“Himoa ang Tanan Alang sa Kahimayaan sa Diyos”

INGONG dedikadong mga alagad sa Diyos, obligado ta sa pagpasundayag sa himaya ni Jehova diha sa atong sinultihan ug binuhatan. Gipahayag ni apostol Pablo ang prinsipyo nga makatabang bahin niini dihang siya misulat: “Kon kamo magkaon o mag-inom o magbuhat ug bisan unsa, himoa ang tanan alang sa kahimayaan sa Diyos.” (1 Cor. 10:31) Apil niini ang atong pagsunod sa matarong nga mga sukdanan ni Jehova, nga repleksiyon sa iyang hingpit nga personalidad. (Col. 3:10) Busa kinahanglang sundogon nato ang Diyos, ingong balaang katawhan.​—Efe. 5:1, 2.

² Gipasiugda kini ni apostol Pedro ngadto sa mga Kristohanon dihang siya misulat: “Ingong masinugtanong mga anak, ayaw na mog pahiuyon sa inyong kanhing mga tinguha dihang wala pa moy kahibalo, apan sama sa Balaang Usa nga nagtawag kaninyo, magmabalaan kamo sa tanan ninyong panggawi, kay nasulat: ‘Magmabalaan mo, kay ako balaan.’” (1 Ped. 1:14-16) Sama sa karaang Israel, ang tanan sa Kristohanong kongregasyon kinahanglang magpabiling balaan. Kini nagpasabot nga sila magpabiling walay mansa, nga wala maimpluwensiyahi sa makasasala ug kalibotanon nga mga buhat. Busa sila gilain para sa sagradong pag-alagad.​—Ex. 20:5.

³ Ang pagkabalaan mamentinar pinaagi sa pagsunod sa mga balaod ug prinsipyo ni Jehova nga klarong gipadayag sa Balaang Kasulatan. (2 Tim. 3:16) Pinaagi sa pagtuon sa Bibliya, kita natudloan bahin kang Jehova ug sa iyang mga paagi, ug kita nasuod kaniya. Ang atong pagtuon nakapakombinsir nato nga kinahanglang unahon nato pagpangita ang Gingharian sa Diyos ug himoon ang kabubut-on ni Jehova ingong pinakaimportante sa atong kinabuhi. (Mat. 6:33; Roma 12:2) Kini nagpasabot nga kinahanglang isul-ob nato ang bag-ong personalidad.​—Efe. 4:22-24.

ESPIRITUWAL UG MORAL NGA KAHINLO

⁴ Ang pagsunod sa matarong nga mga sukdanan ni Jehova dili kanunayng sayon. Ang atong kaaway, si Satanas nga Yawa, naningkamot nga mobiya ta sa kamatuoran. Usahay malisdan ta tungod sa daotang mga impluwensiya niining kalibotana ug sa atong pagkadili-hingpit. Ang pagtuman sa atong dedikasyon nagpasabot nga kinahanglan tang makigbugno sa espirituwal nga paagi. Ang Kasulatan nag-ingon nga dili ta angayng matingala dihang makaatubang tag mga pagsupak o pagsulay. Makasinati gyod tag mga pag-antos tungod sa pagkamatarong. (2 Tim. 3:12) Magmalipayon ta bisag nagsagubang ug mga pagsulay, kay nahibalo ta nga ang maong mga pagsulay maoy pamatuod nga atong ginabuhat ang kabubut-on sa Diyos.​—1 Ped. 3:14-16; 4:12, 14-16.

⁵ Bisag hingpit si Jesus, nakat-onan niya ang pagkamasinugtanon gikan sa mga butang nga iyang giantos. Wala gyod siya magpadaog sa mga tentasyon ni Satanas o magtinguhag kalamposan sa kalibotan. (Mat. 4:1-11; Juan 6:15) Wala gyod sukad maghunahuna si Jesus sa pagkompromiso. Bisag gidumtan siya sa kalibotan tungod sa iyang pagkamatinumanon, gituman niya ang matarong nga mga sukdanan ni Jehova. Una siya mamatay, gipasidan-an ni Jesus ang iyang mga tinun-an nga ang kalibotan magdumot sab kanila. Sukad niadto, ang mga sumusunod ni Jesus nakasinatig kasakitan, pero sila nagmaisogon kay nahibalo sila nga gidaog na sa Anak sa Diyos ang kalibotan.​—Juan 15:19; 16:33; 17:16.

⁶ Aron dili ta mahimong bahin sa kalibotan, kinahanglan natong ituboy ug tumanon ang matarong nga mga sukdanan ni Jehova, sama sa gihimo sa atong Agalon. Gawas nga dili ta makiglabot sa mga isyu sa politika ug sa katilingban, kinahanglang suklan nato ang ubos kaayo nga moralidad sa kalibotan. Kinahanglang sundon gyod nato ang tambag sa Santiago 1:21: “Isalikway ang tanang kahugawan ug ang matag lama sa pagkadaotan, ug mapainubsanong dawata ang pagpatisok sa pulong nga makaluwas kaninyo.” Pinaagi sa pagtuon ug pagtambong sa mga tigom, ‘matisok ang pulong’ sa kamatuoran diha sa atong hunahuna ug kasingkasing, ug dili gyod ta magtinguha sa gitanyag sa kalibotan. Ang tinun-ang si Santiago misulat: “Wala ba mo mahibalo nga ang pagpakighigala sa kalibotan maoy pagpakig-away sa Diyos? Busa bisan kinsa nga buot makighigala sa kalibotan maghimo sa iyang kaugalingon nga kaaway sa Diyos.” (Sant. 4:4) Tungod niini, ang Bibliya naghatag kanatog bug-at nga tambag sa pagsunod sa matarong nga mga sukdanan ni Jehova ug sa pagpabiling bulag sa kalibotan.

⁷ Ang Pulong sa Diyos nagpasidaan kanato nga likayan ang makauulaw ug imoral nga paggawi. Kini nag-ingon: “Ang seksuwal nga imoralidad ug ang tanang matang sa kahugawan o kahakog dili ninyo angayng hisgotan, kay dili kini angay sa mga balaan.” (Efe. 5:3) Busa kinahanglang dili nato tugotan nga padayon tang maghunahuna sa mga butang nga law-ay, makauulaw, o daotan, ug dili gyod nato tugotan nga mahisgotan kini sa atong mga panag-estoryahay. Ang paghimo niini magpakita nga gusto natong sundon ang hinlo ug matarong nga mga sukdanan ni Jehova sa moralidad.

PISIKAL NGA KAHINLO

⁸ Gawas pa sa espirituwal ug moral nga kahinlo, giila sab sa mga Kristohanon ang kahinungdanon sa pisikal nga kahinlo. Sa karaang Israel, ang balaang Diyos nagsugo nga kinahanglang hinlo kanunay ang kampo. Kita sab kinahanglang hinlo aron ‘walay makitang dili maayo’ si Jehova kanato.​—Deut. 23:14.

⁹ Sa Bibliya, ang pagkabalaan konektado sa pisikal nga kahinlo. Pananglitan, si Pablo misulat: “Mga hinigugma, . . . hinloan nato ang atong kaugalingon sa tanang kahugawan sa unod ug espiritu, aron mahimo tang mas balaan samtang nahadlok ta sa Diyos.” (2 Cor. 7:1) Busa ang tanang Kristohanon kinahanglang maningkamot nga kanunayng hinlo ang ilang lawas pinaagi sa regular nga pagligo ug paglaba sa ilang sinina. Bisag dili parehas ang kahimtang sa matag nasod, sagad duna ra tay magamit nga sabon ug tubig aron kanunayng hinlo ang atong lawas ug ang atong mga anak.

¹⁰ Tungod sa atong buluhatong pagsangyaw, kita sagad nailhan diha sa komunidad nga atong gipuy-an. Ang kahinlo ug kahapsay sa balay, sa sulod ug gawas, makahatag nag pamatuod sa mga silingan. Dunay ikatabang ang matag membro sa pamilya sa paghimo niini. Ang mga brader angayng maghatag ug pagtagad sa puy-anan ug sa palibot niini, kay ang hinlong tugkaran ug hapsay nga puy-anan makahatag ug maayong impresyon sa uban. Ang paghimo niini, apil ang ilang pagpanguna sa espirituwal nga kalihokan, magpamatuod nga ang mga ulo sa pamilya nagdumala sa ilang panimalay sa maayong paagi. (1 Tim. 3:4, 12) Ang mga sister sab dunay responsibilidad sa pag-atiman sa mga buluhaton, ilabina sa sulod sa balay. (Tito 2:4, 5) Ang nabansay pag-ayong mga anak mohimo sab sa ilang bahin pinaagi sa pag-atiman sa ilang kaugalingon ingon man sa ilang kuwarto nga magpabiling hinlo ug hapsay. Busa ang tibuok pamilya magtinabangay sa pag-ugmad ug maayong batasan sa kahinlo nga haom sa bag-ong kalibotan ubos sa Gingharian sa Diyos.

¹¹ Daghang alagad ni Jehova karon dunay kaugalingong sakyanan nga gamiton sa pagtambong sa mga tigom. Sa ubang lugar, ang sakyanan kinahanglanon kaayo sa ministeryo. Kinahanglang kanunay ning hinlo ug maayog kondisyon. Ang atong balay ug sakyanan kinahanglang makahatag ug pamatuod nga kita bahin sa hinlo ug balaang katawhan ni Jehova. Kini nga prinsipyo mapadapat sab sa atong bag nga pangsangyaw ug Bibliya.

¹² Ang atong sininaan ug pamostura kinahanglang subay sa mga prinsipyo sa Diyos. Dili nato gusto nga moatubang sa prominenteng tawo kon ang atong sinina nagkagidlay o kaswal ra kaayo. Labaw na gyod tang magbantay sa atong sininaan ug pamostura dihang magrepresentar ta kang Jehova diha sa ministeryo o sa plataporma! Ang atong pamostura ug mga estilo sa sinina makaapektar sa panglantaw sa uban bahin sa pagsimba kang Jehova. Dili gyod maayo kon dili ta desente o dili magmahunahunaon sa uban. (Miq. 6:8; 1 Cor. 10:31-33; 1 Tim. 2:9, 10) Busa dihang mangandam ta sa pagsangyaw o pagtambong sa mga tigom, sirkitong asembliya, o kombensiyon, kinahanglan natong hinumdoman ang giingon sa Kasulatan bahin sa pisikal nga kahinlo ug desenteng panagway. Gusto nato nga kanunayng pasidunggan ug himayaon si Jehova.

¹³ Mapadapat sab kini dihang mobisita ta sa tibuok kalibotang hedkuwarter o sa usa sa mga sangang buhatan sa mga Saksi ni Jehova. Hinumdomi nga ang ngalang Bethel nagkahulogang “Balay sa Diyos.” Busa kinahanglang ang atong sininaan ug panggawi sama ra dihang motambong ta sa mga tigom sa Kingdom Hall.

¹⁴ Bisan sa dihang maglingawlingaw, hunahunaon sab nato ang atong sininaan ug pamostura. Pangutan-a ang kaugalingon, ‘Maulaw ba kong mosangyaw sa impormal nga paagi tungod sa akong sininaan?’

MAAYONG MATANG SA KALINGAWAN

¹⁵ Ang pahulay ug kalingawan gikinahanglan aron magpabilin tang balanse ug maayog panglawas. Kas-a, gidapit ni Jesus ang iyang mga tinun-an sa pagkuyog kaniya ngadto sa mingawng dapit aron “makapahulay kadiyot.” (Mar. 6:31) Ang pagpahulay ug maayong matang sa kalingawan makaparelaks nato ug makatabang nga makapadayon ta sa naandang kalihokan.

¹⁶ Kay daghan ang matang sa kalingawan karon, ang mga Kristohanon angayng magpakitag diyosnong kaalam dihang mamilig mga kalingawan. Bisag ang paglingawlingaw mapuslanon, dili kini ang pinakaimportante sa kinabuhi. Gipasidan-an ta nga sa “kataposang mga adlaw,” ang mga tawo “mahigugmaon sa kalipayan imbes mahigugmaon sa Diyos.” (2 Tim. 3:1, 4) Daghan sa giisip nga kalingawan ang dili dalawaton niadtong gustong mosunod sa matarong nga mga sukdanan ni Jehova.

¹⁷ Ang mga Kristohanon sa unang siglo kinahanglang maningkamot nga dili maimpluwensiyahan sa ilang palibot nga mahigugmaon sa kalipayan. Sa teatro sa Roma, ang mga nanambong nalingaw sa pagtan-aw nga nag-antos ang uban. Ang pagkabayolente, pag-ulag dugo, ug seksuwal nga imoralidad gipasundayag aron malingaw ang mga tawo, pero ang mga Kristohanon sa unang siglo naglikay nianang mga butanga. Daghang kalingawan sa kalibotan karon ang nagpasiugda sab sa samang mga butang ug gidisenyo aron sugnoran ang daotang inklinasyon sa tawo. Kinahanglan tang ‘magbantay pag-ayo’ sa atong paggawi, nga magpalayo sa kalingawan nga makadaot sa moralidad. (Efe. 5:15, 16; Sal. 11:5) Ug bisan tuod wala ray daotan sa usa ka kalingawan, basin ang katibuk-ang kahimtang dili dalawaton.​—1 Ped. 4:1-4.

¹⁸ Dunay maayong mga matang sa kalingawan nga puwedeng himoon sa mga Kristohanon. Daghan ang nakabenepisyo sa pagsunod sa tambag sa Kasulatan ug sa balanseng mga sugyot nga makita sa atong mga publikasyon.

¹⁹ Usahay, puwede tang mangimbitar sa pipila ka pamilya para sa Kristohanong panag-ubanay. O ang mga brader ug sister tingali imbitahon alang sa usa ka salosalo sa kasal o susamang okasyon. (Juan 2:2) Responsibilidad sa nangimbitar kon unsay mahitabo sa maong okasyon. Klaro nga kinahanglang magmabinantayon dihang dagkong grupo ang magtapoktapok. Ang relaks nga setting sa tapoktapok nahimong hinungdan nga ang uban migawi na nga dili haom sa usa ka Kristohanon, nga nagpatuyang na sa pagkaon ug pag-inom ug nakahimo pa ganig ubang seryosong sala. Tungod niini, nakita sa maalamong mga Kristohanon nga maayong limitahan ang gidak-on ug gidugayon sa maong mga tapoktapok. Kon dunay idalit nga alkoholikong ilimnon, kinahanglang dili palabian ang pag-inom niini. (Filip. 4:5) Kon himoon ang tanan aron maseguro nga ang mga tapoktapok mahimong mapuslanon ug makapalig-on sa espirituwal, ang pagkaon ug ilimnon dili mahimong pinakaimportanteng butang.

²⁰ Dalayegon gyod ang pagkamaabiabihon. (1 Ped. 4:9) Dihang mangimbitar tag mga igsoon sa atong balay aron mangaon, mag-snack, magrelaks, ug magtapoktapok, dili nato kalimtan kadtong makaluluoy ug kahimtang. (Luc. 14:12-14) Kon giimbitar ta sa maong mga okasyon, ang atong panggawi kinahanglang uyon sa tambag sa Marcos 12:31. Maayo gyod nga magpakita tag apresasyon sa pagkamaayo sa uban.

²¹ Ang mga Kristohanon nalipay gyod sa dagayang regalo sa Diyos ug sa pagkahibalo nga sila mahimong “mokaon ug moinom ug malipay sa tanan [nilang] paghago.” (Eccl. 3:12, 13) Kon atong ‘himoon ang tanan alang sa kahimayaan sa Diyos,’ ang mga nangimbitar ingon man ang mga bisita malipay sa paghinumdom sa maong mga tapoktapok kay sila napalig-on sa espirituwal.

MGA KALIHOKAN SA ESKUWELAHAN

²² Ang mga anak sa mga Saksi ni Jehova makabenepisyo sa pangunang sekular nga edukasyon. Sa ilang pag-eskuwela, interesado silang mahanas sa pagbasa ug pagsulat. Ang ubang subject nga gitudlo sa eskuwelahan makatabang nila samtang nangab-ot silag espirituwal nga mga tumong. Samtang mag-eskuwela, maayong maningkamot sila sa ‘paghinumdom sa ilang Dakong Maglalalang’ pinaagi sa pag-una sa espirituwal nga mga butang.​—Eccl. 12:1.

²³ Kon ikaw usa ka Kristohanong batan-on nga nag-eskuwela, likayi ang wala kinahanglanang pagpakig-uban sa kalibotanong mga batan-on. (2 Tim. 3:1, 2) Kay si Jehova nagtagana sa gikinahanglang proteksiyon, dako kag mahimo sa paglikay sa kalibotanong mga impluwensiya. (Sal. 23:4; 91:1, 2) Busa aron mapanalipdan ang imong kaugalingon, pahimusli ang mga tagana ni Jehova.​—Sal. 23:5.

²⁴ Aron magpabiling bulag sa kalibotan samtang nag-eskuwela, kadaghanang batan-ong Saksi dili moapil sa ekstrakurikular nga mga kalihokan. Lagmit dili kini masabtan sa mga klasmet ug titser. Pero ang paglipay sa Diyos mao ang importante. Kini nagpasabot nga gamiton nimo ang imong konsensiya nga nabansay sa Bibliya ug magmadeterminado nga dili malangkit sa kalibotanong mga kompetisyon o sa nasyonalismo. (Gal. 5:19, 26) Pinaagi sa pagpamati sa Kasulatanhong tambag sa Kristohanong mga ginikanan ug pagpahimulos sa maayong pakig-uban diha sa kongregasyon, kamong mga batan-on makasunod sa matarong nga mga sukdanan ni Jehova.

SEKULAR NGA TRABAHO UG MGA KAUBAN

²⁵ Ang mga ulo sa pamilya dunay Kasulatanhong obligasyon sa pagtagana para sa ilang panimalay. (1 Tim. 5:8) Bisan pa niana, ingong mga ministro, giila nila nga ang ilang sekular nga trabaho ikaduha lang sa intereses sa Gingharian. (Mat. 6:33; Roma 11:13) Pinaagi sa pagpakitag debosyon sa Diyos ug pagkakontento nga sila dunay makaon ug masul-ob, ilang malikayan ang mga kabalaka ug lit-ag sa materyalistikong pagkinabuhi.​—1 Tim. 6:6-10.

²⁶ Angayng hinumdoman kanunay sa tanang Kristohanong nanarbaho ang mga prinsipyo sa Kasulatan. Ang matinud-anong panginabuhi nagpasabot nga likayan natong maapil sa mga buhat nga naglapas sa balaod sa Diyos o sa gobyerno. (Roma 13:1, 2; 1 Cor. 6:9, 10) Gihinumdoman nato kanunay ang kapeligrohan sa daotang pakig-uban. Ingong mga sundalo sa Kristo, likayan nato ang mga negosyo nga supak sa mga sukdanan sa Diyos, makakompromiso sa Kristohanong neyutralidad, o makadaot sa espirituwalidad. (Isa. 2:4; 2 Tim. 2:4) Ug dili nato tugotan nga duna tay koneksiyon sa “Bantogang Babilonya,” ang imperyo sa bakak nga relihiyon nga kaaway sa Diyos.​—Pin. 18:2, 4; 2 Cor. 6:14-17.

²⁷ Ang pagsunod sa matarong nga mga sukdanan sa Diyos magpalihok nato nga dili pahimuslan ang atong Kristohanong panag-ubanay aron maghisgot ug negosyo o uban pang personal nga interes. Ang katuyoan sa atong pagpakig-uban sa mga igsoon panahon sa Kristohanong mga tigom, asembliya, ug kombensiyon maoy para lang gyod sa pagsimba kang Jehova. Kita nagkaon sa iyang espirituwal nga lamesa ug nalipay sa ‘pagdinasigay’ sa usag usa. (Roma 1:11, 12; Heb. 10:24, 25) Espirituwal nga mga butang lang ang angayng hisgotan sa maong panag-ubanay.

NAGKAHIUSA INGONG MGA KRISTOHANON

²⁸ Agig pagsunod sa matarong nga mga sukdanan ni Jehova, ang iyang katawhan kinahanglan sab nga “makigdinaitay aron mamentinar ang panaghiusa nga [ilang] nabatonan pinaagi sa balaang espiritu.” (Efe. 4:1-3) Imbes pahimut-an ang kaugalingon, ang matag usa magtinguha sa pagbuhat ug maayo alang sa uban. (1 Tes. 5:15) Seguradong kini nga tinamdan ang imong nakita sa inyong kongregasyon. Bisag unsa pay atong rasa, nasyonalidad, kahimtang sa katilingban, panginabuhi, o natapos nga edukasyon, kitang tanan gigiyahan sa samang matarong nga mga sukdanan. Bisan ang mga dili Saksi nakaobserbar niining talagsaong tinamdan sa katawhan ni Jehova.​—1 Ped. 2:12.

²⁹ Aron ipasiugdag dugang ang basehanan sa panaghiusa, si apostol Pablo misulat: “Adunay usa ka lawas, ug usa ka espiritu, sama nga dunay usa ka paglaom nga alang niini kamo gitawag; usa ka Ginoo, usa ka pagtuo, usa ka bawtismo; usa ka Diyos ug Amahan sa tanan, nga labaw sa tanan ug nagalihok pinaagi sa tanan ug anaa sa tanan.” (Efe. 4:4-6) Sa ato pa, kinahanglang magkahiusa ta sa pagsabot sa pangunang mga doktrina sa Bibliya ug sa mas lawom nga mga pagtulon-an sa Bibliya ingong pag-ila sa pagkasoberano ni Jehova. Sa pagkatinuod, si Jehova naghatag sa iyang katawhan ug putling pinulongan sa kamatuoran maong sila nagkahiusa sa pag-alagad kaniya.​—Sof. 3:9.

³⁰ Ang panaghiusa ug pakigdait sa Kristohanong kongregasyon maoy tinubdan sa kadasig sa tanang nagsimba kang Jehova. Atong naeksperyensiyahan ang katumanan sa saad ni Jehova: “Hiusahon nako sila, sama sa mga karnero diha sa toril.” (Miq. 2:12) Gusto natong huptan kanunay ang maong malinawong panaghiusa pinaagi sa pagsunod sa matarong nga mga sukdanan ni Jehova.

³¹ Malipayon kadtong gidawat nga mahimong bahin sa hinlong kongregasyon ni Jehova! Ang atong kadungganan nga tawgon sa ngalan ni Jehova dili kabayran sa bisan unsang sakripisyo nga atong gihimo. Samtang atong huptan ang atong bililhong relasyon kang Jehova, maningkamot tang masunod ang iyang matarong nga mga sukdanan ug ipaila kini sa uban.​—2 Cor. 3:18.