Kinsa ba Gayod ang Nagmando sa Kalibotan?

KON UNSAY GIINGON SA BIBLIYA

“Ang Daotan maoy nagmando sa kalibotan.”​—1 Juan 5:19.

“Ang Anak sa Diyos mianhi . . . aron sa paglaglag sa mga buhat sa yawa.”​—1 Juan 3:8, New Century Version.

KON UNSAY KAAYOHAN NIINI ALANG KANIMO

Masabtan nimo kon nganong daghag problema ang kalibotan.​—Pinadayag 12:12.

Makombinsir ka nga kinahanglang usbon ang kalibotan aron mahimong mas maayong puy-an.​—1 Juan 2:17.

MAKATUO BA GYOD TA SA GIINGON SA BIBLIYA?

Oo, tungod sa tulo ka rason:

• Hapit nang matapos ang pagmando ni Satanas. Gusto gyong taposon ni Jehova ang pagmando ni Satanas sa mga tawo. Siya nagsaad nga ‘wagtangon niya ang Yawa’ ug ang tanang kadaot nga gihimo ni Satanas.​—Hebreohanon 2:14, Bag-ong Kalibotang Hubad.

• Si Jesu-Kristo ang gipili sa Diyos nga momando sa kalibotan. Si Jesus lahi gayod sa bangis ug hakog nga magmamando niining kalibotana. Bahin sa pagmando ni Jesus, ang Diyos nagsaad: “Maluoy siya sa timawa ug sa kabos . . . Luwason niya sila gikan sa pagdaogdaog ug kapintasan.”​—Salmo 72:13, 14.

• Ang Diyos dili mamakak. Ang Bibliya klarong nag-ingon: “Ang Diyos dili gayod mamakak.” (Hebreohanon 6:18) Kon mosaad si Jehova, seguradong iya kining tumanon! (Isaias 55:10, 11) “Ang magmamando niining kalibotana palagpoton.”​—Juan 12:31.