jehova mao ang nanglakaw diha nianang maong “dalan,” “ang Alagianan sa Pagkabalaan.” Ang bisan kinsa nga walay matarong nga tumong, mahinlong motibo, dili makaagi sa mahulagwayong paagi sa “Alagianan sa Pagkabalaan” ug mapasig-uli sa kahimuot sa Diyos.
15 Sa Hunyo 1, 1935, diha sa kombensiyon sa Washington, D.C., 840 sa “dakong panon” ang gibawtismohan sa tubig, nga naghatag ug makitang pamatuod nga sila misugod na sa pagsulod sa “dalan.” Karon, ang nagatubong milyonmilyon kanila misulod na nianang dalana, nga nakigduyog sa nagkadiyutayng gidaghanon sa dinihogang nanghibilin. Sa malinawon ug malipayong pag-ubanay, sila dungan karong nanglakaw diha sa “dalan,” determinado nga, pinaagi sa tabang sa Diyos nga Labing Makagagahom sa langit, walay makabungkag sa ilang panaghiusa.
16 Sa mahulagwayong pagkasulti, walay leon o bisan unsang manunukob nga mananap ang mapalgan niining dalana. Sa ato pa, walay makababag o makapalisang sa dinihogang nanghibilin ug sa “dakong panon.” Masaligong gitaak nila ang dalan nga gibuksan alang kanila sa ilang Manluluwas, ang Dakong Siro, nga diin ang Sion mao ang ilang destinasyon.
17 Karon, sa halawom nga “konklusyon sa sistema sa mga butang,” bukas pa gihapon kanang hinatag sa Diyos nga “dalan.” Panonpanon sa mapabilhong mga tawo nagalihok sa impormasyon nga nahulog na ang Babilonyang Bantogan sa dili pa moatake ang Dakong Siro, si Jesu-Kristo. Ug sila mikalagiw gikan niini, nagapanulod sa alagianan sa espirituwal nga paraiso, “ang Alagianan sa Pagkabalaan.”—Jeremias 50:8.
18 Ilang nakab-ot ang dili-mabatbat nga kalipay ug kasadya, sumala sa pagkapahayag niana sa kataposang bersikulo sa Isaias kapitulo 35: “Ug ang mga linukat ni Jehova mobalik ug moanha uban ang pag-awit alang sa Sion; ug ang kalipay nga walay kataposan anha sa ibabaw sa ilang mga ulo. Sila makadawat sa kasadya ug kalipay, ug ang kasubo ug paghupaw mangahanaw.” Ang ilang kasubo ug paghupaw sa ilang pagkadili kaharmoniya niadto kang Jehova nga Diyos nawala sukad sa 1919. Ug ang kasubo ug paghupaw wala na mobalik sa matinumanon, ug malipayong mga saksi. Salamat sa nagasultig kamatuoran nga Diyos, si Jehova, nga dalayegong nakatuman nianang masidlakong tagna sa Isaias kapitulo 35!
[Mga Pangutana nga Pagatun-an]
1, 2. Kanus-a nakabaton ug espirituwal nga katumanan ang Isaias kapitulo 35, ug sa unsang paagi gibatbat kini diha sa unang duha ka mga bersikulo?
3. Balik sa ika-unom nga siglo W.K.P., diin nahimutang ang yutang awaaw, ug sa unsang paagi kini magmasadya?
4, 5. (a) Kanus-a, sa modernong panahon, nahitabo ang samang kausaban gikan sa pagkahimong biniyaan nga yuta, ug ngano? (b) Unsay misangpot sa mga kalihokan sa pagpasig-uli sa dinihogang nanghibilin? (c) Sa unsang paagi gibatbat sa Isaias 35:5-7 ang ilang gibag-ong espirituwal nga kahimtang?
6. Unsa ang wala mapugngi sa padayong paglungtad sa antitipiko, modernong-adlawng Edom, ug kinsa karon ang nagasinggit nga malipayon duyog sa napasig-uling nanghibilin?
7. Unsa ang wala maaninaw sa mga mata sa pagsabot sa nanghibilin sa 1914, apan nabuksan ba ang ilang “buta” nga mga mata?
8. Unsay epekto sa duha ka mga kombensiyon sa Cedar Point, Ohio, diha sa espirituwal nga mga igdulongog ug sa mga dila sa napasig-uling nanghibilin?
9. Sa espirituwal nga paagi, sa unsang paagi mibugwak ang mga tubig sa kamingawan?
10, 11. (a) Unsay kahulogan niining makapapreskong kausaban? (b) Pinaagi sa unsang dalan nakab-ot sa nanghibilin ang ilang espirituwal nga paraiso, ug sa unsang paagi gibatbat kini sa Isaias 35:8, 9?
12. Awtomatiko bang nabuksan ang “dalan” alang sa nanghibilin dihang natapos ang Gubat sa Kalibotan I, ug unsay nahitabo sa ikaupat nga adlaw sa tuig sa 1919?
13, 14. Unsay mga hitabo sa 1919 nga nagpakita nga ang mahulagwayong dalan nabuksan alang sa nanghibilin, ug kinsa ang nanagpanglakaw niadtong maong “dalan”?
15. Unsay makitang pamatuod nga nakasulod na ang “dakong panon” sa mahulagwayong dalan?
16. Sa mahulagwayong pagkasulti, sa unsang paagi walay leon o ubang manunukob nga mananap ang makita niining dalana?
17. (a) Bisan ug halawom na kita sa “konklusyon sa sistema sa mga butang,” bukas pa ba gihapon ang “dalan”? (b) Kinsa ang nanagpanulod diha sa “Alagianan sa Pagkabalaan,” ug sa unsang paagi ilang gihimo kini?
18. Sa unsang paagi gibatbat sa kataposang bersikulo sa Isaias 35 ang presenteng kahimtang sa matinumanong mga saksi ni Jehova, ug ngadto kang kinsa ipadangat ang pasalamat alang sa katumanan niining tagnaa?