May Anak na Sila!

Dugay nang minyo si Abraham ug Sara. Ilang gibiyaan ang hayahay nga kinabuhi sa Ur ug nagpuyo na lang sa tolda. Pero wala magreklamo si Sara kay misalig siya kang Jehova.

Gusto kaayo si Sara ug anak maong iyang giingnan si Abraham: ‘Kon manganak ang akong katabang nga si Agar, mora na pod nag akong anak.’ Wala madugay, si Agar nanganak. Ismael ang ngalan sa bata.

Human sa daghang tuig, dihang 99 ang edad ni Abraham ug 89 pod si Sara, naay miabot nga tulo ka bisita. Giimbitar sila ni Abraham nga mamahulay ug mangaon ilalom sa kahoy. Nahibalo ba ka kinsay ilang mga bisita? Mga anghel sila! Ilang giingnan si Abraham: ‘Sunod tuig sa ingon aron nga petsa, manganak mog lalaki.’ Naminaw si Sara sulod sa tolda. Mikatawa siya ug naghunahuna: ‘Manganak pa kaha ko nga tigulang na man kaayo ko?’

Pagkasunod tuig, natuman ang gisaad sa anghel ni Jehova. Nanganak si Sara ug batang lalaki. Ginganlan ni Abraham ang bata ug Isaac, nga nagpasabot ug “Pagkatawa.”

Pag-edad ni Isaac ug singko, nakita ni Sara nga gisungog ni Ismael si Isaac. Gusto niyang protektahan ang iyang anak, maong giingnan niya si Abraham nga papahawaon si Agar ug Ismael. Sa primero, wala mosugot si Abraham. Pero giingnan siya ni Jehova: ‘Paminaw kang Sara, kay atimanon ra nako si Ismael. Pero tumanon nako ang akong saad nimo pinaagi kang Isaac.’