Kapitulo 74
Tambag Kang Marta, ug Instruksiyon Bahin sa Pag-ampo
SA LAKAT sa ministeryo ni Jesus sa Judea, misulod siya sa balangay sa Betania. Kini ang dapit nga gipuy-an ni Marta, Maria, ug ilang igsoong lalaki si Lasaro. Tingali nahibalag ni Jesus kini silang tulo sayosayo sa iyang ministeryo ug mao nga suod na nilang higala. Sa bisan unsang paagi, niadtong panahona si Jesus miadto sa balay ni Marta ug iyang giabiabi.
Ikag si Marta nga madulotan si Jesus sa kinamaayohan nga iyang nabatonan. Sa pagkamatuod, usa ka dakong kadungganan nga moduaw ang gisaad nga Mesiyas sa kaugalingong balay! Busa si Marta napuliki sa paglutog daghang pagkaon ug pag-atiman sa daghan pang detalye nga gidesinyo sa paghimong mas kahimut-anan ug hamugaway ang pagpuyo ni Jesus.
Sa laing bahin, ang igsoong babaye ni Marta si Maria milingkod sa tiilan ni Jesus ug namati kaniya. Sa taudtaod, si Marta miduol ug miingon kang Jesus: “Ginoo, wala bay bili kanimo nga gipasagdan lamang ako sa akong igsoon sa pag-atiman sa mga butang? Busa, sultihi gani siya sa pagtabang kanako.”
Apan si Jesus wala mosulti sa bisan unsa kang Maria. Hinunoa, gitambagan niya si Marta tungod kay mabalak-on kaayo sa materyal nga mga butang. “Marta, Marta,” siya malulutong nagbadlong kaniya, “ikaw mabalak-on ug nabalisa sa daghang butang. Bisan pa niana, diyutay ra ang butang nga gikinahanglan, ngani, usa ra.” Nag-ingon si Jesus nga dili kinahanglang gugolon ang daghang panahon sa paglutog daghang potahe alang sa usa ka pagkaon. Ang diyutay lamang o usa ra ka potahe paigo na.
Maayo ang katuyoan ni Marta; buot niyang mahimong maabiabihon nga tagbalay. Ugaling, tungod sa iyang mabalak-ong pagtagad sa materyal nga mga tagana, nawad-an siyag higayon nga makadawat ug personal nga instruksiyon gikan sa kaugalingong Anak sa Diyos! Busa si Jesus mihinapos: “Sa iyang bahin, gipili ni Maria ang maayong bahin, ug kini dili pagakuhaon gikan kaniya.”
Sa ulahi, sa laing okasyon, ang usa ka tinun-an nangutana kang Jesus: “Ginoo, tudloi kami kon unsaon sa pag-ampo, sama nga gitudloan usab ni Juan ang iyang mga tinun-an.” Lagmit ang maong tinun-an wala diha sa mga usa ka tuig ug tunga nga sayosayo sa gihatag ni Jesus ang sulundang pag-ampo sa iyang Wali sa Bukid. Mao nga gisubli ni Jesus ang iyang mga instruksiyon apan unya gihatag ang usa ka ilustrasyon sa pagpasiugda sa panginahanglang molahutay sa pag-ampo.
“Kinsa kaninyo ang may higala,” si Jesus misugod, “ug moadto kaniya sa tungang gabii ug moingon kaniya, ‘Higala, pabayloa akog tulo ka tinapay, tungod kay nahiabot kanako ang usa ka higala nga nagapanaw ug ako walay ikadulot kaniya’? Ug kadtong anaa sa sulod motubag, ‘Ayaw ako pagsamoka. Ang pultahan gitrangkahan na, ug ang akong mga bata ania uban kanako sa higdaanan; dili ako makabangon ug makahatag kanimog bisan unsa.’ Sultihan ko kamo, Bisan pag siya dili makabangon ug makahatag kaniyag bisan unsa tungod sa iyang pagkahigala, tungod sa iyang pagsigisiging hangyo siya mobangon ug mohatag kaniya sa bisan unsa nga iyang kinahanglanon.”
Sa maong pagtandi si Jesus wala magpasabot nga si Jehova nga Diyos dili gustong motubag sa mga hangyo, sama sa higala sa iyang estorya. Dili, apan siya nag-ilustrar nga kon ang walay-gustong higala motubag sa malahutayong mga hangyo, pagkalabi pa ang atong mahigugmaong langitnong Amahan! Busa si Jesus mipadayon: “Busa ako magaingon kaninyo, Magpadayon kamo sa pagpangayo, ug kini igahatag kaninyo; magpadayon sa pagpangita, ug kamo makakaplag; magpadayon sa pagpanuktok, ug kamo pagabuksan. Kay ang tanan nga mangayo makadawat, ug ang tanan nga mangita makakaplag, ug ang tanan nga manuktok pagabuksan.”
Unya si Jesus nagtumong sa dili-hingpit, makasasalang tawhanong mga amahan, nga nag-ingon: “Sa pagkamatuod, kinsang amahana sa inyong taliwala nga, kon ang iyang anak mangayo ug isda, magahatag hinuon kaniyag usa ka bitin inay sa isda? O kon siya mangayo usab ug itlog, magahatag kaniyag tanga? Busa, kon kamo, bisan tuod daotan, mahibalo nga mohatag ug maayong mga gasa ngadto sa inyong mga anak, pagkalabi pa nga ang Amahan sa langit magahatag ug balaang espiritu ngadto niadtong mangayo kaniya!” Sa pagkamatuod, dako kaayong makatukmod nga pagdasig ang gihatag ni Jesus nga magmalahutayon sa mga pag-ampo. Lucas 10:38–11:13.
▪ Nganong gihimo ni Marta ang dako kaayong pagpangandam alang kang Jesus?
▪ Unsay gihimo ni Maria, ug nganong gidayeg siya ni Jesus inay si Marta?
▪ Unsay nakaagda kang Jesus sa pagsubli sa iyang mga instruksiyon bahin sa pag-ampo?
▪ Giunsa ni Jesus sa pag-ilustrar ang panginahanglan nga magmalahutayon sa pag-ampo?