Introduksiyong Makapukaw sa Interes

ANG introduksiyon maoy usa ka hinungdanong bahin sa bisan unsang pakigpulong. Kon makapukaw ka gayod sa interes sa imong mamiminaw, sila mas makiling sa pagpamati pag-ayo sa sunod nga mga pulong. Sa ministeryo sa kanataran, kon ang imong introduksiyon dili makapukaw sa interes, ikaw basin dili makapadayon sa imong presentasyon. Sa dihang ikaw mohatag ug pakigpulong diha sa Kingdom Hall, dili manggawas ang mamiminaw, apan basin maghunahuna ang mga indibiduwal ug laing mga butang kon ikaw dili makadani ug makahawid sa ilang interes.

Sa pag-andam sa imong introduksiyon, ibutang sa hunahuna ang mosunod nga mga tumong: (1) pagkuha sa atensiyon sa imong mamiminaw, (2) tin-aw nga pag-ila sa imong ulohan, ug (3) pagpakita kon nganong mahinungdanon ang ulohan alang sa imong mamiminaw. Sa pipila ka kaso, kining tulo ka tumong basin makab-ot sa susamang panahon. Hinuon, usahay kini pagahisgotan nga tinagsatagsa, ug magkalain ang han-ay.

Kon Unsaon Pagkuha sa Atensiyon sa Imong Mamiminaw. Ang kamatuorang ang mga tawo nagtigom aron magpatalinghog sa usa ka diskurso wala magpasabot nga ang mamiminaw andam sa paghatag sa ilang wala-mabahing atensiyon. Nganong wala man? Ang ilang mga kinabuhi punog daghang butang nga nagkinahanglan sa ilang atensiyon. Sila basin naghunahuna sa usa ka problema sa panimalay o sa laing gikabalak-an sa kinabuhi. Ang hagit nga imong giatubang isip mamumulong maoy pagdani ug paghawid sa atensiyon sa mamiminaw. Adunay labaw sa usa ka paagi nga imong mahimo kini.

Usa sa labing bantogang mga diskurso nga napahayag sukad mao ang Wali sa Bukid. Sa unsang paagi gisugdan kini? Sumala sa asoy ni Lucas, si Jesus miingon: “Malipayon kamong mga kabos, . . . malipayon kamo nga gigutom karon, . . . malipayon kamo nga naghilak karon, . . . malipayon kamo sa dihang pagadumtan kamo sa mga tawo.” (Luc. 6:20-22) Nganong nakapukaw kana sa interes? Sa pipila ka pulong, giila ni Jesus ang pipila sa seryosong mga suliran nga gisagubang sa iyang mga tigpatalinghog. Unya, inay magdugay sa paghisgot sa mga suliran, iyang gipakita nga ang mga tawong adunay ingong mga suliran mahimong malipayon gihapon, ug gihimo niya kana sa paagi nga ang iyang mga tigpatalinghog gustong makapaminaw ug dugang pa.

Ang mga pangutana epektibong magamit sa pagpukaw sa interes, apan kinahanglang kana maoy hustong matang sa pangutana. Kon ipaila sa imong mga pangutana nga ikaw maghisgot lamag mga butang nga nadunggan na sa mamiminaw sa nangagi, ang interes basin maawop ra dayon. Ayaw pagsuknag mga pangutana nga makapaulaw sa imong mamiminaw o magbadlong kanila. Hinunoa, paningkamoti pagbalay ang imong mga pangutana sa paaging makapalihok sa hunahuna. Hunong kadiyot human sa matag pangutana aron ang imong mga tigpatalinghog makabatog panahon sa paghunahuna sa tubag. Kon sila mobati nga sila diha sa hunahuna nakigsultihanay kanimo, imong nakuha ang ilang atensiyon.

Ang paggamit ug tinuod-kinabuhing kasinatian maoy lain nga maayong paagi sa pagdani sa atensiyon. Apan ang pag-asoy lamag usa ka estorya makapildi sa imong katuyoan kon ang kasinatian makapakaulaw sa usa sa imong mamiminaw. Kon mahinumdoman ang imong estorya apan makalimtan ang pagtulon-ang duyog niana, sipyat ka sa imong tumong. Sa dihang ang usa ka kasinatian gamiton sa introduksiyon, angayng magpahiluna kini sa patukoranan sa usa ka mahinungdanong bahin sa lawas sa imong pakigpulong. Bisan pag gikinahanglan tingali ang pipila ka detalye aron magmadasigon ang pag-asoy, pagbantay nga dili tas-on kaayo ang mga kasinatian.

Ang pipila ka mamumulong mosugod pinaagi sa paggamit ug bag-ong balita, pangutlo gikan sa lokal nga mantalaan, o komento sa usa ka inilang awtoridad. Kini usab mahimong epektibo kon kini tinuod nga haom sa ulohan ug angay sa mamiminaw.

Kon ang imong pakigpulong maoy usa ka bahin sa simposyum o usa ka bahin sa Tigom sa Pag-alagad, nan kasagarang labing maayo nga imong himoong mubo ug deretso sa punto ang imong introduksiyon. Kon ikaw maghatag ug pakigpulong publiko, sunda gayod ang panahon nga gigahin alang sa introduksiyon. Ang lawas sa pakigpulong mao ang magpasa sa impormasyong labing hinungdanon alang sa imong mamiminaw.

Ikaw basin mosulti usahay atubangan sa mamiminaw nga maduhaduhaon o mabatokon pa. Sa unsang paagi madani nimo ang ilang atensiyon? Si Esteban, nga usa ka sayong Kristohanon nga gibatbat nga “puno sa espiritu ug kaalam,” gipugos pagdala sa atubangan sa Hudiyohanong Sanhedrin. Iyang gihatag didto ang usa ka larinong pagdepensa sa Kristiyanidad. Giunsa niya pagsugod? Sa matinahorong paagi ug sa paghisgot sa butang nga ilang gikauyonan. “Mga katawhan, mga igsoon ug mga amahan, paminaw. Ang Diyos sa kahimayaan nagpakita sa atong katigulangang si Abraham.” (Buh. 6:3; 7:2) Didto sa Areopago sa Atenas, gipahiuyon ni apostol Pablo ang iyang introduksiyon alang sa lahi kaayong mamiminaw, nga nag-ingon: “Mga taga-Atenas, akong nakita nga sa tanang butang kamo daw mas mahadlokon sa mga bathala kay sa uban.” (Buh. 17:22) Ingong resulta sa epektibong mga introduksiyon, ang duha ka pundok sa mamiminaw andam sa pagpamatig dugang pa.

Sa dihang mag-alagad sa kanataran, kinahanglang madani usab nimo ang atensiyon sa mga tawo. Kon ang imong pagduaw dili abanteng pagkahikay, ang tagbalay basin puliki sa ubang mga butang. Sa pipila ka bahin sa kalibotan, ang dili-dinapit nga mga dumuduaw gidahom nga moderetso dayon sa punto. Sa ubang dapit, maoy kostumbre ang pagsunod sa pipila ka batasan sa dili ka pa mopahayag sa hinungdan sa imong pagduaw.​—Luc. 10:5.

Sa bisan haing kahimtang, ang tiunay nga kamahigalaon makatabang sa pagmugna sa atmosperang makatabang sa kabildohanay. Kasagaran nga maayo ang pagsugod pinaagi sa butang nga direktang nalangkit sa kon unsay anaa sa hunahuna sa tawo. Sa unsang paagi makatino ka kon unsay gamiton? Aw, sa imong pagduol sa tawo, may gibuhat ba siya? Tingali siya nagauma, nagahinlo sa tugkaran sa iyang balay, nagaayog kotse, nagaluto, nagalaba, o nag-atiman sa mga bata. May gitan-aw ba siya​—usa ka mantalaan o kalihokan sa dalan? Gipabanaag ba sa iyang palibot ang linaing interes sa pangisda, esports, musika, biyahe, mga kompiyuter, o laing butang? Kasagarang mabalaka ang mga tawo bahin sa bag-o pa nilang nadunggan sa radyo o nakita sa telebisyon. Ang usa ka pangutana o mubong komento bahin sa bisan hain nianang mga butanga tingali mosangpot sa mahigalaong kabildohanay.

Ang higayon nga si Jesus nakigsulti sa usa ka babayeng Samarianhon daplin sa usa ka atabay duol sa Sikar maoy talagsaong panig-ingnan kon unsaon pagsugod ang kabildohanay uban sa tuyong makahatag ug pamatuod.​—Juan 4:5-26.

Kinahanglang imong andamon pag-ayo ang imong introduksiyon, ilabina kon ang imong kongregasyon kanunayng nagkobre sa teritoryo niini. Kon dili, ikaw basin dili makahatag ug pamatuod.

Espesipikong Ipahayag ang Imong Ulohan. Diha sa Kristohanong kongregasyon, ang tsirman o ang nauna kanimong may bahin sa programa kasagarang mao ang magpahibalo sa ulohan sa imong pakigpulong ug magpaila kanimo. Bisan pa niana, maayo nga imong pahinumdoman ang imong mamiminaw sa imong ulohan panahon sa pagsulti nimo sa introduksiyon. Kini mahimong pulong-por-pulong nga pagpahayag sa tema, apan dili kinahanglang maingon gayod niana. Sa bisan unsang kahimtang, ang tema angayng inanay nga mapadayag sa pagpadayon sa pakigpulong. Sa usa ka paagi diha sa introduksiyon, angay nimong itumong ang pagtagad nganha sa imong ulohan.

Sa dihang si Jesus nagpadala sa iyang mga tinun-an aron sa pagwali, si Jesus tin-awng nagpaila sa mensahe nga ilang ipahayag. “Sa inyong pagpanglakaw, pagwali, nga magaingon, ‘Ang gingharian sa mga langit haduol na.’” (Mat. 10:7) Bahin sa atong adlaw, si Jesus miingon: “Kining maayong balita sa gingharian igawali.” (Mat. 24:14) Kita giawhag nga “iwali ang pulong,” nga mao, gamiton ang Bibliya sa dihang magasangyaw. (2 Tim. 4:2) Sa dili pa buksan ang Bibliya o itumong ang pagtagad nganha sa Gingharian, hinunoa, kasagarang gikinahanglan nga ipaila ang usa ka hitabo nga presenteng gikabalak-an. Tingali makakomento ka bahin sa krimen, kawalay-trabaho, inhustisya, gubat, kon unsaon pagtabang ang mga batan-on, sakit, o kamatayon. Apan ayaw pagdugay sa paghisgot sa daotang mga butang; ang imong mensahe maoy makapalig-on. Paningkamoti ang pagtumong sa kabildohanay nganha sa Pulong sa Diyos ug sa paglaom sa Gingharian.

Ipakita Kon Nganong ang Ulohan Hinungdanon Alang sa Imong Mamiminaw. Kon ikaw magpakigpulong diha sa kongregasyon, ikaw makapaneguro nga kadtong maminaw kanimo kasagarang interesado sa imong hisgotan. Apan magpatalinghog ba sila sa paaging ang usa ka tawo magpatalinghog sa dihang siya makakat-on ug butang nga tinong naglangkit kaniya? Magpatalinghog ba sila kay nakaamgo nga ang ilang nadungog mohaom sa ilang kahimtang sa kinabuhi ug kay imong gidasig diha kanila ang tinguha nga may himoon bahin niana? Kana mahitabo lamang kon hunahunaon mo pag-ayo ang imong mamiminaw​—ilang mga kahimtang, ilang mga kabalaka, ilang mga tinamdan​—diha sa pagpangandam sa imong pakigpulong. Kon gihimo mo kana, nan ilakip ang butang nga magpaila niana diha sa imong introduksiyon.

Kon kaha ikaw nagpakigpulong diha sa plataporma o nagasangyaw sa usa ka tawo, usa sa labing maayong mga paagi sa pagpukaw sa interes bahin sa usa ka ulohan mao ang paglangkit sa imong mamiminaw. Ipakita kon sa unsang paagi nalangkit sa ulohan nga imong ginahisgotan ang ilang mga suliran, ilang mga panginahanglan, o mga pangutanang anaa sa ilang mga hunahuna. Kon imong ipaila nga ikaw dili lang maghisgot ug malangkobong mga bahin sa ulohan apan maghisgot sa espesipikong mga bahin sa ulohan, sila mamati pag-ayo. Aron mahimo kana, kinahanglan nga mag-andam ka pag-ayo.

Ang Imong Paagi sa Pagpresentar Niini. May pangunang importansiya kon unsa ang imong isulti diha sa introduksiyon, apan kon unsaon nimo pagsulti kini makapukaw usab sa interes. Tungod niini kinahanglang ilakip sa imong pagpangandam dili lang kon unsay imong isulti kondili kon unsaon usab nimo pagsulti kana.

Ang paggamit ug hustong mga pulong mahinungdanon sa pagpalampos sa imong tumong, busa maayo ang pag-andam pag-ayog duha o tulo ka tudling-pulong. Ang mubo, yanong mga tudling-pulong kasagaran nga labing maayo. Alang sa usa ka pakigpulong diha sa kongregasyon, basin gusto nimong isulat kana sa imong mga nota, o basin palabihon mo ang pagsag-ulo niana aron ang imong pang-abling mga pulong makabaton sa gikinahanglang epekto. Ang pagpahayag ug epektibong introduksiyon sa dili-dinalidaling paagi makatabang kanimo nga makabatog kaligdong nga kinahanglanon sa pagpahayag sa nabiling bahin sa imong pakigpulong.

Kon Kanus-a Andamon Kini. Nagkadaiya ang mga opinyon bahin niining ulohana. Ang pipila ka eksperyensiyadong mga mamumulong nagtuo nga ang pagpangandam sa pakigpulong angay nga sugdan sa introduksiyon. Ang uban nga nagtuon bahin sa publikong pagdiskurso may opinyon nga angayng andamon ang introduksiyon pagkahuman sa lawas sa pakigpulong.

Tinuod nga kinahanglang mahibalo ka kon unsa ang imong ulohan ug kon unsang mga pangunang punto ang gihunahuna nimong han-ayon sa dili ka pa maghikay sa mga detalye sa haom nga introduksiyon. Apan unsa na man kon ikaw nagaandam sa imong pakigpulong gikan sa pinatik nga laraw? Human sa pagbasa sa laraw, kon may ideya ka na alang sa introduksiyon, tinong dili daotan nga imong isulat kana. Hinumdomi, usab, aron mahimong epektibo ang imong introduksiyon, kinahanglang imong tagdon ang imong mamiminaw ingon man ang materyal diha sa laraw.