Si Samson Gihimong Kusgan ni Jehova

Daghang Israelinhon ang nagsimba na pod ug mga idolo, busa gitugotan ni Jehova nga masakop sila sa mga Filistehanon. Pero may mga Israelinhon nga nagsimba gihapon kang Jehova. Apil na nila si Manoa. Wala silay anak sa iyang asawa. Usa ka adlaw niana, nagpakita ang anghel ni Jehova sa asawa ni Manoa. Giingnan siya sa anghel: ‘Manganak kag lalaki ug iyang luwason ang Israel gikan sa mga Filistehanon. Mahimo siyang Nazareo.’ Kabalo ba ka unsay Nazareo? Espesyal sila nga mga alagad ni Jehova. Ang mga Nazareo dili puwedeng magpaputol ug buhok.

Unya, natawo ang anak ni Manoa. Samson ang iyang ngalan. Sa dako na si Samson, gihimo siya ni Jehova nga kusgan kaayo. Nakapatay gani siyag leyon bisag kamot ray iyang gigamit. Kas-a, gipatay niya ang 30 ka Filistehanon. Gidumtan sa mga Filistehanon si Samson ug gusto nila siyang patyon. Dihay gabii nga samtang natulog si Samson sa Gaza, nag-atang sila sa pultahan sa siyudad aron mapatay nila siya inigkabuntag. Pero pagkatungang gabii, mibangon si Samson ug iyang giibot ang pultahan sa siyudad. Gipas-an niya kini ug gidala sa tumoy sa bukid nga duol sa Hebron!

Sa ulahi, giadto sa mga Filistehanon ang uyab ni Samson nga si Delila ug gisultihan: ‘Bayran ka namog libolibo ka pirasong silver basta imo ming sultihan kon nganong kusgan kaayo si Samson. Gusto namo siyang dakpon ug prisohon.’ Misugot si Delila kay interesado siya sa kuwarta. Sa primero, wala motug-an si Samson kon nganong kusgan siya. Pero wala gyod undangi ug pangutana ni Delila si Samson hangtod mitug-an siya. Si Samson miingon: ‘Wala pa sukad maputli akong buhok kay Nazareo ko. Mawad-an kog kusog kon putlan kini.’ Sayop gayod ang gihimo ni Samson!

Gibalitaan dayon ni Delila ang mga Filistehanon: ‘Kabalo na ko sa iyang sekreto!’ Gipakatulog niya si Samson sa iyang paa ug gipaputlan ang buhok ni Samson. Dayon misinggit si Delila: ‘Samson, naay mga Filistehanon!’ Pagmata ni Samson wala na siyay kusog. Gidakop siya sa mga Filistehanon, gibutaan, ug gipriso.

Usa ka adlaw niana, libolibo ka Filistehanon ang naa sa templo sa ilang diyos nga si Dagon. Naninggit sila: ‘Gitabangan ta sa atong diyos nga madakpan si Samson! Pagawsa si Samson kay ato siyang binuangan!’ Gipatindog nila siya taliwala sa duha ka dagkong haligi ug giyagayagaan. Si Samson miingon: ‘Oh Jehova, palihog hatagi kog kusog bisag karon lang.’ Niining panahona, taas nag buhok si Samson. Iyang gitulod ang mga haligi kutob sa iyang maarangan. Natumpag ang tibuok templo ug namatay ang tanang tawo didto, apil si Samson.