Gimahal ni Josias ang Balaod sa Diyos

Si Josias nahimong hari sa Juda dihang otso anyos siya. Niadtong panahona, ang mga tawo naghimog madyik ug nagsimbag mga idolo. Sa 16 anyos na si Josias, gusto niyang moalagad kang Jehova sa hustong paagi. Pag-edad niyag 20, iyang gipulpog ang tanang idolo ug mga altar. Ug dihang 26 anyos na si Josias, iyang gipaayo ang templo ni Jehova.

Didto sa templo, nakit-an sa hataas nga saserdoteng si Hilkias ang Balaod ni Jehova. Tingali mao kadto ang linukot nga basahon nga gisulat mismo ni Moises. Gidala kini sa sekretaryo sa hari nga si Sapan ngadto kang Josias ug gibasa ang maong Balaod sa kusog nga tingog. Samtang naminaw si Josias, iyang nahibaloan nga dugay nang wala motuman ang mga tawo kang Jehova. Miingon si Haring Josias kang Hilkias: ‘Suko kaayo si Jehova nato. Lakaw ug pakigsulti kaniya. Sultian ta ni Jehova kon unsay angay natong buhaton.’ Mitubag si Jehova pinaagi sa propetisa nga si Hulda: ‘Ang mga tawo sa Juda mibiya kanako. Silotan ko sila pero dili sa panahon ni Haring Josias, kay matinumanon siya nako.’

Dihang nahibaloan ni Josias ang maong mensahe, miadto siya sa templo ug gitigom didto ang tanang tawo sa Juda. Dayon iyang gibasa ang Balaod ni Jehova sa kusog nga tingog. Si Josias ug ang mga tawo nanaad nga motuman sila kang Jehova sa tibuok nilang kasingkasing.

Daghang tuig nga wala magsaulog ug Paskuwa ang mga tawo sa Juda. Pero dihang nabasa ni Josias sa Balaod nga kinahanglang saulogon ang Paskuwa kada tuig, iyang giingnan ang mga tawo: ‘Magsaulog tag Paskuwa para kang Jehova.’ Busa giandam ni Josias ang daghang halad ug nagpili siyag mga mag-aawit para sa templo. Gisaulog sa mga tawo ang Paskuwa, dayon pito ka adlaw nilang gisaulog ang Pista sa mga Tinapay nga Walay Igpapatubo. Wala pay Paskuwa nga sama niadto sukad sa panahon ni Samuel. Gimahal gyod ni Josias ang Balaod sa Diyos. Ganahan ba pod kang magtuon bahin kang Jehova?