Nakig-estorya si Jehova Kang Samuel

Ang hataas nga saserdoteng si Eli naay duha ka anak nga nag-alagad ingong saserdote sa tabernakulo. Sila mao si Hopni ug Pinehas. Wala sila mosunod sa mga balaod ni Jehova, ug daotan kaayo sila. Dihang maghalad ang mga Israelinhon kang Jehova, kuhaon ni Hopni ug Pinehas ang pinakamaayong karne. Kabalo si Eli sa ginahimo sa iyang mga anak pero gipasagdan lang niya sila. Mosugot kaha si Jehova nga padayon nila kanang himoon?

Wala mosundog si Samuel kang Hopni ug Pinehas bisag mas bata siya. Nalipay si Jehova kang Samuel. Usa ka gabii niana samtang natulog si Samuel, nakadungog siyag tingog nga nagtawag niya. Mibangon siya, midagan paingon kang Eli, ug miingon: ‘Gitawag ba ko nimo?’ Pero si Eli miingon: ‘Wala man ti ka tawga. Balik ug tulog.’ Natulog ug balik si Samuel. Dayon nadungog na pod niya ang tingog ug miadto na pod siya kang Eli. Sa ikatulong higayon nga nadungog ni Samuel ang tingog, nakahunahuna si Eli nga si Jehova ang nagtawag kang Samuel. Busa iyang giingnan si Samuel nga kon naay motawag, mao ni iyang itubag: ‘Naa ba kay gustong isulti, Jehova? Naminaw ang imong alagad.’

Mibalik ug higda si Samuel. Dayon nakadungog siyag tingog: ‘Samuel! Samuel!’ Siya mitubag: ‘Naa ba kay gustong isulti, Jehova? Naminaw ang imong alagad.’ Si Jehova miingon kaniya: ‘Ingna si Eli nga silotan nako siya ug ang iyang pamilya. Nahibalo siya nga daotan ang gihimo sa iyang mga anak didto sa tabernakulo pero gipasagdan lang niya sila.’ Pagkabuntag, giablihan ni Samuel ang mga pultahan sa tabernakulo, nga maoy iyang trabaho. Nahadlok siyang mosulti sa hataas nga saserdote sa giingon ni Jehova. Pero gitawag siya ni Eli ug gipangutana: ‘Anak ko, unsay giingon ni Jehova? Sultihi ko sa tanan.’ Busa gisulti ni Samuel ang tanang giingon ni Jehova.

Samtang nagdako si Samuel, padayon siyang gitabangan ni Jehova. Ang tanang Israelinhon nahibalo nga gipili siya ni Jehova ingong propeta ug maghuhukom.