SEKSIYON 4

Kinsa ang Diyos?

ANG mga tawo nagsimbag daghang diyos. Apan ang Balaang Kasulatan nagtudlo nga dunay usa lamang ka matuod nga Diyos. Siya supremo, walay kasama, ug walay kataposan. Siya ang naglalang sa tanang butang sa langit ug sa yuta, ug siya ang naghatag kanatog kinabuhi. Busa, siya lamang ang takos natong simbahon.

Si Moises nga naggunit sa mga papan nga bato diin nasulat ang Napulo ka Sugo — Ang Balaod gihatag pinaagi kang propeta Moises ingong “ang pulong nga gisulti pinaagi sa mga manulonda”

Ang Diyos adunay personal nga ngalan—JEHOVA. Ang Diyos nag-ingon kang Moises: “Kini ang imong isulti sa mga anak sa Israel, ‘Si Jehova nga Diyos sa inyong mga katigulangan, ang Diyos ni Abraham, ang Diyos ni Isaac ug ang Diyos ni Jacob, nagpadala kanako nganhi kaninyo.’ Kini ang akong ngalan hangtod sa panahong walay tino, ug kini ang handomanan kanako hangtod sa sunodsunod nga mga kaliwatan.” (Exodo 3:15) Ang ngalang Jehova makitag mga 7,000 ka beses diha sa Balaang Kasulatan. Ang Salmo 83:18 nag-ingon bahin sa Diyos, “ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.”

Karaang manuskrito sa Linukot nga Basahon sa Patayng Dagat nga may ngalan sa Diyos

Walay tawo nga nakakita sukad sa Diyos. Ang Diyos nagsulti kang Moises: “Dili ka arang makakita sa akong nawong, tungod kay walay tawo nga makakita kanako ug mabuhi pa.” (Exodo 33:20) Ang Diyos nagpuyo sa langit ug dili makita ni bisan kinsang tawo. Busa sayop ang paghimo o pag-ampo sa usa ka idolo, larawan, o simbolo sa Diyos. Si Jehova nga Diyos nagsugo kang propeta Moises: “Dili ka magbuhat alang kanimo ug usa ka linilok nga larawan o usa ka dagway nga sama sa bisan unsa nga anaa sa kalangitan sa itaas o anaa sa yuta sa ubos o anaa sa mga tubig ilalom sa yuta. Dili ka magyukbo kanila ni maaghat sa pag-alagad kanila, tungod kay ako si Jehova nga imong Diyos maoy Diyos nga nagapangayo ug bug-os nga pagkamahinalaron.” (Exodo 20:2-5) Sa ulahi, pinaagi kang propeta Isaias, ang Diyos miingon: “Ako mao si Jehova. Kana ang akong ngalan; ug dili ko ihatag kang bisan kinsa ang akong kaugalingong himaya, ni ang akong pagdayeg ngadto sa kinulit nga mga larawan.”—Isaias 42:8.

Ang pipila ka tawo nagtuo sa Diyos apan lagmit naghunahuna sila nga Siya dili mailhan ug dili maduolan, ug nga Siya kahadlokan imbes higugmaon. Unsay imong hunahuna? Interesado ba ang Diyos kanimo? Mahimo ba nimo siyang mailhan, nga masuod pa gani kaniya? Atong susihon kon unsay giingon sa Kasulatan bahin sa mga hiyas sa Diyos.

Balaang Espiritu sa Diyos ug Iyang mga Anghel

Sa unsang paagi ang Diyos nagtuman sa iyang kabubut-on? Usa ka paagi mao ang pagpadala sa iyang balaang espiritu. Kini mao ang iyang di-makita nga aktibong puwersa, ang way-kinutbanang gahom nga gigamit niya sa pagtuman kon unsay iyang kabubut-on. Kini dili persona o anghel. Gigamit sa Diyos ang maong puwersa sa paglalang sa langit ug yuta. “Pinaagi sa pulong ni Jehova nabuhat ang mga langit, ug ang tanan nilang panon pinaagi sa espiritu sa iyang baba.” (Salmo 33:6) Ang Genesis 1:2 nagsaysay nga sa dihang ang yuta natabonan pag katubigan ug samtang giandam pa sa Diyos ang yuta aron puy-an sa tawo, “ang aktibong puwersa sa Diyos naglihok ngadto-nganhi ibabaw sa nawong sa mga tubig.” Dayon gigamit sa Diyos ang iyang balaang espiritu sa paglalang sa tanang buhing linalang sa yuta.

Gigamit usab sa Diyos ang iyang mga anghel sa pagtuman sa iyang kabubut-on. Sila gilalang sa Diyos aron magpuyo sa langit uban niya. Ang mga anghel gamhanan kaayo. Sila magpahayag ug mga mensahe gikan sa Diyos ug magtuman sa ubang importanteng mga buluhaton. Pananglitan, ang Kasulatan nagtumong sa Balaod nga gihatag kang propeta Moises ingong “ang pulong nga gisulti pinaagi sa mga manulonda [o anghel].” Ang mga anghel sa Diyos motabang usab sa iyang mga alagad dinhi sa yuta. Gani, ang Kasulatan nagtawag sa mga anghel nga “mga espiritu alang sa publikong pag-alagad, nga gipadala aron mag-alagad niadtong magapanunod sa kaluwasan.”—Hebreohanon 1:14; 2:2.