Gisugo ni Jehova si Jeremias sa Pagsangyaw

Gipili ni Jehova si Jeremias nga mahimong propeta sa katawhan sa Juda. Gisugo siya ni Jehova nga sangyawan ug pasidan-an ang mga tawo nga hunongon ang ilang daotang binuhatan. Si Jeremias miingon: ‘Pero Jehova, bata pa ko. Dili ko kamaong makig-estorya sa mga tawo.’ Giingnan siya ni Jehova: ‘Ayaw kabalaka. Tudloan ti ka kon unsay isulti. Tabangan ti ka.’

Gisugo ni Jehova si Jeremias nga tigomon ang mga lider sa katawhan, buakon ang tibod atubangan nila, ug isulti kini: ‘Ingon ani sab ang mahitabo sa Jerusalem.’ Dihang gihimo to ni Jeremias, nasuko pag-ayo ang mga lider. Gikulata siya sa saserdote nga si Pasur ug dayon giipit ang iyang liog, kamot, ug tiil. Tibuok gabii nga dili makalihok si Jeremias. Pagkabuntag gibuhian siya ni Pasur. Si Jeremias miingon: ‘Dili na nako ni makaya. Dili na ko mosangyaw.’ Pero miundang ba gyod siya? Wala. Dihang iya ning gihunahuna pag-ayo, siya miingon: ‘Ang mensahe ni Jehova morag kalayo nga naa sa sulod nako. Dili ko makahunong sa pagsangyaw.’ Padayong gipasidan-an ni Jeremias ang mga tawo.

Paglabay sa daghang tuig, bag-o na sab ang hari sa Juda. Naglagot ang mga saserdote ug ang bakak nga mga propeta sa mensahe ni Jeremias. Ilang giingnan ang mga pangulo: ‘Angayng patyon kining tawhana.’ Si Jeremias miingon: ‘Kon patyon ko ninyo, nagpatay mog inosenteng tawo. Gisulti ra nako ang giingon ni Jehova.’ Pagkadungog niini sa mga pangulo, sila miingon: ‘Ayaw siyag patya.’

Padayong nagsangyaw si Jeremias, ug nasuko pag-ayo ang mga pangulo. Ilang giingnan ang hari nga patyon si Jeremias. Ang hari miingon nga sila nay bahala kon unsay ilang buhaton ni Jeremias. Busa ilang gidakop siya ug gihulog sa lawom ug lapokon nga atabay aron mamatay. Hinayhinay nga miunlod si Jeremias sa lapok.

Dayon ang opisyal sa palasyo nga si Ebed-melek miingon sa hari: ‘Gihulog sa mga pangulo si Jeremias sa atabay! Mamatay gyod siya kon magpabilin siya didto.’ Giingnan sa hari si Ebed-melek nga magdalag 30 ka tawo aron kuhaon si Jeremias gikan sa atabay. Sama kang Jeremias, magpadayon ba ka sa pagsangyaw bisag unsay mahitabo?