Si Jehova Nagpailob Kang Jonas

Daotan ang mga tawo sa Nineve, usa ka siyudad sa Asirya. Gisugo ni Jehova ang iyang propeta nga si Jonas sa pag-adto sa Nineve ug sultihan sila nga dili na maghimog daotan. Pero miikyas si Jonas. Misakay siyag barko paingon sa Tarsis.

Samtang nagbiyahe ang barko, dihay kusog kaayong bagyo maong nahadlok ang mga trabahante sa barko. Miampo sila sa ilang mga diyos ug nangutana: ‘Ngano mang nahitabo ni?’ Dayon si Jonas miingon: ‘Sala ni nako. Wala nako buhata ang gisugo ni Jehova, ug miikyas ko. Ilabay ko sa dagat aron mohunong ang bagyo.’ Dili unta gusto sa mga trabahante nga ilabay sa dagat si Jonas, pero namugos siya. Dihang giitsa na nila siya, mihunong ang bagyo.

Abi ni Jonas ug mamatay na siya. Samtang nag-anam siyag kaunlod, miampo siya kang Jehova. Dayon nagpadala si Jehova ug dakong isda. Gilamoy niini si Jonas, pero wala siya mamatay. Si Jonas miampo samtang naa sa tiyan sa isda: ‘Motuman na gyod ko nimo pirme.’ Sa tabang ni Jehova, wala maunsa si Jonas sa sulod sa isda. Human sa tulo ka adlaw, giluwa siya niini sa baybayon.

Giingnan na pod ni Jehova si Jonas nga moadto sa Nineve. Gituman niya ang sugo ni Jehova. Miadto siya ug giingnan ang daotang mga tawo: ‘Kuwarenta na lang ka adlaw, laglagon na ang Nineve.’ Dayon naay nahitabo nga wala damha—ang mga tawo sa Nineve mipatuo ug mihunong sa paghimog daotan. Ang hari sa Nineve miingon sa mga tawo: ‘Pag-ampo mo sa Diyos ug paghinulsol. Basin diay dili na ta niya laglagon.’ Dihang nakita ni Jehova nga naghinulsol ang mga tawo, wala niya laglaga ang Nineve.

Nasuko si Jonas nga wala malaglag ang Nineve. Hunahunaa kini: Si Jehova nagpailob ug naluoy kang Jonas, pero si Jonas wala maluoy sa mga tawo sa Nineve. Milingkod siya sa gawas sa siyudad, nagpasilong sa tanom nga upo, ug nagmug-ot. Dayon namatay ang tanom, ug nasuko si Jonas. Busa giingnan siya ni Jehova: ‘Mas naluoy ka sa tanom kay sa mga tawo sa Nineve. Naluoy ko nila maong wala nako sila laglaga.’ Unsay leksiyon? Ang mga tawo sa Nineve mas importante kay sa bisan unsang tanom.