Kinabuhi sa Malinawong Bag-ong Kalibotan
Iniglantaw nimo sa hulagway niining pulyetoha, unsay imong bation? Dili ba mangandoy ang imong kasingkasing sa kalinaw, kalipay, ug kauswagan nga makita dinha? Tino gayod. Apan damgo ba lamang, o handurawan, ang pagtuo nga kining mga kahimtanga may panahong molungtad sa yuta?
Kana tingali ang hunahunaon sa kadaghanang tawo. Ang tinuod nga mga panghitabo karon mao ang gubat, krimen, kagutmanan, sakit, pagkatigulang—sa paghisgot lamag pipila. Bisan pa niana may katarongan sa paglaom. Sa paglantaw sa umaabot, ang Bibliya nagasugid mahitungod sa usa ka “bag-ong mga langit ug usa ka bag-ong yuta nga atong ginapaabot sumala sa saad [sa Diyos], ug ang pagkamatarong magapabilin niini.”—2 Pedro 3:13; Isaias 65:17.
Kining “bag-ong mga langit” ug “bag-ong yuta,” sumala sa Bibliya, dili bag-o materyal nga mga langit o bag-o literal nga yuta. Ang pisikal nga yuta ug mga langit gibuhat nga hingpit, ug ang Bibliya nagapakita nga sila magpabilin sa walay kataposan. (Salmo 89:36, 37; 104:5) Ang “bag-ong yuta” mao unyay matarong nga katilingban sa mga tawo nga magapuyo sa yuta, ug ang “bag-ong mga langit” mao unyay hingpit langitnong gingharian, o kagamhanan, nga magamando ibabaw niining yutan-ong katilingban sa mga tawo. Apan realistiko ba ang pagtuo nga posible ang “usa ka bag-ong yuta,” o mahimayaong bag-ong kalibotan?
Aw, palandonga ang kamatuoran nga kanang maayong mga kahimtang maoy bahin sa unang katuyoan sa Diyos niining yutaa. Gibutang niya ang unang tawhanong magtiayon sa yutan-ong Paraiso sa Eden ug gihatagan silag kahibulongan nga buluhaton: “Sumanay ug dumaghan kamo ug pun-on ninyo ang yuta ug magagahom kamo niini.” (Genesis 1:28) Oo, ang katuyoan sa Diyos mao nga sila magbatog mga anak ug sa kataposan magpakaylap sa ilang Paraiso sa tibuok yuta. Bisan pag sa ulahi gipalabi nila ang pagsupak sa Diyos, sa ingon nagpamatuod nga dili takos mabuhi sa walay kataposan, ang unang katuyoan sa Diyos wala mausab. Ug kini pagatumanon sa usa ka bag-ong kalibotan!—Isaias 55:11.
Sa pagkamatuod, inig-ampo nimo sa Pag-ampo sa Ginoo, o Amahan Namo, nga mangayo nga moabot ang Gingharian sa Diyos, ikaw nagaampo nga ang iyang langitnong kagamhanan magwagtang sa pagkadaotan gikan sa yuta ug magmando ibabaw niining bag-ong kalibotan. (Mateo 6:9) Ug kita makasalig nga tubagon sa Diyos kanang pag-ampoa, sanglit ang iyang Pulong nagasaad: “Ang mga matarong mismo magapanunod sa yuta, ug sila magapuyo niini sa walay kataposan.”—Salmo 37:29.
Kinabuhi sa Bag-ong Kalibotan sa Diyos
Ang Gingharian sa Diyos magpatunghag mga kaayohan sa yuta nga dili ikatanding, nga himoon ang tanang butang nga maayo nga sa sinugdan mao ang katuyoan sa Diyos nga pahimuslan sa iyang katawhan sa yuta. Mawala na ang mga dinumtanay ug mga pagdapigdapig, ug sa kataposan ang tanan sa yuta mahimong tinuod nga higala sa usag usa. Sa Bibliya, ang Diyos nagasaad nga iyang ‘pahunongon ang mga gubat hangtod sa kinatumyan sa yuta.’ “Ang nasod dili mobakyaw ug espada batok sa nasod, ni sila makakat-on pa sa gubat.”—Salmo 46:9; Isaias 2:4.
Ang tibuok yuta sa kataposan mahidangat sa samag-tanaman paraisong kahimtang. Ang Bibliya nagaingon: “Ang kamingawan ug ang mala nga yuta magakalipay, ug ang umaw nga kapatagan magmasadyaon ug mamulak sama sa rosas. . . . Kay sa kamingawan magagula ang mga tubig, ug ang mga suba sa umaw nga kapatagan. Ug ang napagba nga yuta mahimong linaw sa mga tangbo, ug ang giuhaw nga yuta sama sa mga tubod sa tubig.”—Isaias 35:1, 6, 7.
May bug-os unyang katarongan sa paglipay sa Paraisong yuta. Ang katawhan dili na pagagutomon tungod sa kakulang sa pagkaon. “Ang yuta mismo mohatag sa iyang abot,” ang Bibliya nagaingon. (Salmo 67:6; 72:16) Ang tanan magpahimulos sa mga bunga sa ilang paghago, kay ang atong Maglalalang nagasaad: “Sila magatanom ug mga parrasan ug magakaon sa ilang mga bunga. . . . sila dili magatanom ug lain ang magakaon.”—Isaias 65:21, 22.
Sa bag-ong kalibotan sa Diyos, ang katawhan dili na maghuot sa dagko kaayong mga tinukod sa apartment o mga barongbarong, kay ang Diyos nagtuyo: “Sila magatukod ug mga balay ug magapuyo niana . . . Sila dili magatukod ug lain ang magapuyo.” Ang Bibliya nagasaad usab: “Sila dili magahago sa walay kapuslanan.” (Isaias 65:21-23) Sa ingon ang katawhan magbatog mabungahon, makapatagbaw nga buluhaton. Ang kinabuhi unya dili makapuol.
Sa igong panahon, ipasig-uli pa sa Gingharian sa Diyos ang makigdaitong relasyon nga naglungtad sa tanaman sa Eden taliwala sa mga hayop, ug taliwala sa mga hayop ug sa mga tawo. Ang Bibliya nagaingon: “Ang lobo mohigda sa kadiyut ipon sa laking nating kordero, ug ang leopardo molubog uban sa nating kanding, ug ang nating baka ug ang balhiboong nating leyon ug ang linaming nga mananap manag-ipon; ug ang usa ka bata nga gamay maoy magamando kanila.”—Isaias 11:6-9; Oseas 2:18.
Tiaw na, sa Paraisong yuta mangaayo usab ang tanang sakit ug mga kaluyahon sa lawas! Ang Pulong sa Diyos nagapasalig kanato: “Walay molupyo ang magaingon: ‘Ako masakiton.’” (Isaias 33:24) “[Ang Diyos] magapahid sa tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit. Ang unang mga butang miagi na.”—Pinadayag 21:4.
Kon sa Unsang Paagi Kini Posible Alang Kanimo
Tinong ang imong kasingkasing matandog gayod sa mga saad sa Diyos mahitungod sa kinabuhi sa iyang bag-ong kalibotan sa pagkamatarong. Ug bisan tuod isipon tingali sa pipila nga ang pagkatuman nianang mga panalangina labihan ka maayo aron matuman, sila dili kaayo ingong labihan ka maayo kon magagikan sa atong mahigugmaong Maglalalang.—Salmo 145:16; Miqueas 4:4.
Hinuon, adunay mga kinahanglanon nga kab-oton aron kita magapuyo sa walay kataposan sa umaabot nga Paraiso sa yuta. Gipakita ni Jesus ang usa ka pangunang kinahanglanon, nga miingon sa pag-ampo sa Diyos: “Kini nagkahulogan sa kinabuhing walay kataposan, ang ilang pagkuhag kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.
Busa kon buot gayod natong mopuyo sa bag-ong kalibotan sa Diyos, kinahanglan unang hisayran nato ang kabubut-on sa Diyos ug dayon buhaton kini. Kay kini usa ka kamatuoran: Kining “kalibotana lumalabay ug mao man usab ang pangibog niini, apan ang nagabuhat sa kabubut-on sa Diyos magapabilin sa walay kataposan,” sa pagtagamtam sa walay kataposan sa mga panalangin nga ibubo sa atong mahigugmaong Maglalalang.—1 Juan 2:17.
Gawas kon ipaila, ang tanang kinutlo sa Bibliya maoy gikan sa New World Translation of the Holy Scriptures.