Ilang Tibuok-Kalibotang Organisasyon ug Buluhaton

ADUNAY daghang yunit nga gigamit sa pagtultol sa buluhatong pagsangyaw diha sa kapin sa 230 ka nasod diin kini ginahimo. Ang katibuk-ang direksiyon naggikan sa Nagamandong Lawas sa tibuok-kalibotang hedkuwarter sa Brooklyn, New York. Ang Nagamandong Lawas magpadala ug mga hawas kada tuig ngadto sa lainlaing mga sona sa tibuok kalibotan aron makighisgot sa mga hawas sa sangang buhatan nianang maong mga sona. Diha sa mga sangang buhatan, may mga Komite sa Sanga nga adunay mga tulo ngadto sa pito ka membro aron magdumala sa buluhaton diha sa mga nasod ilalom sa ilang teritoryo. Ang ubang mga sangang buhatan adunay mga pasilidad alang sa pag-imprenta, ang uban naggamit ug tulin-kaayong mga rotary press. Ang nasod o dapit nga gialagaran sa matag sangang buhatan gibahin ngadto sa mga distrito, ug ang mga distrito, sa baylo, gibahin ngadto sa mga sirkito. Ang matag sirkito adunay sakop nga mga 20 ka kongregasyon. Ang usa ka magtatan-aw sa distrito moduaw sa mga sirkito diha sa iyang distrito sa paagi nga turnoturno. Duha ka asembliya ang himoon kada tuig alang sa matag sirkito. May magtatan-aw usab sa sirkito, ug siya moduaw sa matag kongregasyon diha sa iyang sirkito kasagaran kaduha sa usa ka tuig, nga nagatabang sa mga Saksi sa pag-organisar ug paghimo sa buluhatong pagsangyaw diha sa teritoryo nga giasayn sa maong kongregasyon.

Ang lokal nga kongregasyon uban sa Kingdom Hall niini mao ang sentro sa pagpahibalo sa maayong balita diha sa imong komunidad. Ang mga dapit nga sakop sa matag kongregasyon gibahinbahin sa gagmayng mga teritoryo. Giasayn kini ngadto sa matag Saksi nga maningkamot sa pagduaw ug sa pagpakigsulti sa mga tawo diha sa matag balay nga sakop niana. Ang matag kongregasyon, nga gilangkoban ug gikan sa pipila ka buok ngadto sa mga 200 ka Saksi, adunay mga ansiyano nga giasayn sa pag-atiman sa lainlaing mga katungdanan. Ang matag usa ka magmamantala sa maayong balita mao ang hinungdanon diha sa organisasyon sa mga Saksi ni Jehova. Ang matag usa sa mga Saksi, nag-alagad man sa tibuok-kalibotang hedkuwarter, sa mga sangang buhatan, o sa mga kongregasyon, naghimo niining buluhaton sa kanataran sa personal nga pagpahibalo sa uban bahin sa Gingharian sa Diyos.

Ang mga taho bahin niini nga kalihokan sa kataposan makaabot sa tibuok-kalibotang hedkuwarter, ug usa ka tinuig nga Yearbook ang hugpongon ug ipatik. Dugang pa, usa ka tsart ang ipatik kada tuig diha sa Enero 1 nga isyu sa Ang Bantayanang Torre. Kining duha ka publikasyon maghatag ug detalyadong mga taho sa mga kalamposan sa matag tuig diha sa pagpamatuod bahin kang Jehova ug sa iyang Gingharian ilalom kang Kristo Jesus. Sa di pa dugayng katuigan mga 14,000,000 ka Saksi ug mga interesado ang nanambong sa tinuig nga Memoryal sa kamatayon ni Jesus. Ang mga Saksi ni Jehova naggugol ug kapin sa 1,000,000,000 ka oras kada tuig sa pagmantala sa maayong balita, ug kapin sa 300,000 ka bag-ohan ang nabawtismohan. Ang napahimutang nga literatura mikabat ug gatosan ka milyong kopya.