“Hinumdomi Sila nga Nanguna Kaninyo”

KINI nga mga pulong ni apostol Pablo, nga narekord sa Hebreohanon 13:7, mahubad sab ug: “Hinumdomi kadtong nagmando kaninyo.” Sukad sa Pentekostes 33 C.E., ang matinumanong mga apostoles ni Ginoong Jesu-Kristo maoy nagtuman niini nga papel ingong nagamandong lawas nga maoy nanguna sa paghatag ug direksiyon para sa bag-ong natukod nga Kristohanong kongregasyon. (Buh. 6:2-4) Pero sa mga tuig 49 C.E., nausab ang kahimtang. Puwede nang mahimong membro sa nagamandong lawas bisan kadtong dili apostoles ni Jesus. Dihang nadesisyonan ang isyu bahin sa pagpatuli, ang nagamandong lawas gilangkoban na sa “mga apostoles ug sa mga ansiyano sa Jerusalem.” (Buh. 15:1, 2) Responsibilidad nila ang pag-atiman sa mga isyu nga makaapektar sa tanang Kristohanon. Nagpadala silag mga sulat ug mga sugo, nga nakapalig-on sa mga kongregasyon ug nakatabang sa mga tinun-an nga magpabiling nahiusa sa hunahuna ug buhat. Ang mga kongregasyon nagmasinugtanon ug nagpasakop sa direksiyon sa nagamandong lawas, maong gipanalanginan sila ni Jehova ug miuswag.​—Buh. 8:1, 14, 15; 15:22-31; 16:4, 5; Heb. 13:17.

² Human mamatay ang mga apostoles, nagsugod ang grabeng apostasya. (2 Tes. 2:3-12) Gitagna ni Jesus sa iyang ilustrasyon sa trigo ug mga bunglayon nga human mapugas ang trigo (dinihogang mga Kristohanon), duna poy nagpugas ug mga bunglayon (dili tinuod nga mga Kristohanon) taliwala sa mga trigo. Latas sa kasiglohan, kining duha ka grupo gipasagdan nga magdungan sa pagtubo hangtod sa ting-ani, “ang hinapos sa usa ka sistema sa mga butang.” (Mat. 13:24-30, 36-43) Ang matag dinihogang Kristohanon padayong nakabaton sa pag-uyon ni Jesus nianang panahona, pero walay nagamandong lawas o bisan kinsa sa yuta nga gigamit ni Jesus aron mohatag ug direksiyon sa iyang mga sumusunod. (Mat. 28:20) Apan iyang gitagna nga mausab ang kahimtang panahon sa ting-ani.

³ “Kinsa ba gayod ang matinumanon ug maalamong ulipon?” Pinaagi niana nga pangutana, gihisgotan ni Jesu-Kristo ang usa ka ilustrasyon ingong bahin sa “ilhanan” nga iyang gihatag maylabot “sa hinapos sa sistema sa mga butang.” (Mat. 24:3, 42-47) Gipakita ni Jesus nga ang maong matinumanong ulipon kanunayng magtaganag espirituwal nga pagkaon “sa hustong panahon” alang sa katawhan sa Diyos. Sama nga migamit si Jesus ug usa ka grupo sa mga lalaki​—imbes usa lang ka indibiduwal​—aron manguna niadtong unang siglo, ang matinumanong ulipon nga gigamit ni Jesus sa hinapos sa sistema sa mga butang dili kay usa lang ka brader.

PAG-ILA SA “MATINUMANON UG MAALAMONG ULIPON”

⁴ Kinsay gitudlo ni Jesus nga magpakaon sa iyang mga sumusunod? Haom lang nga gamiton niya ang dinihogang mga Kristohanon sa yuta. Sila gitawag sa Bibliya nga “mga saserdote nga hari” nga gisugo aron “‘ipahayag . . . bisan asa ang dalayegong mga hiyas’ sa Usa nga nagtawag [kanila] gikan sa kangitngit ngadto sa iyang kahibulongang kahayag.” (1 Ped. 2:9; Mal. 2:7; Pin. 12:17) Ang tanan bang dinihogan sa yuta apil sa matinumanong ulipon? Dili. Dihang milagrosong gipakaon ni Jesus ang mga 5,000 ka lalaki, gawas pa sa mga babaye ug bata, iyang giapod-apod ang pagkaon ngadto sa mga tinun-an, ug giapod-apod sab kini sa mga tinun-an ngadto sa mga tawo. (Mat. 14:19) Iyang gipakaon ang daghan pinaagi sa pipila ra ka tawo. Karon, nagtagana sab siyag espirituwal nga pagkaon sa samang paagi.

⁵ Busa “ang matinumanong piniyalan, ang usa nga maalamon,” gilangkoban sa gamayng grupo sa dinihogang mga brader nga direktang nalangkit sa pag-andam ug pag-apod-apod ug espirituwal nga pagkaon panahon sa presensiya sa Kristo. (Luc. 12:42) Sa kataposang mga adlaw, ang dinihogang mga brader nga naglangkob sa “matinumanon ug maalamong ulipon” nag-alagad didto sa hedkuwarter. Kini nga dinihogang mga brader mao karon ang Nagamandong Lawas sa mga Saksi ni Jehova.

⁶ Kini nga grupo gigamit ni Jesu-Kristo sa pagpahibalo sa impormasyon bahin sa katumanan sa mga tagna sa Bibliya ug sa paghatag ug tukma sa panahong direksiyon bahin sa pagpadapat sa mga prinsipyo sa Bibliya sa adlaw-adlawng pagkinabuhi. Kining espirituwal nga pagkaon giapod-apod pinaagi sa lokal nga mga kongregasyon sa mga Saksi ni Jehova. (Isa. 43:10; Gal. 6:16) Sa panahon sa Bibliya, ang sinaligang ulipon, o piniyalan, mao ang tigdumala sa panimalay. Sa susama, ang matinumanon ug maalamong ulipon gihatagag responsibilidad sa pagdumala sa panimalay sa pagtuo. Busa ang matinumanong ulipon sab ang nagdumala sa materyal nga mga kabtangan, buluhatong pagsangyaw, mga programa sa asembliya ug kombensiyon, pagtudlog mga tigdumala alang sa lainlaing responsibilidad sa organisasyon, ug paghimog literatura sa Bibliya. Kining tanan para sa kaayohan sa “mga sulugoon sa panimalay.”​—Mat. 24:45.

⁷ Busa kinsa man ang “mga sulugoon sa panimalay”? Sila kadtong gitagan-an ug pagkaon. Sa sinugdan, ang tanang sulugoon sa panimalay maoy dinihogan. Sa ulahi, apil na sa mga sulugoon sa panimalay ang dakong panon sa “ubang mga karnero.” (Juan 10:16) Kining duha ka grupo mokaon sa espirituwal nga pagkaon nga gitagana sa matinumanong ulipon.

⁸ Panahon sa dakong kasakitan, dihang moabot si Jesus aron ipahayag ug ipahamtang ang paghukom alang niining daotang sistema, iyang itudlo ang matinumanong ulipon “sa pagdumala sa tanan niyang kabtangan.” (Mat. 24:46, 47) Kadtong naglangkob sa matinumanong ulipon makadawat sa ilang langitnong ganti. Duyog sa uban pang membro sa 144,000, sila magmando uban sa Kristo didto sa langit. Bisag wala na unyay matinumanon ug maalamong ulipon sa yuta, giyahan ni Jehova ug Jesus ang yutan-ong mga sakop sa Mesiyanikong Gingharian pinaagi sa tinudlong “mga prinsipe.”​—Sal. 45:16.

NGANONG ANGAYNG ‘HINUMDOMAN SILA NGA NANGUNA’?

⁹ Daghag rason kon nganong angay natong ‘hinumdoman sila nga nanguna’ ug ipakita ang atong pagsalig kanila. Nganong ang pagbuhat niana makaayo kanato? Si apostol Pablo miingon: “Sila nagabantay kaninyo sanglit manubag sila sa Diyos, aron himoon nila kini nga malipayon ug dili manghupaw, kay makadaot kini kaninyo.” (Heb. 13:17) Hinungdanon nga magmasinugtanon ug magpasakop ta sa mga nagapanguna kay sila nagabantay kanato alang sa atong espirituwal nga kaayohan.

¹⁰ Sa 1 Corinto 16:14, si Pablo miingon: “Himoa ang tanang butang uban ang gugma.” Ang mga desisyon nga gihimo alang sa katawhan sa Diyos gibase sa kinalabwang hiyas, ang gugma. Bahin sa gugma, ang 1 Corinto 13:4-8 nag-ingon: “Ang gugma taas ug pailob ug maayo. Ang gugma dili seloso. Kini dili manghambog, dili garboso, dili bastos, dili mangita sa kaugalingong kaayohan, dili masuk-anon. Kini dili maghupot ug listahan sa kadaot. Kini dili magsadya sa pagkadili-matarong, apan magsadya uban sa kamatuoran. Kini moantos sa tanang butang, motuo sa tanang butang, molaom sa tanang butang, molahutay sa tanang butang. Ang gugma dili gyod molubad.” Kay gibase sa gugma ang tanang desisyon nga gihimo para sa kaayohan sa mga alagad ni Jehova, kita makasalig gyod sa ilang pagdumala. Dugang pa, ang maong pagdumala nagpadayag sa gugma ni Jehova.

¹¹ Sama sa unang siglo, ang gigamit ni Jehova sa pagdumala sa iyang katawhan maoy dili hingpit nga mga tawo. Gani, sukad pa gyod kaniadto naggamit na si Jehova ug dili hingpit nga mga tawo sa pagtuman sa iyang kabubut-on. Si Noe naghimog arka ug nagwali bahin sa umaabot nga kalaglagan sa iyang panahon. (Gen. 6:13, 14, 22; 2 Ped. 2:5) Si Moises gitudlo nga manguna aron pagawson sa Ehipto ang katawhan ni Jehova. (Ex. 3:10) Dili hingpit nga mga tawo ang gigiyahan sa Diyos sa pagsulat sa Bibliya. (2 Tim. 3:16; 2 Ped. 1:21) Ang paggamit ni Jehova karon ug dili hingpit nga mga tawo sa pagdumala sa buluhatong pagsangyaw ug paghimog tinun-an dili makapahuyang sa atong pagsalig sa organisasyon sa Diyos. Hinuon, kita napalig-on kay nahibalo ta nga kon wala ang tabang ni Jehova, dili gyod molampos ang tanang ginahimo sa organisasyon. Latas sa daghang kalisdanan ug kasinatian, gipakita sa matinumanong ulipon nga sila gigiyahan sa espiritu sa Diyos. Nakatagamtam gyod ug dagayang panalangin ang makitang bahin sa organisasyon ni Jehova karon. Busa kinasingkasing kitang mosuportar ug bug-os nga mosalig niini.

KON UNSAON NATO PAGPAKITA ANG ATONG PAGSALIG

¹² Kadtong gihatagag mga responsibilidad sa kongregasyon nagpakita sa ilang pagsalig pinaagi sa malipayong pagdawat ug matinumanong pagbuhat sa ilang mga obligasyon. (Buh. 20:28) Ingong magmamantala sa Gingharian, kita madasigong nakigbahin sa pagpamalaybalay, pagbalikduaw, ug pagdumalag mga pagtuon sa Bibliya. (Mat. 24:14; 28:19, 20) Aron bug-os makapahimulos sa dagayang espirituwal nga pagkaon nga gitagana sa matinumanong ulipon, kita mangandam ug motambong sa Kristohanong panagkatigom, apil ang mga asembliya ug kombensiyon. Kita makabenepisyo gyod sa pagdinasigay dihang makig-uban ta sa atong mga igsoon niini nga mga panagkatigom.​—Heb. 10:24, 25.

¹³ Dihang mosuportar ta sa organisasyon pinaagig materyal nga kontribusyon, atong gipakita nga duna tay pagsalig niini. (Prov. 3:9, 10) Dihang makita nato nga ang atong mga igsoon nanginahanglag materyal nga tabang, kita molihok dayon. (Gal. 6:10; 1 Tim. 6:18) Ginahimo nato kini tungod sa inigsoong gugma, nga kanunayng nangitag kahigayonan nga ipakita ang atong apresasyon sa pagkamaayo ni Jehova ug sa iyang organisasyon.​—Juan 13:35.

¹⁴ Mapakita sab nato ang atong pagsalig sa organisasyon pinaagi sa pagsuportar sa mga desisyon niini. Apil niini ang mapainubsanong pagsunod sa direksiyon sa gitudlo nga mga tigdumala, sama sa mga tigdumala sa sirkito ug mga ansiyano sa kongregasyon. Kini nga mga brader apil niadtong “nanguna,” nga kinahanglan natong sundon ug pasakopan. (Heb. 13:7, 17) Bisag dili nato bug-os masabtan ang mga rason sa ilang mga desisyon, nahibalo ta nga ang pagsuportar niana maoy para sa atong dumalayong kaayohan. Ingong resulta, panalanginan ta ni Jehova kay nagmasinugtanon ta sa iyang Pulong ug sa iyang organisasyon. Nianang paagiha, gipakita nato nga kita nagpasakop gayod sa Agalon, si Jesu-Kristo.

¹⁵ Oo, angay gayod kitang mosalig sa matinumanon ug maalamong ulipon. Si Satanas, ang diyos niini nga sistema sa mga butang, naningkamot pag-ayo nga pasipalahan ang ngalan ni Jehova ug ang iyang organisasyon. (2 Cor. 4:4) Ayawg pabiktima sa daotang mga taktika ni Satanas! (2 Cor. 2:11) Nahibalo siya nga “mubo na lang ang iyang panahon” sa di pa siya itambog sa kahiladman, ug determinado siyang biktimahon ang mas daghang alagad ni Jehova kutob sa mahimo. (Pin. 12:12) Pero samtang gipangusgan ni Satanas ang iyang paningkamot, hinaot nga mas makigsuod ta kang Jehova. Hinaot nga mosalig ta kang Jehova ug sa iyang gigamit sa paggiya sa iyang katawhan karon. Ang atong paghimo niini makapahiusa kanato.