“Igaingon Mo Kanila Kining Pulonga”

1. (a) Sa unsang paagi managsama si Jesus ug si Jeremias? (b) Nganong angay natong sundogon si Jeremias diha sa atong ministeryo?

SI Jesu-Kristo mao ang atong pangunang sulondan sa pagsangyaw sa maayong balita. Makaiikag nga ang mga tawo sa unang siglo nga nakakita kang Jesus naghunahuna usahay nga siya mao ang manalagnang si Jeremias. (Mat. 16:​13, 14) Sama kang Jesus, si Jeremias gisugo usab sa Diyos sa pagsangyaw. Pananglitan, sa usa ka higayon ang Diyos nag-ingon kaniya: “Igaingon mo kanila kining pulonga, ‘Mao kini ang giingon ni Jehova.’” (Jer. 13:​12, 13; Juan 12:49) Ug diha sa iyang ministeryo gipasundayag ni Jeremias ang samang mga hiyas nga gipasundayag ni Jesus.

2. Sa unsang paagi ang mga panginahanglan sa mga tawo karon susama niadtong sa mga Hudiyo sa panahon ni Jeremias?

² Apan, ang pipila ka Saksi tingali moingon: ‘Ang atong buluhatong pagsangyaw lahi nianang kang Jeremias. Siya usa ka tigpamaba sa Diyos ngadto sa usa ka nasod nga napahinungod Kaniya, samtang ang kadaghanan sa atong sangyawan wala makaila kang Jehova.’ Tinuod kana. Apan sa panahon ni Jeremias, ang kadaghanan sa mga Hudiyo nahimong ‘dili maalamon’ ug mibiya sa matuod nga Diyos. (Basaha ang Jeremias 5:​20-22.) Kinahanglan silang magbag-o aron dawaton ni Jehova ang ilang pagsimba. Sa samang paagi, ang mga tawo karon kinahanglang makakat-on sa pagkahadlok kang Jehova ug mosubay sa matuod nga pagsimba, sila man nagaangkong mga Kristohanon o wala. Atong tan-awon kon sa unsang paagi kita makaalagad sa matuod nga Diyos ug makatabang sa mga tawo pinaagi sa pagsundog kang Jeremias.

‘ANG KAMOT NI JEHOVA MIDAPAT SA AKONG BABA’

3. Unsa ang talagsaong butang nga gihimo sa Diyos kang Jeremias sa sinugdan sa iyang buluhaton, ug unsay gibati sa manalagna bahin niini?

³ Mahinumdoman nato nga sa sinugdan sa iyang pagpanagna, si Jeremias nakadungog niining mga pulonga: “Kanilang tanan nga ikaw akong paadtoon, ikaw moadto; ug ang tanan nga isugo ko kanimo, imong isulti. Ayaw kahadlok tungod sa ilang mga nawong, kay ‘ako nagauban kanimo sa pagluwas kanimo,’ mao ang giingon ni Jehova.” (Jer. 1:​7, 8) Ug unya gihimo sa Diyos ang usa ka butang nga wala damha sa manalagna. Si Jeremias nagsulti kanato: “Si Jehova mituy-od sa iyang kamot ug gidapat kini sa akong baba. Unya si Jehova miingon kanako: ‘Ania, gibutang ko ang akong mga pulong diha sa imong baba. Tan-awa, gitudlo ko ikaw niining adlawa.’” (Jer. 1:​9, 10) Sukad niadto, nahibalo si Jeremias nga siya mamulong alang sa Labing Gamhanan nga Diyos.a Pinaagi sa bug-os nga pagpaluyo sa Diyos, misamot pa ang kasibot ni Jeremias alang sa sagradong pag-alagad.​—Isa. 6:​5-8.

4. Unsa nga mga panig-ingnan sa talagsaong kasibot sa pagsangyaw ang imong ikaasoy?

⁴ Karong adlawa, wala na maghikap si Jehova sa iyang mga alagad sa pisikal nga paagi. Apan, pinaagi sa iyang espiritu, siya naghatag kanila ug hugot nga tinguha sa pagsangyaw sa maayong balita. Daghan kanila ang nagpakitag talagsaong kasibot. Tagda ang kasinatian ni Maruja sa Espanya. Kapin na sa 40 ka tuig nga naparalisar ang iyang mga kamot ug mga tiil. Sanglit lisod alang kaniya ang pagpamalaybalay, siya nangitag laing mga paagi aron magpabiling aktibo diha sa ministeryo. Ang usa ka paagi mao ang paghimog mga sulat. Ang mga pulong idiktar ni Maruja ngadto sa iyang anak nga babaye, ug unya isulat kini sa iyang anak. Panahon sa usa ka bulan nga kampanya, si Maruja ug ang iyang anak nakapadalag kapin sa 150 ka sulat nga ang matag sobre niini gipasukipan nilag usa ka kopya sa tract. Tungod sa ilang mga paningkamot, ang maayong balita nakaabot sa kadaghanan sa mga balay sa kasikbit nga balangay. Si Maruja miingon sa iyang anak, “Kon ang usa sa atong mga sulat makaabot sa mga kamot sa usa ka tawong ligdong ug kasingkasing, si Jehova magapanalangin kanato pinaagi sa paghatag ug usa ka pagtuon sa Bibliya.” Usa ka lokal nga ansiyano misulat, “Mapasalamaton ako kang Jehova nga may mga igsoon nga sama kang Maruja nga naghatag ug maayong panig-ingnan sa uban sa pagpabili kon unsa gayoy hinungdanon.”

5. (a) Sa unsang paagi padayong nahuptan ni Jeremias ang kasibot bisan pag ang mga tawo wala magpakabana? (b) Sa unsang paagi padayon nimong mahuptan ang kasibot sa pagsangyaw sa maayong balita?

⁵ Sa panahon ni Jeremias, ang kadaghanan sa mga molupyo sa Jerusalem ‘wala mahimuot’ sa kamatuoran bahin sa Diyos. Mihunong ba sa pagsangyaw ang manalagna tungod kay daghan ang wala magpakabana sa iyang mensahe? Wala gayod! Si Jeremias miingon: “Ako napuno sa kaaligutgot ni Jehova. Gikapoyan ako sa pagluom.” (Jer. 6:​10, 11) Sa unsang paagi padayon nimong mahuptan ang samang matang sa kasibot? Ang usa ka paagi mao ang pagpamalandong sa imong dakong pribilehiyo sa pagrepresentar sa matuod nga Diyos. Ikaw nahibalo nga gitamay sa prominenteng mga tawo niining kalibotana ang ngalan sa matuod nga Diyos. Hunahunaa usab kon giunsa paglimbong sa mga pangulo sa relihiyon ang mga tawo sa inyong teritoryo, sama sa gihimo sa mga saserdote sa mga adlaw ni Jeremias. (Basaha ang Jeremias 2:​8, 26, 27.) Sa kasukwahi, ang maayong balita sa Gingharian sa Diyos nga imong ginamantala maoy pamatuod sa kaluoy sa Diyos alang sa katawhan. (Lam. 3:​31, 32) Oo, ang pagpamalandong niana makatabang kanimo aron padayon nimong mahuptan ang kasibot sa pagmantala sa maayong balita ug sa pagtabang sa mga tawong karnerohon.

6. Unsang dagkong mga hagit ang nasinatian ni Jeremias?

⁶ Lagmit mouyon ka nga dili kanunayng sayon ang pagpabiling masiboton sa Kristohanong ministeryo. Samtang si Jeremias nag-alagad kang Jehova, siya nakasinati usab ug grabeng mga hagit, nga lakip niini mao ang pag-atubang sa mini nga mga manalagna. Imong mabasa ang usa ka pananglitan niini diha sa Jeremias kapitulo 28. Ang kadaghanan sa mga tawo wala mamati sa iyang mensahe, ug usahay siya mobating nag-inusara ug walay kadangpan. (Jer. 6:​16, 17; 15:17) Dugang pa, dihay higayon nga kinahanglan siyang mobarog nga malig-on atubangan sa iyang mga kaaway nga nagtinguha sa iyang kinabuhi.​—Jer. 26:11.

“IMO AKONG GILIMBONGAN, OH JEHOVA”

7, 8. Sa unsang mapuslanong paagi nga ang Diyos ‘naglimbong’ kang Jeremias?

⁷ Sa dihang si Jeremias giyagayagaan ug giinsulto matag adlaw, iyang gipahungaw ang iyang mga pagbati sa Diyos. Sa imong hunahuna, sa unsang diwa ikaw makaingon nga “gilimbongan” ni Jehova ang iyang matinumanong manalagna, sumala sa gihisgotan sa Jeremias 20:​7, 8?​—Basaha.

⁸ Tataw nga si Jehova wala maglingla o magtonto kang Jeremias pinaagi sa paggamit ug tuso, malalangon nga laraw batok kaniya. Hinunoa, “gilimbongan” sa Diyos ang iyang manalagna sa positibo ug mapuslanon nga paagi. Gibati ni Jeremias nga grabe kaayo ang mga pagsupak, nga kon sa iyang kaugalingon lamang, dili na siya makatuman sa asaynment nga gihatag sa Diyos kaniya. Apan iya gayod kanang natuman tungod kay siya gipaluyohan ug gitabangan sa Labing Gamhanan. Busa, ikaw makaingon nga si Jehova nakalupig kaniya ug nga Siya mopatim-awng mas kusganon kay kang Jeremias ug sa iyang tawhanong mga tinamdan. Sa dihang gihunahuna niining maong tawo sa Diyos nga siya dili na makaagwanta ug dili na makapadayon pa, gigamit ni Jehova ang usa ka puwersa nga makaimpluwensiya kaniya, nga tungod niana si Jeremias susamag “gilimbongan.” Nadaog sa kusog sa Diyos ang mga kahuyangan niining maong manalagna. Bisan sa kawalay-pagpakabana, pagsalikway, ug kapintasan, si Jeremias nakapadayon sa pagsangyaw.

9. Nganong makapalig-on kanimo ang mga pulong sa Jeremias 20:11?

⁹ Si Jehova maoy sama “sa usa nga makalilisang ang pagkagamhanan” tapad kang Jeremias kinsa mitabang kaniya. (Jer. 20:11) Ang Diyos makapalig-on usab kanimo aron padayon nimong mahuptan ang kasibot alang sa matuod nga pagsimba ug aron ikaw makapadayon bisan pa sa dagkong mga problema. Mahimo nimo kining ikalarawan ingon sa pagkagamit niini sa ubang hubad​—si Jehova maoy “usa ka manggugubat nga gamhanan” diha sa imong kiliran.​—New Cebuano Version.

10. Unsa ang determinado nimong buhaton sa dihang ikaw makaatubang ug pagsupak?

¹⁰ Kining puntoha gipasiugda ni apostol Pablo sa dihang siya nagdasig sa mga Kristohanon nga nakasinatig pagsupak. Siya misulat: “Magagawi kamo sa paaging takos sa maayong balita labot kang Kristo, aron nga . . . akong madunggan . . . nga kamo nagabarog nga malig-on sa usa ka espiritu, uban ang usa ka kalag nga naningkamot kiliran sa kiliran alang sa pagtuo sa maayong balita, ug sa bisan unsang paagi dili malisang sa inyong mga kaatbang.” (Filip. 1:​27, 28) Sama kang Jeremias ug sa mga Kristohanon sa unang siglo, ikaw makasalig ug angay gayong mosalig sa Labing Gamhanan nga Diyos samtang tumanon mo ang imong ministeryo. Kon ang pipila ka tawo moyubit o mopasakit kanimo, hinumdomi nga si Jehova anaa sa imong kiliran ug makahatag kanimo ug kusog. Iya kanang gibuhat kang Jeremias ug ngadto sa kadaghanan sa imong kaigsoonan; busa, mahimo usab niya kanang buhaton kanimo. Pangamuyo kaniya alang sa tabang, ug makasalig ka nga siya motubag sa imong pag-ampo. Ikaw usab mahimong makaingon nga ikaw ‘nalimbongan’ samtang ang Diyos naghatag kanimog kusog aron ikaw magmaisogon, inay nga magmahinadlokon, sa pagbuntog sa mga kababagan. Oo, tingali mahimo pa gani nimo ang labaw pa kay sa kon unsay imong gidahom.​—Basaha ang Buhat 4:​29-31.

11, 12. (a) Unsa nga mga pagpasibo ang imong mahimo aron imong maestorya ang mas daghang tawo diha sa ministeryo? (b) Sa unsang paagi mapadapat sa inyong lugar ang hulagway nga makita sa panid 39?

¹¹ Ang atong mabasa bahin sa pag-alagad ni Jeremias makatabang kanato sa daghang paagi aron mahimong mas epektibong mga ministro sa maayong balita. Human makaalagad ingong manalagna ni Jehova sulod sa kapin sa 20 ka tuig, siya nakaingon: “Ako nagpadayon sa pagsulti kaninyo, nga mibangon ug sayo ug misulti, apan kamo wala mamati.” (Jer. 25:3) Oo, siya sayong nagsugod sa iyang buluhaton inay nga maglanganlangan. Aduna ba kitay makat-onan sa iyang panig-ingnan? Sa daghang kongregasyon, may mga magmamantala nga momatag sayo aron mosangyaw diha sa mga terminal sa bus ug sa mga estasyon sa tren. Sa kabaryohan, daghang Saksi ang mobisita sayo sa buntag sa mga mag-uuma ug sa uban pa nga nagmata na nianang mga orasa. May nahunahunaan ka ba nga ubang mga paagi nga personal nimong ikapadapat kining matulon-anong panig-ingnan sa pagkamatinumanon ni Jeremias sa iyang ministeryo? Mahimo bang momata ka usab ug sayo aron ikaw presente sa dihang magsugod ang naeskedyul nga tigom sa dayon nang pagsangyaw?

¹² Dugang pa, ang pagpamalaybalay sa mahapon ug sa magabii kasagarang adunay maayo usab kaayong mga resulta diha sa daghang dapit. Ang ubang mga magmamantala mosangyaw pa man gani sa gabii, diin sila moduaw sa mga nagtrabaho diha sa mga gasolinahan, mga restawran, ug sa ubang mga dapit sa negosyo nga bukas sulod sa 24 oras. Makapasibo ka ba sa imong eskedyul aron ikaw makasangyaw sa panahon nga lagmit imong makaplagan ang mga tawo diha sa balay o sa uban pang mga dapit?

13, 14. (a) Sa unsang paagi ang panig-ingnan ni Jeremias nalangkit sa paghimog mga balikduaw? (b) Sa unsang paagi gipasiugda ang kahinungdanon sa pagtuman sa imong saad labot sa mga pagbalikduaw?

¹³ Dihay higayon nga gisugo ni Jehova si Jeremias nga ipahayag ang mga tagna samtang magtindog diha sa mga ganghaan sa templo o sa mga ganghaan sa Jerusalem. (Jer. 7:2; 17:​19, 20) Pinaagi sa pagpahayag ni Jeremias diha sa mga ganghaan, mas daghang tawo ang nakapatalinghog sa pulong ni Jehova. Ug sanglit daghang tawo, lakip ang mga prominente sa siyudad, mga magpapatigayon, ug mga negosyante, ang mag-agian sa samang ganghaan, lagmit nga sublisubli niyang nasangyawan ang pipila ka tawo aron sila matabangan nga makasabot sa mga butang nga ila nang nadunggan sa miagi. Unsay atong makat-onan niini sa dihang kita mohimog mga pagbalikduaw niadtong mga tawo nga nagpakitag interes?

¹⁴ Nahibalo si Jeremias nga ang kinabuhi sa mga tawo nagdepende sa iyang buluhaton ingong manalagna sa Diyos. Sa usa ka higayon sa dihang siya dili makahimo sa pagtuman sa sugo sa Diyos sa pagsangyaw sa mga tawo, iyang gipadala ang iyang higala nga si Baruk. (Basaha ang Jeremias 36:​5-8.) Sa unsang paagi atong masundog si Jeremias niining bahina? Kon atong saaran ang tagbalay nga kita mobalik, ato ba kanang tumanon? Kon kita dili makatuman sa atong saad nga mobalikduaw o modumalag pagtuon sa Bibliya, gihikay ba nato nga may usa nga moadto puli kanato? Si Jesus miingon: ‘Himoa ang inyong pulong nga Oo magkahulogan nga Oo.’ (Mat. 5:37) Hinungdanon ang pagtuman sa atong saad tungod kay kita nagrepresentar sa Diyos sa kamatuoran ug kahusay.​—1 Cor. 14:​33, 40.

15, 16. (a) Sa unsang paagi gisundog sa daghan ang panig-ingnan ni Jeremias sa pagpalapad sa ilang ministeryo? (b) Unsa nga leksiyon ang imong makat-onan sa kasinatian gikan sa Chile, nga gihulagway diha sa panid 40?

¹⁵ Gidasig ni Jeremias ang mga Hudiyo sa Babilonya pinaagi sa pagsulat kanila mahitungod sa “maayong pulong” ni Jehova sa pagpasig-uli. (Jer. 29:​1-4, 10) Karong adlawa, ang “maayong pulong” bahin sa kon unsay hapit nang buhaton ni Jehova mahimong epektibong ikapakaylap pinaagi sa sulat ug telepono. Mahimo ba nimong gamiton kining mga paagiha aron sa pagtabang sa imong mga paryente ug sa uban nga atua sa lagyong mga dapit o niadtong mga tawo nga lisod makontak?

¹⁶ Pinaagi sa pagsundog sa panig-ingnan ni Jeremias sa bug-os nga pagtuman sa iyang ministeryo, ang mga magmamantala sa Gingharian karon sagad makabaton ug maayong mga resulta. Usa ka sister didto sa Chile ang nakig-estorya sa usa ka babaye nga mogawasay sa estasyon sa tren. Ang maong babaye nalipay sa pagkadungog sa mensahe sa Bibliya ug miuyon nga duawon sa iyang balay aron makighisgot sa Bibliya. Apan wala masulat sa sister ang adres sa babaye. Human niadto, kay nakaamgo nga hinungdanong ugmaron ang interes sa babaye diha sa kamatuoran, ang atong sister miampo kang Jehova alang sa tabang. Pagkaugma, siya mibalik sa estasyon sa tren sa samang oras. Iyang nahibalag pag-usab ang babaye. Nianang higayona, iya na gayong gisulat ang adres sa babaye ug sa ulahi miduaw sa balay niini aron matabangan kini sa pagsabot sa Kasulatan. Sa dili madugay ang paghukom sa Diyos kalit nga modangat sa kalibotan ni Satanas. Apan adunay paglaom alang niadtong maghinulsol ug magpasundayag ug pagtuo sa maayong balita. (Basaha ang Lamentaciones 3:​31-33.) Busa, atong ipabanaag kini nga kamatuoran pinaagi sa makugihong pagkobre sa atong teritoryo.

“TINGALI SILA MAMATI UG MOTALIKOD, ANG MATAG USA”

17. Sa inyong teritoryo, sa unsang paagi imong masundog ang tinamdan ni Jeremias?

¹⁷ Wala magtinguha si Jehova nga ang mga tawo mamatay. Mga napulo ka tuig sa wala pa ang kalaglagan sa Jerusalem, gigamit niya si Jeremias aron ipahayag ang paglaom alang niadtong mga nadestiyero sa Babilonya. Atong mabasa: “Itutok ko ang akong mata kanila sa maayong paagi, ug papaulion ko gayod sila niining yutaa. Ug pagatukoron ko sila, ug dili ko pagalumpagon; ug itanom ko sila, ug dili ko pagalukahon.” Si Jeremias nakaingon ngadto kanila: “Adunay paglaom alang sa [inyong] kaugmaon.” (Jer. 24:6; 26:3; 31:17) Gihuptan usab ni Jeremias ang samang panglantaw sa Diyos alang sa mga tawo. Uban ang tinuod nga kahingawa iyang gituman ang iyang ministeryo, ug gimantala ang mga awhag ni Jehova: “Palihog, talikod kamo, ang matag usa gikan sa iyang daotang dalan.” (Jer. 35:15) May nahunahunaan ka bang ubang mga paagi aron imong ikapakita ang lalom nga personal nga interes sa mga tawo diha sa inyong teritoryo?

18, 19. (a) Unsa nga panglantaw ang kinahanglan natong isalikway samtang kita nagsangyaw sa maayong balita? (b) Unsa nga tinamdan ni Jeremias ang angay natong batonan?

¹⁸ Wala gayod molubad ang lalom nga gugma ni Jeremias alang sa mga tawo. Sa dihang nalaglag ang Jerusalem, siya padayong naluoy kanila. (Basaha ang Lamentaciones 2:11.) Ang mga Hudiyo mao ang mabasol sa katalagman nga midangat kanila. Apan, si Jeremias wala moingon: ‘Daan na bitaw kong nag-ingon ninyo.’ Hinunoa, siya mibatig dakong kasubo sa ilang gidangatan. Sa samang paagi, ang atong ministeryo dili kay basta rutina na lamang, nga magbuhat niini tungod kay giisip lamang nato kini ingong obligasyon. Ang atong mga paningkamot sa paghatag ug pamatuod angayng magpakita kon unsa ka lalom ang atong gugma sa atong kahibulongang Diyos ug sa mga tawo, kinsa gilalang sumala sa iyang dagway.

¹⁹ Walay pribilehiyo o kadungganan niining kalibotana ang makalabaw sa atong buluhatong pagpamatuod alang sa matuod nga Diyos. Mao kana ang gibati ni Jeremias sa dihang siya misulat: “Ang imong mga pulong nakaplagan, ug akong gikaon kini; ug kanako ang imong pulong nahimong kasadya ug pagmaya sa akong kasingkasing; kay ako gitawag sa imong ngalan, Oh Jehova.” (Jer. 15:16) Samtang atong gisangyaw ang maayong balita, mahimong daghan pa ang makahupot ug kahibalo sa Diyos ug mahigugma kaniya kinsa ilang nautangan sa ilang kinabuhi. Ato kanang mahimo kon kita mag-alagad uban ang kasibot ug gugma, sama sa gipakita ni Jeremias.