Kapitulo Uno
Kahiusa sa Pagsimba sa Atong Panahon—Unsay Kahulogan Niini?
1, 2. (a) Unsang kulbahinam nga kalihokan ang nagakahitabo sa atong panahon? (b) Unsang kahibulongang paglaom ang nabatonan sa matinud-anog kasingkasing nga mga tawo?
SA TIBUOK kalibotan adunay kulbahinam nga kalihokan alang sa kahiusa sa pagsimba. Kini nagpahiusa sa milyonmilyong katawhan sa tanang kanasoran, mga tribo, ug mga pinulongan. Daghan pa ang ginatigom matag tuig. Sila nailhan diha sa Bibliya ingong “mga saksi” ni Jehova ug gitawag nga “usa ka dakong panon.” Sila nagatanyag sa Diyos ug “sagradong pag-alagad adlaw ug gabii.” (Isaias 43:10-12; Pinadayag 7:9-15) Nganong gibuhat nila kini? Kay sila nakabatog kahibalo bahin kang Jehova ingong bugtong matuod nga Diyos. Nagpalihok kini kanila sa pagpahiuyon sa ilang kinabuhi sa iyang matarong nga mga sukdanan. Gawas pa, nahibaloan nila nga kita nagkinabuhi na sa “kataposang mga adlaw” niining presenteng daotang kalibotan, nga sa dili madugay ang Diyos maglaglag niini, ug nga pulihan niya kini sa iyang paraisonhon nga bag-ong kalibotan.—2 Timoteo 3:1-5, 13; 2 Pedro 3:10-13.
2 Ang Pulong sa Diyos nagsaad: “Sa dili na madugay, ug ang daotan mawala na . . . Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:10, 11) “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:4.
3. Sa unsang paagi nakab-ot ang tinuod nga panaghiusa sa pagsimba?
3 Kadtong gihiusa karon sa matuod nga pagsimba maoy molangkob sa unang mga molupyo nianang bag-ong kalibotan. Nakakat-on sila sa kabubut-on sa Diyos ug nagabuhat niana kutob sa ilang maarangan. Nagpakita sa kahinungdanon niini, si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Si apostol Juan misulat: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”—1 Juan 2:17.
Kon Unsa Gayod ang Kahulogan Niini
4. (a) Unsa ba gayod ang kahulogan sa pagpanigom sa daghan kaayong katawhan diha sa nahiusang pagsimba sa atong panahon? (b) Giunsa paghubit sa Bibliya ang maong pagpanigom?
4 Unsa ba gayod ang kahulogan sa pagpanigom sa daghan kaayong katawhan diha sa nahiusang pagsimba sa atong panahon? Kini maoy tin-aw nga pamatuod nga kita haduol na kaayo sa kataposan niining daotang kalibotan, nga ang bag-ong kalibotan sa Diyos mosugod gilayon human niana. Kita maoy mga saksing-nakakita sa katumanan sa mga tagna sa Bibliya nga nagtagna niining hinungdanong pagpanigom. Usa nianang tagnaa nagkanayon: “Mahitabo sa kaulahiang bahin sa mga adlaw [kining kataposang mga adlaw] nga ang bukid sa balay ni Jehova [iyang nabayaw nga matuod nga pagsimba] lig-ong matukod ibabaw sa tumoy sa kabukiran [labaw sa bisan unsang matang sa pagsimba], . . . ug nganha niini ang mga katawhan magaganayan. Ug daghang kanasoran ang moadto gayod ug moingon: ‘Umari kamo, ug manungas kita ngadto sa bukid ni Jehova ug ngadto sa balay sa Diyos ni Jacob; ug siya magatudlo kanato bahin sa iyang mga dalan, ug kita magalakaw sa iyang mga alagianan.’”—Miqueas 4:1, 2; Salmo 37:34.
5, 6. (a) Unsa ka tinuod nga ang mga nasod nagaliso ngadto kang Jehova? (b) Unsang mga pangutana ang angay natong isukna sa atong kaugalingon?
5 Bisan tuod ang enterong mga nasod wala magtanyag sa ilang kaugalingon diha sa espirituwal nga balay sa pagsimba ni Jehova, milyonmilyong indibiduwal gikan sa tanang kanasoran ang nagabuhat niana. Sa dihang makakat-on sila bahin sa mahigugmaong katuyoan ug makapadaning personalidad ni Jehova nga Diyos, ang ilang mga kasingkasing dulot nga mapalihok. Mapaubsanon silang nagtinguha sa pagsusi kon unsay gikinahanglan sa Diyos kanila. Ang ilang pag-ampo maoy sama nianang iya sa salmista nga miingon: “Tudloi ako sa pagbuhat sa imong kabubut-on, kay ikaw mao ang akong Diyos.”—Salmo 143:10.
6 Nakita mo ba ang imong kaugalingon taliwala sa dakong panon sa katawhan nga ginatigom karon ni Jehova diha sa nahiusang pagsimba? Ang imo bang pagsanong sa instruksiyon nga imong nadawat gikan sa iyang Pulong nagpakita nga imo gayong giila nga si Jehova mao ang Tinubdan niini? Sa unsang gilapdon ikaw “magalakaw sa iyang mga alagianan”?
Kon sa Unsang Paagi Nakab-ot Kana
7. (a) Sa unsang gilapdon nga ang panaghiusa sa pagsimba sa kataposan makab-ot? (b) Nganong dinalian nga mahimong usa ka magsisimba ni Jehova karon, ug sa unsang paagi makatabang kita sa uban sa pagbuhat niana?
7 Maoy katuyoan ni Jehova nga ang tanang intelihenteng linalang mahiusa diha sa matuod nga pagsimba. Pagkadako sa atong pangandoy sa adlaw sa dihang ang tanang tawo magasimba sa bugtong matuod nga Diyos! (Salmo 103:19-22) Apan sa dili pa kana mahitabo, kinahanglang wagtangon una ni Jehova ang tanang modumili sa pagbuhat sa iyang matarong nga kabubut-on. Sa kamaluluy-on, naghatag siyag abanteng pahibalo bahin sa iyang pagabuhaton, aron ang mga tawo bisan diin makabatog kahigayonan sa pagbag-o sa ilang dalan. (Isaias 55:6, 7) Busa, sa atong panahon “ngadto sa matag nasod ug tribo ug pinulongan ug katawhan,” kining dinaliang hangyo ginahimo: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na, ug busa simbaha ninyo ang Usa nga maoy naghimo sa langit ug sa yuta ug sa dagat ug sa mga tuboran sa mga tubig.” (Pinadayag 14:6, 7) Gidawat ba nimo ang maong pagdapit? Kon mao, maoy imong pribilehiyo ang pagdapit sa uban nga mahibalo ug magsimba sa matuod nga Diyos.
8. Human makakat-on sa paninugdang mga pagtulon-an sa Bibliya, unsang dugang pag-uswag ang angay natong himoon sa malugotong paagi?
8 Dili katuyoan ni Jehova nga simbahon siya sa mga tawo nga nag-ingon nga sila nagtuo kaniya apan unya nagpadayon sa pagpangagpas sa ilang mga interes. Buot sa Diyos nga ang mga tawo mahidangat sa “tukmang kahibalo sa iyang kabubut-on” ug ipasundayag kana sa ilang kinabuhi. (Colosas 1:9, 10) Busa, ang mapasalamatong mga tawo nga nakakat-on sa paninugdang mga pagtulon-an sa Bibliya gustong mouswag ngadto sa Kristohanong pagkahamtong. Ang ilang tinguha mao ang mas suod nga pagkaila kang Jehova, pagpalapad ug pagpalalom sa ilang pagsabot sa iyang Pulong, ug pagpadapat niana sa ilang kinabuhi nga mas bug-os. Buot nilang isumbalik-silaw ang mga hiyas sa atong langitnong Amahan ug tamdon ang mga butang sama sa iyang pagtamod. Magpalihok kini kanila sa pagpangitag mga paagi sa pagpaambit sa nagaluwas-kinabuhing buluhaton nga gihikay niyang buhaton dinhi sa yuta sa atong adlaw. Mao ba usab kana ang imong tinguha?—Marcos 13:10; Hebreohanon 5:12–6:3.
9. Sa unsang mga paagi ang tinuod nga panaghiusa posible karon?
9 Gipakita sa Bibliya nga silang moalagad kang Jehova kinahanglang usa ka nahiusang katawhan. (Efeso 4:1-3) Kining maong panaghiusa angayng maglungtad karon, bisan pag kita nagkinabuhi sa nabahinbahin nga kalibotan ug nakigbisog gihapon sa atong mga pagkadi-hingpit. Malugotong nag-ampo si Jesus nga ang tanan niyang mga tinun-an mausa, nga magtagamtam sa tinuod nga panaghiusa. Unsay ipasabot niini? Una, nga sila makabaton ug maayong relasyon uban kang Jehova ug sa iyang Anak. Ikaduha, nga sila mahiusa sa usag usa. (Juan 17:20, 21) Sa maong tumong, ang Kristohanong kongregasyon nagsilbi ingong organisasyon nga pinaagi niana si Jehova nagtudlo sa iyang katawhan.
Unsang mga Punto ang Makatabang sa Panaghiusa?
10. (a) Unsay atong maugmad kon personal natong gamiton ang Bibliya aron mangatarongan sa mga pangutanang makaapektar kanato? (b) Analisaha ang mga hinungdan nga makaamot sa Kristohanong panaghiusa pinaagi sa pagtubag sa mga pangutanang gilista niining parapoha.
10 Hisgotan nato karon ang pito ka yawing mga punto nga makatabang sa panaghiusa sa pagsimba. Sa dihang tubagon mo ang kaubang mga pangutana, palandonga kon sa unsang paagi ang kada punto makaapektar sa imong relasyon kang Jehova ug sa mga isigka-Kristohanon. Ang pagpangatarongan pinasikad niining mga puntoha ug pagsusi sa mga kasulatan nga gisitar apan wala kutloa makatampo sa imong pag-uswag sa diyosnong kaalam, katakos sa panghunahuna, ug pagsabot—mga hiyas nga gikinahanglan natong tanan. (Proverbio 5:1, 2; Filipos 1:9-11) Tagsatagsaa pagtagad kining mga puntoha.
(1) Atong giila ang katungod ni Jehova sa pagpahilunag sukdanan bahin sa maayo ug daotan. “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.”—Proverbio 3:5, 6.
Nganong angay natong tinguhaon ang tambag ug paggiya ni Jehova sa paghimog mga desisyon? (Salmo 146:3-5; Isaias 48:17)
(2) Ania kanato ang Pulong sa Diyos sa paggiya kanato. “Dihang nadawat ninyo ang pulong sa Diyos, nga inyong nadungog gikan kanamo, inyong gidawat kini, dili ingong pulong sa mga tawo, kondili, ingon sa kon unsa kini sa pagkatinuod, ingong pulong sa Diyos, nga naglihok usab diha kaninyo nga mga magtutuo.”—1 Tesalonica 2:13.
Unsang kapeligrohan ang motungha kon kita yanong mobuhat sa usa ka butang nga “gibati” natong matarong? (Proverbio 14:12; Jeremias 10:23, 24; 17:9)
Kon kita walay kahibalo kon unsang tambaga ang gihatag sa Bibliya bahin sa usa ka tinong butang, unsay angay natong buhaton? (Proverbio 2:3-5; 2 Timoteo 3:16, 17)
(3) Kitang tanan makakuhag kaayohan gikan sa samang programa sa espirituwal nga pagpakaon. “Ang tanan nimong mga anak mahimong mga tinudloan ni Jehova.” (Isaias 54:13) “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang makita ninyo nga ang adlaw [sa kalaglagan] nagkaduol na.”—Hebreohanon 10:24, 25.
Unsang mga kaayohan ang maangkon niadtong bug-os nga magpahimulos sa mga kahikayan ni Jehova sa espirituwal nga pagpakaon? (Isaias 65:13, 14)
(4) Si Jesu-Kristo, ug dili tawo, mao ang atong Pangulo. “Ayaw kamo pagpatawag nga Rabbi, kay usa ra ang inyong magtutudlo, samtang kamong tanan mga igsoon. Dugang pa, ayaw ninyo tawgang amahan si bisan kinsa dinhi sa yuta, kay usa ra ang inyong Amahan, ang langitnong Usa. Ayaw kamo pagpatawag nga ‘mga pangulo,’ kay usa ra ang inyong Pangulo, si Kristo.”—Mateo 23:8-10.
Angay bang bation ni bisan kinsa kanato nga kita labaw sa ubang tawo? (Roma 3:23, 24; 12:3)
(5) Kita nagasalig sa kagamhanan sa Gingharian sa Diyos ingong bugtong paglaom sa katawhan. “Busa, mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.’ Nan, magpadayon sa pagpangita pag-una sa gingharian ug sa iyang pagkamatarong.”—Mateo 6:9, 10, 33.
Sa unsang paagi ang “pagpangita pag-una sa gingharian” makatabang sa pagpanalipod sa atong panaghiusa? (Miqueas 4:3; 1 Juan 3:10-12)
(6) Ang balaang espiritu nagapatungha diha sa mga magsisimba ni Jehova sa mga hiyas nga hinungdanon sa Kristohanong panaghiusa. “Ang bunga sa espiritu mao ang gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.”—Galacia 5:22, 23.
Unsay angay natong buhaton aron ang espiritu sa Diyos magpatunghag bunga diha kanato? (Buhat 5:32)
Sa unsang paagi ang pagbaton sa espiritu sa Diyos makaimpluwensiya sa atong relasyon uban sa mga isigka-Kristohanon? (Juan 13:35; 1 Juan 4:8, 20, 21)
(7) Ang tanang tinuod nga mga magsisimba sa Diyos makig-ambit sa pagsangyaw sa maayong balita sa iyang Gingharian. “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—Mateo 24:14.
Unsay angayng magpalihok kanato kon buot natong bug-os makigbahin niining kalihokan sa pagsangyaw? (Mateo 22:37-39; Roma 10:10)
11. Unsay mahimong epekto kon ipadapat nato ang mga kamatuoran sa Bibliya sa atong kinabuhi?
11 Ang nahiusang pagsimba kang Jehova mas magpasuod nato kaniya ug magpaarang nato sa pagpahimulos sa makapalig-on nga panag-ubanay duyog sa mga isigkamagtutuo. Ang Salmo 133:1 nag-ingon: “Tan-awa! Pagkamaayo ug pagkamakalilipay nga ang mga igsoon mag-uban pagpuyo diha sa panaghiusa!” Pagkamakapahupay nga makalingkawas gikan sa kalibotan uban sa tanang kadalo, imoralidad, ug kapintasan niini ug sa pagpakigtigom uban niadtong tinuod nga nahigugma kang Jehova ug nagsunod sa iyang mga balaod!
Likayi ang Mabahinbahinong mga Impluwensiya
12. Nganong angay natong likayan ang independenteng espiritu?
12 Aron dili madaot ang atong bililhon tibuok-kalibotang panaghiusa, likayan gayod nato ang mabahinbahinong mga impluwensiya. Usa niini mao ang espiritu sa pagkaindependente nga bulag sa Diyos ug sa iyang mga balaod. Si Jehova motabang kanato sa paglikay niini pinaagi sa pagyagyag sa tinubdan niini, si Satanas nga Yawa. (2 Corinto 4:4; Pinadayag 12:9) Si Satanas maoy nag-impluwensiya kang Adan ug Eva sa pagsalikway sa gisulti sa Diyos ug sa paghimog mga desisyon nga sukwahi sa kabubut-on sa Diyos. Ang sangpotanan maoy katalagman alang kanila ug kanato. (Genesis 3:1-6, 17-19) Kining kalibotana natuphan sa espiritu sa pagkaindependente nga bulag sa Diyos ug sa iyang mga balaod. Busa kinahanglang pukgoon nato ang maong espiritu diha sa atong kaugalingon.
13. Unsay magpakita kon kaha kita sa kamatinud-anon nagapangandam sa kinabuhi sa matarong bag-ong kalibotan sa Diyos?
13 Pananglitan, tagda ang kulbahinam nga saad ni Jehova nga ilisan ang presenteng daotang kalibotan sa bag-ong mga langit ug usa ka bag-ong yuta nga niini “magpuyo ang pagkamatarong.” (2 Pedro 3:13) Dili ba angayng magpalihok kini kanato aron magsugod sa pagpangandam sa pagpuyo nianang panahona sa dihang motunhay na ang pagkamatarong? Nagpasabot kini sa pagsunod sa tin-awng tambag sa Bibliya: “Ayaw ninyo higugmaa ang kalibotan o ang mga butang nga anaa sa kalibotan. Kon adunay mahigugma sa kalibotan, ang gugma sa Amahan wala diha kaniya.” (1 Juan 2:15) Busa, molikay kita niining espirituha sa kalibotan—sa independenteng tinamdan, hinobrang pagtagad sa kaugalingon, imoralidad ug kapintasan niini. Batasanon nato ang pagpatalinghog kang Jehova ug pagsunod kaniya nga kinasingkasing, bisan pa sa bisan unsang sukwahing mga hilig sa dili-hingpit nga unod. Ang atong bug-os nga dalan sa kinabuhi magpamatuod nga ang atong panghunahuna ug mga motibo natumong sa pagbuhat sa kabubut-on sa Diyos.—Salmo 40:8.
14. (a) Nganong hinungdanon ang pagpahimulos sa kahigayonan karon sa pagkat-on sa mga dalan ni Jehova ug pagpadapat niana sa atong kinabuhi? (b) Unsay kahulogan sa mga kasulatang gisitar sa parapo alang kanato sa personal?
14 Inig-abot sa tinudlong panahon nga si Jehova molaglag niining daotang sistema sa mga butang ug sa tanang mopalabi sa mga paagi niini, siya dili magalangan. Dili niya ioktaba kanang panahona o usbon ang iyang mga sukdanan aron konsiderahon kadtong naningkamot gihapon sa paghawid sa kalibotan samtang sa kataphaw nagatuon sa kabubut-on sa Diyos ug nagabuhat niana. Karon na ang panahon sa paglihok! (Lucas 13:23, 24; 17:32; 21:34-36) Busa, pagkamakapadasig nga makita ang dakong panon nga nagapahimulos niining hamiling kahigayonan, nga maikagong nagatinguha sa instruksiyon nga ginatagana ni Jehova pinaagi sa iyang Pulong ug organisasyon ug nahiusang nagalakaw diha sa iyang mga alagianan ngadto sa bag-ong kalibotan! Ug samtang dugang kitang makakat-on bahin kang Jehova, mas mahigugma kita kaniya ug buot nga moalagad kaniya.
Repasong Panaghisgot
• Unsay katuyoan ni Jehova maylabot sa pagsimba?
• Human kita makakat-on sa paninugdang mga pagtulon-an sa Bibliya, unsang dugang pag-uswag ang angay natong himoon sa masibotong paagi?
• Sa tinagsatagsa unsay atong mahimo aron mahiusa sa ubang mga magsisimba ni Jehova?
[Hulagway sa panid 4]
‘Ang mga maaghop magapanag-iya sa yuta ug makakaplag sa ilang tumang kalipay sa kadagaya sa pakigdait’