Ang Diyos Labaw ba ni Jesus sa Tanang Panahon?

SI JESUS wala gayod moangkon nga mao ang Diyos. Ang tanang gipamulong niya bahin sa iyang kaugalingon nagapaila nga wala siya mag-isip nga sama sa Diyos sa bisan unsang paagi​—dili sa gahom, dili sa kahibalo, dili sa edad.

Sa matag yugto sa panahon sa iyang paglungtad, kon kaha sa langit o sa yuta, ang iyang sinultihan ug kagawian nagabanaag sa iyang pagkaubos sa Diyos. Ang Diyos maoy superyor o labaw sa tanang panahon, si Jesus maoy ubos nga gilalang sa Diyos.

Si Jesus Gipakitang Lahi sa Diyos

MATAG karon ug unya, gipakita ni Jesus nga siya usa ka linalang nga separado sa Diyos ug nga siya, si Jesus, may Diyos nga labaw kaniya, usa ka Diyos nga iyang gisimba, usa ka Diyos nga gitawag niyang “Amahan.” Sa pag-ampo ngadto sa Diyos, nga mao, ang Amahan, si Jesus miingon, “Ikaw, ang bugtong matuod nga Diyos.” (Juan 17:3) Sa Juan 20:​17 siya miingon kang Maria Magdalena: “Ako mosaka ngadto sa akong Amahan ug inyong Amahan, ngadto sa akong Diyos ug inyong Diyos.” (RS, Katolikong edisyon) Sa 2 Corinto 1:​3 si apostol Pablo nagapamatuod niining relasyona: “Bulahan ang Diyos ug Amahan sa atong Ginoong Jesu-Kristo.” Sanglit si Jesus may Diyos, ang iyang Amahan, siya dili mahimo nga sa samang panahon mao ang maong Diyos.

Si apostol Pablo wala magpanuko sa paghisgot bahin kang Jesus ug sa Diyos ingong lahi ug separado: “Alang kanato adunay usa ka Diyos, ang Amahan, . . . ug adunay usa ka Ginoo, si Jesu-Kristo.” (1 Corinto 8:​6, JB) Gipakita sa apostol ang pagkalahi sa gihisgotan niya “ang presensiya sa Diyos ug ni Kristo Jesus ug sa piniling mga manulonda.” (1 Timoteo 5:​21, RS Common Bible) Maingon nga si Pablo naghisgot bahin kang Jesus ug sa mga manulonda ingong lahi gikan sa usag usa sa langit, mao man usab si Jesus ug ang Diyos.

Ang mga pulong ni Jesus sa Juan 8:​17, 18 makahuloganon usab. Siya nagaingon: “Sa imong kaugalingong Kasugoan kini nahisulat, ‘Ang pamatuod sa duha ka tawo matuod.’ Ako mao ang nagapamatuod mahitungod sa akong kaugalingon, ug ang Amahan nga nagpadala kanako nagapamatuod mahitungod kanako.” Dinhi gipakita ni Jesus nga siya ug ang Amahan, nga mao, ang Diyos nga Makagagahom sa Tanan, maoy duha ka lahing persona, kay sa unsang paagi ikaingon nga tinuod dunay duha ka saksi?

Si Jesus dugang nagpakita nga siya separado gikan sa Diyos sa pag-ingon: “Nganong ginatawag ninyo ako nga maayo? Walay usa ang maayo gawas sa Diyos lamang.” (Marcos 10:​18, JB) Busa si Jesus nag-ingon nga walay mausa ang sama ka maayo kay sa Diyos, wala bisan pa si Jesus. Ang Diyos maayo sa paagi nga nagabulag kaniya gikan kang Jesus.

Mapasakopong Alagad sa Diyos

MATAG karon ug unya, si Jesus mihimog mga pamulong sama sa: “Ang Anak dili makabuhat sa bisan unsa sa iyang kaugalingong kabubut-on, siya makabuhat lamang kon unsay iyang nakita nga ginabuhat sa iyang Amahan.” (Juan 5:​19, The Holy Bible, ni Monsenyor R. A. Knox) “Ako nanaog gikan sa langit aron sa pagbuhat, dili sa akong kaugalingong kabubut-on, apan sa kabubut-on sa nagpadala kanako.” (Juan 6:38) “Ang akong ginatudlo dili ako, kondili iya sa nagpadala kanako.” (Juan 7:16) Dili ba ang nagpadala labaw sa gipadala?

Kining relasyona dayag diha sa sambingay ni Jesus sa parrasan. Gipanig-ingon niya ang Diyos, iyang Amahan, ngadto sa tag-iya sa parrasan, kinsa mipanaw sa layong dapit ug gitugyan kana sa mga saop, nga naghawas sa Hudiyong klero. Sa dihang ang tag-iya sa ulahi nagsugo sa usa ka ulipon aron makakuha sa bunga sa parrasan, ang mga saop nagbunal sa ulipon ug siya gipalakaw nga walay dala. Unya gipadala sa tag-iya ang ikaduhang ulipon, ug sa ulahi ang ikatulo, nga silang duha nakabaton sa samang pagtagad. Sa kataposan, ang tag-iya miingon: “Akong ipadala ang akong anak [Jesus] nga pinalangga. Lagmit siya ilang pagatahoron.” Apan ang tikasang mga saop miingon: “‘Kini mao ang manununod; patyon nato siya, aron maato na ang kabilin.’ Niana sila naglabay kaniya sa gawas sa parrasan ug nagpatay kaniya.” (Lucas 20:​9-16) Sa ingon giilustrar ni Jesus ang iyang kaugalingong posisyon ingon nga pinadala sa Diyos aron sa pagbuhat sa kabubut-on sa Diyos, maingon nga ang usa ka amahan magpadala sa usa ka mapasakopong anak.

Ang mga sumusunod ni Jesus sa tanang panahon nag-isip kaniya ingong mapasakopong alagad sa Diyos, dili sama sa Diyos. Sila miampo ngadto sa Diyos mahitungod sa “imong balaang alagad si Jesus, si kinsa imong gidihogan, . . . ug ang mga ilhanan ug mga katingalahan gihimo pinaagi sa ngalan sa imong balaang alagad si Jesus.”​—Buhat 4:​23, 27, 30, RS, Katolikong edisyon.

Ang Diyos Labaw sa Tanang Panahon

SA SINUGDANAN mismo sa ministeryo ni Jesus, sa iyang paghaw-as sa tubig nga gibawtismohan kaniya, ang tingog sa Diyos gikan sa langit miingon: “Kini mao ang akong Anak, ang pinalangga, nga akong giuyonan.” (Mateo 3:​16, 17) Ang Diyos nag-ingon ba nga siya mao ang iyang kaugalingong anak, nga iyang giuyonan, nga iyang gipadala ang iyang kaugalingon? Wala, ang Diyos nga Maglalalang nag-ingon nga siya, ingon nga labaw, nag-uyon sa usa nga ubos, ang iyang Anak si Jesus, alang sa buluhaton sa unahan.

Gipaila ni Jesus ang pagkalabaw sa iyang Amahan sa miingon siya: “Ang espiritu ni Jehova ania kanako, tungod kay ako iyang gidihogan sa pagpahayag sa maayong balita ngadto sa mga kabos.” (Lucas 4:18) Ang pagdihog mao ang paghatag ug pagbulot-an o usa ka komisyon o sugo sa usa nga labaw ngadto sa usa nga wala pay awtoridad. Dinhi ang Diyos sa tin-aw mao ang labaw, kay iyang gidihogan si Jesus, nga mihatag kaniyag awtoridad nga wala niya mabatoni sa nangagi.

Gitin-aw ni Jesus ang pagkalabaw sa iyang Amahan sa dihang ang inahan sa duha ka disipulo mihangyo nga ang iyang mga anak molingkod nga ang usa sa tuo ug ang usa sa wala ni Jesus sa dihang siya mahiabot sa iyang Gingharian. Si Jesus mitubag: “Mahitungod sa mga lingkoranan sa akong tuong kamot ug sa akong wala, kini dili akoa sa pagtugot; kini iya kanila si kinsa gihatagan sa akong Amahan,” nga mao, ang Diyos. (Mateo 20:​23, JB) Kon si Jesus mao pa ang Diyos nga Makagagahom sa Tanan, ang maong mga posisyon iyaha unta nga ikahatag. Apan si Jesus dili makahatag kanila, kay kana iyaha sa Diyos sa paghatag, ug si Jesus dili mao ang Diyos.

Ang kaugalingong mga pag-ampo ni Jesus maoy gamhanang panig-ingnan sa iyang ubos nga relasyon ngadto sa iyang Diyos. Sa dihang si Jesus hapit nang mamatay, gipakita niya kon kinsa ang iyang labaw pinaagi sa pag-ampo: “Amahan, kon buot mo, kuhaa kining kopa gikan kanako. Bisan pa niana, dili ang akong kabubut-on, apan ang imoha ang mamatuman.” (Lucas 22:42) Kang kinsa siya nag-ampo? Ngadto sa usa ka bahin niya? Dili, siya nag-ampo ngadto sa usa nga bug-os separado, ang iyang Amahan, ang Diyos, kansang kabubut-on maoy labaw ug lahi kay sa iyaha, ang bugtong Usa nga makaarang sa “pagkuha niining kopa.”

Unya, samtang duol na siyang mamatay, si Jesus mituwaw: “Diyos ko, Diyos ko, nganong gibiyaan mo ako?” (Marcos 15:​34, JB) Kang kinsa man si Jesus mituwaw? Sa iyang kaugalingon o sa bahin sa iyang kaugalingon? Sa pagkamatuod, ang maong pagtuwaw, “Diyos ko,” wala maggikan sa usa nga nag-isip sa iyang kaugalingon nga mao ang Diyos. Ug kon si Jesus mao ang Diyos, nan si kinsa man ang mibiya kaniya? Iyang kaugalingon? Kana dili makataronganon. Si Jesus miingon usab: “Amahan, gitugyan ko sa imong mga kamot ang akong espiritu.” (Lucas 23:46) Kon si Jesus mao ang Diyos, unsay hinungdan iyang igatugyan ang iyang espiritu ngadto sa Amahan?

Sa pagkamatay ni Jesus, siya didto sa lubnganan sulod sa mga bahin sa tulo ka adlaw. Kon siya mao ang Diyos, nan ang Habakkuk 1:​12 sayop sa nagaingon kini: “Oh Diyos ko, Balaan ko, ikaw dili mamatay.” Apan ang Bibliya nagaingon nga si Jesus namatay ug walay hunahuna sulod sa lubnganan. Ug kinsay nagbanhaw kang Jesus gikan sa mga patay? Kon siya tinuod nga patay, siya dili makabanhaw sa iyang kaugalingon. Sa laing bahin, kon siya dili tinuod nga patay, ang iyang nagpakaaron-ingnong pagkamatay dili makabayad sa bili sa lukat sa kasal-anan ni Adan. Apan gibayran gayod niya ang maong bili sa bug-os pinaagi sa iyang tinuod nga kamatayon. Busa mao “ang Diyos [nga] nagbanhaw [kang Jesus] pinaagi sa pagbadbad sa mga kasakit sa kamatayon.” (Buhat 2:24) Ang labaw, ang Diyos nga Makagagahom sa Tanan, maoy nagbanhaw sa ubos, ang iyang alagad si Jesus, gikan sa mga patay.

Ang kamatuoran ba nga si Jesus makahimog mga milagro, sama sa pagbanhaw ug mga tawo, nagapaila nga siya maoy Diyos? Aw, ang mga apostol ug ang mga manalagnang si Elias ug Eliseo nagbaton nianang gahoma, usab, apan kana wala maghimo kanilang labaw kay sa mga tawo. Ang Diyos mihatag ug gahom sa paghimog mga milagro ngadto sa mga manalagna, kang Jesus, ug sa mga apostol sa pagpakita nga Siya nagpaluyo kanila. Apan kana wala maghimo ni bisan kinsa kanila nga bahin sa usa ka daghag-persona nga Pagkadiyos.

Si Jesus May Limitadong Kahibalo

SA DIHANG si Jesus mihatag sa iyang panagna mahitungod sa kataposan niining sistema sa mga butang, siya miingon: “Apan nianang adlawa o taknaa walay nahibalo, bisan ang mga manulonda sa langit, ni ang Anak, apan ang Amahan lamang.” (Marcos 13:​32, RS, Katolikong edisyon) Kon si Jesus mao pa ang samang Anak nga bahin sa Pagkadiyos, siya nahibalo unta kon unsay nahibaloan sa Amahan. Apan si Jesus wala mahibalo, kay siya dili man sama sa Diyos.

Sa susama, atong mabasa sa Hebreohanon 5:​8 nga si Jesus “nakakat-on sa pagkamasinugtanon gikan sa mga butang iyang giantos.” Makahanduraw ba kita nga ang Diyos kinahanglang may pagakat-onan? Dili, apan si Jesus kinahanglan, kay wala siya mahibalo sa tanan nga nahibaloan sa Diyos. Ug kinahanglang siya makakat-on sa butang nga dili gayod kinahanglang makat-onan sa Diyos​—ang pagkamasinugtanon. Ang Diyos dili kinahanglang may pagasugton.

Ang kalainan tali sa nahibaloan sa Diyos ug sa nahibaloan ni Kristo naglungtad usab sa dihang si Jesus gibanhaw ngadto sa langit aron mahauban sa Diyos. Matikdi ang unang mga pulong sa kataposang basahon sa Bibliya: “Ang pinadayag ni Jesu-Kristo, nga gihatag sa Diyos kaniya.” (Pinadayag 1:​1, RS, Katolikong edisyon) Kon si Jesus mismo maoy bahin sa Pagkadiyos, kinahanglan bang siya hatagag pinadayag sa laing bahin sa Pagkadiyos​—ang Diyos? Tinong siya unta mahibalo nianang tanan, kay ang Diyos nahibalo. Apan si Jesus wala mahibalo, kay siya dili man Diyos.

Si Jesus Nagapadayong Ubos

SA IYANG una-tawhanong paglungtad, ug usab dinhi sa yuta, si Jesus maoy ubos sa Diyos. Sa iyang pagkabanhaw, siya nagpadayon diha sa ubos, ikaduhang posisyon.

Sa paghisgot sa pagkabanhaw ni Jesus, si Pedro ug kadtong kauban niya misulti sa Hudiyong Sanhedrin: “Ang Diyos nagbanhaw kaniya [Jesus] . . . ngadto sa iyang tuong kamot.” (Buhat 5:31) Si Pablo miingon: “Ang Diyos nagbayaw kaniya ngadto sa labaw nga katungdanan.” (Filipos 2:9) Kon si Jesus Diyos, unsaon man pagbayaw kang Jesus, nga mao, pagpataas kaniya ngadto sa taas pang katungdanan kay sa iya nang gipahimuslan kanhi? Siya unta mao nay nabayaw nga bahin sa Trinidad. Kon, una pa sa pagkabayaw niya, si Jesus sama sa Diyos, ang pagbayaw kaniya sa dugang maghimo unta kaniyang labaw sa Diyos.

Si Pablo miingon usab nga si Kristo misulod sa “langit mismo, aron siya makaatubang sa presensiya sa Diyos alang kanato.” (Hebreohanon 9:​24, JB) Kon ikaw moatubang sa presensiya sa lain, sa unsang paagi ikaw mahimong mao kanang personaha? Dili mahimo kana. Kinahanglang ikaw lahi ug separado.

Sa susama, una pa batoha ngadto sa kamatayon, ang martir nga si Esteban “mitutok sa langit ug nakakita sa himaya sa Diyos ug kang Jesus nga nagtindog sa tuong kamot sa Diyos.” (Buhat 7:55) Tin-aw, iyang nakita ang duha ka separadong indibiduwal​—apan walay balaang espiritu, walay Trinidad nga Pagkadiyos.

Sa asoy sa Pinadayag 4:​8 hangtod sa 5:​7, gipakita ang Diyos nga naglingkod sa iyang langitnong trono, apan si Jesus wala. Kinahanglang siya moduol sa Diyos aron sa pagkuha sa linukot nga basahon gikan sa tuong kamot sa Diyos. Kini nagapakita nga sa langit si Jesus dili Diyos kondili separado gikan kaniya.

Nahiuyon sa nahisgotan na, ang Bulletin of the John Rylands Library sa Manchester, Inglaterra, nagaingon: “Sa iyang tapos-pagkabanhaw langitnong kinabuhi, si Jesus gihulagway ingong naghawid sa personal nga pagkalain sa matag tipik ingong linain ug separado gikan sa persona sa Diyos ingon nga iyang nabatonan diha sa iyang kinabuhi sa yuta ingong ang yutan-ong Jesus. Tapad sa Diyos ug kon itandi sa Diyos, siya mopatim-aw, sa pagkamatuod, ingong laing langitnong linalang diha sa langitnong hukmanan sa Diyos, sama ra sa mga manulonda​—bisan pag ingong Anak sa Diyos, siya nahimutang sa laing kategoriya, ug sa posisyon labaw kaayo kanila.”​—Itandi ang Filipos 2:11.

Ang Bulletin nagaingon usab: “Bisan pa niana, kon unsa man ang gipamulong bahin sa iyang kinabuhi ug mga katungdanan ingong langitnong Kristo wala magkahulogan o magpasabot nga sa balaang kahimtang siya maoy sama sa Diyos mismo ug bug-os maoy Diyos. Sa kasukwahi, diha sa Bag-ong Testamento nga hulagway sa iyang langitnong persona ug ministeryo atong makita ang usa ka pigura nga separado ug ubos sa Diyos.”

Sa walay-kataposang umaabot sa langit, si Jesus mopadayong separado, ubos nga alagad sa Diyos. Ang Bibliya nagapahayag niini niining paagiha: “Pagkahuman niana moabot ang kataposan, sa dihang iyang [Jesus sa langit] igatugyan ang gingharian ngadto sa Diyos ang Amahan . . . Unya ang Anak mismo magpasakop sa Usa nga nagsakop sa tanang butang ngadto kaniya, aron ang Diyos mamahimong tanan sa tanan.”​—1 Corinto 15:​24, 28, NJB.

Si Jesus Wala Gayod Moangkon nga Mao ang Diyos

ANG baroganan sa Bibliya matin-aw. Dili lamang ang Diyos nga Makagagahom sa Tanan, si Jehova, usa ka personalidad nga separado kang Jesus apan Siya sa tanang panahon maoy iyang labaw. Si Jesus sa tanang panahon gipadayag ingong separado ug ubos, usa ka mapaubsanong alagad sa Diyos. Kana ang hinungdan ang Bibliya tin-awng nagaingon nga “ang ulo ni Kristo mao ang Diyos” sa samang paagi nga “ang ulo sa matag lalaki mao si Kristo.” (1 Corinto 11:3) Ug kini ang hinungdan si Jesus mismo miingon: “Ang Amahan labaw kay kanako.”​—Juan 14:​28, RS, Katolikong edisyon.

Ang kamatuoran mao nga si Jesus dili Diyos ug wala gayod moangkon niana. Kini ginaila sa nagkadaghang mga eskolar. Sumala sa ginaingon sa Rylands Bulletin: “Ang kamatuoran kinahanglang atubangon nga ang panukiduki sa Bag-ong Testamento latas, ingnon ta, sa miaging trayenta o kuwarenta ka tuig nag-agak sa nagkadaghang madungganong mga eskolar sa Bag-ong Testamento sa konklusyon nga si Jesus . . . wala gayod magtuo nga siya Diyos.”

Ang Bulletin nagaingon usab bahin sa unang-siglong mga Kristohanon: “Busa, sa dihang gihatag nila [kang Jesus] ang mapasidungganong mga titulo sama sa Kristo, Anak sa tawo, Anak sa Diyos ug Ginoo, kini maoy mga paagi sa pag-ingon dili nga siya maoy Diyos, apan nga gibuhat niya ang buluhaton sa Diyos.”

Busa, bisan ang pila ka relihiyosong eskolar nagaangkon nga ang ideya nga si Jesus maoy Diyos nahasupak sa tibuok nga pamatuod sa Bibliya. Dinha, ang Diyos maoy labaw sa tanang panahon, ug si Jesus mao ang ubos nga alagad.

[Blurb sa panid 19]

‘Ang panukiduki sa Bag-ong Testamento miagak sa nagkadaghang eskolar sa konklusyon nga si Jesus wala gayod magtuo nga siya Diyos.’​—Bulletin of the John Rylands Library

[Hulagway sa panid 17]

Giingnan ni Jesus ang mga Hudiyo: “Ako nanaog gikan sa langit aron sa pagbuhat, dili sa akong kabubut-on, apan sa kabubut-on sa nagpadala kanako.”​—Juan 6:​38

[Hulagway sa panid 18]

Sa mituwaw si Jesus: “Diyos ko, Diyos ko, nganong gibiyaan mo ako?” tinong siya wala magtuo nga siya mao ang Diyos