Kapitulo 92
Napulo ka Sanlahon Giayo Panahon sa Kataposang Pag-adto ni Jesus sa Jerusalem
SI Jesus nagpakyas sa singkamot sa Sanhedrin sa pagpatay kaniya pinaagi sa pagpahawa sa Jerusalem ug pag-adto sa siyudad sa Epraim, nga tingali 24 kilometros o kapin pa amihanan-silangan sa Jerusalem. Didto siya nagapabilin kauban sa iyang mga tinun-an, nga layo sa iyang mga kaaway.
Hinunoa, ang panahon alang sa Paskuwa sa 33 K.P. nagsingabot, ug sa wala madugay si Jesus milakaw na usab. Siya miagi sa Samaria ug mipaingon sa Galilea. Kadto ang kataposan niyang pagduaw sa maong dapit una siya mamatay. Samtang didto sa Galilea, lagmit siya ug ang iyang mga tinun-an mikuyog sa uban nga nagpadulong sa Jerusalem alang sa pagsaulog sa Paskuwa. Gisubay nila ang ruta agi sa distrito sa Perea, silangan sa Subang Jordan.
Sa sinugdan sa panaw, sa pagsulod ni Jesus sa usa ka balangay nga mahimong didto sa Samaria o sa Galilea, gitagbo siyag napulo ka lalaki nga may sanla. Kining ngilngig nga sakit inanay magaut-ot sa mga bahin sa lawas sa usa ka tawo—sa iyang mga tudlo sa kamot, iyang mga tudlo sa tiil, iyang mga dalunggan, iyang ilong, ug iyang mga wait. Aron mapanalipdan ang uban batok sa pagkahitakdan, ang Kasugoan sa Diyos nagaingon mahitungod sa usa ka sanlahon: “Magatabon siya sa bigote ug magasinggit siya: ‘Mahugaw, mahugaw!’ Sa tanang adlaw nga ang sakit anaa kaniya siya mamahugaw. . . . Magapuyo siya nga mag-inusara.”
Ang napulo ka sanlahon nagbantay sa mga pagdili o restriksiyon alang sa mga sanlahon ug nagpalayo kang Jesus. Bisan pa niana, sila misinggit uban sa makusog nga mga tingog: “Jesus, Magtutudlo, maluoy ka intawon kanamo!”
Sa pagkakita kanila sa layo, si Jesus misugo: “Lumakaw kamo ug magpakita sa mga saserdote.” Gisulti kadto ni Jesus tungod kay ang Kasugoan sa Diyos nagahatag ug pagbulot-an sa mga saserdote sa pagpahayag nga nangaayo nang mga sanlahon niadtong naayo na sa ilang sakit. Sa maong paagi ang maong mga tawo uyonan nga moipon sa pagpuyo pag-usab uban sa himsog nga mga tawo.
Ang napulo ka sanlahon may pagsalig sa milagrosong mga gahom ni Jesus. Mao nga midali sila sa pagpakigkita sa mga saserdote, bisan pag sila wala pa mangaayo. Samtang diha sa dalan, ang ilang pagtuo kang Jesus gigantihan. Misugod sila sa pagkakita ug pagkabatyag sa ilang nahibalik nga kahimsog!
Siyam sa nahinloang mga sanlahon nagpadayon sa ilang lakaw, apan ang laing sanlahon, usa ka Samarianhon, mibalik aron pangitaon si Jesus. Ngano? Kay siya mapasalamaton kaayo tungod sa nahitabo kaniya. Gidayeg niya ang Diyos uban sa makusog nga tingog, ug sa dihang nakaplagan niya si Jesus, siya mihapa sa iyang mga tiil, nga nagpasalamat kaniya.
Sa pagtubag si Jesus miingon: “Ang napulo nahinloan, dili ba? Nan, hain man ang siyam? Wala bay nakita nga mibalik sa pagdayeg sa Diyos gawas niining tawo sa laing nasod?”
Unya giingnan niya ang tawong Samarianhon: “Tumindog ug lumakaw ka; ang imong pagtuo nakapaayo kanimo.”
Kon atong mabasa ang bahin sa pag-ayo ni Jesus sa napulo ka sanlahon, angay ibutang nato sa kasingkasing ang leksiyon nga gipasabot sa iyang pangutana: “Nan, hain man ang siyam?” Ang kaingrato nga gipadayag sa siyam maoy seryosong kahuyangan. Kita ba, sama sa Samarianhon, magpakita nga mapasalamaton tungod sa mga butang atong nadawat gikan sa Diyos, apil ang tinong saad sa kinabuhing walay kataposan diha sa matarong bag-ong kalibotan sa Diyos? Juan 11:54, 55; Lucas 17:11-19; Levitico 13:16, 17, 45, 46; Pinadayag 21:3, 4.
▪ Giunsa pagpakyas ni Jesus ang singkamot sa pagpatay kaniya?
▪ Diin ba sunod miadto si Jesus, ug unsay iyang destinasyon?
▪ Nganong ang mga sanlahon nagtindog sa layo, ug nganong giingnan sila ni Jesus nga moadto sa mga saserdote?
▪ Unsang leksiyon ang atong matun-an gikan niining kasinatiana?