Kini Bang Kalibotana Molungtad?

Walay laing kaliwatan ang nakadungog ug daghan kaayong panaghisgot mahitungod sa kataposan sa kalibotan. Daghan nahadlok nga ang kalibotan matapos diha sa nukleyar nga kalaglagan. Ang uban naghunahuna nga ang polusyon mahimong molaglag sa kalibotan. Ang uban pa nabalaka nga ang ekonomikanhong kagubot mopahinabog pagbugnoay sa pundokpundok sa katawhan.

Kining kalibotana ba sa tinuod matapos? Kon mao, unsay kahulogan niini? May kalibotan bang natapos kaniadto?

Usa ka Kalibotan Natapos​—Gipulihan sa Lain

Oo, ang usa ka kalibotan tinuod natapos. Tagda ang kalibotan nga nahimong daotan kaayo sa mga adlaw ni Noe. Ang Bibliya nagsaysay: “Ang kalibotan niadtong panahona nakaagom ug kalaglagan sa dihang gilunopan kana ug tubig.” Ang Bibliya usab nag-ingon: “Siya [Diyos] wala magpugong sa pagsilot sa karaang kalibotan, apan naghupot kang Noe, usa ka magwawali sa pagkamatarong, nga luwas kauban sa pito pa sa dihang iyang gipalunopan ang kalibotan sa mga tawong dili diyosnon.”​—2 Pedro 2:5; 3:6.

Timan-i kon unsay gipasabot sa kataposan sa kalibotan ug kon unsay wala niini ipasabot. Wala kini magkahulogan ug kataposan sa katawhan. Si Noe ug iyang pamilya nakalabang-buhi sa globonhong Lunop. Mao usab ang planetang Yuta ug ang nindot daghag bituon nga kalangitan. Ang “usa ka kalibotan sa mga tawong dili diyosnon” mao ang nahanaw, usa ka daotang sistema sa mga butang.

Sa kadugayan, samtang ang mga liwat ni Noe mingdaghan, laing kalibotan ang nadayag. Kining ikaduhang kalibotan, o sistema sa mga butang, naglungtad hangtod sa atong adlaw. Ang iyang kasaysayan natugob sa gubat, krimen, ug kapintasan. Unsay mahitabo niining kalibotana? Molungtad ba kini?

Ang Kaugmaon Niining Kalibotana

Pagkatapos mag-ingon nga ang kalibotan sa adlaw ni Noe nakaagom ug kalaglagan, ang asoy sa Bibliya nagpadayon: “Pinaagi sa mao rang pulong ang mga langit ug ang yuta nga karon nagalungtad gikatagana alang sa kalayo.” (2 Pedro 3:7) Sa pagkatinuod, ingon sa pagbatbat sa laing magsusulat sa Bibliya: “Ang kalibotan [nga nagalungtad karong adlawa] mahanaw.”​—1 Juan 2:17.

Ang Bibliya wala magpasabot nga ang literal nga yuta o ang daghag bituon nga kalangitan mahanaw, ngani kini wala mahanaw sa adlaw ni Noe. (Salmo 104:5) Inay, kining kalibotana, uban sa iyang “mga langit,” o mga magmamando sa gobyerno ubos sa impluwensiya ni Satanas, ug ang iyang “yuta,” o tawhanong sosyedad, pagalaglagon nga morag pinaagi sa kalayo. (Juan 14:30; 2 Corinto 4:4) Kining kalibotana, o sistema sa mga butang, malaglag maingon gayod kasegurado sa nahitabo sa kalibotan sa wala pa ang Lunop. Bisan si Jesu-Kristo nagsulti mahitungod sa kahimtang sa “mga adlaw ni Noe” ingong panig-ingnan sa mahitabo una pa gayod sa pagkatapos niining kalibotana.​—Mateo 24:​37-39.

Mahinungdanon, sa dihang si Jesus naghisgot mahitungod sa mga adlaw ni Noe, kadto maoy sa pagtubag sa pangutana sa iyang mga apostol: “Unsa man ang ilhanan sa imong pag-anhi, ug sa kataposan sa kalibotan?” (Mateo 24:​3, King James Version) Ang mga sumusunod ni Jesus nahibalo nga kining kalibotana matapos. Kini bang palaaboton nakapahadlok kanila?

Sa kasukwahi, sa dihang gihubit ni Jesus ang mga panghitabo nga mahitabo sa dili pa ang pagkatapos sa kalibotan, siya nagdasig kanila sa pagkalipay ‘tungod kay ang ilang kaluwasan nagkaduol na.’ (Lucas 21:28) Oo, kaluwasan gikan kang Satanas ug sa iyang daotang sistema sa mga butang ngadto sa usa ka malinawon bag-ong kalibotan!​—2 Pedro 3:13.

Apan kanus-a matapos kining kalibotana? Unsang “ilhanan” ang gihatag ni Jesus bahin sa iyang “pag-anhi, ug sa kataposan sa kalibotan”?

“Ang Ilhanan”

Ang Gregong pulong nga gihubad dinhing “pag-anhi” maoy pa·rou·siʹa, ug nagkahulogang “presensiya,” nga mao, sa aktuwal pagkaania. Busa sa dihang “ang ilhanan” makita, kana wala magkahulogan nga si Kristo sa dili madugay moabot kondili nga siya nakabalik na ug maoy presente. Kana nagkahulogan nga siya nagsugod sa dili makitang pagmando ingong langitnong hari ug nga sa dili madugay molaglag sa iyang mga kaaway.​—Pinadayag 12:​7-12; Salmo 110:​1, 2.

Si Jesus wala maghatag ug usa lamang ka hitabo ingong “ang ilhanan.” Siya nagbatbat ug daghang mga panghitabo ug mga kahimtang sa kalibotan. Tanan niini mahitabo sulod sa panahon nga gitawag sa mga magsusulat sa Bibliya ug “ang kataposang mga adlaw.” (2 Timoteo 3:​1-5; 2 Pedro 3:​3, 4) Tagda ang pila ka mga butang nga gitagna ni Jesus magtimaan sa “ang kataposang mga adlaw.”

“Ang nasod motindog batok nasod ug ang gingharian batok gingharian.” (Mateo 24:7) Ang gubat sa modernong panahon labawng ngilngig kay kaniadto. Usa ka historyano nag-ingon: “Ang Unang Gubat sa Kalibotan [sugod sa 1914] maoy unang ‘bug-os’ nga gubat.” Bisan pa, ang ikaduhang gubat sa kalibotan labaw pang malaglagon. Ug ang gubat nagpadayon sa pagdaot sa yuta. Oo, ang mga pulong ni Jesus nagakatuman sa madulaong paagi!

“Aduna unyay mga kanihit sa pagkaon.” (Mateo 24:7) Tapos sa Gubat sa Kalibotan I nahitabo ang tingali kinagrabehang gutom sa tibuok kasaysayan. Ang teribleng gutom usab misunod sa Gubat sa Kalibotan II. Ang hampak sa kakulang sa pagkaon nag-apektar kutob sa ikalimang bahin sa populasyon sa yuta, nga nagapatay sa mga 14 milyones nga kabataan kada tuig. Tinuod, may “kanihit sa pagkaon”!

“Aduna unyay makusog nga mga linog.” (Lucas 21:11) Sa aberids, mga napulo ka pilo ang gidaghanon sa mamatay kada tuig gumikan sa mga linog sukad sa 1914 kay sa milabayng mga siglo. Tagda lamang ang pipila ka dagkong linog: 1920, Tsina, 200,000 namatay; 1923, Hapon, 99,300 nawad-ag kinabuhi; 1939, Turkey, 32,700 nakalasan sa kinabuhi; 1970, Peru, 66,800 namatay; ug 1976, Tsina, mga 240,000 (o, sumala sa pila ka tinubdan, 800,000) ang nawad-an ug kinabuhi. Tinuod, “makusog nga mga linog”!

“Sa sunodsunod nga dapit mga kamatay.” (Lucas 21:11) Pagkatapos lang gayod sa Gubat sa Kalibotan I, mga 21 milyones ka tawo ang namatay sa trangkaso Espanyola. Ang Science Digest nagtaho: “Sa tibuok kasaysayan wala pa gayoy mas bangis, mas tulin nga paghampak sa kamatayon.” Sukad niadto, ang sakit sa kasingkasing, kanser, AIDS, ug daghan pang uban nga mga sakit nakapatay sa gatosan ka milyon.

“Pag-uswag sa pagkamalapason.” (Mateo 24:12) Ang atong kalibotan sukad sa 1914 nailhan ingong kalibotan sa krimen ug kabangisan. Sa daghang mga dapit walay mausa ang mobati nga luwas sa kadalanan bisan ngani sa adlawng dako. Sa pagkagabii ang mga tawo magpabilin diha sa ilang mga puloy-anan sulod sa trangkado ug naalihan nga mga pultahan, kay nahadlok nga mogawas.

Daghang ubang butang gitagna nga mahitabo sa panahon sa kataposang mga adlaw, ug tanan niini nagakatuman usab. Kini nagkahulogan nga ang kataposan sa kalibotan duol na. Apan, ikalipay, may mga makalabang-buhi. Pagkatapos mag-ingon nga “ang kalibotan mahanaw,” ang Bibliya nagsaad: “Siya nga nagatuman sa kabubut-on sa Diyos magapabilin hangtod sa kahangtoran.”​—1 Juan 2:17.

Busa kinahanglan natong tun-an ang kabubut-on sa Diyos ug buhaton kana. Unya kita makalabang-buhi sa pagkatapos niining kalibotan sa pagtagamtam sa dumalayong mga panalangin sa bag-ong kalibotan sa Diyos. Ang Bibliya nagasaad nga nianang panahona: “Ang Diyos . . . magapahid sa tanang luha gikan sa mga mata [sa katawhan], ug ang kamatayon wala na, ug wala na usab unyay pagminatay ni paghilak ni kasakit.”​—Pinadayag 21:​3, 4.

Gawas kon gipaila, ang tanang kinutlo sa Bibliya nagagikan sa New World Translation of the Holy Scriptures.

[Picture Credit Line sa panid 6]

Tinubdan sa Letrato: Ayroplano: Letrato sa USAF. Bata: Letrato sa WHO ni W. Cutting. Linog: Y. Ishiyama, Unibersidad sa Hokkaido, Hapon.