Magkalipay sa Kinabuhing Pamilyahanon
Ang mga pamilya ba kaha magmalipayon?
Sa unsang paagi kana mahimo?
May nahibaloan ka bang mga pamilya nga nahiusa ug malipayon sama nianang makita niini nga pulyeto? Ang mga pamilya sa bisan diin nga dapit nagakabungkag sa bug-os. Ang diborsiyo o panagbulag, walay permanenteng trabaho, mga suliran sa nag-inusarang ginikanan, kapakyasan—kining tanan nakaamot sa krisis. Usa ka eksperto bahin sa kinabuhing pamilyahanon miagulo: “Pagkakaron, ang mga panagna sa pagkamatay sa pamilya maoy sinati sa tanan.”
Nganong ang mga pamilya karong adlawa gihan-okan man sa maong seryosong mga suliran? Sa unsang paagi kita magkalipay sa kinabuhing pamilyahanon?
Kon sa Unsang Paagi Gisugdan ang Pamilya
Sa pagtubag niining mga pangutanaha, kinahanglan nga atong mahibaloan ang sinugdanan sa kaminyoon ug sa pamilya. Kay kon sila may Tigmugna—usa ka Maglalalang—ang mga sakop sa pamilya angay nga mosalig kaniya alang sa giya, sanglit angay nga siya sa tino nahibalo sa labing maayong paagi nga kita magkalipay sa bug-os sa kinabuhing pamilyahanon.
Makaiikag, daghan ang nagtuo nga ang kahikayan sa pamilya walay Tigmugna. Ang The Encyclopedia Americana nag-ingon: “Ang pila ka iskolar nakiling sa pagsubay sa sinugdanan sa kaminyoon ngadto sa mga kahikayan sa pagpares-pares sa mga hayop nga ubos sa tawo.” Apan, si Jesu-Kristo nagsulti mahitungod sa paglalang sa lalaki ug babaye. Siya nagkutlo ingong awtoridad sa sayong rekord sa Bibliya ug miingon: “Kon unsay gihiusa sa Diyos ayaw itugot nga may tawo nga magabulag.”—Mateo 19:4-6.
Busa si Jesu-Kristo husto. Usa ka intelihenteng Diyos ang naglalang sa unang mga tawo ug naghikay alang sa malipayong kinabuhing pamilyahanon. Ang Diyos naghugpong sa unang pares sa kaminyoon ug nag-ingon nga ang lalaki “kinahanglang makig-ipon sa iyang asawa ug sila kinahanglang mahimong usa ka unod.” (Genesis 2:22-24) Nan, mahimo kaha, nga ang hinungdan sa mga suliran sa pamilya karong adlawa maoy tungod sa pangagpas sa mga estilo-sa-kinabuhi nga nagalapas sa mga sukdanan nga gihan-ay sa Maglalalang diha sa iyang Pulong, ang Bibliya?
Haing Dalan sa Kalamposan?
Ingon sa nasayran nimo sa walay duhaduha, ang modernong kalibotan nagapasiugda sa kaugalingong-kaayohan ug kaugalingong-katagbawan. “Ang kadalo maayo,” sulti sa usa ka tigpamuhunan sa mograduwaray nga saring sa kolehiyo sa Tinipong Bansa. “Puwede kang magdinalo ug sa gihapon mahimong mobati ka ug maayo sa imong kaugalingon.” Apan ang pangagpas sa materyal nga mga kabtangan dili mosangpot sa kalamposan. Ang materyalismo, sa pagkatinuod, maoy usa sa kinadak-an nag-inusara nga mga hulga sa kinabuhing pamilyahanon tungod kay manghilabot kini sa tawhanong mga relasyon ug mohurot sa panahon ug salapi sa mga tawo. Sa kasukwahi, hunahunaa kon sa unsang paagi ang duha lamang ka proverbio sa Bibliya motabang kanato sa pagkakita kon unsay hinungdanon sa kalipay.
“Maayo pa ang pagkaon ug mga utanon kauban sa mga tawo nga imong gihigugma kay sa pagkaon ug labing lamian nga karne diin anaa ang pagdumot.”
“Maayo pa ang pagkaon ug uga nga panit sa tinapay uban sa kalinaw sa hunahuna kay sa mangombira sa usa ka balay nga napuno sa bingkil.”
Proverbio 15:17; 17:1, “Today’s English Version.”
Kusganon, dili ba? hunahunaa lang kon unsa ka lahi ang kalibotan kon unahon sa kada pamilya kining mga butanga! Ang Biblia usab nagtagana ug bililhong mga giya kon sa unsang paagi ang mga sakop sa pamilya magtagad sa usag-usa. Tagda ang pipila lang ka mga pahimangno nga gihatag niini.
Mga Bana: ‘Higugmaa ang inyong masigkaasawa ingon nga inyong kaugalingong lawas.’—Efeso 5:28-30.
Yano, apan praktikal kaayo! Ang Bibliya usab nagatambag sa bana sa ‘paghatag sa iyang asawa ug pasidungog.’ (1 Pedro 3:7) Iyang himoon kini pinaagi sa paghatag kaniya ug linaing pagtagad, lakip ang kalumo, pagsabot, ug pagpasalig. Iya usab pabilhan ang iyang mga opinyon ug patalinghugan siya. (Itandi ang Genesis 21:12.) Dili ka ba mouyon nga ang bisan haing pamilya makabenepisyo kon ang bana magtagad sa iyang asawa uban ang kahingawa, ingon sa gusto niya nga siya mismo pagatagdon?—Mateo 7:12.
Mga Asawa: “Magbaton ug halalom nga pagtahod sa [inyong] masigkabana.”—Efeso 5:33.
Ang asawa makaamot sa kalipay sa pamilya pinaagi sa pag-abag sa iyang bana sa pagpas-an sa iyang bug-at nga mga kaakohan. Mao kini ang tuyo, sanglit ang Diyos naghatag ug asawa nga mahimong “usa ka katabang alang kaniya, ingong kapikas niya.” (Genesis 2:18) Makaapresyar ka ba sa panalangin ngadto sa kinabuhing pamilyahanon sa dihang ang asawa magpakita ug pagtahod sa iyang bana pinaagi sa pagpaluyo sa iyang mga desisyon ug sa pagpakigtambayayong kaniya sa pagkab-ot sa mga tumong sa pamilya?
Mga Kapikas sa Kaminyoon: “Ang mga bana ug ang mga asawa kinahanglang magmaunongon sa usag-usa.”—Hebreohanon 13:4, TEV.
Sa dihang sila magmaunongon, ang kinabuhing pamilyahanon seguradong makabenepisyo. Ang pagpanapaw sagad modaot sa pamilya. (Proverbio 6:27-29, 32) Mao nga, sa kamaalamon, ang Bibliya nagaaghat: “Magmalipayon uban sa imong asawa ug pangitaa ang imong kalipay uban sa babaye nga imong giminyoan . . . Ngano mang ihatag mo ang imong gugma sa laing babaye?”—Proverbio 5:18-20, TEV.
Mga Ginikanan: “Bansaya ang [inyong mga anak] diha sa dalan alang [kanila].”—Proverbio 22:6.
Sa dihang ang mga ginikanan mohatag ug panahon ug pagtagad sa mga anak, ang kinabuhing pamilyahanon seguradong mouswag. Mao nga, ang Bibliya nagaaghat sa mga ginikanan sa pagtudlo sa ilang kabataan sa hustong mga prinsipyo ‘sa dihang sila magalingkod sa ilang balay ug sa dihang sila magalakaw sa dalan ug sa dihang sila manghigda ug sa dihang sila mamangon.’ (Deuteronomio 11:19) Ang Bibliya usab nagaingon nga ang mga ginikanan kinahanglan magpakita nga sila nahigugma sa ilang mga anak pinaagi sa pagdisiplina kanila.—Efeso 6:4.
Mga Anak: “Mga anak, managsugot kamo sa inyong mga ginikanan diha sa panaghiusa uban sa Ginoo.”—Efeso 6:1.
Tinuod, niining malapason nga kalibotan, dili kanunay sayon ang pagsugot sa inyong mga ginikanan. Apan, dili ka ba mouyon nga maalamon ang pagbuhat sa kon unsay gisulti kanato sa Tigmugna sa pamilya? Siya nasayod kon unsay maayo sa paghimo sa atong kinabuhing pamilyahanon nga mas malipayon. Busa paningkamoti ug maayo sa pagsugot sa imong mga ginikanan. Magmadeterminado sa paglikay sa daghang mga tentasyon sa kalibotan sa pagbuhat kon unsay daotan.—Proverbio 1:10-19.
Kutob sa mahimo nga ang matag sakop sa pamilya magpadapat sa tambag sa Bibliya, ang pamilyahanong pagkinabuhi makabenepisyo. Ang pamilya dili lang kay makatagamtam sa mas maayong kinabuhi karon apan kana makabaton ug kalaoman sa usa ka kahibulongang kaugmaon diha sa bag-ong kalibotan nga gisaad sa Diyos. (2 Pedro 3:13; Pinadayag 21:3, 4) Busa batasana ang pamilyahanong pagtuon sa Bibliya! Minilyon sa mga pamilya sa tibuok yuta nakakaplag nga ang giya nga gitagana diha sa libro nga Ang Sekreto sa Kalipay sa Pamilya mahimong tinuod nga kaayohan.
Gawas kon gipaila, ang tanang kinutlo sa Bibliya nagagikan sa New World Translation of the Holy Scriptures.