Maayong Panig-ingnan​—Asap

Si Asap nag-atubang ug krisis sa iyang kinabuhi. Ang mga tawo sa iyang palibot malinapason sa mga balaod sa Diyos ug daw wala silay naani nga kadaot! Busa si Asap namalandong kon may kaayohan ba ang pagpaningkamot sa pagpahimuot sa Diyos. “Kawang lamang gayod nga gihinloan ko ang akong kasingkasing ug gihunawan ko ang akong mga kamot sa pagkainosente,” siya miingon. Apan nausab ang hunahuna ni Asap sa dihang namalandong ug maayo niini. Iyang nasabtan nga lumalabay lang ang kalipay sa mga daotan. Unsay nasulti ni Asap? Pinaagig awit kini ang iyang gisulti kang Jehova: ‘Ikaw lang gayod ang nakahatag kanakog kalipay dinhi sa yuta.’​—Salmo 73:3, 13, 16, 25, 27.

May mga panahon tingali nga magduhaduha ka kon mapuslanon ba ang pagsunod sa mga prinsipyo sa Diyos. Apan sunda si Asap, ug ayawg hunahunaa nga malipayon ang mga tawong daotan. Palandonga ang situwasyon niadtong nagalapas sa mga balaod ni Jehova. Tawhay ba gayod ang ilang kinabuhi? Duna ba silay sekretong paagi sa pagpabiling malipayon nga wala matagamtam niadtong nagmatinumanon sa Diyos? Sa mapamalandong ug maayo kining butanga, seguradong mouyon ka sa giingon ni Asap: ‘Ang pagpakigsuod sa Diyos maayo kanako.’​—Salmo 73:28.