Maayong Panig-ingnan​—Ang Tulo ka Hebreohanon

Si Hananias, Misael, ug Azarias nagtindog sa kapatagan sa Dura, duol sa Babilonya. Ang mga tawo sa ilang palibot nanghapa atubangan sa dako kaayong larawan. Bisan pa sa pagpamit-os sa ilang mga kauban ug sa silot nga ipahamtang sa hari, kining tulo ka batan-on lig-on kaayog baroganan. Matinahoron apan maisogon nilang gisultihan si Nabucodonosor nga ang ilang desisyon sa pag-alagad kang Jehova dili gayod mausab.​—Daniel 1:6; 3:17, 18.

Bata pa kining tulo ka lalaki sa dihang gibihag sila sa Babilonya. Ang ilang pagkamatinumanon bisag batan-on pa​—pagdumili sa pagkaon sa mga pagkaon nga gidili sa Balaod sa Diyos—​nag-andam kanila sa pag-atubang sa mga pagsulay sa umaabot. (Daniel 1:6-20) Sila nahibalo gikan sa ilang naeksperyensiyahan nga maalamon ang pagsunod kang Jehova. Determinado ka ba gayod sa pagsunod sa mga sukdanan sa Diyos bisag pit-oson ka sa imong mga higala? Kon bata ka pa nga nabansay sa pagsunod kang Jehova bisan sa daw gagmayng mga butang, mas makapabilin kang matinumanon sa dihang makaatubang kag dagkong mga pagsulay sa umaabot.​—Proverbio 3:5, 6; Lucas 16:10.