Kon Giunsa Pag-organisar ug Pagdumala ang Kongregasyon

SA UNANG sulat ni apostol Pablo sa mga taga-Corinto, iyang gihisgotan ang hinungdanong kamatuoran bahin sa Diyos. Siya misulat: “Ang Diyos usa ka Diyos dili sa kasamok kondili sa kalinaw.” Dayon, sa paghisgot ug dugang bahin sa mga tigom sa kongregasyon, siya miingon: “Himoa ang tanang butang nga may kahapsay ug pinaagig kahikayan.”​—1 Cor. 14:33, 40.

² Sa sinugdanan sa maong sulat, si apostol Pablo mitambag bahin sa mga panagsumpaki diha sa kongregasyon sa Corinto. Giawhag niya ang mga igsoon didto nga “magsulti nga may panagkauyon” ug ‘bug-os magkahiusa sa samang kaisipan ug sa samang panghunahuna.’ (1 Cor. 1:10, 11) Dayon siya nagtambag kanila bahin sa mga butang nga makadaot sa panaghiusa sa kongregasyon. Iyang gigamit ang lawas sa tawo ingong ilustrasyon sa pagpakita nga gikinahanglan ang panaghiusa ug kooperasyon. Giawhag niya ang tanan sa Kristohanong kongregasyon nga magpakitag pagtagad ug pagmahal sa usag usa, bisag unsa pay ilang papel. (1 Cor. 12:12-26) Ang maong panaghiusa ug kooperasyon nagpakita nga ang kongregasyon angayng organisado.

³ Pero giunsa pag-organisar ang Kristohanong kongregasyon? Kinsay nag-organisar niini? Unsay gihimong mga kahikayan? Kinsay gitudlo nga magdumala sa mga responsibilidad sa Kristohanong kongregasyon? Makita nato ang tubag niini nga mga pangutana pinaagi sa pagsusi sa Bibliya.​—1 Cor. 4:6.

GIORGANISAR SA TEOKRATIKANHONG PAAGI

⁴ Ang Kristohanong kongregasyon natukod sa Pentekostes 33 C.E. Unsay atong makat-onan bahin sa kongregasyon sa unang siglo? Kadto giorganisar ug gidumala sa teokratikanhong paagi, sa ato pa, ubos sa pagmando (Grego, kraʹtos) sa Diyos (the·osʹ). Kining duha ka pulong makita sa 1 Pedro 5:10, 11. Ang asoy sa Bibliya bahin sa nahitabo sa Jerusalem duolag 2,000 ka tuig kanhi tin-awng nagpakita nga ang kongregasyon sa dinihogang mga Kristohanon gitukod sa Diyos. (Buh. 2:1-47) Kadto maoy iyang tinukod, iyang panimalay. (1 Cor. 3:9; Efe. 2:19) Gisunod sa Kristohanong kongregasyon karon ang paagi sa pag-organisar ug ang mga kalihokan nga gisugdan sa unang siglo.

⁵ Ang unang kongregasyon nagsugod nga may mga 120 ka tinun-an. Sila ang unang gidihogan sa balaang espiritu ingong katumanan sa Joel 2:28, 29. (Buh. 2:16-18) Niadtong adlawa sab, mga 3,000 ang gibawtismohan sa tubig ug sila nahimong sakop sa kongregasyon sa dinihogang mga Kristohanon. Gidawat nila ang pulong bahin sa Kristo ug “padayong nagdeboto sa ilang kaugalingon sa ginatudlo sa mga apostoles.” Human niadto, “adlaw-adlawng gidugang ni Jehova kanila kadtong iyang mga ginaluwas.”​—Buh. 2:41, 42, 47.

⁶ Kay miuswag pag-ayo ang kongregasyon sa Jerusalem, ang Hudiyong hataas nga saserdote mireklamo nga gipuno sa mga tinun-an ang Jerusalem sa ilang pagtulon-an. Sa ulahi, daghang Hudiyong saserdote ang nahimong tinun-an ug nahimong sakop sa kongregasyon.​—Buh. 5:27, 28; 6:7.

⁷ Si Jesus miingon: “Kamo mahimong akong mga saksi sa Jerusalem, sa tibuok Judea ug Samaria, ug hangtod sa kinalay-ang bahin sa yuta.” (Buh. 1:8) Ug dihang nahitabo ang dakong paglutos sa Jerusalem human mamatay si Esteban, ang mga tinun-an nga namuyo didto nagkatibulaag sa tibuok Judea ug Samaria. Pero bisag asa sila, nagpadayon sila sa pagsangyaw sa maayong balita ug paghimog mas daghang tinun-an, apil niini ang pipila ka Samarianhon. (Buh. 8:1-13) Sa ulahi, ang maayong balita gisangyaw sab ngadto sa mga dili tinuli, mga tawong dili Hudiyo. (Buh. 10:1-48) Ingong resulta, midaghan ang mga tinun-an ug natukod ang bag-ong mga kongregasyon sa ubang lugar, dili lang sa Jerusalem.​—Buh. 11:19-21; 14:21-23.

⁸ Unsay gihimong kahikayan aron maseguro nga ang matag bag-ong natukod nga kongregasyon maorganisar ug madumala sa teokratikanhong paagi? Pinaagi sa paggiya sa espiritu sa Diyos, gihimo ang kahikayan nga may mga magbalantay nga moatiman sa panon. Si Pablo ug Bernabe nagtudlog mga ansiyano sa mga kongregasyon nga ilang gibisita sa ilang unang misyonaryong panaw. (Buh. 14:23) Ang magsusulat sa Bibliya nga si Lucas naghisgot bahin sa pagpakig-estorya ni Pablo sa mga ansiyano sa kongregasyon sa Efeso. Si Pablo miingon kanila: “Tagda ang inyong kaugalingon ug ang tibuok panon, nga niana kamo gitudlo sa balaang espiritu nga mga tigdumala, aron magbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.” (Buh. 20:17, 28) Kuwalipikado sila nga mahimong ansiyano kay nakab-ot nila ang Kasulatanhong mga kuwalipikasyon. (1 Tim. 3:1-7) Ang isigkamagbubuhat ni Pablo nga si Tito giawtorisahan sa pagtudlog mga ansiyano sa mga kongregasyon sa Creta.​—Tito 1:5.

⁹ Samtang nagkadaghan ang natukod nga kongregasyon, ang mga apostoles ug mga ansiyano sa Jerusalem padayong nag-alagad ingong pangunang mga tigdumala sa nagkadako nga Kristohanong kongregasyon sa lainlaing nasod niadtong unang siglo. Sila nag-alagad ingong nagamandong lawas niini.

¹⁰ Sa sulat ni apostol Pablo sa kongregasyon sa Efeso, gipatin-aw niya nga aron padayong magkahiusa ang Kristohanong kongregasyon, kinahanglan silang mosunod sa giya sa espiritu sa Diyos pinaagi sa pagpasakop sa pagkaulo ni Jesu-Kristo. Giawhag ni Pablo ang mga Kristohanon didto nga ugmaron ang pagkamapainubsanon ug huptan “ang panaghiusa” pinaagi sa pagbaton ug malinawong relasyon sa tanan diha sa kongregasyon. (Efe. 4:1-6) Dayon iyang gikutlo ang Salmo 68:18 ug giaplikar kana sa tagana ni Jehova nga kuwalipikadong mga lalaki nga mag-alagad sa kongregasyon ingong mga apostoles, propeta, tig-ebanghelyo, magbalantay, ug magtutudlo. Ingong gasa gikan kang Jehova, ang maong mga lalaki magpalig-on sa tibuok kongregasyon aron kini mohamtong sa espirituwal ug kini makapalipay sa Diyos.​—Efe. 4:7-16.

ANG MGA KONGREGASYON KARON NAGSUNOD SA PAAGI SA MGA APOSTOLES

¹¹ Ang tanang kongregasyon sa mga Saksi ni Jehova karon nagsunod sa samang paagi sa pag-organisar. Kini nga mga kongregasyon nahiusa ingong tibuok kalibotang kongregasyon nga ang nanguna maoy mga dinihogan sa espiritu. (Zac. 8:23) Kini gipaposible ni Jesu-Kristo. Gituman niya ang iyang saad nga siya mounong sa iyang dinihogang mga tinun-an “sa tanang adlaw hangtod sa hinapos sa sistema sa mga butang.” Kadtong nahimong sakop sa mauswagong kongregasyon midawat sa maayong balita sa Diyos, kinabubut-ong nagpahinungod sa ilang kinabuhi kang Jehova, ug nagpabawtismo ingong mga tinun-an ni Jesus. (Mat. 28:19, 20; Mar. 1:14; Buh. 2:41) Ilang giila “ang maayong magbalantay,” si Jesu-Kristo, ingong Ulo sa tibuok panon, nga gilangkoban sa dinihogang mga Kristohanon ug sa “ubang mga karnero.” (Juan 10:14, 16; Efe. 1:22, 23) Ang maong “usa ka panon” padayong nagkahiusa pinaagi sa pag-ila kanunay sa pagkaulo sa Kristo ug sa pagpasakop sa iyang gitudlo nga manguna sa organisasyon, ang “matinumanon ug maalamong ulipon.” Hinaot padayon natong ipakita ang atong bug-os nga pagsalig sa gitudlong manguna sa organisasyon karon.​—Mat. 24:45.

ANG PAPEL SA LEGAL NGA MGA KORPORASYON

¹² Aron matagana ang espirituwal nga pagkaon sa hustong panahon ug masangyaw ang maayong balita sa Gingharian sa dili pa moabot ang kataposan, gitukod ang pipila ka korporasyon. Kining legal nga mga korporasyon giila sa mga gobyerno sa lainlaing nasod ug dunay kooperasyon sa usag usa. Kini nga mga korporasyon nakatabang nga masangyaw ang maayong balita sa tibuok kalibotan.

PAG-ORGANISAR SA SANGANG BUHATAN

¹³ Dihang magtukod ug sangang buhatan, ang Nagamandong Lawas magtudlog tulo o kapin pa nga mga ansiyano nga mahimong Komite sa Sangang Buhatan sa pagdumala sa buluhaton diha sa nasod o mga nasod nga sakop sa maong sangang buhatan. Ang usa ka membro niini nga komite mag-alagad ingong koordinetor sa Komite sa Sangang Buhatan.

¹⁴ Ang lokal nga mga kongregasyon nga sakop sa usa ka sangang buhatan organisahon ingong mga sirkito. Lainlaig gidak-on ang mga sirkito, depende sa lugar ug pinulongan ingon man sa gidaghanon sa kongregasyon diha sa teritoryong sakop sa sangang buhatan. Usa ka tigdumala sa sirkito ang itudlo nga mag-alagad sa mga kongregasyon sa matag sirkito. Ang sangang buhatan maghatag sa tigdumala sa sirkito ug mga instruksiyon kon unsaon niya paghimo ang iyang asaynment.

¹⁵ Ang mga kongregasyon nagsunod sa mga kahikayan sa organisasyon nga gihimo para sa kaayohan sa tanan. Ilang dawaton ang kahikayan sa pagtudlog mga ansiyano nga nagdumala sa buluhaton sa mga sangang buhatan, sirkito, ug kongregasyon. Sila may pagsalig sa matinumanon ug maalamong ulipon sa pagtaganag espirituwal nga pagkaon sa hustong panahon. Sa susama, ang matinumanong ulipon karon bug-os nga nagpasakop sa pagkaulo sa Kristo, nagsunod sa mga prinsipyo sa Bibliya, ug nagpagiya sa balaang espiritu. Samtang magkahiusa ta sa pagtuman sa mga buluhaton, maeksperyensiyahan nato ang nasinatian sa mga Kristohanon sa unang siglo: “Ang mga kongregasyon padayon gayong nalig-on diha sa pagtuo ug nagkadako kini adlaw-adlaw.”​—Buh. 16:5.