Unsay Gituohan sa mga Saksi ni Jehova?
“Buot kaming maminaw kanimo kon unsa ang imong gituohan, kay ang amo lamang nahibaloan mahitungod niining mga Kristohanon mao nga sila ginasaway bisan diin!” (Buhat 28:22, The Living Bible) Kadtong mga pangulo sa komunidad sa unang-siglong Roma naghatag ug maayong panig-ingnan. Buot silang maminaw gikan sa tinubdan, inay kay gikan lamang sa mga kritiko sa gawas.
Sa susama, ang mga Saksi ni Jehova karong adlawa kadaghanan ginadaot, ug sayop ang pagdahom nga hisayran ang tinuod bahin kanila gikan sa madapigong mga tinubdan. Busa kami malipay sa pagsaysay kanimo sa pipila sa among pangunang mga pagtuo.
Ang Bibliya, si Jesu-Kristo, ug ang Diyos
Kami nagtuo nga “ang tibuok Kasulatan dinasig sa Diyos ug mapuslanon.” (2 Timoteo 3:16) Ug bisan tuod ang pila nag-angkon nga kami dili matuod nga mga Kristohanon, kini dili gayod tinuod. Ginaduso namo sa bug-os ang pamatuod ni apostol Pedro mahitungod kang Jesu-Kristo: “Walay laing ngalan sa silong sa langit ang gikahatag taliwala sa mga tawo nga pinaagi niini maluwas kita.”—Buhat 4:12.
Ugaling lamang, sanglit si Jesus miingon nga siya mao ang “Anak sa Diyos” ug nga “Ang Amahan nagpadala kanako,” ang mga Saksi ni Jehova nagtuo nga ang Diyos labaw kay kang Jesus. (Juan 10:36; 6:57) Si Jesus mismo miila: “Ang Amahan labaw kay kanako.” (Juan 14:28; 8:28) Busa kami wala magtuo nga si Jesus sama sa Amahan, sumala sa ginaingon sa doktrinang Trinidad. Hinunoa, kami nagtuo nga siya gilalang sa Diyos ug siya ubos Kaniya.—Colosas 1:15; 1 Corinto 11:3.
Sa Ingles nga pinulongan, ang ngalan sa Diyos maoy Jehovah. Ang Bibliya nagaingon: “Ikaw, kansang ngalan lamang mao si JEHOVA, mao ang labing hataas sa tibuok yuta.” (Salmo 83:18, King James Version) Nahiuyon niana nga pahayag, gibutang ni Jesus ang dakong pasiugda sa ngalan sa Diyos, nga nagtudlo sa iyang mga sumusunod sa pag-ampo: “Amahan namo nga anaa sa mga langit, balaana ang imong ngalan.” Ug siya mismo miampo sa Diyos: “Akong gipaila ang imong ngalan ngadto sa mga tawo nga imong gihatag kanako.”—Mateo 6:9; Juan 17:6.
Ang mga Saksi ni Jehova nagtuo nga sila angay mahisama kang Jesus sa pagpaila sa ngalan ug mga katuyoan sa Diyos ngadto sa uban. Busa among gidala ang ngalang mga Saksi ni Jehova tungod kay kami nagasundog kang Jesus, “ang Matinumanong Saksi.” (Pinadayag 1:5; 3:14) Sa tukma, ang Isaias 43:10 nagaingon ngadto sa hawas nga katawhan sa Diyos: “‘Kamo ang akong mga saksi,’ nagaingon si Jehova, ‘bisan ang akong alagad nga akong napili.’”
Ang Gingharian sa Diyos
Gitudloan ni Jesus ang iyang mga sumusunod sa pag-ampo: “Umanhi ang imong gingharian,” ug iyang gihimo ang maong Gingharian nga dakong tema sa iyang pagpanudlo. (Mateo 6:10; Lucas 4:43) Ang mga Saksi ni Jehova nagtuo nga ang Gingharian maoy usa ka tinuod nga kagamhanan gikan sa langit, nga kini magamando ibabaw sa yuta, ug si Jesu-Kristo mao ang tinudlo dili-makitang Hari niini. “Ang kagamhanan igatungtong sa iyang abaga,” nagaingon ang Bibliya. “Sa kauswagan sa iyang kagamhanan ug sa pakigdait walay kataposan.”—Isaias 9:6, 7, KJ.
Bisan pa niana, si Jesu-Kristo dili mao lamang ang bugtong hari sa kagamhanan sa Diyos. Siya magbaton ug daghang kaubang magmamando uban kaniya sa langit. “Kon kita mopadayon sa pag-antos,” misulat si apostol Pablo, “kita magakauban usab sa pagmando ingon nga mga hari.” (2 Timoteo 2:12) Ang Bibliya nagapaila nga kadtong mga tawo nga banhawon aron sa pagmando uban ni Kristo sa langit maoy limitado sa “usa ka gatos ug kap-atag upat ka libo, nga gipalit gikan sa yuta.”—Pinadayag 14:1, 3.
Hinuon, ang bisan unsang kagamhanan kinahanglang may mga ginsakpan, ug ang mga Saksi ni Jehova nagtuo nga binilyon pa gawas niining langitnong mga magmamando magadawat ug kinabuhing walay kataposan. Sa kataposan ang yuta, nga nahimo nang matahom nga Paraiso, mapuno niining takos nga mga ginsakpan sa Gingharian sa Diyos, nga ang tanan nagapasakop sa pagmando ni Kristo ug sa iyang kaubang mga magmamando. Sa ingon ang mga Saksi ni Jehova lig-ong nagtuo nga ang yuta dili gayod malaglag ug matuman ang saad sa Bibliya: “Ang mga matarong mismo magapanunod sa yuta, ug sila magapuyo ibabaw niini sa walay kataposan.”—Salmo 37:29; 104:5.
Apan sa unsang paagi moabot ang Gingharian sa Diyos? Pinaagi ba sa kinabubut-ong pagpasakop sa tanang mga katawhan sa kagamhanan sa Diyos? Sa kasukwahi, ang Bibliya matinud-anong nagapakitang ang pag-abot sa Gingharian magkinahanglan sa direktang pagbalda sa Diyos sa kahikayan sa yuta: “Ang Diyos sa langit magatukod sa usa ka gingharian nga dili gayod malaglag. Ug ang gingharian mismo . . . magadugmok ug magalaglag niining tanang gingharian, ug kini mismo mobarog sa mga panahong walay katinoan.”—Daniel 2:44.
Kanus-a moabot ang Gingharian sa Diyos? Pinasukad sa mga tagna sa Bibliya nga nangatuman karon, nagtuo ang mga Saksi ni Jehova nga kini moabot sa dili madugay. Dapiton namo ang imong pagtagad sa pila ka tagna nga nagatagna sa mga hitabo sa “kataposang mga adlaw” niining daotang sistema sa mga butang. Kana sila nahitala sa Mateo 24:3-14; Lucas 21:7-13, 25-31; ug 2 Timoteo 3:1-5.
Tungod kay among ‘gihigugma si Jehova nga among Diyos uban sa tibuok namong kasingkasing, kalag, hunahuna, ug kusog, ug ang among silingan sama sa among kaugalingon,’ kami wala mabahin sa nasodnon, rasanhon, ug sa sosyal nga paagi. (Marcos 12:30, 31) Kami ilado tungod sa gugma nga gipadayag taliwala sa among Kristohanong mga igsoon nga hikaplagan diha sa tanang nasod. (Juan 13:35; 1 Juan 3:10-12) Sa ingon among gihuptan ang neyutral nga baroganan bahin sa politikanhong mga kahikayan nianang mga nasora. Among gipaningkamotang mahisama sa unang mga tinun-an ni Jesus, nga bahin kanila siya miingon: “Sila dili bahin sa kalibotan, maingon nga ako dili bahin sa kalibotan.” (Juan 17:16) Kami nagtuo nga ang pagpabiling bulag sa kalibotan nagkahulogan sa paglikay sa imoral nga kagawian nga kasagaran kaayo karong adlawa, apil ang pagbakak, pagpangawat, pakighilawas, panapaw, homoseksuwalidad, sayop nga paggamit sa dugo, pagsimbag diyosdiyos, ug ubang susamang butang nga ginasaway sa Bibliya.—1 Corinto 6:9-11; Efeso 5:3-5; Buhat 15:28, 29.
Paglaom sa Umaabot
Ang mga Saksi ni Jehova nagtuo nga ang among kinabuhi karon niining kalibotana dili mao lamang. Kami nagtuo nga gipadala ni Jehova si Kristo sa yuta aron ibubo ang iyang dugo-sa-kinabuhi ingong lukat aron ang mga tawo makabatog matarong nga pagbarog ngadto sa Diyos ug makadawat sa kinabuhing walay kataposan sa usa ka bag-ong sistema sa mga butang. Sumala sa gisulti sa usa ka apostol ni Jesus: “Kami gipahayag karon nga matarong pinaagi sa iyang dugo.” (Roma 5:9; Mateo 20:28) Ang mga Saksi ni Jehova dulot mapasalamaton sa Diyos ug sa iyang Anak tungod nianang tagana sa lukat nga nagapaposible sa umaabot nga kinabuhi.
Ang mga Saksi ni Jehova may bug-os nga pagsalig sa umaabot nga kinabuhi, nga gipasukad sa pagkabanhaw gikan sa mga patay ilalom sa Gingharian sa Diyos. Kami nagtuo, sumala sa ginatudlo sa Bibliya, nga inigkamatay sa usa ka tawo ang iyang paglungtad mohunong, nga “nianang adlawa ang iyang mga hunahuna mahanaw.” (Salmo 146:3, 4; Ezekiel 18:4; Ecclesiastes 9:5) Oo, ang umaabot nga kinabuhi alang sa mga patay gipasukad sa paghinumdom sa Diyos kanila diha sa pagkabanhaw.—Juan 5:28, 29.
Bisan pa niana, ang mga Saksi ni Jehova nagtuo nga daghang buhi karon maluwas dihang laglagon sa Gingharian sa Diyos ang tanang kagamhanan karon ug, ingon nga si Noe ug iyang pamilya naluwas sa Lunop, sila magpadayong buhi sa pagtagamtam sa kinabuhi sa walay kataposan sa nahinloang yuta. (Mateo 24:36-39; 2 Pedro 3:5-7, 13) Apan kami nagtuo nga ang pagkaluwas nagaagad sa pagkab-ot sa mga kinahanglanon ni Jehova, sumala sa ginaingon sa Bibliya: “Ang kalibotan lumalabay . . . , apan ang nagabuhat sa kabubut-on sa Diyos magapabilin sa walay kataposan.”—1 Juan 2:17; Salmo 37:11; Pinadayag 7:9, 13-15; 21:1-5.
Dayag, dili posibleng hisgotan ang tanang pagtuo sa mga Saksi ni Jehova, apan dapiton ka namo sa pagbatog dugang impormasyon.
Gawas kon ipaila, ang tanang kinutlo sa Bibliya maoy gikan sa New World Translation of the Holy Scriptures.
[Blurb sa panid 4]
Among gidala ang ngalang mga Saksi ni Jehova tungod kay kami nagasundog kang Jesus