Kapitulo Desinuybe

Magpadayon sa Pagsulti nga Maisogon sa Pulong sa Diyos

1. (a) Unsang maayong balita ang gimantala sa mga tinun-an ni Jesus, apan unsay reaksiyon sa pipila ka Hudiyo? (b) Unsang mga pangutana ang mahimo natong isukna?

DUOLAG 2,000 ka tuig kanhi, ang Anak sa Diyos, si Jesu-Kristo, gidihogan isip umaabot nga Hari sa tibuok yuta. Tungod sa paghulhog sa relihiyosong mga kaaway, si Jesus gipatay, apan gibanhaw siya ni Jehova gikan sa mga patay. Tungod kang Jesus, ang walay-kataposang kinabuhi posible na karon. Ugaling, sa dihang ang mga tinun-an ni Jesus dayag nga nagmantala nianang maayong balita, misilaob ang paglutos. Ang pipila kanila gibalhog sa bilanggoan, gibunalan pa ug gimandoan sa paghunong pagsulti bahin kang Jesus. (Buhat 4:1-3, 17; 5:​17, 18, 40) Unsay ilang buhaton? Kon ikaw pa, unsa may imong buhaton? Ipadayon mo kaha ang pagsangyaw nga maisogon?

2. (a) Unsang kahibulongang balita ang kinahanglang imantala sa atong adlaw? (b) Kinsa ang may responsabilidad sa pagwali sa maayong balita?

² Sa 1914 ang Hari sa Gingharian sa Diyos, si Jesu-Kristo, naentrono sa langit aron magmando ‘taliwala sa iyang mga kaaway.’ (Salmo 110:2) Sunod, si Satanas ug iyang mga demonyo gitambog sa yuta. (Pinadayag 12:1-5, 7-12) Nagsugod na ang kataposang mga adlaw sa presenteng daotang sistema. Inigkatapos niining yugtoa sa panahon, pagadugmokon sa Diyos ang tibuok satanasnong sistema sa mga butang. (Daniel 2:44; Mateo 24:21) Ang mga makalabang-buhi makalaom sa walay-kataposang kinabuhi diha sa usa ka yuta nga maparaiso. Kon nagtuo ka niining maayong balita, gusto nimong ipaambit kini sa uban. (Mateo 24:14) Apan unsang reaksiyon ang imong dahomon?

3. (a) Unsay sanong sa mga tawo sa mensahe sa Gingharian? (b) Unsang pangutana ang kinahanglang atong atubangon?

³ Sa pagsangyaw nimo sa maayong balita sa Gingharian, ang pipila ka tawo tingali mahinangop niini, apan ang kadaghanan dili motagad. (Mateo 24:37-39) Ang uban tingali motamay o mosupak kanimo. Si Jesus nagpasidaan nga ang pagsupak mahimong magagikan sa imong mga paryente. (Lucas 21:16-19) Kini basin mahitabo usab sa inyong dapit-trabahoan o sa eskuylahan. Sa pipila ka bahin sa yuta, ang mga Saksi ni Jehova nailalom gani sa pagdili sa gobyerno. Kon mag-atubang sa maong mga kahimtang, mopadayon ka ba sa pagsulti nga maisogon sa pulong sa Diyos ug ‘mobarog nga malig-on sa pagtuo’?​—1 Corinto 16:13.

Dili Mosalig sa Atong Kaugalingong Kusog

4. (a) Aron magpamatuod nga kita maoy matinumanong mga alagad sa Diyos, unsa ang usa ka pangunang kinahanglanon? (b) Nganong hinungdanon kaayo ang Kristohanong mga tigom?

⁴ Ang matinumanong pag-alagad kang Jehova nagkinahanglan sa pagsalig sa iyang mga kahikayan. Ang mga tigom sa kongregasyon maoy usa niini. Ang Kasulatan nag-awhag kanato nga dili kini talikdan. (Hebreohanon 10:23-25) Kadtong nagpadayon ingong matinumanong mga Saksi ni Jehova nanlimbasog nga maregular sa pagtambong sa mga tigom uban sa mga isigkamagsisimba. Panahon nianang mga tigoma ang atong kahibalo sa Kasulatan mouswag. Gawas pa, ang atong pagsabot sa inilang mga kamatuoran mousbaw, ug ang atong kaamgohan sa mga paagi sa paggamit niini mas mohait. Kita mas masuod sa atong Kristohanong mga igsoon diha sa nahiusang pagsimba ug mapalig-on sa pagbuhat sa kabubut-on sa Diyos. Ang espiritu ni Jehova motaganag pagtultol pinaagi sa kongregasyon, ug pinaagi sa maong espiritu, si Jesus anaa sa atong taliwala.​—Mateo 18:20; Pinadayag 3:6.

5. Sa dihang nailalom sa pagdili ang mga Saksi ni Jehova, unsay ginahimo sa mga tigom?

⁵ Regular ka bang nagatambong sa tanang tigom, ug gipadapat mo ba sa personal ang imong nadunggan nga gihisgotan? Usahay, sa dihang ang mga Saksi ni Jehova nailalom sa pagdili, kinahanglang himoon ang mga tigom sa gagmayng mga grupo diha sa pribadong mga balay. Ang mga dapit ug mga oras tingali maglainlain ug dili kanunayng kombenyente, kay ang pipila ka tigom ginahimo sa lawom nga gabii. Apan bisan pa sa personal nga kalisdanan o kapeligrohan, ang matinumanong mga igsoong lalaki ug babaye manlimbasog gayod sa pagtambong sa matag tigom.

6. Sa unsang paagi ginapasundayag nato ang atong pagsalig kang Jehova, ug sa unsang paagi makatabang kini kanato sa pagpadayon sa pagsulti nga maisogon?

⁶ Ang pagsalig kang Jehova maugmad pinaagi sa regular nga pagdangop kaniya diha sa kinasingkasing nga pag-ampo, kay nahibalo nga atong gikinahanglan ang tabang sa Diyos. Ginahimo mo ba kana? Si Jesus balikbalik nga nag-ampo panahon sa iyang ministeryo sa yuta. (Lucas 3:21; 6:​12, 13; 22:39-44) Ug sa gabii una pa sa paglansang kaniya, iyang giawhag ang iyang mga tinun-an: “Magpadayon kamo sa pagbantay ug sa pag-ampo, aron dili kamo mahidangat sa tentasyon.” (Marcos 14:38) Kon mahibalag nato ang pagkadili-matinagdanon sa mensahe sa Gingharian, matental kita sa paghinayhinay diha sa atong ministeryo. Kon biaybiayon o lutoson kita sa mga tawo, basin matental kita sa pagpakahilom na lamang aron makalikay sa mga suliran. Apan kon kita madasigong moampo nga ang espiritu sa Diyos motabang kanato sa pagpadayon sa pagsulti nga maisogon, mapanalipdan kita batok sa pagpadaog sa maong mga tentasyon.​—Lucas 11:13; Efeso 6:18-20.

Talaan sa Maisogong Pagsangyaw

7. (a) Nganong ang talaan sa Mga Buhat ilabinang makaiikag kanato? (b) Tubaga ang mga pangutana nga gihatag sa kataposan niining parapoha, nga nagpasiugda kon sa unsang paagi ang impormasyon makahatag kanatog kaayohan.

⁷ Ang tanan nga anaa sa basahon sa Mga Buhat ilabinang makaiikag kanatong tanan. Nag-asoy kini kon sa unsang paagi ang mga apostoles ug ubang unang mga tinun-an​—mga tawo nga sama kanatog mga pagbati—​nagbuntog sa mga kababagan ug nagpamatuod nga maisogon ug matinumanong mga saksi ni Jehova. Susihon nato ang usa ka bahin sa maong talaan sa tabang sa mosunod nga mga pangutana ug sa mga kasulatang gisitar. Samtang buhaton nato kana, hunahunaa kon sa unsang paagi ikaw makapahimulos sa personal sa imong ginabasa.

Ang mga apostoles edukado ba kaayong mga tawo? Sila ba mga tawong sa kinaiyanhon dili mahadlokon, bisan pa kon unsay mahitabo? (Juan 18:​17, 25-27; 20:19; Buhat 4:13)

Unsay nakapaarang kang Pedro sa pagsulti nga maisogon atubangan sa Hudiyohanong hukmanan nga naghukom nga sad-an ang Anak sa Diyos? (Mateo 10:​19, 20; Buhat 4:8)

Unsay gibuhat sa mga apostoles sa mga semana sa wala pa sila tarala atubangan sa Sanhedrin? (Buhat 1:14; 2:​1, 42)

Sa dihang ang mga magmamando nagmando sa mga apostoles nga mohunong sa pagwali nga gipasukad sa ngalan ni Jesus, unsay tubag ni Pedro ug Juan? (Buhat 4:​19, 20)

Human sa ilang pagkagawas, kinsa ang gidangpan na usab sa mga apostoles alang sa tabang? Giampo ba nila nga mohunong ang paglutos, o unsa? (Buhat 4:24-31)

Sa unsang paagi si Jehova mihatag ug tabang sa dihang gisulayan sa mga magsusupak ang pagpahunong sa buluhaton sa pagwali? (Buhat 5:17-20)

Sa unsang paagi gipakita sa mga apostoles nga nasabtan nila ang hinungdan nga sila giluwas? (Buhat 5:​21, 41, 42)

Bisan pag daghan sa mga tinun-an natibulaag tungod sa paglutos, unsay ilang gipadayon sa pagbuhat? (Buhat 8:​3, 4; 11:19-21)

8. Unsang makalipayng mga resulta ang misangpot gikan sa ministeryo sa unang mga tinun-an, ug sa unsang paagi nalangkit kita?

⁸ Ang buluhaton sa pagwali sa maayong balita wala makawang. Mga 3,000 ka tinun-an ang nabawtismohan sa Pentekostes 33 K.P. “Ang mga magtutuo sa Ginoo padayon nga nadugangan, mga panon sa mga lalaki ug mga babaye.” (Buhat 2:41; 4:4; 5:14) Ngadtongadto, bisan ang usa ka mabangis nga maglulutos sa katawhan sa Diyos, si Saulo sa Tarso, nahimong Kristohanon ug misugod sa pagsangyaw nga maisogon sa kamatuoran. Siya nailhan nga si apostol Pablo. (Galacia 1:22-24) Ang buluhaton nga nagsugod sa unang siglo wala mahunong. Kini nagkakusog hinuon niining kataposang mga adlaw ug nakaabot sa tanang bahin sa yuta. Kita adunay pribilehiyo sa pagpakig-ambit niini, ug samtang ginahimo nato kini, kita makakat-on gikan sa panig-ingnan nga gipadayag sa maunongong mga saksi nga nag-alagad nga una kanato.

9. (a) Unsang mga kahigayonan sa pagpamatuod ang gipahimuslan ni Pablo? (b) Sa unsang mga paagi imong gisabwag ang mensahe sa Gingharian ngadto sa uban?

⁹ Sa dihang nasayran ni Pablo ang kamatuoran bahin kang Jesu-Kristo, unsay iyang gibuhat? “Sa walay langan . . . siya misugod sa pagwali bahin kang Jesus, nga Siya mao ang Anak sa Diyos.” (Buhat 9:20) Siya mapasalamaton sa dili-takos nga kalulot sa Diyos kaniya, ug siya nakaamgo nga ang tanan nagkinahanglan sa maayong balita nga iyang nadawat. Si Pablo maoy usa ka Hudiyo, ug sumala sa batasan niadtong panahona, siya misulod sa mga sinagoga aron sa pagpamatuod. Siya nagwali usab sa balay-balay ug nangatarongan sa mga tawo diha sa tiyanggihan. Ug siya andam mobalhin ngadto sa bag-ong mga teritoryo aron pagwali sa maayong balita.​—Buhat 17:17; 20:20; Roma 15:​23, 24.

10. (a) Giunsa pagpakita ni Pablo nga bisan pag maisogon, siya masinabtanon usab sa paagi sa iyang pagpamatuod? (b) Sa unsang paagi makapaaninag kita sa mga hiyas ni Pablo sa dihang magpamatuod ngadto sa mga paryente, mga kauban sa trabaho, o sa mga kauban sa eskuylahan?

¹⁰ Si Pablo maisogon apan masinabtanon usab, ug kita angay usab nga maingon. Iyang gipukaw ang interes sa mga Hudiyo pinasukad sa mga saad nga gipahayag sa Diyos ngadto sa ilang mga katigulangan. Ngadto sa mga Grego siya namulong nga pinasukad sa mga butang nga ilang nasinati. Usahay siya migamit sa iyang kaugalingong kasinatian sa pagkahibalo sa kamatuoran ingong paagi sa pagpamatuod. Siya miingon: “Gihimo ko ang tanang butang tungod sa maayong balita, aron ako mahimong mag-aambit niini sa uban.”​—1 Corinto 9:20-23; Buhat 22:3-21.

11. (a) Unsay gibuhat ni Pablo sa paglikay sa balikbalik nga mga pagpakigharong sa mga magsusupak? (b) Kanus-a maalamon nga kita mosundog sa panig-ingnan ni Pablo, ug sa unsang paagi? (c) Diin ba gikan ang gahom sa pagpadayon sa pagsulti nga maisogon?

¹¹ Sa dihang daw mas maayo nga si Pablo magwali sa laing dapit sa mubong panahon tungod sa pagsupak, iya kanang gibuhat inay ipugos ang balikbalik nga mga pagpakigharong sa mga magsusupak. (Buhat 14:5-7; 18:5-7; Roma 12:18) Apan wala gayod niya ikaulaw ang maayong balita. (Roma 1:16) Bisag si Pablo wala makaangay sa tampalasan​—mabangis pa—​nga tratasyon sa mga magsusupak, siya “nakabaton ug kaisog pinaagi sa atong Diyos” sa pagpadayon sa pagwali. Siya miingon: “Ang Ginoo mibarog duol kanako ug mihatag kanakog gahom, aron nga pinaagi kanako ang pagwali matuman sa bug-os.” (1 Tesalonica 2:2; 2 Timoteo 4:17) Ang Ulo sa Kristohanong kongregasyon, si Jesus, nagpadayon sa paghatag sa gahom nga atong gikinahanglan sa pagbuhat sa buluhatong iyang gitagna alang sa atong adlaw.​—Marcos 13:10.

12. Unsay mohatag ug ebidensiya sa Kristohanong pagkamaisogon, ug unsay pasikaranan niana?

¹² Kita adunay bug-os nga katarongan sa pagpadayon sa pagsulti nga maisogon sa pulong sa Diyos, sama sa gibuhat ni Jesus ug sa ubang matinumanong mga alagad sa Diyos sa unang siglo. Wala kini magpasabot nga mahimong dili mahunahunaon o mosulay sa pagpugos sa mensahe diha sa mga tawong dili gusto niana. Apan dili kita mohunong tungod kay ang mga tawo dili matinagdanon; ni kita magpakahilom tungod sa pagsupak. Sama kang Jesus, gipunting nato ang Gingharian sa Diyos ingong ang angayang kagamhanan sa tibuok yuta. Mosulti kitang may pagsalig tungod kay kita naghawas kang Jehova, ang Soberano sa Uniberso, ug tungod kay ang mensaheng atong ginamantala dili gikan kanato kondili gikan kaniya. Ug ang atong gugma kang Jehova angay nga mao ang atong labing puwersadong motibo sa pagdayeg kaniya.​—Filipos 1:​27, 28; 1 Tesalonica 2:13.

Repasong Panaghisgot

• Nganong hinungdanon nga ipakig-ambit ang mensahe sa Gingharian uban sa tanan nga posible, apan unsang mga reaksiyon ang atong madahom?

• Sa unsang paagi ikapakita nato nga kita wala mosalig sa atong kaugalingong kusog sa pag-alagad kang Jehova?

• Unsang bililhong mga pagtulon-an ang atong makat-onan gikan sa basahon sa Mga Buhat?

[Mga hulagway sa panid 173]

Sama sa nangagi, ang mga alagad ni Jehova karon nagsulti sa pulong sa Diyos nga maisogon