Kapitulo Desiotso

“Sila Dili Bahin sa Kalibotan”

1. (a) Una siya patya, unsay giampo ni Jesus alang sa kaayohan sa iyang mga tinun-an? (b) Nganong ang ‘pagkadili-bahin sa kalibotan’ hinungdanon kaayo?

SA GABII una siya patya, si Jesus miampo alang sa iyang mga tinun-an. Kay nahibalo nga ipailalom sila ni Satanas sa hilabihang kapit-osan, si Jesus miingon ngadto sa iyang Amahan: “Naghangyo ako kanimo, dili nga kuhaon sila gikan sa kalibotan, kondili nga bantayan sila tungod sa usa nga daotan. Sila dili bahin sa kalibotan, ingon nga ako dili bahin sa kalibotan.” (Juan 17:​15, 16) Nganong hinungdanon kaayo ang pagkabulag sa kalibotan? Kay si Satanas mao man ang magmamando niining kalibotana. Ang mga Kristohanon dili buot mahimong bahin sa usa ka kalibotan nga nailalom sa iyang paggahom.​—Lucas 4:5-8; Juan 14:30; 1 Juan 5:19.

2. Sa unsang mga paagi si Jesus dili bahin sa kalibotan?

² Ang pagkadili-bahin sa kalibotan wala magpasabot nga si Jesus walay gugma alang sa uban. Sa kasukwahi, siya nag-ayo sa masakiton, nagbanhaw sa mga patay, ug nagtudlo sa mga tawo bahin sa Gingharian sa Diyos. Iya pa ganing gihatag ang iyang kinabuhi alang sa katawhan. Apan wala niya higugmaa ang dili-diyosnong mga tinamdan ug mga buhat niadtong nagpadayag sa espiritu sa kalibotan ni Satanas. Busa, siya nagpasidaan batok sa mga butang nga sama sa mahilayong mga pangibog, materyalistikong paagi sa kinabuhi, ug pagtinguha sa pagkamadungganon. (Mateo 5:​27, 28; 6:19-21; Lucas 20:​46, 47) Nan, dili katingad-ang si Jesus milikay usab sa politika sa kalibotan. Bisan pag siya usa ka Hudiyo, nagpabilin siyang neyutral sa politikanhong mga panagbangi tali sa Roma ug sa mga Hudiyo.

“Ang Akong Gingharian Dili Bahin Niining Kalibotana”

3. (a) Unsang sumbong bahin kang Jesus ang gihimo sa Hudiyong relihiyosong mga pangulo kang Pilato, ug ngano? (b) Unsay nagpakita nga si Jesus dili interesado nga mahimong usa ka tawhanong hari?

³ Palandonga kon unsay nahitabo sa dihang ang Hudiyong relihiyosong mga pangulo nagpadakop kang Jesus ug nagdala kaniya ngadto kang Poncio Pilato, ang Romanong gobernador. Sa pagkamatuod, ang maong mga pangulo naglungotlungot tungod kay giyagyag ni Jesus ang ilang pagkasalingkapaw. Aron molihok ang gobernador batok kang Jesus, ilang gisumbong siya pinaagi sa pag-ingon: “Among nakaplagan kining tawhana nga nagpahisalaag sa among nasod ug nagdili sa pagbayad sa buhis kang Cesar ug nag-ingon nga siya maoy Kristo nga usa ka hari.” (Lucas 23:2) Tin-aw, kadto bakak tungod kay usa ka tuig nga miagi sa dihang buot sa katawhan nga himoong hari si Jesus, siya mibalibad. (Juan 6:15) Nahibalo siya nga siya mahimong langitnong Hari sa umaabot. (Lucas 19:​11, 12) Gawas pa, siya ibutang sa trono, dili pinaagi sa mga tawo, kondili pinaagi ni Jehova.

4. Unsay tinamdan ni Jesus bahin sa pagbayad ug buhis?

⁴ Tulo lang ka adlaw una sa pagdakop kang Jesus, gisulayan sa mga Pariseo nga makasulti si Jesus ug butang nga ikasumbong siya sa sala bahin sa pagbayad ug buhis. Apan siya miingon: “Pakitai akog usa ka denario [usa ka Romanhong sensilyo]. Kansang dagway ug mga kinulit ang anaa niini?” Sa dihang sila miingon “Kang Cesar,” siya mitubag: “Nan, ibayad gayod ninyo kang Cesar ang mga butang ni Cesar, apan ang mga butang sa Diyos ngadto sa Diyos.”​—Lucas 20:20-25.

5. (a) Unsang pagtulon-an ang gitudlo ni Jesus sa iyang mga tinun-an panahon sa pagdakop kaniya? (b) Sa unsang paagi gipatin-aw ni Jesus ang hinungdan sa iyang gibuhat? (c) Unsa ang sangpotanan sa maong paghusay?

⁵ Wala, si Jesus wala magtudlo sa pagrebelde batok sa sekular nga mga awtoridad. Sa dihang ang mga sundalo ug ubang mga tawo miabot sa pagdakop kang Jesus, si Pedro mihulbot sa usa ka espada ug gitigbas ang usa sa mga tawo, nga naputol ang usa ka dalunggan. Apan si Jesus miingon: “Ibalik ang imong espada sa sakoban niini, kay ang tanang mogamit sa espada mamatay pinaagi sa espada.” (Mateo 26:​51, 52) Sa sunod adlaw gipatin-aw ni Jesus ang iyang kalihokan kang Pilato, nga nag-ingon: “Ang akong gingharian dili bahin niining kalibotana. Kon ang akong gingharian bahin pa niining kalibotana, ang akong mga alagad makig-away na unta aron dili ako ikatugyan ngadto sa mga Hudiyo.” (Juan 18:36) Si Pilato miadmitir nga ‘walay pasukaranan sa mga sumbong’ batok kang Jesus. Apan kay nagpadaog sa pagpit-os sa magubotong panon, gipalansang ni Pilato si Jesus.​—Lucas 23:13-15; Juan 19:12-16.

Mga Tinun-an Misunod sa Pagpanguna ni Jesus

6. Sa unsang paagi gipakita sa unang mga Kristohanon nga sila naglikay sa espiritu sa kalibotan apan nahigugma sa katawhan?

⁶ Sa ingon ang mga tinun-an ni Jesus nakasabot kon unsay gikinahanglan sa pagkadili-bahin sa kalibotan. Nagpasabot kadto sa paglikay sa dili-diyosnong espiritu ug kalihokan sa kalibotan, nga naglakip sa mapintason ug mahilayong kalingawan sa Romanhong arena ug teatro. Tungod niana, ang mga tinun-an ginganlang mga tigdumot sa katawhan. Apan halayo sa pagdumot sa ilang mga isigkatawo, sila nanlimbasog sa pagtabang sa uban nga makapahimulos sa mga kahikayan sa Diyos alang sa kaluwasan.

7. (a) Tungod kay dili bahin sa kalibotan, unsay nasinati sa unang mga tinun-an? (b) Unsay pag-isip nila sa politikanhong mga magmamando ug sa pagbayad ug buhis, ug ngano?

⁷ Ang mga sumusunod ni Jesus gilutos sama kaniya, kasagarang pinaagi sa walay hustong kasayoran nga mga opisyales sa gobyerno. Bisan pa niana, mga 56 K.P., si apostol Pablo misulat ngadto sa mga Kristohanon sa Roma, nga nag-awhag kanila nga ‘magpasakop sa labaw nga mga awtoridad [politikanhong mga magmamando], kay walay awtoridad gawas nga pinaagi sa Diyos.’ Dili ingong si Jehova nagtukod sa sekular nga mga gobyerno, kondili siya nagtugot nga sila maglungtad hangtod ang iyang Gingharian na lamang ang magamando sa tibuok yuta. Sa pagkaangay, si Pablo mitambag sa mga Kristohanon nga tahoron ang sekular nga mga opisyales ug mobayad ug buhis.​—Roma 13:1-7; Tito 3:​1, 2.

8. (a) Asa kutob kinahanglang magpasakop ang mga Kristohanon sa labaw nga mga awtoridad? (b) Sa unsang paagi ang unang mga Kristohanon nagsunod sa panig-ingnan ni Jesus?

⁸ Hinuon, ang pagpasakop sa politikanhong mga magmamando kinahanglang relatibo, dili absoluto. Sa dihang adunay panagsumpaki tali sa mga balaod ni Jehova ug sa mga balaod sa tawo, kadtong nag-alagad kang Jehova kinahanglang mosunod sa Iyang mga balaod. Matikdi kon unsay giingon sa librong On the Road to Civilization​—A World History bahin sa unang mga Kristohanon: “Ang mga Kristohanon midumili sa pagpakigbahin sa pipila ka katungdanan sa Romanong mga lungsoranon. Ang mga Kristohanon . . . mibati nga ang pagsulod sa militaryong serbisyo maoy paglapas sa ilang pagtuo. Sila dili mohupot ug politikanhong katungdanan. Sila dili mosimba sa emperador.” Sa dihang ang Hudiyonhong hataas nga hukmanan ‘hugot nga nagmando’ sa mga tinun-an nga mohunong sa pagwali, sila mitubag: “Kinahanglang among sugton ang Diyos ingong magmamando inay ang mga tawo.”​—Buhat 5:27-29.

9. (a) Nganong ang mga Kristohanon sa Jerusalem migawas sa siyudad ug nangalagiw ngadto sa kabukiran niadtong 66 K.P.? (b) Sa unsang paagi kana usa ka bililhong sumbanan?

⁹ Mahitungod sa politikanhon ug militaryong mga panagbangi, ang mga tinun-an nagpabiling bug-os nga neyutral. Sa 66 K.P., ang mga Hudiyo mialsa batok kang Cesar. Giliyokan dayon sa Romanhong kasundalohan ang Jerusalem. Unsay gihimo sa mga Kristohanon sa siyudad? Sila nahinumdom sa tambag ni Jesus nga mogawas sa siyudad. Sa dihang ang mga Romano temporaryong misibog, nangalagiw ang mga Kristohanon tabok sa Suba sa Jordan ngadto sa kabukiran sa Pella. (Lucas 21:20-24) Ang ilang neyutralidad nagsilbing usa ka sumbanan alang sa matinumanong mga Kristohanon sa kaulahian.

Mga Kristohanon Kinahanglang Neyutral Niining Kataposang mga Adlaw

10. (a) Unsang buluhaton ang gikapulikian sa mga Saksi ni Jehova, ug ngano? (b) Bahin sa unsa nga sila neyutral?

¹⁰ Ang makasaysayanhong talaan nagpakita ba nga may pundok niining kataposang mga adlaw nga nagsunod sa estriktong neyutralidad ingong pagsundog sa unang mga Kristohanon? Oo, ang mga Saksi ni Jehova naghimo niana. Sulod nianang tanang panahon, sila nagpadayon sa pagwali nga ang Gingharian sa Diyos mao ang bugtong galamiton aron ipatungha ang malungtarong kalinaw, kauswagan, ug kalipay alang sa mga nahigugma sa pagkamatarong. (Mateo 24:14) Apan kon bahin sa mga panagbangi sa mga nasod, sila nagpabiling bug-os nga neyutral.

11. (a) Sa unsang paagi ang neyutralidad sa mga Saksi lahi sa mga buhat sa klero? (b) Unsay pag-isip sa mga Saksi ni Jehova mahitungod sa ginabuhat sa uban labot sa politika?

¹¹ Sa dakong kasukwahi, ang klero sa mga relihiyon niining kalibotana nalangkit kaayo sa politikanhong mga kalihokan. Sa pipila ka nasod, sila aktibong nangampanya pabor o kontra sa mga kandidato. Ang pipila ka klerigo naghupot pa ganig politikanhong katungdanan. Ang uban nagpit-os sa mga politiko sa pagpabor sa mga programang aprobado sa klero. Bisan pa niana, ang mga Saksi ni Jehova dili mag-apil-apil sa politika. Ni sila manghilabot kon unsay buhaton sa uban kon bahin sa pag-anib sa usa ka politikanhong partido, pagkandidato alang sa politikanhong katungdanan, o pagbotar panahon sa mga piliay. Si Jesus miingon nga ang iyang mga tinun-an dili bahin sa kalibotan, busa ang mga Saksi ni Jehova dili mosalmot sa politika.

12. Unsay miresulta tungod kay ang mga relihiyon niining kalibotana dili neyutral?

¹² Sumala sa gitagna ni Jesus, subsob ang pagpakiggubat sa mga nasod. Bisan ang mga partido sa mga nasod nagbugnoay sa usag usa. (Mateo 24:​3, 6, 7) Ang relihiyosong mga pangulo halos kanunay nga mosuportar sa usa ka nasod o partido batok sa laing partido, nga moawhag sa ilang mga sumusunod sa pagbuhat usab niana. Ang resulta? Nagpatyanay sa usag usa ang mga membro sa samang relihiyon diha sa panggubatan tungod lamang sa mga kalainan sa nasyonalidad o tribo. Supak kini sa kabubut-on sa Diyos.​—1 Juan 3:10-12; 4:​8, 20.

13. Unsay gipakita sa mga ebidensiya bahin sa pagkaneyutral sa mga Saksi ni Jehova?

¹³ Bisan pa niana, ang mga Saksi ni Jehova bug-os nga neyutral sa tanang panag-away. Ang The Watchtower sa Nobyembre 1, 1939, miingon: “Ang tanan nga anaa sa kiliran sa Ginoo mahimong neyutral maylabot sa naggubatay nga mga nasod.” Ang mga Saksi ni Jehova sa tanang nasod ug ubos sa tanang kahimtang magpadayong neyutral. Dili nila itugot nga ang makapabahing politika ug mga gubat sa kalibotan magbungkag sa ilang internasyonal nga pag-igsoonay. Sila ‘nagsalsal sa ilang mga espada nga mga punta sa daro ug sa ilang mga bangkaw nga mga galab.’ Tungod kay neyutral, sila dili na makakat-on pa sa gubat.​—Isaias 2:​3, 4; 2 Corinto 10:​3, 4.

14. Tungod sa pagpabiling bulag sa kalibotan, unsay nasinati sa mga Saksi ni Jehova?

¹⁴ Unsay usa ka resulta sa ilang neyutralidad? Si Jesus miingon: “Kay kamo dili man bahin sa kalibotan, . . . ang kalibotan nagdumot kaninyo.” (Juan 15:19) Daghang Saksi ni Jehova ang nabilanggo tungod sa pagkaalagad sa Diyos. Ang pipila gipaantos, gipatay pa gani, nga susama sa nahitabo sa unang-siglo nga mga Kristohanon. Kini tungod kay si Satanas, “ang diyos niini nga sistema sa mga butang,” nagasupak sa mga alagad ni Jehova, kinsa dili bahin niini.​—2 Corinto 4:4; Pinadayag 12:12.

15. (a) Sa unsang dulnganan ang tanang nasod nagamartsa, ug unsay maampingong likayan sa mga Saksi ni Jehova? (b) Nganong ang pagkabulag sa kalibotan seryoso kaayong butang?

¹⁵ Ang mga alagad ni Jehova malipayon nga sila dili bahin sa kalibotan, tungod kay ang tanang nasod niini nagamartsa paingon sa ilang kalaglagan sa Armagedon. (Daniel 2:44; Pinadayag 16:​14, 16; 19:11-21) Malikayan nato ang maong sangpotanan kay kita bulag man sa kalibotan. Ingong nahiusang katawhan sa tibuok yuta, kita maunongon ngadto sa langitnong Gingharian sa Diyos. Matuod, tungod kay dili bahin sa kalibotan, makaagom kita sa pagbugalbugal ug paglutos niini. Hinuon, sa dili madugay kana mohunong na, sanglit kining daotang kalibotan karon ubos ni Satanas pagalaglagon hangtod sa hangtod. Sa laing bahin, kadtong nag-alagad kang Jehova mabuhing walay kataposan sa iyang matarong nga bag-ong kalibotan ubos sa Gingharian sa Diyos.​—2 Pedro 3:10-13; 1 Juan 2:15-17.

Repasong Panaghisgot

• Sa unsang paagi gipakita ni Jesus kon unsay kahulogan nga “dili bahin sa kalibotan”?

• Unsay tinamdan sa unang mga Kristohanon bahin sa (a) espiritu sa kalibotan, (b) sekular nga mga magmamando, ug (c) pagbayad ug buhis?

• Sa unsang mga paagi ang mga Saksi ni Jehova sa modernong kapanahonan naghatag ug ebidensiya sa ilang Kristohanong neyutralidad?

[Hulagway sa panid 165]

Gipatin-aw ni Jesus nga siya ug ang iyang mga sumusunod “dili bahin sa kalibotan”