Para Nimo, Unsa ang Bibliya?

KON UNSAY GIINGON SA BIBLIYA

“Ang tibuok Balaang Kasulatan gisulat pinaagi sa paggiya sa Diyos.”​—2 Timoteo 3:16, Bag-ong Kalibotang Hubad.

KON UNSAY KAAYOHAN NIINI ALANG KANIMO

Mahibaloan nimo ang tubag sa hinungdanong mga pangutana bahin sa kinabuhi.​—Proverbio 2:1-5.

Magiyahan ka sa adlaw-adlaw nga pagkinabuhi.​—Salmo 119:105.

Makabaton kag tinuod nga paglaom sa umaabot.​—Roma 15:4.

MAKATUO BA GYOD TA SA GIINGON SA BIBLIYA?

Oo, tungod sa tulo ka rason:

• Wala magkasumpaki. Ang Bibliya gisulat sa mga 40 ka tawo sa kapig 1,600 ka tuig. Kadaghanan nila wala magkit-anay. Bisan pa niana, ang tibuok Bibliya wala magkasumpaki ug usa ra ang tema!

• Tinuod nga kasaysayan. Kasagaran, dili isulti sa mga historyano ang kapildihan sa ilang nasod. Apan lahi ang mga magsusulat sa Bibliya. Ilang girekord dili lang ang ilang mga sayop kondili ang kapildihan usab sa ilang nasod.​—2 Cronicas 36:15, 16; Salmo 51:1-4.

• Natuman nga mga tagna. Mga 200 ka tuig nga abante, ang Bibliya nagtagna nga malaglag ang karaang siyudad sa Babilonya. (Isaias 13:17-22) Gisaysay niini kon sa unsang paagi malaglag ang Babilonya ug kon kinsa ang molaglag niini!​—Isaias 45:1-3.

  Dugang pa, daghang tagna sa Bibliya ang natuman bisan sa kinagamyang detalye. Apan dili ba kana ang atong madahom sa Pulong sa Diyos?​—2 Pedro 1:21.