Kapitulo 79
Usa ka Nasod Nawala, Apan Dili ang Tanan
HUMAN sa pakighisgot ni Jesus uban sa mga tawong nagtigom diha sa gawas sa balay sa usa ka Pariseo, dihay mga tawo nga mitaho kaniya “mahitungod sa mga Galileanhon kansang dugo gisagol [sa gobernador sa Roma si Poncio] Pilato diha sa ilang mga halad-inihaw.” Kini nga mga Galileanhon mao tingali ang nangamatay dihang libolibo sa mga Hudiyo miprotesta sa paggamit ni Pilato sa salapi gikan sa tipiganan sa salapi sa templo aron sa pagtukod ug agosanan sa tubig aron adunay tubig ang Jerusalem. Kadtong mitaho niining butanga ngadto kang Jesus tingali nagsugyot nga nag-antos ang mga Galileanhon sa katalagman tungod sa ilang daotang mga binuhatan.
Apan, gitul-id sila ni Jesus, nga nangutana: “Nagdahom ba kamo nga ang maong mga Galileanhon labi pa ka makasasala kay sa tanang mga Galileanhon tungod kay sila nanag-antos niining mga butanga? Dili,” si Jesus mitubag. Dayon iyang gigamit ang hitabo sa pagpasidaan sa mga Hudiyo: “Gawas kon maghinulsol kamo, kamong tanan mangamatay usab sa ingon.”
Mipadayon, gisubli ni Jesus ang laing hitabo sa maong dapit, tingali nalangkit usab sa pagtukod ug agosanan sa tubig. Siya nangutana: “O kadtong napulog-walo ka tawo nga natumpagan sa torre sa Siloam, ug nangamatay tungod niini, nagadahom ba kamo nga sila labaw pa ka malinapason kay sa tanang uban pa nga nagpuyo sa Jerusalem?” Dili, dili tungod sa pagkadaotan nga nangamatay kining mga tawhana, miingon si Jesus. Hinunoa, “ang panahon ug wala damhang mga hitabo” mao ang hinungdan sa maong mga katalagman. Apan, gigamit ni Jesus ang maong okasyon sa pagpasidaan: “Gawas kon kamo maghinulsol, kamong tanan mangamatay usab sa ingon.”
Unya si Jesus mipadayon sa paghatag ug haom nga ilustrasyon, nga nag-ingon: “Dihay usa ka tawo nga may kahoyng igira nga gitanom niya sa iyang parrasan, ug siya miadto sa pagpangitag bunga niini, ug siya walay nakaplagan. Ug siya miingon sa mag-aatiman sa parrasan, ‘Tan-awa sulod sa tulo ka tuig na karon ako magaanhian sa pagpangitag bunga niining kahoy nga igira, apan wala akoy hingkaplagan. Putla kini! Nganong pausikan pa man niini kining yuta?’ Siya mitubag kaniya nga nag-ingon, ‘Agalon, pasagdi lang siya niining tuiga usab, hangtod kapalibotan ko kinig kalot ug kaabunohan ko kini; ug kon mamunga kini sa umaabot, maayo; apan kon dili man, putlon mo na lang.’”
Si Jesus misulay kapin sa tulo ka tuig sa pag-ugmad sa pagtuo sa Hudiyonhong nasod. Apan pila lamang ka gatos ka disipulo ang maihap ingong bunga sa iyang mga kahago. Karon, sa ikaupat nga tuig sa iyang ministeryo, gipakusgan pa gayod niya ang iyang mga paningkamot, sa simbolikong paagi nangalot ug namutang ug abuno sa palibot sa Hudiyonhong kahoy nga igira pinaagi sa madasigong pagwali ug pagpanudlo sa Judea ug sa Perea. Apan sa walay kapuslanan! Ang nasod wala maghinulsol ug busa angay sa kalaglagan. Diyutayng nahibilin lamang sa nasod ang misanong.
Unya nanudlo si Jesus diha sa sinagoga sa Adlawng-igpapahulay. Didto nakakita siya ug babaye kinsa, tungod kay siya giyawaan, nagtikuko sulod sa 18 ka tuig. Tungod sa kaluoy, gitawag siya ni Jesus: “Babaye, mahigawas ka na sa imong sakit.” Ug iyang gipatong ang iyang mga kamot kaniya, ug dihadiha siya natul-id ug nagdayeg sa Diyos.
Apan, ang nangulong opisyal sa sinagoga nasuko. “Adunay unom ka adlaw nga niini ang mga tawo kinahanglan magabuhat,” siya miingon. “Panganhi kamo niining mga adlawa ug magpaayo, ug dili sa adlaw nga igpapahulay.” Ang opisyal mituo sa gahom ni Jesus nga makaayo apan gihukman ang mga tawo sa pag-adto aron mamaayo sa Adlawng-igpapahulay!
“Mga maot,” mitubag si Jesus, “dili ba sa adlaw nga igpapahulay ang matag usa kaninyo magabadbad man sa iyang baka o sa iyang asno gikan sa pasungan ug dad-on kini sa gawas aron paimnon? Ug kining babayehana nga anak ni Abraham, nga gigapos ni Satanas sulod na sa napulog-walo ka tuig, dili ba kinahanglan nga pagabadbaran siya sa adlaw nga igpapahulay?”
Buweno, sa pagkadungog niini, kadtong misupak kang Jesus naulawan. Ang panon sa mga tawo, hinunoa, nalipay sa tanang mahimayaong mga butang nga ilang nakita nga gihimo ni Jesus. Sa pagtubag gisubli ni Jesus ang duha ka matagnaong mga ilustrasyon mahitungod sa Gingharian sa Diyos, ang mga tagna nga iyang gisugilon kanila diha sa usa ka sakayan sa Dagat sa Galilea nga mga usa ka tuig nga miagi. Lucas 13:1-21; Ecclesiastes 9:11; Mateo 13:1-33.
▪ Unsang mga katalagman ang gihisgotan dinhi, ug unsang pagtulon-an ang gikuha ni Jesus gikan niini?
▪ Unsay aplikasyon niini bahin sa dili-mabungahong kahoyng igira, ug sa mga paningkamot nga magmabungahon kini?
▪ Sa unsang paagi ang nangulong opisyal mituo sa gahom ni Jesus sa pag-ayo, apan sa unsang paagi giladlad ni Jesus ang pagkamaot sa maong tawo?