Upat ka Batan-on nga Mituman Kang Jehova

Gidala ni Nabucodonosor sa Babilonya ang mga anak sa prominenteng mga pamilya sa Juda, ug gipaatiman niya sila sa opisyal sa palasyo nga si Aspenaz. Gisugo niya si Aspenaz nga mangitag pinakahimsog ug pinakabrayt nga mga batan-ong lalaki gikan nila. Paeskuylahon silag tulo ka tuig aron mahimong taas nga mga opisyal sa Babilonya. Tudloan sila sa pagbasa, pagsulat, ug pagsultig Akadianhon nga pinulongan sa Babilonya. Kinahanglang mokaon sab sila sa pagkaon sa hari ug mga opisyal. Upat niining mga batan-on mao si Daniel, Hananias, Misael, ug Azarias. Gitagaan sila ni Aspenaz ug Babilonyanhong mga ngalan: Beltesazar, Sadrak, Mesak, ug Abednego. Kini ba nga edukasyon makapahunong nila sa pag-alagad kang Jehova?

Determinado ang upat ka batan-on nga motuman kang Jehova. Kahibalo sila nga dili puwedeng kan-on ang pagkaon sa hari kay ang uban niini gidili sa Balaod ni Jehova. Busa miingon sila kang Aspenaz: ‘Palihog, ayaw mi tagai sa pagkaon sa hari.’ Si Aspenaz mitubag: ‘Kon dili mo mokaon ug makit-an sa hari nga nagniwang mo, patyon ko niya!’

Nakahunahuna si Daniel ug solusyon. Iyang giingnan ang ilang tigbantay: ‘Palihog, tagai lang mig utan ug tubig sa 10 ka adlaw. Dayon ikomparar mi sa mga batan-on nga nagkaon sa pagkaon sa hari.’ Misugot ang tigbantay.

Human sa 10 ka adlaw, mas himsog tan-awon si Daniel ug ang tulo niya ka amigo kay sa tanang ubang batan-on. Nalipay si Jehova nga mituman sila niya. Gihatagan pa gani niyag kaalam si Daniel nga makapatin-aw sa mga panan-awon ug mga damgo.

Human sa ilang pag-eskuyla, gidala ni Aspenaz kang Nabucodonosor si Daniel, Hananias, Misael, ug Azarias. Nakig-estorya ang hari kanila ug iyang nakita nga mas brayt ug mas abtik sila kay sa tanang ubang batan-on. Busa iyang gipili silang upat nga mahimong mga opisyal sa iyang palasyo. Sila ang kanunayng konsultahon sa hari bahin sa importanteng mga butang. Gihimo sila ni Jehova nga mas maalamon kay sa tanang maalamong mga opisyal sa hari ug iyang mga madyikero.

Si Daniel, Hananias, Misael, ug Azarias naa sa layong lugar, pero wala sila malimot nga mga alagad sila ni Jehova. Mag-alagad ba gihapon ka kang Jehova bisag dili nimo kauban ang imong mama ug papa?