Panapos nga Panaghisgot Uban sa mga Kandidato sa Bawtismo

Ang mga bawtismo kasagarang himoon panahon sa mga asembliya ug kombensiyon sa mga Saksi ni Jehova. Sa konklusyon sa pakigpulong sa bawtismo, hangyoon sa mamumulong ang mga kandidato sa bawtismo sa pagtindog ug pagtubag niining duha ka pangutana sa kusog nga tingog:

1. Naghinulsol ka na ba sa imong mga sala, gipahinungod ang imong kinabuhi kang Jehova, ug gidawat ang iyang paagi sa pagluwas pinaagi ni Jesu-Kristo?

2. Imo bang nasabtan nga ang imong bawtismo magpaila kanimo nga ikaw usa na ka Saksi ni Jehova ug bahin na ka sa organisasyon ni Jehova?

Ang positibong tubag sa mga kandidato sa bawtismo niini nga mga pangutana maoy “pagpahayag sa pagtuo ngadto sa uban” nga sila nagtuo sa lukat ug bug-os nang nagdedikar, o nagpahinungod, sa ilang kaugalingon kang Jehova. (Roma 10:9, 10) Ang mga kandidato sa bawtismo mag-ampo ug mamalandong daan niining mga pangutanaha aron sila makahatag ug tubag nga uyon sa ilang personal nga pagtuo.

Imo na bang gidedikar ang imong kaugalingon kang Jehova pinaagi sa pag-ampo, nga nagsaad nga siya lang ang imong simbahon ug himoon nimong pinakaimportante sa imong kinabuhi ang pagbuhat sa iyang kabubut-on?

Ikaw ba bug-os nang kombinsido nga magpabawtismo sa labing madaling panahon?

Unsay angayng isul-ob panahon sa bawtismo? (1 Tim. 2:9, 10; Juan 15:19; Filip. 1:10)

Angayng makita diha sa atong sininaan nga kita dunay “pagtahod sa kaugalingon ug sa uban ug maayong panghunahuna” aron madayag ang atong “debosyon sa Diyos.” Busa kadtong bawtismohan dili magsul-ob ug seksi kaayong sinina nga pangkaligo nga makita ang pribadong parte sa lawas. Dili sab angayng magsul-ob ug sinina nga naay hulagway, panultihon, o slogan. Ang ilang sininaan angayng hapsay, hinlo, may dignidad, ug haom sa okasyon.

Unsay angayng panggawi sa usa dihang magpabawtismo? (Luc. 3:21, 22)

Ang bawtismo ni Jesus mao ang panig-ingnan sa Kristohanong bawtismo karon. Iyang nasabtan nga ang bawtismo maoy seryosong lakang, ug makita kini diha sa iyang tinamdan ug binuhatan. Busa sa lugar diin himoon ang bawtismo, dili angay nga ang usa magpasiaw, magduladula, maglangoylangoy, o mobuhat ug bisan unsa nga makadaot sa kaseryoso sa okasyon. Ang bag-ong nabawtismohan dili pod angayng mogawi nga daw nakaangkon ug kadaogan. Bisan tuod ang bawtismo usa ka malipayong okasyon, ang maong kalipay angayng ipahayag sa paagi nga may dignidad.

Sa unsang paagi ang regular nga pagtambong sa mga tigom ug pagpakig-uban sa kongregasyon makatabang nimo sa pagtuman sa imong dedikasyon kang Jehova?

Human sa imong bawtismo, nganong importante nga ipadayon nimo ang imong maayong eskedyul sa personal nga pagtuon ug regular nga pagpakigbahin sa ministeryo?

MGA INSTRUKSIYON ALANG SA MGA ANSIYANO SA KONGREGASYON

Dihang ipahibalo sa dili bawtismadong magmamantala nga gusto na siyang magpabawtismo, kinahanglang dasigon siya sa pagrepaso sa “Mga Pangutana Alang sa Gustong Magpabawtismo” nga makita sa panid 185-207 niini nga libro. Ipabasa kaniya ang “Mensahe Alang sa Dili Bawtismadong Magmamantala,” sugod sa panid 182, nga naghisgot kon unsaon niya pagpangandam alang sa panaghisgot uban sa mga ansiyano. Panahon sa panaghisgot, puwedeng gamiton sa potensiyal nga kandidato sa bawtismo ang iyang personal nga mga nota ug ablihan kini nga libro. Pero dili kinahanglan nga dunay morepaso niya sa mga pangutana sa dili pa siya rebyohon sa mga ansiyano.

Kon ang usa gustong magpabawtismo, angay niya kining ipahibalo sa koordinetor sa mga ansiyano. Human mabasa niadtong mihangyo nga magpabawtismo ang “Mga Pangutana Alang sa Gustong Magpabawtismo,” pangutan-on siya sa koordinetor sa mga ansiyano kon gidedikar na ba niya ang iyang kaugalingon kang Jehova pinaagi sa pag-ampo aron buhaton ang Iyang kabubut-on. Kon gidedikar na niya ang iyang kaugalingon, ang koordinetor mag-asayn ug duha ka ansiyano nga makighisgot uban sa potensiyal nga kandidato sa bawtismo. Ilang hisgotan uban kaniya ang “Mga Pangutana Alang sa Gustong Magpabawtismo.” Importante nga ang ansiyano nga giasayn sa pagdumala sa Bahin 1 dili mao ang modumala sa Bahin 2. Dili kinahanglang hulaton nga mahibaloan una ang eskedyul sa asembliya o kombensiyon ayha siya rebyohon.

Ang duha ka bahin kasagarang kobrehan sa duha ka sesyon. Ang matag sesyon sagad dangtan ug mga usa ka oras, pero puwede ra pod nga mogahin ug dugang nga panahon kon gikinahanglan. Ang kada sesyon kinahanglang sugdan ug taposon pinaagi sa pag-ampo. Ang kandidato o mga ansiyano dili angayng magdalidali sa pagkonsiderar sa mga pangutana. Ang mga ansiyano nga giasayn sa pagdumala sa panaghisgot maningkamot nga himoon kining prayoridad sa ilang eskedyul.

Kasagarang mas maayo nga himoon ang pagrebyo sa mga pangutana ngadto sa indibiduwal nga kandidato, dili grupo sa mga kandidato. Pinaagi sa tubag sa kandidato sa matag pangutana, matino sa mga ansiyano kon unsa ka lawom ang iyang pagsabot sa kamatuoran sa Bibliya ug maseguro kon siya ba kuwalipikado na sa bawtismo. Dugang pa, kon indibiduwal ang pagrepaso, dili magpanuko ang kandidato sa paghatag sa iyang tubag. Ang magtiayon puwedeng dungan nga repasohon.

Kon babaye ang kandidato sa bawtismo, himoon sa ansiyano ang pagrebyo nga makita silang duha, pero dili ra madunggan sa uban. Kon kinahanglang magpauban ug usa pa nga moduyog sa pagrebyo, kinahanglan nga ang iuban usa ka ansiyano o ministeryal nga alagad, depende sa seksiyon nga hisgotan sa rebyo, sumala sa makita sa sunod parapo.

Sa kongregasyon nga diyutay rag ansiyano, ang kuwalipikadong ministeryal nga alagad nga dunay maayong panghukom ug katakos sa pag-ila makahimo sa pagrebyo sa mga kandidato sa mga pangutana para sa bawtismo nga makita sa “Bahin 1: Kristohanong mga Pagtulon-an.” Mga ansiyano lang ang angayng modumala sa “Bahin 2: Kristohanong Pagkinabuhi.” Kon ang kongregasyon kulang ug kuwalipikadong mga brader, ang tigdumala sa sirkito mahimong kontakon aron susihon kon duna bay makatabang nga mga ansiyano sa duol nga kongregasyon.

Kon ang kandidato sa bawtismo menor de edad, ang iyang magtutuo nga (mga) ginikanan kinahanglang presente sa mga sesyon. Kon wala ang (mga) ginikanan, kinahanglang naay duha ka ansiyano (o ansiyano ug ministeryal nga alagad, depende sa seksiyon nga hisgotan sa rebyo) ang presente sa matag sesyon.

Angayng tinoon sa mga ansiyano nga kadtong gustong magpabawtismo dunay igong pagsabot sa pangunang mga pagtulon-an sa Bibliya. Tinoon sab nila kon gipabilhan ba gyod niya ang kamatuoran ug kon nagpakita ba siyag hustong pagtahod sa organisasyon ni Jehova. Kon siya wala makasabot sa pangunang mga pagtulon-an sa Bibliya, hikayon sa mga ansiyano nga matabangan siya aron mokuwalipikar sa bawtismo sa sunod higayon. Ang uban tingali kinahanglang hatagan pag panahon nga mas mapabilhan nila ang buluhatong pagsangyaw o ang pagpasakop sa mga kahikayan sa organisasyon. Depende na sa mga ansiyano kon unsaon pagbahin sa usa ka oras o kapin pa alang sa matag sesyon aron matino gyod nila kon ang usa andam na ba alang sa bawtismo. Bisan pag magkalahi ang gidugayon sa panahon nga igahin sa matag pangutana, kinahanglang repasohon gihapon ang tanang pangutana.

Ang mga ansiyano nga giasayn sa pagrepaso sa mga pangutana magmiting human sa ikaduhang sesyon ug magdesisyon kon ang kandidato kuwalipikado ba sa bawtismo o dili. Angayng konsiderahon sa mga ansiyano ang kahimtang (o, background), katakos, ug uban pang sirkumstansiya sa matag kandidato. Ang importanteng mahibaloan sa mga ansiyano mao nga kon ang usa ba nakaugmad nag suod nga relasyon kang Jehova ug nakasabot sa pangunang mga kamatuoran sa Bibliya. Pinaagi sa inyong mahigugmaong tabang, kadtong magpabawtismo maandam pag-ayo sa pagtuman sa ilang importanteng asaynment ingong mga ministro sa maayong balita.

Dayon, ang usa o duha ka ansiyano nga giasayn makig-estorya sa girebyo ug pahibaloon siya kon kuwalipikado ba siya para sa bawtismo o dili. Kon siya kuwalipikado, repasohon siya sa mga ansiyano sa “Panapos nga Panaghisgot Uban sa mga Kandidato sa Bawtismo,” sa panid 206-207. Kon ang kandidato wala pa mahuman sa iyang pagtuon sa librong Mabuhi Ka Hangtod sa Hangtod! angay siyang dasigon sa mga ansiyano nga ipadayon ang pagtuon human sa bawtismo. Pahibaloon siya nga ang iyang ngalan ug ang petsa sa iyang bawtismo ibutang sa Congregation’s Publisher Record. Pahinumdoman siya sa mga ansiyano nga kinahanglan kini nga mga impormasyon aron padayong maatiman sa organisasyon ang relihiyosong mga kalihokan sa mga Saksi ni Jehova sa tibuok kalibotan ug aron ang magmamantala makapakigbahin sa espirituwal nga mga buluhaton ug makadawat ug espirituwal nga tabang. Dugang pa, puwedeng pahinumdoman sa mga ansiyano ang bag-ong magmamantala nga ang bisan unsang personal nga impormasyon gamiton sumala sa Tibuok Kalibotang Polisa sa mga Saksi ni Jehova Bahin sa Pagprotektar ug Impormasyon nga naa sa jw.org. Kini nga panaghisgot sagad kobrehan sulod lang sa 10 ka minuto o ubos pa.

Usa ka tuig human sa bawtismo sa magmamantala, duha ka ansiyano ang makig-estorya kaniya aron hatagan siyag pagdasig ug mapuslanong mga sugyot. Ang usa sa mga ansiyano kinahanglang mao ang tigdumala sa grupo sa maong magmamantala. Kon ang bag-ong bawtismado menor de edad, kinahanglang presente ang iyang magtutuong (mga) ginikanan. Kinahanglang himoon ang panaghisgot sa mahigugmaon ug madasigon nga paagi. Hisgotan sa mga ansiyano ang iyang espirituwal nga pag-uswag ug hatagan siyag praktikal nga mga sugyot kon sa unsang paagi mapadayon niya ang iyang maayong rutina sa pagtuon ug adlaw-adlaw nga pagbasa sa Bibliya, senemanang pamilyahanong pagsimba, kanunayng pagtambong ug pagpakigbahin sa mga tigom, ug pagpakigbahin sa ministeryo kada semana. (Efe. 5:15, 16) Kon wala pa siya mahuman sa pagtuon sa librong Mabuhi Ka Hangtod sa Hangtod! hikayon sa mga ansiyano nga dunay motabang niya nga mahuman ang pagtuon. Ang mga ansiyano angayng mohatag ug mahigugmaong komendasyon kaniya. Kasagaran, igo na ang paghatag kaniyag tambag ug mga sugyot bahin sa usa o duha ka punto.