Kapitulo Desisayis

“Batoni ang Mainit nga Gugma Alang sa Usag Usa”

1. Unsay kasagarang makapadayeg sa mga bag-ong tumatambong sa mga tigom sa mga Saksi ni Jehova?

INIGTAMBONG sa mga tawo sa unang higayon sa mga tigom sa mga Saksi ni Jehova, sila kasagarang makadayeg sa gugma nga gipakita didto. Makita nila kini diha sa pagtimbaya kanila ug sa mainitong panag-igsoonay. Ang mga bisita sa atong mga kombensiyon makamatikod usab niining gugmaha. Usa ka tighipos ug balita sa mantalaan misulat bahin sa usa ka kombensiyon: ‘Walay usang nalango sa droga o alkoholikong ilimnon. Walay nagsiningkahay ug nagsininggitay. Walay nagtukloray. Walay nagsinikhanay. Walay namalikas o nanunglo. Walay komedyang hilas o law-ayng mga pulong. Walay nanigarilyo. Walay nangawat. Walay naglabayg basiyong mga lata diha sa nataran. Talagsaon gayod kadto.’ Kining tanan maoy pamatuod sa gugma, ang gugma nga “dili bastos, dili mangita sa kaugalingong kaayohan niini.”​—1 Corinto 13:4-8.

2. (a) Ngadtongadto, unsay angay nga madayag bahin sa atong pagpakitag gugma? (b) Sa pagsundog kang Kristo, unsang matanga sa gugma ang angay natong ugmaron?

² Ang inigsoong gugma maoy ilhanan sa tinuod nga mga Kristohanon. (Juan 13:35) Samtang kita motubo sa espirituwal, kita makakat-on sa pagpakitag gugma sa mas bug-os nga paagi. Si apostol Pablo nag-ampo nga ang gugma sa iyang mga isigka-Kristohanon “mosamot pa sa pagdagaya.” (Filipos 1:9) Gipakita ni apostol Juan nga ang atong gugma angay nga masakripisyohon sa kaugalingon. Siya misulat: “Pinaagi niini atong nahibaloan ang gugma, tungod kay [ang Anak sa Diyos] nagtugyan sa iyang kalag alang kanato; ug kita nailalom sa obligasyon nga itugyan ang atong mga kalag alang sa atong mga igsoon.” (1 Juan 3:16; Juan 15:​12, 13) Itahan ba gayod nato ang atong kinabuhi alang sa atong mga igsoon? Bisan tuod ang kadaghanang kahimtang dili mangayo niana, sa unsang gilapdon nga kita maningkamot sa pagtabang kanila karon, bisan kon kini dili kombenyente kanato?

3. (a) Sa unsang paagi ikapahayag nato ang atong gugma sa mas bug-os nga paagi? (b) Nganong hinungdanon ang pagbatog mainitong gugma alang sa usag usa karon?

³ Duyog sa atong mga buhat nga magbanaag sa masakripisyohon-sa-kaugalingong espiritu, kita angay nga dunay tim-os nga mainitong pagbati sa atong mga igsoon. Ang Pulong sa Diyos nag-awhag kanato: “Sa inigsoong gugma batoni ang malumong pagmahal alang sa usag usa.” (Roma 12:10) Kitang tanan mobatig ingon niana alang sa pipila ka tawo. Apan makakat-on ba kita nga mobati sa maong kahinangop alang sa ubang mga tawo? Samtang magkahiduol ang kataposan ning karaang sistema, hinungdanon gayod nga kita mas masuod sa atong mga isigka-Kristohanon. Ang Bibliya nag-ingon: “Ang kataposan sa tanang butang haduol na. . . . Labaw sa tanang butang, batoni ang mainit nga gugma alang sa usag usa, kay ang gugma magatabon sa daghang sala.”​—1 Pedro 4:​7, 8.

Sa Dihang Motungha ang mga Suliran

4. (a) Nganong ang mga suliran mahimong motungha tali sa mga igsoon sa kongregasyon? (b) Bisan tuod kita dili kanunay gustong mobuhat niana, unsang kaayohan ang mahimong mosangpot kon atong ipadapat ang tambag sa Bibliya?

⁴ Tinuod, samtang kita dili hingpit, may mga panahon nga makabuhat kitag mga butang nga makapasakit sa uban. Ang atong mga igsoon usab mahimong makasala batok kanato sa daghang paagi. (1 Juan 1:8) Kon ikaw masugamak sa maong kahimtang, unsay angay nimong buhaton? Ang Kasulatan nagtaganag gikinahanglang pagtultol. Apan ang gisulti niini basin dili mahiuyon sa atong hilig nga himoon ingong dili hingpit nga mga tawo. (Roma 7:21-23) Bisan pa niana, ang atong masibotong pagpadapat sa tambag nga anaa sa Bibliya magpamatuod sa atong sinserong tinguha sa pagpahimuot kang Jehova. Ang pagbuhat niana magpatugob usab sa kalidad sa atong gugma ngadto sa uban.

5. Kon dunay mopasakit kanato, nganong kita dili angayng manimalos?

⁵ Sa dihang masakitan ang mga tawo, usahay mangita silag mga paagi nga manimalos sa tagsala. Apan kana makapasamot lang sa kahimtang. Kon ang panimalos gikinahanglan, angay natong itugyan kana ngadto sa Diyos. (Proverbio 24:29; Roma 12:17-21) Ang uban tingali mosulay nga dili na lang makigkita sa tagsala. Apan dili gayod nato buhaton kana sa mga isigkamagsisimba kay, sa bahin, ang pagkadalawaton sa atong pagsimba mag-agad sa atong paghigugma sa atong mga igsoon. (1 Juan 4:20) Busa, si Pablo misulat: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon.” (Colosas 3:13) Mahimo ba nimo kana?

6. (a) Unsa ka subsob nga kinahanglang pasayloon nato ang atong igsoon? (b) Ang pagsabot sa unsa bahin sa atong kaugalingon ang motabang kanato sa pagdumala sa usa ka sala batok kanato?

⁶ Unsa na man kon ang usa sublisubling makasala batok kanato apan dili makahimog grabeng mga sala nga tungod niana siya ikapalagpot sa kongregasyon? Alang sa maong ginagmayng mga sala, si apostol Pedro nagsugyot sa pagpasaylo “hangtod sa makapito.” Apan si Jesus miingon: “Dili, Hangtod sa makapito, kondili, Hangtod sa kapitoag-pito.” Iyang gipasiugda ang kadako sa atong kasal-anan sa Diyos kon itandi sa mahimong sala ni bisan kinsang tawo batok kanato. (Mateo 18:21-35) Sa daghang paagi kita makasala batok sa Diyos kada adlaw​—usahay tungod sa usa ka hinakog nga buhat, sa atong isulti o hunahunaon, o sa dili nato mahimo—​nga dili gani maghunahuna nga kita nagpakasala. (Roma 3:23) Apan, ang Diyos padayong nagmaluluy-on kanato. (Salmo 103:10-​14; 130:​3, 4) Siya nangayo nga magmaluluy-on usab kita sa usag usa. (Mateo 6:​14, 15; Efeso 4:​1-3) Sa ingon kita magapakita unya sa matang sa gugma nga “dili maghupot ug talaan sa kadaot.”​—1 Corinto 13:​4, 5; 1 Pedro 3:​8, 9.

7. Unsay angay natong buhaton kon ang usa ka igsoon may kaligutgot kanato?

⁷ May mga higayon tingali nga atong maamgohan nga bisan tuod kita walay kaligutgot sa atong igsoon, siya ang may kaligutgot kanato. Mahimo natong ‘tabonan kini sa gugma,’ sumala sa gisugyot sa 1 Pedro 4:8. O kaha kita ang mouna pagpakigsulti kaniya ug maningkamot pagpasig-uli sa malinawong mga relasyon.​—Mateo 5:​23, 24.

8. Kon ang isigkamagtutuo makahimog butang nga makapasuko kanato, unsay arang mahimo bahin niana?

⁸ Mahimong ang usa ka isigkamagtutuo magbuhat ug butang nga makapasuko dili lamang kanimo kondili sa uban usab. Dili kaha maayo nga makigsulti kaniya? Maayo tingali. Kon ikaw mismo ang mopasabot sa problema ngadto kaniya sa malulotong paagi, kini mahimong magdalag maayong mga sangpotanan. Apan sa dili pa, angay nimong suknaon ang imong kaugalingon: ‘Nagbuhat ba gayod siyag butang nga dili kasulatanhon? O dili kaha nga ang suliran maoy tungod lang kay magkalahi ang among kagikan ug pagmatuto?’ Pagbantay nga dili maghimog kaugalingon nimong mga sukdanan ug dayon maghukom sumala niini. (Santiago 4:​11, 12) Si Jehova sa walay-pagpihig modawat sa mga tawo gikan sa tanang matang sa kagikan ug mapailobon kanila samtang sila molambo sa espirituwal.

9. (a) Kinsay mohatag pagtagad sa mga kaso sa seryosong kasal-anan diha sa kongregasyon? (b) Kanus-a man nga maoy responsabilidad sa usa nga nahimoag sala ang paglihok nga una, ug uban sa unsang tumong?

⁹ Kon dunay igsoon sa kongregasyon nga malangkit sa seryosong kasal-anan, sama sa imoralidad, ang dihadihang pagtagad kinahanglang ihatag. Pinaagi ni kinsa? Pinaagi sa mga ansiyano. (Santiago 5:​14, 15) Bisan pa niana, kon ang sala mahimo batok sa usa ka igsoon, tingali bahin sa negosyo o sa makadaot nga paggamit sa dila, nan ang nahimoag sala kinahanglang maningkamot sa pagduol sa nakasala diha sa pribadong paagi. (Mateo 18:15) Kon kana dili makasulbad sa kahimtang, ang dugang mga tikang angayng himoon, sumala sa gilaraw sa Mateo 18:​16, 17. Ang gugma alang sa atong makasasalang igsoon ug ang tinguha sa ‘pagkabig’ kaniya motabang nato sa pagbuhat niini sa paagi nga maabot ang iyang kasingkasing.​—Proverbio 16:23.

10. Kon may motunghang problema, unsay makatabang nato sa pag-isip sa kahimtang sa hustong paagi?

¹⁰ Kon may motunghang problema, seryoso man o dili, kita matabangan kon kita maningkamot sa pagsabot kon giunsa kini pag-isip ni Jehova. Siya dili mouyon sa sala sa bisan unsang dagway, ug sa iyang gitakdang panahon, ang dili mahinulsolong mga mamumuhat ug seryosong sala paphaon gikan sa iyang organisasyon. Bisan pa niana, dili nato kalimtan nga kitang tanan makasala sa ginagmayng mga paagi ug nagkinahanglan sa iyang hataas nga pailob ug kaluoy. Sa ingon si Jehova nagpahilunag sumbanan nga atong sundon kon kita mahimoag mga sala sa uban. Kon kita maluluy-on, kita nagasumbalik-silaw sa iyang gugma.​—Efeso 5:​1, 2.

Pangitag mga Paagi sa ‘Pagpasangkad’

11. Nganong gidasig ni Pablo ang mga taga-Corinto nga “magpasangkad”?

¹¹ Si Pablo migugol ug daghang bulan sa pagpalig-on sa kongregasyon sa Corinto, Gresya. Siya naningkamot pag-ayo sa pagtabang sa mga igsoon didto, ug siya nahigugma kanila. Apan ang uban kanila walay mainitong pagbati kaniya. Sila hinawayon kaayo. Iyang giawhag sila nga “magpasangkad” sa pagpahayag sa ilang pagbati. (2 Corinto 6:11-13; 12:15) Maayo kon kitang tanan magtagad sa gilapdon sa atong pagpahayag sa gugma ngadto sa uban ug sa pagpangitag mga paagi sa pagpasangkad.​—1 Juan 3:14.

12. Unsaon nato pagpalambo ang atong gugma alang sa tanan diha sa kongregasyon?

¹² May pipila ba diha sa kongregasyon nga kita malisdan sa pagpakigsuod? Kon ato lamang palabyon ang bisan unsang kasungian sa personalidad​—sama sa buot usab natong buhaton nila kanato—​kini makatabang sa pagpainit sa relasyon tali kanato. Ang atong mga pagbati kanila mahimong mouswag usab kon atong pangitaon ang ilang maayong mga hiyas ug hunahunaon kini. Sa walay duhaduha kini magpalambo gayod sa atong gugma kanila.​—Lucas 6:​32, 33, 36.

13. Unsaon man nato pagpasangkad sa pagpakitag gugma ngadto niadtong anaa sa atong kongregasyon?

¹³ Tinuod, dunay mga limitasyon sa atong mahimo ngadto sa uban. Mahimong dili nato matimbaya ang tanan sa matag tigom. Mahimong dili nato maapil ang tanan sa dihang atong dapiton ang mga higala sa pagpangaon. Apan makapasangkad ba kita pinaagi sa paggugol lamang ug pipila ka minuto aron mas masinati ang usa ka tawo diha sa atong kongregasyon? Mahimo kahang sa popanahon atong madapit ang usa nga dili kaayo nato kaila nga mokuyog kanato sa pag-alagad sa kanataran?

14. Kon kita anaa taliwala sa mga Kristohanon nga wala pa nato mahimamat, unsaon man nato pagpakitag mainitong gugma sa usag usa?

¹⁴ Ang Kristohanong mga kombensiyon makahatag ug maayong mga kahigayonan sa pagpasangkad sa atong gugma. Libolibo ang mahimong motambong. Kita dili makahimamat nilang tanan, apan kita makagawi sa paagi nga magpakitang giuna nato ang ilang kaayohan kay sa atoa. Tali sa mga sesyon, ikapakita nato ang personal nga interes pinaagi sa pag-una sa pagpakighimamat sa pipila kanila nga anaa sa atong duol. May adlaw ra nga ang tanan unyang magpuyo sa yuta maoy mga igsoong lalaki ug babaye, nga mahiusa sa pagsimba sa matuod nga Diyos ug Amahan sa tanan. Pagkamakapalipay unya nga magkailhanay ang usag usa! Ang mainitong gugma maoy motukmod kanato sa pagbuhat niana. Nganong dili kana sugdan karon?

Repasong Panaghisgot

• Kon may motunghang problema tali sa mga Kristohanon, sa unsang paagi kini pagasulbaron, ug ngano?

• Samtang kita motubo sa espirituwal, sa unsang mga paagi nga angayng molambo usab ang atong gugma?

• Sa unsang paagi posible ang pagpakitag mainitong gugma dili lamang diha sa suod nga mga higala?

[Hulagway sa panid 148]

Ang Kristohanong gugma ikapakita sa daghang paagi, sama sa mga tigom sa kongregasyon