Ang Pagpatalinghog Nakaluwas sa Ilang Kinabuhi

SI Jesu-Kristo nagpasidaan na mahitungod sa kataposan sa Hudiyohanong sistema sa mga butang nga nasentro sa templo sa Jerusalem. Wala siya maghatag ug petsa kon kanus-a kini mahitabo. Apan iyang gihubit ang mga hitabo nga moresulta niana nga kalaglagan. Iyang giawhag ang iyang mga tinun-an sa pagpadayon sa pagbantay ug sa paghawa sa delikadong lugar.

Si Jesus nagtagna: “Inigkakita ninyo nga malibotan ang Jerusalem sa nagkampong kasundalohan, nan hibaloi nga haduol na ang paglaglag kaniya.” Nag-ingon usab siya: “Inigkakita ninyo sa dulumtanang butang nga magpahinabog kalaglagan . . . nga nagabarog diha sa usa ka balaang dapit, . . . nan silang anaa sa Judea pakalagiwa ngadto sa kabukiran.” Giawhag ni Jesus ang iyang mga tinun-an sa dili pagbalik aron sa pagkuha sa ilang materyal nga mga kabtangan. Gikinahanglan ang dinalian nga pagkalagiw aron maluwas ang ilang kinabuhi.​—Lucas 21:​20, 21; Mateo 24:​15, 16.

Aron masugpo ang dugay nang rebelyon, gipangunahan ni Cestius Gallus ang Romanong kasundalohan sa pagsulong sa Jerusalem sa 66 K.P. Misulod pa gani siya sa siyudad ug miatake sa templo. Nagkaguliyang ang tibuok siyudad. Nakita niadtong nagpadayon sa pagbantay nga hapit na ang kalaglagan. Apan posible kaha ang pagkalagiw? Wala damha, gipaatras ni Cestius Gallus ang iyang mga sundalo. Gigukod sila sa Hudiyong mga rebelde. Karon na ang panahon sa pagkalagiw gikan sa Jerusalem ug sa tibuok Judea!

Pagkasunod tuig, ang Romanong kasundalohan namalik ilalom ni Vespasian ug sa iyang anak nga si Tito. Ang tibuok nasod nasugamak sa gubat. Sa sayong bahin sa 70 K.P., ang mga Romano nagtukod palibot sa Jerusalem ug salipdanan nga gama sa talinis nga mga usok. Tungod niini wala nay kaikyasan. (Lucas 19:​43, 44) Nagpinatyanay ang lainlaing mga pundok diha sa siyudad. Ang nabiling mga tawo gipamatay sa mga Romano o gibihag. Ang siyudad ug ang templo niini nalaglag sa bug-os. Sumala sa Hudiyong historyano sa unang siglo nga si Josephus, kapin sa usa ka milyong Hudiyo ang nag-antos ug namatay. Ang templo wala na gayod matukod pag-usab.

Kon ang mga Kristohanon nagpabilin gihapon sa Jerusalem sa 70 K.P., mahimong gipatay o giulipon sila apil sa tanang atua didto. Apan, ang karaang mga historyano nagtaho nga ang mga Kristohanon nagpatalinghog sa pasidaan sa Diyos ug mikalagiw gikan sa Jerusalem ug sa tibuok Judea ngadto sa kabukiran sidlakan sa Suba sa Jordan. Ang uban mipuyo sa Pella, sa probinsiya sa Perea. Sila mibiya sa Judea ug wala na mobalik. Ang pagpatalinghog sa pasidaan ni Jesus nakaluwas sa ilang kinabuhi.

Ikaw ba Kinasingkasing nga Nagpatalinghog sa mga Pasidaan Gikan sa Kasaligang mga Tinubdan?

Human makadungog ug daghang pasidaan sa mga butang nga wala gayod mahitabo, daghang tawo wala na manumbaling sa tanang pasidaan. Apan, ang pagpatalinghog sa mga pasidaan makaluwas sa imong kinabuhi.

Sa Tsina sa 1975, dihay mga pasidaan nga maglinog. Milihok ang mga opisyales. Nagpatalinghog ang mga tawo. Naluwas ang libolibong kinabuhi.

Sa Abril 1991 sa Pilipinas, ang mga baryohanon diha sa bakilid sa Bolkang Pinatubo nagtaho nga ang bolkan nagbuga ug alisngaw ug abo. Human sa pagpaniid sa kahimtang sa duha ka bulan, ang Philippine Institute of Volcanology and Seismology nagpasidaan bahin sa nagsingabot nga kapeligrohan. Dihadiha, tinagpulo ka libong tawo gibakwet gikan sa maong dapit. Sayo niadtong Hunyo 15, uban ang kusog kaayong pagbuto, kapin sa walo ka kilometrong kubiko sa napulpog nga bato ug yuta ang gibuga ngadto sa kalangitan ug dayon nahulog diha sa kabanikahan. Ang pagpatalinghog nakaluwas ug libolibong kinabuhi.

Ang Bibliya nagpasidaan bahin sa kataposan sa presenteng sistema sa mga butang. Kita nagkinabuhi na karon sa kataposang mga adlaw. Samtang nagkaduol ang kataposan, ikaw ba nagpadayon sa pagbantay? Ikaw ba naghimo ug mga lakang aron makapalayo sa delikadong lugar? Uban ang pagkadinalian, ikaw ba nagpasidaan sa uban sa pagbuhat niana?

[Hulagway sa panid 20]

Ang pagpatalinghog sa pasidaan nakaluwas ug daghang kinabuhi sa dihang ang Bolkang Pinatubo nagpabuga ug abo

[Hulagway sa panid 21]

Naluwas ang kinabuhi sa mga Kristohanon nga nagpatalinghog sa pasidaan ni Jesus sa dihang gilaglag ang Jerusalem niadtong 70 K.P.