Milagro Didto sa Pulang Dagat

Pagkahibalo sa Paraon nga namiya na ang mga Israelinhon, nagmahay siya kon nganong iya silang gipabiya. Gisugo niya ang iyang mga sundalo: ‘Andama ang tanang karwahe kay gukdon nato sila! Wala unta nato sila pabiyaa.’ Unya ilang gigukod ang mga Israelinhon.

Gitultolan ni Jehova ang iyang katawhan pinaagig panganod kon adlaw ug kalayo kon gabii. Gidala niya sila sa Pulang Dagat, ug gipapahulay didto.

Dayon nakita sa mga Israelinhon nga nagpadulong ang Paraon ug ang iyang mga sundalo. Dili na sila kaikyas kay natung-an sila sa dagat ug sa mga sundalo sa Ehipto. Giingnan nila si Moises: ‘Mamatay na gyod ta ani! Maayo pag wala mi nimo pagawsa sa Ehipto.’ Pero si Moises miingon: ‘Ayaw mog kahadlok. Kalma lang ug tan-awa kon unsaon ta pagluwas ni Jehova.’ May pagsalig gyod si Moises kang Jehova!

Gisugo ni Jehova ang mga Israelinhon nga manglakaw na. Nianang gabhiona, gibutang ni Jehova ang panganod sa tunga sa mga Ehiptohanon ug sa mga Israelinhon. Busa ngitngit ang nahimutangan sa mga Ehiptohanon, pero hayag ang sa mga Israelinhon.

Gisugo ni Jehova si Moises nga iisa ang iyang kamot ibabaw sa dagat. Dayon nagpadala si Jehova ug kusog kaayo nga hangin sa tibuok gabii. Natunga ang dagat, ug puwede na kining agian. Daghan kaayong Israelinhon ang mitabok agi sa uga nga dalan. Morag pader ang tubig diha sa ilang isigkakilid.

Misunod ang mga sundalo sa Paraon sa giagian sa mga Israelinhon. Dayon dunay gihimo si Jehova aron magkagubot ang mga sundalo. Nangatangtang ang mga ligid sa ilang karwahe. Naninggit ang mga sundalo: ‘Mangatras ta kay si Jehova ang nakig-away para nila!’

Giingnan ni Jehova si Moises: ‘Iisa ang imong kamot ibabaw sa dagat.’ Dihadiha ang tubig mitabon sa mga sundalo sa Ehipto maong ang Paraon ug ang tanan niyang sundalo namatay.

Dayon nanganta ang nakatabok nga mga Israelinhon aron dayegon si Jehova: “Awitan nako si Jehova kay siya nabayaw pag-ayo. Ang kabayo ug ang nagsakay niini iyang gitambog sa dagat.” Samtang nanganta ang katawhan, ang mga babaye nanayaw nga nagbitbit ug mga tamborin. Lipay kaayo silang tanan kay nakagawas na gyod sila sa Ehipto.