Kapitulo Desisiyete
Ipakita ang Diyosnong Pagkamahinalaron Diha sa Panimalay
1. Sa unsang paagi ang pagpadapat sa giya gikan sa Pulong sa Diyos nakaapektar sa mga kaminyoon?
SI Jehova ang Tagmugna sa kaminyoon, ug ang iyang Pulong naghatag sa labing maayong giya alang sa mga pamilya. Ingong resulta sa pagpadapat sa maong giya, natukod sa daghang tawo ang malamposong mga kaminyoon. Dalayegon, ang pipilang nagpuyopuyo lang natukmod nga magparehistro sa legal nga paagi sa ilang kaminyoon. Gihunong sa uban ang pagpakigsekso sa dili nila kapikas sa kaminyoon. Ang mabangis nga mga lalaking abusado sa ilang mga asawa ug mga anak nakakat-on sa pagpakitag kalulot ug kalumo.
2. Unsay nalangkit sa pagkinabuhi ingong Kristohanong pamilya?
2 Daghang butang ang nalangkit sa pagkinabuhi ingong Kristohanong pamilya, sama sa kon unsay pag-isip nato sa pagkamalungtaron sa kaminyoon, kon unsay atong ginabuhat sa pagtuman sa atong mga responsabilidad diha sa pamilya, ug kon giunsa nato pagtagad ang mga sakop sa pamilya. (Efeso 5:33–6:4) Bisan pag kita tingali nahibalo sa ginaingon sa Bibliya bahin sa pamilyahanong kinabuhi, laing butang ang pagpadapat sa tambag sa Bibliya. Walay usa kanato ang gustong mahisama sa mga gihukman ni Jesus tungod sa paglapas sa mga sugo sa Diyos. Sa binakak sila nangatarongan nga ang relihiyosong pagkamahinalaron lamang maoy igo na. (Mateo 15:4-9) Dili nato gustong batonan ang dagway sa diyosnong pagkamahinalaron apan mapakyas sa pagpakita niini diha sa atong kaugalingong panimalay. Sa kapulihay, gusto natong ipasundayag ang tinuod nga diyosnong pagkamahinalaron, nga maoy “usa ka paagi nga makaganansiyag dako.”—1 Timoteo 5:4; 6:6; 2 Timoteo 3:5.
Unsang Gidugayon Angayng Molungtad ang Kaminyoon?
3. (a) Unsay nagakahitabo sa daghang kaminyoon, apan unsay angay nga atong determinasyon? (b) Nga gamiton ang imong Bibliya, tubaga ang mga pangutanang nalista sa ubos niining parapoha.
3 Sa mausbawon, ang mga bugkos sa kaminyoon nagakahuyang. Ang pipila ka magtiayon nga naminyog daghang katuigan mohukom sa pagdiborsiyo ug maminyog lain. Dili na usab talagsaon ang pagkadungog nga ang bag-ong mga magtiayon nagbulag human lamang sa pagkaminyo sa mubong panahon. Walay sapayan kon unsay gibuhat sa uban, angayng tinguhaon nato ang pagpahimuot kang Jehova. Busa atong hisgotan ang mosunod nga mga pangutana ug mga kasulatan sa pagsusi kon unsay giingon sa Pulong sa Diyos mahitungod sa pagkamalungtaron sa kaminyoon.
Sa dihang magminyo ang usa ka lalaki ug usa ka babaye, unsang gidugayon ang angayng dahomon nilang mag-ipon? (Marcos 10:6-9; Roma 7:2, 3)
Unsa ang bugtong hinungdan sa diborsiyo nga maghimo sa pagminyo pag-usab nga makataronganon atubangan sa Diyos? (Mateo 5:31, 32; 19:3-9)
Unsay pagbati ni Jehova bahin sa mga diborsiyo nga wala itugot sa iyang Pulong? (Malaquias 2:13-16)
Gisuportahan ba sa Bibliya ang pagbulag ingong usa ka paagi sa pagsulbad sa mga suliran sa kaminyoon? (1 Corinto 7:10-13)
Ubos sa unsang mga kahimtang nga tingali ikatugot ang pagbulag? (Salmo 11:5; Lucas 4:8; 1 Timoteo 5:8)
4. Nganong malungtaron man ang pipila ka kaminyoon?
4 Ang pipila ka kaminyoon maoy malamposon, malungtaron. Ngano man? Ang paghulat sa pagminyo hangtod nga hamtong na ang lalaki ug babaye maoy usa ka hinungdan, apan ang pagkakaplag ug kapikas nga samag intereses sa usa ug dili magpanuko sa pagpakigsulti sa mga butang mahinungdanon usab. Apan, mas mahinungdanon ang pagkakaplag ug kapikas nga nahigugma kang Jehova ug nagtahod sa iyang Pulong isip pasikaranan sa pagsagubang sa mga suliran. (Salmo 119:97, 104; 2 Timoteo 3:16, 17) Kanang tawhana wala makabaton sa tinamdan nga kon ang kaminyoon dili molampos, siya makahimo sa pagpakigbulag o pagpakigdiborsiyo sa bisan unsang panahon. Siya dili mogamit sa mga kakulangan sa iyang kapikas ingong pasangil sa paglikay sa iyang mga responsabilidad. Hinunoa, siya moatubang sa mga suliran ug mangitag epektibong mga solusyon.
5. (a) Sa unsang paagi ang pagkamaunongon kang Jehova nalangkit sa kaminyoon? (b) Bisan pag makaagom ug pagsupak, unsang mga kaayohan ang mosangpot tungod sa pagsunod sa mga sukdanan ni Jehova?
5 Si Satanas nagpatuo nga sa dihang kita mag-antos, kita mobiya sa mga dalan ni Jehova. (Job 2:4, 5; Proverbio 27:11) Apan ang kinabag-an sa mga Saksi ni Jehova nga nag-antos tungod sa masupakong kapikas wala motalikod sa ilang mga panumpa sa kaminyoon. Sila nagpadayong maunongon kang Jehova ug sa iyang mga sugo. (Mateo 5:37) Ang pipila nga nagmalahutayon nalipay nga ang ilang kapikas miduyog sa pag-alagad kang Jehova—bisan tapos sa pagsupak sa daghang katuigan! (1 Pedro 3:1, 2) Bahin sa mga Kristohanon kansang mga kapikas wala magpakitag mga ilhanan sa kausaban o kansang mga kapikas mibiya kanila tungod kay sila nag-alagad kang Jehova, nahibalo usab sila nga panalanginan sila tungod sa ilang paghatag ug ebidensiya sa diyosnong pagkamahinalaron diha sa panimalay.—Salmo 55:22; 145:16.
Matag Usa Nagahimo sa Iyang Bahin
6. Alang sa malamposong kaminyoon, unsang kahikayan ang kinahanglang pagatahoron?
6 Hinuon, alang sa malamposong kaminyoon gikinahanglan ang labaw pa kay sa pag-ipon lamang sa pagpuyo. Ang usa ka pangunang kinahanglanon sa bahin sa matag kapikas mao ang pagtahod sa kahikayan ni Jehova bahin sa pagkaulo. Mosangpot kini sa kahapsay ug sa pagbati sa kasegurohan diha sa panimalay. Sa 1 Corinto 11:3, atong mabasa: “Ang ulo sa matag lalaki mao si Kristo; sa baylo ang ulo sa usa ka babaye mao ang lalaki; sa baylo ang ulo ni Kristo mao ang Diyos.”
7. Sa unsang paagi angayng ipakita ang pagkaulo diha sa pamilya?
7 Namatikdan mo ba kon unsay unang gihisgotan sa maong bersikulo? Oo, ang matag lalaki adunay Ulo, si Kristo, nga angay niyang pasakopan. Nagpasabot kini nga ang bana angayng magpadapat sa pagkaulo sa paagi nga mopaaninag sa mga hiyas ni Jesus. Si Kristo nagpasakop kang Jehova, dulot nga nahigugma sa kongregasyon, ug nag-atiman niini. (1 Timoteo 3:15) Iya ganing ‘gitugyan ang iyang kaugalingon alang niini.’ Si Jesus maoy, dili magarbohon ug dili mahunahunaon, kondili “malumog-buot ug mapainubsanon sa kasingkasing.” Kadtong nailalom sa iyang pagkaulo “makakaplag ug kahayahay alang sa [ilang] mga kalag.” Sa dihang ang usa ka bana magtagad sa iyang pamilya sa maong paagi, siya nagpakita nga nagpasakop siya sa iyang kaugalingon kang Kristo. Unya ang usa ka Kristohanong asawa makaamgo nga ang pagkooperar sa iyang bana ug pagpasakop sa iyang pagkaulo maoy mapuslanon ug makapahayahay.—Efeso 5:25-33; Mateo 11:28, 29; Proverbio 31:10, 28.
8. (a) Nganong ang Kristohanong mga metodo daw walay maayong mga resulta diha sa pipila ka panimalay? (b) Unsay angay natong himoon kon nag-atubang kita sa maong kahimtang?
8 Bisan pa niana, ang mga suliran motungha. Ang usa ka sukod sa kayugot tungod kay nailalom sa pagdumala sa laing tawo basin nakadulot na ug lalom sa dihang wala pay usa sa pamilya ang nagpadapat sa mga prinsipyo sa Bibliya. Ang malulotong mga paghangyo ug mahigugmaong paagi tingali daw walay mga resulta. Nahibalo kita nga ang Bibliya nagsugo nga isalikway ang “kasuko ug kapungot ug sininggitay ug mapasipalahong sinultihan.” (Efeso 4:31) Apan kon ang pipila ka sakop daw nagbatasan niana, unsay angayng himoon? Aw, si Jesus wala mosundog niadtong nanghulga ug nagpasipala, apan siya nagsalig sa iyang Amahan. (1 Pedro 2:22, 23) Busa sa dihang ang lisod nga mga kahimtang sa panimalay motungha, ipakita ang ebidensiya sa diyosnong pagkamahinalaron pinaagi sa pag-ampo kang Jehova alang sa iyang tabang inay sagopon ang mga paagi sa kalibotan.—Proverbio 3:5-7.
9. Inay sa pagpangitag sayop, unsay nakat-onang buhaton sa daghang Kristohanong mga bana?
9 Dili daling mahitabo ang mga kausaban, apan ang tambag sa Bibliya epektibo kaayo sa dihang ipadapat nga mapailobon ug makugihon. Daghang bana nakadiskobre nga miarang-arang ang kahimtang sa kaminyoon sa dihang nasabtan nila ang paagi ni Kristo sa pagtagad sa kongregasyon. Ang maong kongregasyon gilangkoban ug dili hingpit nga mga tawo. Bisan pa niana, gihigugma kini ni Jesus, gihatagan ug hustong panig-ingnan, ug gigamitan sa Kasulatan aron tabangan kini nga mouswag. Iyang gihatag ang iyang kinabuhi alang sa kongregasyon. (1 Pedro 2:21) Ang iyang panig-ingnan nagdasig sa daghang Kristohanong mga bana nga ihatag ang maayong pagpangulo ug ihatag ang mahigugmaong tabang alang sa kauswagan. Kini mohatag ug mas maayong mga resulta kay sa pagpangitag sayop o dili pagtingog.
10. (a) Sa unsang mga paagi ang usa ka bana o asawa—bisan ang usang nag-angkong Kristohanon—makapahimo tingali sa kinabuhi nga lisod alang sa uban diha sa panimalay? (b) Unsa tingaliy mahimo sa pagpauswag sa kahimtang?
10 Komosta kon ang usa ka bana dili sensitibo sa emosyonal nga mga panginahanglan sa iyang pamilya o dili manguna sa paghikay ug pamilyahanong panaghisgot sa Bibliya ug sa ubang mga kalihokan? O komosta man kon ang usa ka asawa dili mokooperar ug magpakitag diyosnong pagkamapasakopon? Ang pipila makabatog maayong mga resulta pinaagi sa paghimog matinahorong pamilyahanong mga panaghisgot bahin sa mga suliran. (Genesis 21:10-12; Proverbio 15:22) Apan bisan kon dili mabatonan ang mga resulta nga gilaoman, ang matag usa kanato makapauswag sa kahimtang sa panimalay pinaagi sa pagpasundayag sa mga bunga sa espiritu sa Diyos sa matag bahin sa atong kinabuhi, nga magpakitag mahigugmaong konsiderasyon alang sa ubang mga sakop sa pamilya. (Galacia 5:22, 23) Ang pag-uswag moabot, dili pinaagi sa paghulat nga ang laing tawo may pagabuhaton, kondili pinaagi sa pagbuhat sa atong kaugalingong bahin, sa ingon magpakita nga kita nagpadapat sa diyosnong pagkamahinalaron.—Colosas 3:18-21.
Kon Asa Mokuhag mga Tubag
11, 12. Unsay gihatag ni Jehova aron tabangan kita sa pagpalampos sa pamilyahanong kinabuhi?
11 Adunay daghang tinubdan nga kadangpan sa mga tawo alang sa tambag bahin sa mga kalihokan sa ilang pamilya. Apan kita nahibalo nga ang Pulong sa Diyos nasudlan sa labing maayong tambag, ug mapasalamaton kita nga pinaagi sa iyang makitang organisasyon, ang Diyos motabang kanato sa pagpadapat niini. Ginapahimuslan mo ba sa bug-os ang maong tabang?—Salmo 119:129, 130; Miqueas 4:2.
12 Gawas pa sa pagtambong sa mga tigom sa kongregasyon, nagagahin ka bag regular nga mga panahon alang sa pamilyahanong pagtuon sa Bibliya? Ang mga pamilya nga naghimo niana makapaningkamot alang sa panaghiusa diha sa ilang pagsimba. Ang ilang pamilyahanong kinabuhi matugob samtang sila magpadapat sa Pulong sa Diyos diha sa ilang kaugalingong mga kahimtang.—Deuteronomio 11:18-21.
13. (a) Kon kita may mga pangutana bahin sa pamilyahanong mga butang, asa kita kasagarang makakaplag sa gikinahanglang tabang? (b) Unsay angayng maaninag diha sa tanang desisyon nga atong himoon?
13 Tingali ikaw adunay mga pangutana bahin sa pamilyahanong mga butang. Pananglitan, komosta ang mga kontraseptibo? Makataronganon ba ang aborsiyon? Kon ang usa ka anak magpakitag diyutayng interes sa espirituwal nga mga butang, asa kutob siya obligahon sa pagpakig-ambit sa pagsimba sa pamilya? Daghang ingon nga mga pangutana nahisgotan diha sa literatura nga gipatik sa mga Saksi ni Jehova. Kat-oni ang paggamit sa mga tabang sa pagtuon sa Bibliya, lakip ang mga indise, aron makaplagan ang mga tubag. Kon wala kay mga basahon nga gipunting sa usa ka indise, pangita diha sa librarya sa Kingdom Hall. O tingali makabasa ka niining mga basahona diha sa imong kompiyuter. Makahisgot ka usab sa imong mga pangutana uban sa hamtong nga Kristohanong mga lalaki ug mga babaye. Apan ayaw dahoma kanunay ang oo o dili nga tubag sa matag pangutana. Kasagarang kamo ang angayng mohukom, sa tagsatagsa o ingong magtiayon. Unya himoa ang mga desisyon nga magpakita nga ikaw nagpakitag diyosnong pagkamahinalaron dili lamang sa publiko kondili diha usab sa panimalay.—Roma 14:19; Efeso 5:10.
Repasong Panaghisgot
• Sa unsang paagi ang pagkamaunongon kang Jehova naglangkit sa pag-unong sa kapikas sa kaminyoon sa usa?
• Sa dihang mapit-osan tungod sa mga suliran sa pamilya, unsay motabang kanato sa pagbuhat kon unsay makapahimuot sa Diyos?
• Bisan pag ang uban diha sa pamilya may kakulangan, unsay atong mahimo sa pagpauswag sa kahimtang?
[Hulagway sa panid 155]
Ang pagkaulo sa usa ka bana angayng mopaaninag sa mga hiyas ni Jesus
[Hulagway sa panid 157]
Ang pagbatog regular nga pagtuon sa Bibliya uban sa pamilya makatabang sa paghiusa niini