Nadawat ni Cornelio ang Balaang Espiritu

Didto sa Cesarea, naay taas ug ranggo nga opisyal sa Romanong mga sundalo. Siya mao si Cornelio. Dili siya Hudiyo pero gitahod siya sa mga Hudiyo. Motabang gyod siya sa mga pobre ug nanginahanglan. Mituo si Cornelio kang Jehova ug kanunay siyang mag-ampo. Usa ka adlaw niana, naay anghel nga nagpakita kang Cornelio ug miingon: ‘Gidungog sa Diyos ang imong mga pag-ampo. Pagsugo ug mga tawo aron kuhaon si Pedro didto sa iyang gipuy-an sa Jope ug dad-on sa imong balay.’ Nagpadala dayon si Cornelio ug tulo ka tawo ngadto sa Jope, nga mga 48 kilometros paingon sa habagatan.

Nianang panahona sa Jope, si Pedro nakakitag panan-awon. Iyang nakita ang mga hayop nga dili puwedeng kaonon sa mga Hudiyo, ug nadungog niya ang usa ka tingog nga nagsugo niya nga kaonon kadto. Wala mosugot si Pedro. Siya miingon: ‘Wala pa gyod ko makakaon ug mahugaw nga hayop.’ Gisultian siya sa tingog: ‘Ayaw tawgang mahugaw kini nga mga hayop. Gihinloan na sila sa Diyos.’ Dayon giingnan si Pedro: ‘May tulo ka tawo sa imong pultahan. Uban nila.’ Miadto si Pedro sa pultahan ug gipangutana ang mga tawo kon unsay ilang tuyo. Sila mitubag: ‘Gipadala mi ni Cornelio, nga usa ka opisyal sa Romanong mga sundalo. Paadtoon ka sa iyang balay sa Cesarea.’ Giimbitar ni Pedro ang mga tawo nga matulog ug usa ka gabii sa iyang balay. Pagkaugma, mikuyog siya nila sa Cesarea uban ang pipila ka tinun-an gikan sa Jope.

Mihapa si Cornelio dihang nakita niya si Pedro. Pero miingon si Pedro: ‘Tindog! Tawo lang ko sama nimo. Gisugo ko sa Diyos nga moanhi sa imong balay bisan tuod ug ang mga Hudiyo dili mosulod sa balay sa mga Hentil. Palihog sultihi ko kon nganong imo kong gipaanhi.’

Giingnan ni Cornelio si Pedro: ‘Sa miaging upat ka adlaw, nag-ampo ko sa Diyos. Dayon usa ka anghel ang nagsulti nako nga paanhion ka. Palihog tudloi mi sa mga pulong ni Jehova.’ Si Pedro miingon: ‘Akong nahibaloan nga ang Diyos dili magpaborpabor. Dawaton niya ang tanan nga gustong mosimba niya.’ Daghan ug gitudlo si Pedro kanila bahin kang Jesus. Dayon si Cornelio ug ang tanan nga kauban niya didto nakadawat ug balaang espiritu, ug silang tanan gibawtismohan.